ႁူင်းႁဵၼ်းႁႅင်းၵၢၼ်ယၢၼ်မိူင်း Migrant Learning Center (MLC) ၸတ်းႁဵတ်းပၢင် ၶွပ်ႈၶူပ်ႇ 10 ပီ လုၵ်ႈႁဵၼ်းပၢၼ်သိုပ်ႇပၢၼ် လႄႈ ပီႈၼွင်ႉၶႅၵ်ႇၸမ်ၵႆ ၽူႈပၼ်ႁႅင်း တင်းမူတ်းၶဝ်ႈႁူမ်ႈ 200 ပၢႆ ။

ဝၼ်းတီႈ 16/10/2015 ယၢမ်းႁူဝ်ၶမ်ႈ ႁွင်ႈႁဵၼ်းပၢႆးဝူၼ်ႉ Thinking Class Room ၸုမ်းသဵင် ၼုမ်ႇႁႅင်းမႂ်ႇ လႄႈ လုၵ်ႈႁဵၼ်းဢွၼ်ၵၼ်ၸတ်းႁဵတ်းပၢင်ၶွပ်ႈၶူပ်ႇ 10 ပီ ။ ၼႂ်းပၢင်ၼႆႉမီးၽူႈယႂ်ႇ ၵူၼ်းလူင်လႄႈ မုၵ်ႉၸုမ်းတႆးမိူၼ်ၼင်ႇ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ၊ ၸုမ်းၵပ်းသၢၼ် လွင်ႈၼၢင်းယိင်းတႆး၊ ႁွင်ႈလူလိၵ်ႈဢူၺ်းၵေႃႉလီ၊ မုၵ်ႉၸုမ်းၸၢဝ်းၶိူဝ်းတႆး၊ ႁႅင်းၵၢၼ်ၽွမ်ႉႁူမ်ႈ၊ သိုဝ်ႇႁႅင်းၼုမ်ႇ၊ ပၢင်သွၼ်လိၵ်ႈတႆးဝတ်ႉပႃႇပဝ်ႈ ၵဵင်းမႆႇ  ၊ Kid Home ၊BRC ၸိူဝ်းၼႆႉလႄႈလုၵ်ႈ မႃးၶဝ်ႈႁူမ်ႈ ။


ၽူႈၵွၼ်းႁူင်းႁဵၼ်း ၶူးသၢႆလိူၼ်ၶမ်း လၢတ်ႈဝႃႈ “ ၵူၼ်းၼုမ်ႇၵူႈၵေႃႉဢမ်ႇ ထုၵ်ႇလီၶၢတ်ႇၵၢၼ်ႁဵၼ်းၵၢၼ်ႁႃတၢင်းႁူႉ ႁႂ်ႈၵူႈၵေႃႉၶတ်းၸႂ်ႁႂ်ႈတႃႇပၢင်ႇလႅင်းထုၵ်ႇလီလဵပ်ႈႁဵၼ်းလွင်ႈပိုၼ်းမိူင်းႁဝ်း ၊ ၵၢၼ်မိူင်းႁဝ်း ပဵၼ်ၸိူင်ႉႁိုဝ်ယူႇၸိူဝ်းၼႆႉ ႁႂ်ႈမေႃၽွမ်ႉ ၵၼ် ၊ ၸွႆႈၵၼ် ၊ ႁၵ်ႉႁူမ်ၸူမ်းပႅင်းၵၼ် ယႃႇၵုမ်ႇမိုင်ႉ တၢင်းသိူဝ်းယူႇ ၼင်ႇႁိုဝ်တေ ၶိုတ်းပိူၼ်ႈၼၼ်ႉ ထုၵ်ႇလႆႈဢွၼ်ၵၼ်ၶတ်းၸႂ် ” ဝႃႈၼႆ ။


ယိူင်းဢၢၼ်း လွင်ႈလႆႈပိုတ်ႇႁူင်းႁဵၼ်းၼႆႉတႄႉ ပိူင်လူင် ပုၼ်ႈတႃႇႁႅင်းၵၢၼ်ယၢၼ်မိူင်း ၸိူဝ်းလုၵ်ႉ မိူင်းတႆး ႁႃႁဵတ်းၵၢၼ်ႇ ယူႇၼႂ်းမိူင်းထႆး ။ တွၼ်ႈတႃႇၸိူဝ်းပႆႇမေႃလိၵ်ႈလၢႆး ႁႂ်ႈလႆႈႁဵတ်းႁူႉ ၊ ၸိူဝ်းမေႃ ယဝ်ႉၵေႃႈ ႁႂ်ႈမီးတိုဝ်ႉတၢင်း သိုပ်ႇၶိုၼ်းႁဵၼ်းထႅင်ႈ ။ သမ်ႉႁႂ်ႈမေႃၶဝ်ႈႁႃၵၼ် မေႃၸွႆႈထႅမ်ၵၢၼ်မူႇ ၵၢၼ်ၸုမ်း ၊ ၾိုၵ်းၽွၼ်ႉႁႂ်ႈမီးၼမ်ႉၵတ်ႉၵူႈပၢႆးပၢႆး ၊ ႁႂ်ႈၸၢင်ႈလႆႈမိူဝ်း ၸွႆႈထႅမ် ပူၵ်းပွင်ဝၢၼ်ႈမိူင်းၶိုၼ်း - ၸဵမ်ၸိူဝ်းၼႆႉ ။


