ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း တႅမ်ႈလိၵ်ႈတုၵ်းယွၼ်းထိုင် ၸွမ်ၸိုင်ႈတဵင်းၸဵင်ႇ ႁႂ်ႈၵိုတ်းၵၢၼ်လေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ ၼင်ႇၼႆ ။

ထၢမ် - မႂ်ႇသုင်ၶႃႈ ။ လႆႈႁၼ် RCSS/SSA ဢွၵ်ႇလိၵ်ႈၵဵဝ်ႇၵပ်းလွင်ႈ သိုၵ်းလူင်ပွင်ၸိုင်ႈ ႁၢင်ႈသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တၢင်းပွတ်းမိူင်းသူႈၼၼ်ႉၶႃႈဢေႃႈ ။ လွင်ႈၼႆႉ ငဝ်းလၢႆးပဵၼ်ၸိူင်ႉႁိုဝ်ၶႃႈ ?။


တွပ်ႇ - ၵွပ်ႈမိူဝ်ႈလဵဝ် ပၢင်တိုၵ်းၵေႃႈၶႂ်ႈႁၢဝ်ႈႁႅင်းၶိုၼ်ႈမႃးတိၵ်းတိၵ်း ။ ၵွၼ်ႇၼႃႈမိူဝ်ႈတေလူင်းလၢႆးမိုဝ်း NCA တေႃႇထိုင်မႃးဝၼ်းၼႆႉၵေႃႈ ယင်းတိုၵ်ႉမီးပၢင်တိုၵ်းၵၼ်ယူႇ ။ ပေႃးမီးပၢင်တိုၵ်းၵေႃႈ ၵူၼ်းမိူင်းႁဝ်းၶႃႈ ၸိူဝ်းဢမ်ႇမီးတၢင်းၽိတ်းသင်ၼၼ်ႉ လႆႈပၢႆႈၽေးသိုၵ်း ၊ လႆႈထုၵ်ႇၸၢၵ်ႇၽေးသိုၵ်းသေ လႆႈပၢႆႈၽေးသိုၵ်း ၼပ်ႉႁူဝ်ႁဵင်မၼ်းၼႆ လႆႈႁူႉၸွမ်းၸိူင်ႉၼႆသေ ပဵၼ်ဢၼ်ၸႂ်ဢမ်ႇလီၸွမ်း ၼၵ်းၸႂ်ၸွမ်းပၢင်တိုၵ်း ဢၼ်ၵိူတ်ႇၶိုၼ်ႈယူႇမိူဝ်ႈလဵဝ် ။


ယဝ်ႉၵေႃႈ လူင်ပွင်ၸိုင်ႈၵေႃႈသမ်ႉဝႃႈ ႁဵတ်း NCA ၵိုတ်းတိုၵ်းတင်းၸိုင်ႈမိူင်း ဝႃႈၼၼ်ယူႇၵေႃႈ ထႅင်ႈၾၢႆႇၼိုင်ႈ တပ်ႉသိုၵ်းမၢၼ်ႈသမ်ႉၵႂႃႇတိုၵ်းၵၼ်ယူႇတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ။ လွင်ႈၼႆႉ ႁူဝ်ပဝ်ႈလူင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး ၸွမ်သိုၵ်းယွတ်ႈသိုၵ်း လႆႈတႅမ်ႈလိၵ်ႈ ထိုင်ၸူးတီႈ ၸွမ်ၸိုင်ႈတဵင်းၸဵင်ႇ ယွၼ်းမဵတ်ႉတႃႇႁႂ်ႈၵိုတ်းတိုၵ်းပၼ် ၊ ၸွမ်းၼင်ႇၸွမ်ၸိုင်ႈၵႆႉလၢတ်ႈဝႃႈ ပၼ်ႁႃၵၢၼ်ယိပ်းၵွင်ႈၵၢင်ႇလႄႈသင် ၊ ပၼ်ႁႃၵၢၼ်မိူင်းလႄႈသင် ၊ ဢဝ်လၢႆးၵတ်းယဵၼ် လၢႆးၵၢၼ်မိူင်းသေ ၵႄႈလိတ်ႈၵၼ် ၊ ႁႂ်ႈႁဵတ်းလႆႈၸိူင်ႉၼၼ် ႁဝ်းလီသၢင်ႈၾိင်ႈၵၢၼ်မိူင်း ဢၼ်မႂ်ႇသေမႃးၸႂ်ႉတိုဝ်းၸွမ်းၵၼ်ယဝ်ႉ ၊ လႆႈလၢတ်ႈဝႆႉၸိူင်ႉၼၼ် ။ ၵွပ်ႈၼၼ် ႁူဝ်ပဝ်ႈႁဝ်းၶႃႈ ၸွမ်သိုၵ်းယွတ်ႈသိုၵ်း ၸင်ႇလႆႈတႅမ်ႈလိၵ်ႈ ယွၼ်းမဵတ်ႉတႃႇ ႁႂ်ႈလႆႈၵိုတ်းတိုၵ်းပၼ်သေ ဢဝ်လၢႆးၵတ်းယဵၼ် လၢႆးၵၢၼ်မိူင်းသေဢုပ်ႇဢူဝ်းၵၼ် ။


