သိုၵ်းမၢၼ်ႈ ယူႇတီႈလွႆၵိဝ်ႇမွၵ်ႇၶၢဝ် ယိုဝ်းၵွင်ႈလူင်သႂ်ႇဝၢၼ်ႈႁႆး ၶၢဝ်းယၢမ်းၵၢင်ၶိုၼ်း ၊ မၢၵ်ႇလူင်တူၵ်းတိူဝ်ႉႁိူၼ်းၵူၼ်းဝၢၼ်ႈ ရူတ်ႉၵႃး ၊ တိူဝ်ႉၸပ်းၵူၼ်းဝၢၼ်ႈ ဝၢတ်ႇၸဵပ်း ၽွင်းတိုၵ်ႉၼွၼ်းလပ်း ။

ၶိုၼ်းဝၼ်းတီႈ 28/10/2015 ၊ ၼႂ်ဝၼ်းတီႈ 29/10/2015 (မိူဝ်ႈၼႆႉ) တဵင်ႈၶိုၼ်းၸၢႆႉ ယၢမ်း 00:45 မူင်း ၊ သိုၵ်းမၢၼ်ႈယူႇတီႈလွႆၵိဝ်ႇမွၵ်ႇၶၢဝ်သေ ဢဝ်ၶိူင်ႈၵွင်ႈလူင် 120mm ယိုဝ်းသႂ်ႇၼႂ်းဝၢၼ်ႈႁႆး ။ မၢၵ်ႇလူင်တူၵ်းသေ ၸၢၵ်ႇမၢၵ်ႇတိူဝ်ႉၺႃးႁိူၼ်းယေး ၊ ရူတ်ႉၵႃး ၊ ၵူၼ်း 2 ၵေႃႉဝၢတ်ႇၸဵပ်းလႄႈ တိူဝ်ႉၺႃးမႃတၢႆတူဝ်ၼိုင်ႈ - ၼႆယဝ်ႉ ။


မၢၵ်ႇလူင်တႃႇလုၵ်ႈၼိုင်ႈ တူၵ်းတိူဝ်ႉသႂ်ႇႁိူၼ်း ၸၢႆးၸွမ်ၶမ်း မေႃသွၼ်မျႃႉတၢၼ်း ။ တႃႇလုၵ်ႈၼိုင်ႈတိူဝ်ႉသႂ်ႇႁိူၼ်း လုင်းသိူင်း ပႃႈၵဵင် ။ ၵူၼ်းဝၢတ်ႇၸဵပ်းသွင်ၵေႃႉၼၼ်ႉ ပဵၼ်ပႃႈၵဵင် တင်းလုၵ်ႈယိင်းဢွၼ်ႇမၼ်း ၸိုဝ်ႈဢွၼ်ႇယိင်းႁွမ်ၶၢဝ် ။ ပႃႈၵဵင်ၼႆႉ ၸၢၵ်ႇမၢၵ်ႇတိူဝ်ႉၸပ်းတီႈႁူဝ် ၊ ဢွၼ်ႇယိင်းႁွမ်ၶၢဝ်သမ်ႉ တိူဝ်ႉတီႈႁူဝ် တင်းတီႈတိၼ် ၊ မႅၼ်ႈၽွင်းတိုၵ်ႉၼွၼ်းလပ်းယူႇ ။ ရူတ်ႉၵႃးၼၼ်ႉၵေႃႈ ပဵၼ်ၵႃးလုင်းသိူင်း ပႃႈၵဵင် ၊ မႃဢၼ်တၢႆၼၼ်ႉၵေႃႈ ပဵၼ်မႃးလုင်းသိူင်း ပႃၵဵင်ၼင်ႇၵဝ်ႇ ။ ၵႃႈၶၼ်ၶူဝ်းၶွင် ဢၼ်လႆႈလူႉသုမ်းၵႂႃႇတင်းမူတ်း သႅၼ်မၼ်းမွၵ်ႈပၢၵ်ႇပၢႆ - ၵူၼ်းၼႂ်းပိုၼ်ႉတီႈ ဝၢၼ်ႈႁႆး ၵေႃႉၼိုင်ႈလၢတ်ႈ ။


ဝၼ်းတီႈ 28/10/2015 ၼႆႉ တပ်ႉသိုၵ်းၸိုင်ႈတႆး (SSPP/SSA) လေႃႇတိုၵ်းတပ်ႉ ၵွင်းမုင်ႈမိူင်း (မီးႁိမ်းဝၢၼ်ႈလူၺ် မိူင်းဢၢၵ်ႇ) ဢိူင်ႇဝၢၼ်ႈသေႃႉ ၸႄႈဝဵင်းမိူင်းသူႈသေ ႁုပ်ႈယိုတ်းလႆႈၶိုၼ်း ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - တပ်ႉပၢင်သဝ်းဢၼ်ၼႆႉ ၾၢႆႇႁဝ်းထွၼ်သိုၵ်းပၼ် ပူၼ်ႉမႃးမိူဝ်ႈဝၼ်းတီႈ 16/10/2015 ။ ၾၢႆႇသိုၵ်းမၢၼ်ႈၶဝ်ၶိုၼ်ႈပၵ်းယူႇသေ ၶဝ်ၶႂ်ႈယိုဝ်းၵွင်ႈၵႂႃႇတၢင်းလႂ်ၵေႃႈ ယိုဝ်းယူႇတိၵ်းတိၵ်း ၊ မၼ်းတိူဝ်ႉၵူၼ်းဝၢၼ်ႈၵူၼ်းမိူင်းလႄႈ ႁဝ်းလႆႈၶိုၼ်ႈယိုတ်းဢဝ်ၶိုၼ်းယဝ်ႉ - ဝႃႈၼႆ ။


ဢၼ်သိုၵ်းမၢၼ်ႈယိုဝ်းၵွင်ႈလူင် သႂ်ႇဝၢၼ်ႈႁႆးၼႆႉ ၸၢင်ႈပဵၼ်ယွၼ်ႉၶဝ်ဢမ်ႇႁၢၼ်ႉၸႂ် ဢၼ်တပ်ႉသိုၵ်းၸိုင်ႈတႆး ၶိုၼ်ႈလေႃႇတိုၵ်းႁုပ်ႈယိုတ်းဢဝ်ၶိုၼ်း တပ်ႉၵွင်းမုင်ႈမိူင်းၼၼ်ႉ - ၵူၼ်းၼႂ်းပိုၼ်ႉတီႈ ဝၢၼ်ႈႁႆး သိုပ်ႇလၢတ်ႈ ။