ၶွမ်ႊမသျိၼ်ႊၵၢၼ်လိူၵ်ႈတင်ႈ ဢွၵ်ႇၶေႃႈပိုၼ်ၽၢဝ်ႇ ပူတ်းယႃႉပၢင်လိူၵ်ႈတင်ႈ ၼႂ်းၸိုင်ႈတႆး ၼႂ်း 4 ၸႄႈဝဵင်း ၊ တင်းမူတ်း ၼပ်ႉႁူဝ်သိပ်းဢိူင်ႇ ။ လွင်ႈၼႆႉ ပႃႊတီႊႁူဝ်သိူဝ် တေဢွၼ်ႁူဝ်ၵူၼ်းမိူင်း ၼႄၵၢၼ်ၸႂ်သၢၼ်ၶတ်း ။

လိၵ်ႈပိုၼ်ၽၢဝ်ႇပူတ်းယႃႉ ပၢင်လိူၵ်ႈတင်ႈလႄႈ လိၵ်ႈပိုၼ်ၽၢဝ်ႇသၢၼ်ၶတ်း ပႃႊတီႊႁူဝ်သိူဝ် ၽႃသႃမၢၼ်ႈ

မိူဝ်ႈဝၼ်းတီႈ 27/10/2015 (မိူဝ်ႈဝႃး) ၶွမ်ႊမသျိၼ်ႊၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ် (UEC) ဢွၵ်ႇၶေႃႈပိုၼ်ၽၢဝ်ႇဝႃႈ ပူတ်းယႃႉ (ယူၵ်ႉလိူၵ်ႈ) ပၢင်လိူၵ်ႈတင်ႈ ၼႂ်းၸိုင်ႈတႆး 4 ၸႄႈဝဵင်း ။ ၼႂ်းၼၼ်ႉ 2 ၸႄႈဝဵင်း မိူၼ်ၼင်ႇၸႄႈဝဵင်းမိူင်းသူႈ တင်းၸႄႈဝဵင်းၵေးသီးၼႆႉ ပူတ်းယႃႉပႅတ်ႈလုမ်းလုမ်း ။ ၸႄႈဝဵင်းတၢင်ႉယၢၼ်း ပူတ်းယႃႉပႅတ်ႈမၢင်တီႈ တင်းမူတ်း 8 ဢိူင်ႇ ။ ၼႂ်းၸႄႈဝဵင်းႁူဝ်ပၢင်ႇ ပူတ်းယႃႉပႅတ်ႈ 42 ဢိူင်ႇ ။ လွင်ႈပူတ်းယႃႉပၢင်လိူၵ်ႈတင်ႈၼႆႉ ပဵၼ်တူဝ်ႁူဝ်ပဝ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ ဢူးတိၼ်ႇဢေး ၵေႃႉလူင်းလၢႆးမိုဝ်းသေ ဢွၵ်ႇၶေႃႈပိုၼ်ၽၢဝ်ႇဝႆႉ - ၼႆယဝ်ႉ ။


ၸႄႈဝဵင်းႁူဝ်ပၢင်ႇ ဢၼ်ပူတ်းယႃႉပၢင်လိူၵ်ႈတင်ႈၼႆႉ ပႃးဝဵင်းၼမ်ႉတိုၵ်း ပွၵ်ႉ 1, 2, 3, 4, 5 ။ ဝဵင်းၼမ်ႉတိုၵ်းၼႆႉ ယႃႇတႂ်ႈၵၢၼ်ၽွင်းငမ်းၵုမ်းၵမ် ပႃႊတီႊမိူင်းဝႃႉၽွမ်ႉႁူမ်ႈ / တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSP/UWSA) ။ ၼႂ်းၼႃႈလိၼ်ဝႃႉၵုမ်းၵမ်တွၼ်ႈၼိူဝ် ပီ 2015 ၼႆႉ ဢမ်ႇမီးၵၢၼ်လိူၵ်ႈတင်ႈ ။


ၵဵဝ်ႇၵပ်းလွင်ႈပူတ်းယႃႉပၢင်လိူၵ်ႈတင်ႈၼႆႉ ႁူဝ်ပဝ်ႈငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး လၢတ်ႈဝႃႈ - လၢႆးဢၼ် ၶွမ်ႊမသျိၼ်ႊၵၢၼ်လိူၵ်ႈတင်ႈ ႁဵတ်းၵႂႃႇၼႆႉ ႁၼ်ထိုင်ဝႃႈ မၼ်းဢမ်ႇၸွမ်းထမ်း / တြႃး ။ လွင်ႈၼႆႉ မၼ်းပဵၼ်ၵၢၼ်ၸပ်းၾၢႆႇ ။ ၵဵဝ်ႇၵပ်းလွင်ႈၼႆႉ တႄႉဢမ်ႇတႄႉၼၼ်ႉ တေႁဵတ်းပၢင်ၵုမ်ၵၼ်တင်း ၶွမ်ႊမတီႊငဝ်ႈငုၼ်းသေ တေၸတ်းၵႂႃႇထႅင်ႈ - ဝႃႈၼႆ ။