SSPP/SSA တင်းလူင်ပွင်ၸိုင်ႈၵေႃႈ မီးဝႆႉလိၵ်ႈႁူမ်ႈမၢႆ ၸၼ်ႉၸႄႈမိူင်း လႄႈၸၼ်ႉၸိုင်ႈမိူင်းႁူမ်ႈတုမ် ၊ လီဢဝ်ဢၼ်မီးဝႆႉယူႇၼႆႉ ၵႄႈၶႆပၼ်ႁႃၵၼ်ၵႂႃႇၼၼ်ႉ မၼ်းတေၸၢင်ႈလီလိူဝ် ဢဝ်ၵၢၼ်သိုၵ်းသေ ၵႄႈၶႆ ။ ယွၼ်ႉပိူဝ်ႈဝႃႈ ၵၢၼ်သိုၵ်းၼႂ်းမိူင်းႁဝ်းၶႃႈၼႆႉ ၵိူတ်ႇၶိုၼ်ႈမႃးပီယၢဝ်းၶၢဝ်းႁိုင်ယဝ်ႉ ၊ ႁဝ်းဢဝ်ၵၢၼ်သိုၵ်းသေ ၵႄႈလိတ်ႈၵၼ်ယူႇတိၵ်းတိၵ်းၼႆႉ မၼ်းၵေႃႈဢမ်ႇယဝ်ႉတူဝ်ႈလႆႈသေပွၵ်ႈ ။ ယွၼ်ႉၼၼ် ၸင်ႇတႅမ်ႈလိၵ်ႈၸူး ၸွမ်ၸိုင်ႈတဵင်းၸဵင်ႇ မိူဝ်ႈဝၼ်းတီႈ 25/10/2015 ၶႃႈဢေႃႈ ။


ထၢမ် - ၵမ်ႈၽွင်ႈၵေႃႈ ထတ်းသၢင်ဝႃႈ - ၵႃႈၵွၼ်ႇပူၼ်ႉမႃး မိူဝ်ႈၵိုတ်းတိုၵ်းတင်းပွတ်းႁွင်ႇၵေႃႈ ႁႅၼ်းသိုၵ်းလေႃႇတိုၵ်းတၢင်းၸၢၼ်း ။ ၵမ်းၼႆႉၵေႃႈၵိုတ်းတိုၵ်းတၢင်းၸၢၼ်း ယဝ်ႉလီငၢမ်းယဝ်ႉလႄႈ ၶဝ်ၵေႃႈလႆႈတိုဝ်ႉတၢင်းတႃႇတေယိုဝ်းတၢင်းပွတ်းႁွင်ႇ ဝႃႈၼႆၶႃႈဢေႃႈ ။ ယူႇတီႈၶေႃႈၵႂၢမ်းၸိူဝ်းၼႆႉ ၸဝ်ႈႁဝ်းၶဝ်ၶႂ်ႈထတ်းသၢင် ၸိူင်ႉႁိုဝ်ၶႃႈ ?။


