ဢိင်ၼိူဝ်သိုၵ်းမၢၼ်ႈ ယူႇတီႈတပ်ႉၼမ်ႉမွၼ်း ၊ တပ်ႉဝဵင်းၵဝ်ႇ မိူင်းၼွင် ၊ တပ်ႉလွႆၵိဝ်ႇမွၵ်ႇၶၢဝ်သေ ဢဝ်ၵွင်ႈလူင်ယိုဝ်းပွႆႇသႂ်ႇလၢႆတီႈလၢႆတၢင်းၼၼ်ႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးသိုၵ်း လႆႈပၢႆႈၵႂႃႇတီႈမိူင်းသူႈ ထႅင်ႈ ။

ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးသိုၵ်း ၵႂႃႇတီႈမိူင်းသူႈ

ယွၼ်ႉပိူဝ်ႈသိုၵ်းမၢၼ်ႈ ယိုဝ်းၶိူင်ႈၵွင်ႈလူင် / ပွႆႇမၢၵ်ႇလူင်တူၵ်းသႂ်ႇ တီႈဝၢၼ်ႈလွႆၽုၺ်း၊ ၼွင်လႅင် ၊ ၵုၼ်ၵႅင်း ၊ ဝၢၼ်ႈလူၺ် ၊ ႁိမ်းႁွမ်းဝၢၼ်ႈသေႃႉ ၸိူဝ်းၼႆႉတင်းမူတ်း 36 လုၵ်ႈလႄႈ ၵူၼ်းဝၢၼ်ႈၸိူဝ်းယူႇ ၼႂ်းပိုၼ်ႉတီႈထုင်ႉႁိမ်းႁွမ်းၸိူဝ်းၼႆႉ လႆႈတူၵ်းၸႂ်သေဢွၼ်ၵၼ်ပၢႆႈ ။ ႁဵတ်းႁႂ်ႈဝၢၼ်ႈသူၼ်ၼႂ်းထုင်ႉၼႆႉ ႁၢမ်းၵႂႃႇပႅတ်ႈမူတ်း ။ ၵူၼ်းဝၢၼ်ႈၵမ်ႈၽွင်ႈ ပၢႆႈၵႂႃႇတၢင်းႁၢႆးပႃ ၊ ၵမ်ႈၽွင်ႈၵေႃႈပၢႆႈၵႂႃႇတီႈဝၢၼ်ႈသေႃႉ ။ ၸိူဝ်းယူႇတီႈဝၢၼ်ႈသေႃႉၼၼ်ႉၵေႃႈ ယွၼ်ႉပိူဝ်ႈမၢၵ်ႇလူင်တူၵ်းသႂ်ႇ ႁိမ်းဝၢၼ်ႈသေႃႉလႄႈ ၵမ်ႈၽွင်ႈၵေႃႈ သိုပ်ႇပၢႆႈၵႂႃႇယူႇတီႈဝတ်ႉ / ၵျွင်းၸၢၼ်း ဝဵင်းမိူင်းသူႈ - ၼႆယဝ်ႉ ။


ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈဝႃႈ - ဢိင်ၼိူဝ် ဢၼ်ၵဝ်ၶႃႈလႆႈတွင်ႈထၢမ် ၵူၼ်းၸိူဝ်းပၢႆႈမႃးတီႈဝၢၼ်ႈသေႃႉၼႆႉ မၢၵ်ႇလူင်တူၵ်းသႂ်ႇ တီႈဝၢၼ်ႈၽုၺ်း 3 လုၵ်ႈ ၊ ၼွင်လႅင် 3 လုၵ်ႈ ၊ ၵုၼ်ၵႅင်း 4 လုၵ်ႈ ၊ ၼႂ်းဝၢင်းဝတ်ႉၵျွင်းမုၼ်ၸဝ်ႈဝၢၼ်ႈလူၺ် 7 လုၵ်ႈ ၊ ၼႂ်းဝၢၼ်ႈလူၺ်လႄႈ ႁိမ်းႁွမ်းဝၢၼ်ႈလူၺ် 20 လုၵ်ႈ ။ လိူဝ်သေၼၼ်ႉ ႁိမ်းႁွမ်းဝၢၼ်ႈသေႃႉ သၼ်လွႆၼမ်ႉပႃမုင်း ၊ တီႈႁိမ်းဢၼ်ၵူၼ်းပၢႆႈၽေးမႃးယူႇႁဵင်ပၢႆၼၼ်ႉၵေႃႈ (မိူဝ်ႈဝၼ်းတီႈ 24/10/2015) သဵင်ၵွင်ႈတႅၵ်ႇ ။ ယွၼ်ႉၼၼ် ၵူၼ်းပၢႆႈၽေးသိုၵ်း ၸိူဝ်းမႃးယူႇတီႈႁူဝ်ဝၢၼ်ႈသေႃႉၵေႃႈ ယိၼ်းဢမ်ႇပေႃးမီးလွင်ႈႁူမ်ႇလူမ်ႈလႄႈ ၸင်ႇလႆႈဢွၼ်ၵၼ်ပၢႆႈမႃးတီႈဝဵင်းမိူင်းသူႈ - ၸၢႆးၸေႇယ ၵေႃႉပၢႆႈၵႂႃႇယူႇတီႈဝၢၼ်ႈသေႃႉသေ ၶိုၼ်ႈပၢႆႈမႃးတီႈမိူင်းသူႈ လၢတ်ႈ ။