ၸၢႆးၸွမ်သႅင် ၵေႃႉပဵၼ်လုၵ်ႈႁဵၼ်းၵေႃႉၼိုင်ႈ ၵေႃႈလၢတ်ႈဝႃႈ “ မိူဝ်ႈၶႃႈပႆႇမႃးႁဵၼ်းတီႈၼႆႈၼႆႉ ၶႃႈ ဢမ်ႇ ႁူႉသင်ၶႃႈလႆႈပဵၼ်လုၵ်ႈၸၢင်ႈပိူၼ်ႈ ။ တေႃႈလဵဝ်တႄႉ  ႁဵတ်းၵၢၼ်ႁင်းၵူၺ်းယဝ်ႉ ။ ၼင်ႇႁိုဝ် ပေႃးတေႁူႉပွင်ႇတႃလႅင်းၶိုတ်းၸၼ်ႉလုမ်ႈၾႃႉပဵင်းပိူၼ်ႈၼၼ်ႉ ထုၵ်ႇလီဢွၼ်ၵၼ်ၶတ်းၸႂ်ၶႃႈ ” - ဝႃႈၼႆ ။


ႁူင်းႁဵၼ်းႁႅင်းၵၢၼ်ယၢၼ်မိူင်း MLC ၼႆႉပိူင်လူင်မၼ်းသွၼ်ပၼ် လိၵ်ႈဢိင်းၵလဵတ်ႈ ၊ လိၵ်ႈထႆး ၊ ၶွမ်ႊၿိဝ်ႊၻိူဝ်ႊ လိူဝ်ၼၼ်ႉၵေႃႈမီး လိၵ်ႈတႆး ၊ မၢၼ်ႈ ၊ ၶႄႇ၊ တၢင်းၵႃႈၾိင်ႈ ထုင်းၸဵမ်ၸိူဝ်းၼႆႉ ။ ၶၢဝ်းပၢင်သွၼ်တႄႉ ဝၼ်းၸၼ်ထိုင်ဝၼ်းသုၵ်း - ၵၢင်ၼႂ် 09:00 မူင်း  – 11:00 မူင်း လႄႈ ၵၢင်ၶမ်ႈ 18:00 မူင်း – 20:00 မူင်း ၊ ၸုပ်ႈလႂ် သွၼ်ပၼ် ၶၢဝ်းတၢင်း 2 လိူၼ် ။


ႁူင်းႁဵၼ်းႁႅင်းၵၢၼ်ယၢၼ်မိူင်း MLC ၼႆႉ တႄႇပိုတ်ႇမႃးမိူဝ်ႈဝၼ်းတီႈ 17 October 2005 ။ ၽူႈဢွၼ် ႁူဝ်ၵေႃႇတင်ႈႁူင်းႁဵၼ်းတႄႉ Mr. Bill ၸၢဝ်းဢမေႊရီႊၶိူဝ်ႊ ၊ Dr.Thein Lwin ၸၢဝ်းမၢၼ်ႈ တင်း ၶူးသၢႆလိူၼ်ၶမ်း (တႆး) ။ မီးလုၵ်ႈႁဵၼ်းမႃးႁဵၼ်းဢဝ် တၢင်းႁူႉပီ လႂ် ဢမ်ႇ ယွမ်း 1,000 ၵေႃႉ ။ မီး ၶူးသွၼ်လိၵ်ႈထႆး 2 ၵေႃႉ၊ ဢိင်းၵလဵတ်ႈ 2 ၵေႃႉ ၊ ၶွမ်ႊၿိဝ်ႊၻိူဝ်ႊ 1 ၵေႃႉ ။ ၶူးၽူႈၸွႆႈသွၼ် ပဵၼ်ၸူဝ်ႈ ပဵၼ်ၶၢဝ်း ၵေႃႈမီးယူႇဢမ်ႇထၢတ်ႇ ။