တွပ်ႇ - တိုၵ်းတၢင်းႁွင်ႇၵေႃႈလီ ၊ တိုၵ်းတၢင်းၸၢၼ်းၵေႃႈလီ ပေႃးဝႃႈဢဝ်ၵၢၼ်သိုၵ်းသေတိုၵ်းၵၼ်ယူႇၼႆႉတႄႉ ႁဝ်းၶႃႈလႆႈႁၼ်မႃးၼႂ်းပိုၼ်းတႄႉ တပ်ႉသိုၵ်းလူင်ပွင်ၸိုင်ႈၵေႃႈ ဢမ်ႇၵႂႃႇယႃႉမူၺ်ႉတပ်ႉသိုၵ်းၶွင်ၸၢဝ်းၶိူဝ်း ႁႂ်ႈပေႃးႁၢႆၵႂႃႇလႆႈ။ ၵွပ်ႈၼၼ်လႄႈ တိုၵ်းၸုမ်းလႂ်ၵေႃႈလီ မၼ်းပဵၼ်လွင်ႈလိူတ်ႇလွင်ႈမႆႈ ၊ မၼ်းၶတ်းၵၼ်ၶိုၼ်း တင်းဢၼ်ႁဝ်းၶႃႈႁဵတ်း NCA ၼၼ်ႉယူႇ ။ ၵွပ်ႈၼၼ် ၵူႈၾၢႆႇၵူႈတၢင်းၼႆႉ မီးပုၼ်ႈၽွၼ်းသေယဝ်ႉ ႁႂ်ႈဝူၼ်ႉတူၺ်းဝႃႈ ႁဝ်းတေဢဝ်လၢႆးသင်ၵႄႈၶႆ ႁႂ်ႈမၼ်းသၢင်ႇထုၵ်ႇသေပိူၼ်ႈ ။ ပေႃးႁဝ်းဢမ်ႇႁႃလၢႆးမၼ်းၵေႃႈ မၼ်းတေဢမ်ႇယဝ်ႉ ။


ထၢမ် - ပေႃးဝႃႈႁဝ်းၶႃႈ တူၺ်းယၢမ်းလဵဝ်ၼႆႉ ပၢင်တိုၵ်းၵေႃႈႁၢဝ်ႈႁႅင်းမႃး ယူႇတိၵ်းတိၵ်း။ ၵွပ်ႈၼၼ်လႄႈ သင်ၸိူဝ်ႉဝႃႈပၢင်တိုၵ်းႁၢဝ်ႈႁႅင်းမႃးလိူဝ်ၼႆႉ ၊ ဢမ်ႇၼၼ်ၵေႃႈ ၶဝ်ႈယိုဝ်းဝၢၼ်ႈႁႆးၼႆ ၸွင်ႇမၼ်းတေၸၢင်ႈ တုမ်ႉတိူဝ်ႉ ဢၼ်ၸဝ်ႈႁဝ်းၶဝ် 7-8 ၸုမ်း ၵႂႃႇလူင်းလၢႆးမိုဝ်း NCA ဝႆႉယူႇၶႃႈႁႃႉ ?။


တွပ်ႇ - ႁဝ်းၶႃႈတေဢမ်ႇၸၢင်ႈဢဝ် NCA လူႉလႅဝ်သေတႃႉၵေႃႈ ပေႃးဝႃႈတပ်ႉသိုၵ်းလူင်ပွင်ၸိုင်ႈ သမ်ႉၸႂ်ႉဢဵၼ်ႁႅင်းသိုၵ်း ၵႂႃႇတိုၵ်းၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ ၶွင်ၸၢဝ်းၶိူဝ်း ၊ ဢမ်ႇၸုမ်းၼိုင်ႈၵေႃႈၸုမ်းၼိုင်ႈ တိုၵ်းယူႇႁဵတ်းၼႆတိၵ်းတိၵ်းၸိုင် ဢၼ်ႁဵတ်းဝႆႉ NCA ၼႆႉၵေႃႈ မၼ်းတေဢမ်ႇမီးတီႈပွင်ႇသင်ယဝ်ႉ ။ တႃႇၶဝ်တေၶဝ်ႈပႃးမႃးၼႂ်း NCA တင်းမူတ်းတင်းသဵင်ႈၼၼ်ႉၵေႃႈ မၼ်းတေႁဵတ်းႁႂ်ႈၵၢတ်ႈၸိူင်ႉၵႂႃႇ ။ ႁဵတ်းႁႂ်ႈလွင်ႈယုမ်ႇယမ်ၵၼ်ၼႆႉ ဢေႇၵႂႃႇတိၵ်းတိၵ်းသေ တေပဵၼ်လၢႆးတၢင်းဢွမ်ႈသေ  မႃးတုမ်ႉတိူဝ်ႉ NCA လႆႈယူႇ ။