ၽူႈၼမ်းၼႂ်းပႃႊတီႊႁူဝ်သိူဝ် ဝဵင်းတူၼ်ႈတီး ၼၢင်းမျႃႉဢူး ၊ ဢၼ်ပဵၼ်ပႃး ၼေႃႇၽူႈတႅၼ်းၶဵတ်ႇလိူၵ်ႈတင်ႈမၢႆ 1 ဝဵင်းတူၼ်ႈတီး လၢတ်ႈဝႃႈ - ဢိင်ၼိူဝ် ဢၼ် UEC ဢွၵ်ႇၶေႃႈပိုၼ်ၽၢဝ်ႇၼႆႉသေ ၵူၼ်းဝဵင်းတူၼ်ႈတီး တေႁူမ်ႈသၢၼ်မိုဝ်းၵၼ်ၼႄၵၢင်ၸႂ် ။ ၵွပ်ႈဝႃႈ ဢၼ်ပိုၼ်ၽၢဝ်ႇၵႂႃႇၼႆႉ ဢမ်ႇၸႂ်ႈၵၢင်ၸႂ်ၵူၼ်းမိူင်း ။ မၼ်းဢိင်ၼိူဝ် ၵိင်ႇၽႄပႃႊတီႊသေဢၼ်ဢၼ် တၢင်ႇယိုၼ်ႈယွၼ်းမႃးတီႈ UEC ။ UEC သမ်ႉဢမ်ႇလူင်း ထတ်းၶိုၼ်း ၊ ၸွမ်းဢဝ်ၵၢင်ၸႂ်ပႃႊတီႊၼၼ်ႉဝႃႈသေ ဢွၵ်ႇၶေႃႈပိုၼ်ၽၢဝ်ႇ ပူတ်းယႃႉပႅတ်ႈၵၢၼ်လိူၵ်ႈတင်ႈ ၸိူင်ႉၼႆၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းတႆး တူၵ်းသုမ်းသုၼ်ႇလႆႈ - ဝႃႈၼႆ ။


ဢိင်ၼိူဝ်ၶွမ်ႊမသျိၼ်ႊၵၢၼ်လိူၵ်ႈတင်ႈ ပိုၼ်ၽၢဝ်ႇပူတ်းယႃႉ ၵၢၼ်လိူၵ်ႈတင်ႈ ၼႂ်းမိူင်းတႆးၼႆႉသေ ဝၼ်းတီႈ 27/10/2015 ၼႆႉ ပႃႊတီႊႁူဝ်သိူဝ် ၵေႃႈဢွၵ်ႇၶေႃႈပိုၼ်ၽၢဝ်ႇ တင်းမူတ်း 5 ၶေႃႈ ။


ၼႂ်းလိၵ်ႈၶေႃႈပိုၼ်ၽၢဝ်ႇ လၢတ်ႈဝႃႈ ဢၼ်ပူတ်းယႃႉၵၢၼ်လိူၵ်ႈတင်ႈ 4 ၸႄႈဝဵင်း ၼႂ်းမိူင်းတႆးၼႆႉ မၼ်းဢမ်ႇၸႂ်ႈၵၢင်ၸႂ်ၵူၼ်းမိူင်းဢၼ်တႄႉ ။ ဢမ်ႇၸႂ်ႈလူင်းယင်ႇသဵင်ၵၢင်ၸႂ်ၵူၼ်းမိူင်းသေ ႁဵတ်းမႃး ။ လွင်ႈၼႆႉ ႁဵတ်းႁႂ်ႈပိူဝ်ႈတႃႇမူၼ်ႉမႄး ပိူင်ငဝ်ႈပိုင်းမိူင်း (လၵ်းမိူင်း) ယၢပ်ႇၵူၺ်းပႆႇပေႃး ၊ တႃႇလူင်ပွင်ၸိုင်ႈၵူၼ်းမိူင်း တေၶိုၼ်ႈမႃးၵေႃႈ မၼ်းပဵၼ်လွင်ႈၵိတ်ႇၶႂၢင်လူင်ယဝ်ႉ - ၼႆယဝ်ႉ ။


ၼႂ်းၸႄႈဝဵင်းမိူင်းသူႈ တင်းၵေးသီး 2 ၸႄႈဝဵင်း ၊ ဢၼ်လူင်ပွင်ၸိုင်ႈမၢၼ်ႈ ပိုတ်ႇၽၢဝ်ႇပူတ်းယႃႉပႅတ်ႈ ပၢင်လိူၵ်ႈတင်ႈလုမ်းလုမ်း / ပတ်းပိုၼ်ႉၼႆႉ တင်းၸႄႈဝဵင်းတၢင်ႉယၢၼ်း မၢင်ပွတ်းတွၼ်ႈၼႆႉ ပဵၼ်ပိုၼ်ႉတီႈ ၼႃႈလိၼ် ဢၼ်သိုၵ်းမၢၼ်ႈႁၢင်ႈႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တႄႇဝၼ်းတီႈ 06/10/2015 မႃး ။ ၼႂ်းၸႄႈဝဵင်းႁူဝ်ပၢင်ႇ မိူၼ်ၼင်ႇၼမ်ႉတိုၵ်း သမ်ႉပဵၼ်ၼႃႈလိၼ်ဝႃႉ (UWSP/UWSA) ၵုမ်းၵမ်ဝႆႉလႄႈ ယူႇတီႈ လူင်ပွင်ၸိုင်ႈမၢၼ်ႈ ဢမ်ႇၸၢင်ႈၸတ်း ပၢင်လိူၵ်ႈတင်ႈ ။