တီႈဝၢၼ်ႈသေႃႉၼႆႉ ၵမ်ႈၽွင်ႈသိုပ်ႇပၢႆႈမႃးယူႇ ၼႂ်းဝဵင်းမိူင်းသူႈသေတႃႉ ၵူၼ်းဢၼ်မႃးမႂ်ႇၸိူဝ်းၼႆႉၵေႃႈ ယင်းတိုၵ်ႉမီးထႅင်ႈယူႇ ၊ ၵွပ်ႈၼၼ် တီႈဝၢၼ်ႈသေႃႉၼႆႉၵူၺ်း မိူဝ်ႈလဵဝ်မီးၵူၼ်းပၢႆႈၽေး မီးပဵၼ်ႁဵင်ပၢႆယဝ်ႉ ။ မိူဝ်ႈလဵဝ်ၼႆႉ ၵူၼ်းၸိူဝ်းဢၼ်ပၢႆႈမႃးယူႇတီႈဝတ်ႉ / ၵျွင်းၸၢၼ်း ပွၵ်ႉ 4 ၼႂ်းဝဵင်းမိူင်းသူႈ (တၢင်းၵႂႃႇတၢင်ႉယၢၼ်း) မီးပၢၵ်ႇပၢႆ ။ မိူဝ်ႈသိုၼ်းၼၼ်ႉ ပၼ်ႇပုတ်ႈၵၼ်ဢဝ်ထူဝ်ႈလႃႇၵျီႇ တေႃႉသူင်ႇၵၼ်တင်းဝၼ်း - ၼၢင်းၵွၼ်ငိုၼ်း ယူႇပွၵ်ႉ 4 ဝဵင်းမိူင်းသူႈ လၢတ်ႈ ။


ၼၢင်းယေႈလူႇ ၵူၼ်းမိူင်းသူႈ ၵေႃႈလၢတ်ႈဝႃႈ - ႁဝ်းၶႃႈဢၢင်ႈၵႂႃႇၸွႆႈထႅမ် ၵူၼ်းထူပ်းၽေးသိုၵ်းတၢင်းႁၢႆးပႃ ။ ၵူၺ်းၵႃႈ ယွၼ်ႉပိူဝ်ႈသဵင်ၵွင်ႈတႅၵ်ႇ တီႈတၢင်းတေၶဝ်ႈႁိမ်းႁၢႆးပႃၼၼ်ႉလႄႈ ႁဝ်းၶႃႈလႆႈဝၢႆႇႁူဝ်ပွၵ်ႈမႃးၶိုၼ်း ၊ ၵွပ်ႈၼၼ်လႄႈ ဢမ်ႇတၼ်းလႆႈၵႂႃႇထိုင် - ဝႃႈၼႆ ။


တႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ် သိုၵ်းမၢၼ်ႈႁၢင်ႈႁႅင်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းမိူင်းသူႈ ႁၢဝ်ႈႁႅင်း ၊ သွင်ၾၢႆႇပဵၼ်ပၢင်တိုၵ်းၵၼ်ဢမ်ႇယွမ်းမွၵ်ႈ 50 ပွၵ်ႈ ။ ပၢင်တိုၵ်းၼႆႉ ၶႂ်ႈပဵၼ်ၵူႈဝၼ်း ။ ဝၼ်းတီႈ 25/10/2015 (မိူဝ်ႈဝႃး) ၼႆႉ သိုၵ်းမၢၼ်ႈဢဝ်ႁိူဝ်းဝိၼ် 2 လမ်း ၵႂႃႇပၼ်ႇလဵပ်ႈၼိူဝ်ဝၢၼ်ႈႁႆး ၊ ႁဵတ်းႁႂ်ႈၵူၼ်းၼႂ်းဝၢၼ်ႈႁႆးၵေႃႈတူၵ်းၸႂ် တိုၼ်ႇသၢၼ်ႈ ။ ၵမ်ႈၽွင်ႈဝႃႈ သိုၵ်းမၢၼ်ႈတေလူမ်ႇငဝ်ႈငုၼ်း ဝၢၼ်ႈႁႆးတႄႉယဝ်ႉႁိုဝ် ။ ၾၢႆႇၼိုင်ႈၵေႃႈ တပ်ႉသိုၵ်း SSPP/SSA ၵေႃႈ ႁၢင်ႈႁႅၼ်းသိုၵ်းတူဝ်ႈတၼ်းဝႆႉယူႇ - ၼႆယဝ်ႉ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တင်းလူင်ပွင်ၸိုင်ႈမၢၼ်ႈ ပူၼ်ႉမႃးမိူဝ်ႈ ဝၼ်းတီႈ 28/01/2012 တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။ ဢိင်ၼိူဝ် ၶႂ်ႈႁႂ်ႈဝၢၼ်ႈမိူင်းၵတ်းယဵၼ်ၼိမ်သဝ်းသေ SSPP/SSA တုၵ်းယွၼ်းတီႈလူင်ပွင်ၸိုင်ႈမၢၼ်ႈဝႃႈ  ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်းၼႆႉ (NCA) ၼႆႉ ၶႂ်ႈႁႂ်ႈၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ လႆႈၶဝ်ႈပႃးၵူႈမူႇၵူႈၸုမ်း ။ ပေႃးပႆႇၶဝ်ႈပႃးၵူႈမူႇၵူႈၸုမ်းၸိုင် SSPP/SSA ပႆႇတူဝ်ႈတၼ်း တႃႇလူင်းလၢႆးမိုဝ်း NCA ။ ၵူၺ်းၵႃႈ ၾၢႆႇလူင်ပွင်ၸိုင်ႈ သမ်ႉဢမ်ႇႁပ်ႉၵူႈမူႇၵူႈၸုမ်း ၶဝ်ႈပႃးၼႂ်း NCA ။