ထၢမ် - ၵမ်းလိုၼ်းသုတ်း ၶႂ်ႈယွၼ်းၸဝ်ႈႁဝ်း ပၼ်တၢင်းၶႆႈၸႂ်ဝႃႈ ၼင်ႇႁိုဝ်ပၢင်တိုၵ်းၼႂ်းမိူင်းတႆး တေဝွတ်ႈဝၢႆးယဵၼ်ၵႂႃႇလႆႈတႄႉၼၼ်ႉ ၾၢႆႇၸုမ်းပႆႇလူင်းလၢႆးမိုဝ်းၵေႃႈလီ ၊ ၾၢႆႇလူင်ပွင်ၸိုင်ႈၵေႃႈလီ ၊ ပႃးၸဵမ်ၾၢႆႇသိုၵ်းမၢၼ်ႈၵေႃႈလီ ၵိုင်ႇလီႁဵတ်းၸိူင်ႉႁိုဝ် ၸွႆႈလၢတ်ႈပၼ်ၽွင်ႈၶႃႈ ?။


တွပ်ႇ - ပေႃးႁဝ်းၶႃႈၶႂ်ႈသၢင်ႈလွင်ႈၵတ်းယဵၼ် ၊ ၶႂ်ႈသၢင်ႈလွင်ႈၵိုတ်းတိုၵ်းၵၼ် ၊ ၶႂ်ႈမႄးပူၵ်းပွင်ႁႂ်ႈၸိူဝ်ႉၸၢတ်ႈႁဝ်း ၶိုၼ်းထုၵ်ႇမေႃပေႃးၵႂၢမ်းၵၼ်ၼႆတႄႉ မၼ်းၵေႃႈဢမ်ႇယၢပ်ႇလူင်လၢင် ၊ သွၼ်ႇႁႂ်ႈမီးၸႂ်ၶႂ်ႈႁဵတ်းတႄႉတႄႉၵူၺ်း ။ ပေႃးႁဝ်းၶႂ်ႈႁဵတ်းဢၼ်သိုဝ်ႈသႂ်တႄႉ မိူၼ်ၼင်ႇပေႃႇလသီႇတပ်ႉသိုၵ်း ဢၼ်တပ်ႉသိုၵ်းမၢၼ်ႈၶဝ်လၢတ်ႈယူႇၸိူဝ်းၼၼ်ႉ မၼ်းၵေႃႈငၢႆႈငၢႆႈၵူၺ်း ၊ မီးၵွင်ႈၵေႃႈႁဝ်းယႃႇပေယိုဝ်းၵၼ်သေ ဢုပ်ႇဢူဝ်းၵၼ်တူၺ်း ၊ ယႃႇပေဢဝ်ၼမ်ႉတွၼ်းတေႃႇၵၼ် ၊ ယႃႇပေပူၼ်ႉပႅၼ်တေႃႇၵၼ်ၶိုၼ်း ၊ ဢုပ်ႇဢူဝ်းၵၼ်လၢႆးၵတ်းယဵၼ်လီလီ ၊ ၽႂ်မီးတီႈလႂ်ၵေႃႈ ယူႇဝႆႉထႃႈတီႈၼၼ်ႈသေ ၵႄႈၶႆပၼ်ႁႃၵၢၼ်မိူင်း ႁဝ်းလီလီ ၊ ၵႄႈၶႆပၼ်ႁႃၵၢၼ်ယိပ်းၵွင်ႈၵၢင်ႇႁဝ်း ၊ ၵႄႈၶႆပၼ်ႁႃၵၢၼ်သိုၵ်းႁဝ်းလီလီ ၊ ၸႂ်ႉၶၢဝ်းယၢမ်းသေ ၸႂ်ႉမဵတ်ႉတႃႇ ၸႂ်ႉၸေႇတၼႃႇဢၼ်ၸိုၼ်ႈၸၢင်ႇမူတ်းသႂ်သေႁဵတ်းတႄႉ မၼ်းၵေႃႈတေႁဵတ်းလႆႈယူႇ ။


ၵူၺ်းၵႃႈ ပေႃးဝႃႈဢမ်ႇပဵၼ်ၸိူင်ႉၼၼ်ၸိုင် ၶႂ်ႈဢဝ်ၼမ်ႉတွၼ်းၽွၼ်းလႆႈၼိူဝ်ၵၼ် ၊ ၶႂ်ႈပေႉပုၼ်ႈၵၼ်သေႁဵတ်းၼႆတႄႉ မၼ်းၵေႃႈဢမ်ႇၸႂ်ႈၼမ်ႉၸႂ် ၸေႇတၼႃႇဢၼ်လီလႄႈ ဢၼ်သၢင်ႈဝႆႉပိူဝ်ႈတႃႇၸိုင်ႈမိူင်းႁႂ်ႈပေႃးၵတ်းယဵၼ်ၼၼ်ႉၵေႃႈ တေယၢပ်ႇယူႇ ႁၼ်ထိုင်ၼင်ႇၼႆ ။