ၵူၼ်းဝၢၼ်ႈၵုင်းၼိမ် 2 ၵေႃႉ ဢၼ်ပၢႆႈပိုင်ႈႁူမ်ႈယူႇသဝ်း တီႈဝဵင်းမိူင်းသူႈ ပွၵ်ႈႁိူၼ်း ယဵမ်ႈၸႂ်းသူၼ်ႁႆႈ ထုၵ်ႇသိုၵ်းမၢၼ်ႈယိုဝ်း ။ တိူဝ်ႉတီႈၶႅၼ် တီႈၶႃၵေႃႉၼိုင်ႈ ၊ တႃႇၵေႃႉၼိုင်ႈႁၢႆလၢႆဝႆႉ ။

လုင်းပွႆး ၵေႃႉတိူဝ်ႉၺႃးမၢၵ်ႇၵွင်ႈသိုၵ်းမၢၼ်ႈ

ဝၼ်းတီႈ 26/10/2015 (မိူဝ်ႈသိုၼ်း) ၵၢင်ၼႂ်ယၢမ်း 10 မူင်း ၊ ၵူၼ်းဝၢၼ်ႈၵုင်းၼိမ် ၸိုဝ်ႈလုင်းပွႆး ဢႃယု 53 ပီ ၊ ထုၵ်ႇသိုၵ်းမၢၼ်ႈ ဢဝ်ၵွင်ႈယိုဝ်းသႂ်ႇ တီႈဝၢၼ်ႈၵုင်းၼိမ် ဢိူင်ႇႁၢႆးပႃ ၸႄႈဝဵင်းမိူင်းသူႈ ။ သိုၵ်းမၢၼ်ႈ ယိုဝ်းသႂ်ႇလၢႆလၢႆၵမ်းသေ မၢၵ်ႇၵွင်ႈတိူဝ်ႉၸပ်းတီႈၶႅၼ်ၾၢႆႇၶႂႃ ၊ တီႈၶႃၵေႃႈ တိူဝ်ႉဢိတ်းဢွတ်း ။ မိူဝ်ႈလဵဝ် ၶဝ်ႈယူတ်းယႃတူဝ်ဝႆႉ တီႈႁူင်းယႃဝၢၼ်ႈႁႆး - ၼႆယဝ်ႉ ။


လုင်းပွႆးၼႆႉ ပဵၼ်ၵူၼ်းပၢႆႈၽေးသိုၵ်း မႃးပိုင်ႈဢိင်ယူႇသဝ်းဝႆႉတီႈပၢင်သဝ်း ၵူၼ်းပၢႆႈၽေး တီႈဝဵင်းမိူင်းသူႈ ၊ တင်းဢူၺ်းၵေႃႉမၼ်း (သွင်ၵေႃႉ) မိူဝ်းယဵမ်ႈၸႂ်းႁိူၼ်းလႄႈ သူၼ်ႁႆႈၸွမ်းၵၼ်သေ ၺႃးငႃးသိုၵ်းမၢၼ်ႈ ၊ ၶႃသွင်ၵေႃႉသမ်ႉၵူဝ်သေလႅၼ်ႈပၢႆႈ ၊ သိုၵ်းမၢၼ်ႈၵေႃႈယိုဝ်း ။ လုင်းပွႆးတိူဝ်ႉၸပ်းတီႈၶႅၼ်ၾၢႆႇၶႂႃ လႄႈ တီႈၶႃဢိတ်းဢွတ်း ၊ ၵူၺ်းၵႃႈ ဢူၺ်းၵေႃႉမၼ်းတႄႉ တေႃႇထိုင်မိူဝ်ႈလဵဝ်ၵေႃႈ ယင်းပႆႇႁၼ် - ၼႆယဝ်ႉ ။