ၵူၼ်းဝၢၼ်ႈၵူၼ်းမိူင်း သၢမ်ပၢၼ်ၸဵတ်းသႅၼ်း ၸိူဝ်းၶွၼ်ႈတုမ်ႁူမ်ႈၵၼ် ၵႂႃႇယွၼ်းသူး တီႈထၢတ်ႇၸေႇၻီႇ / ၵွင်းမူး သပေႇၺုၸုမ်ႈမိူင်း ႁူဝ်ဝဵင်းသႅၼ်ဝီ ပိူဝ်ႈတႃႇႁႂ်ႈမီးလွင်ႈၵိုတ်းပၢင်တိုၵ်း ထုၵ်ႇၶတ်းသေႃးႁႄႉႁၢမ်ႈ ။ လႆႈၶၢႆႉပၢင်ယွၼ်းသူး ၵႂႃႇတီႈႁေႃၸဝ်ႈမိူင်း မိူင်းလီ ။

တီႈထၢတ်ႇၸေႇၻီႇ / ၵွင်းမူး သပေႇၺုၸုမ်ႈမိူင်း ႁူဝ်ဝဵင်းသႅၼ်ဝီ ဢၼ်ၶတ်းသေႃးဝႆႉ လႄႈ တီႈႁေႃၸဝ်ႈမိူင်း မိူင်းလီ

မိူဝ်ႈဝၼ်းတီႈ 25/10/2015 ယၢမ်းပွတ်းၼႂ် ၵူၼ်းဝၢၼ်ႈၵူၼ်းမိူင်းၵူႈသႅၼ်းသႅၼ်း ၼႂ်းမိူင်းတႆးပွတ်းႁွင်ႇ 13 ၸႄႈဝဵင်း ၊ ၶွၼ်ႈတုမ်ၵၼ်တီႈဝဵင်းသႅၼ်ဝီသေ ဢၢၼ်းၵႂႃႇယွၼ်းသူးတီႈ ၸေႇၻီႇၵွင်းမူး / ထၢတ်ႈ သပေႉၺုၸုမ်ႈမိူင်း ဢၼ်မီးတီႈႁူဝ်ဝဵင်းသႅၼ်ဝီ ၸိုင်ႈတႆးပွတ်းႁွင်ႇ ၊ ပိူဝ်ႈတႃႇႁႂ်ႈပၢင်တိုၵ်း ၼႂ်းမိူင်းတႆးၵိုတ်းၽႂ်းၽႂ်းသေ ႁႂ်ႈၵူၼ်းမိူင်းတႆးၵႆယၢၼ်ၽေးသိုၵ်းသိူဝ် ။ ၵူၺ်းၵႃႈ ၽိူဝ်ႇၵႂႃႇႁွတ်ႈတီႈၼၼ်ႈယဝ်ႉ ဢမ်ႇၸၢင်ႈၶဝ်ႈတၢင်းၼႂ်း ၊ ၵွပ်ႈမီးၵူၼ်းၶတ်းသေႃးႁူဝ်ႉဝၢင်းထၢတ်ႈပႅတ်ႈ ။ သင်ၶၸဝ်ႈလႄႈၵူၼ်းမိူင်း ၸိူဝ်းႁူမ်ႈၵၼ်ၵႂႃႇယွၼ်းသူးၼၼ်ႉၵေႃႈ လႆႈၼင်ႈပၢၵ်ႇၽၵ်းတူႁူဝ်ႉဝၢင်းသေ ဝႆႈပုတ်ႉထ / ၽြႃးၵူၺ်း - ၼႆယဝ်ႉ ။


ယွၼ်ႉပိူဝ်ႈၼၼ်လႄႈ ပၢင်ယွၼ်းသူးၼႆႉ လႆႈၶၢႆႉၵႂႃႇႁဵတ်းတီႈ ႁေႃၸဝ်ႈမိူင်း မိူင်းလီ ဢိူင်ႇမိူင်းလီ ဝဵင်းသႅၼ်ဝီ ထႅင်ႈၵမ်းၼိုင်ႈ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉသေ ၽူႈၶၢၼ်ပၢၵ်ႇ ၵေႃၵပ်းသၢၼ်ၵူၼ်းၼုမ်ႇတႆး ၸၢႆးသႅင်မိူင်း လၢတ်ႈဝႃႈ - ႁဝ်းလၢတ်ႈၵၼ်ဝႆႉဝႃႈ ႁဝ်းၶႃႈယိူင်းဢၢၼ်းၵႂႃႇယွၼ်းသူး တိူင်ႇၵၢဝ်ႇတီႈၼၼ်ႈ ၊ ႁႂ်ႈပၢင်တိုၵ်းၼႂ်းမိူင်းတႆးၵိုတ်းၽႂ်းၽႂ်းသေ ႁႂ်ႈၵူၼ်းမိူင်းတႆးၵႆယၢၼ်ၽေးသိုၵ်းသိူဝ် ။ ၽိူဝ်ႇၵႂႃႇသမ်ႉ ပိူၼ်ႈၶတ်းသေႃးၽၵ်းတူပႅတ်ႈ ။ ၵဵဝ်ႇၵပ်းလွင်ႈၼႆႉ လႆႈၵႂႃႇထၢမ်သေလႆႈႁူႉမႃးတႄႉ ဢမ်ႇၸႂ်ႈတူဝ်မုၼ်ၸဝ်ႈ ဢၼ်ၼင်ႈဝတ်ႉ / ၵျွင်းတီႈၼၼ်ႈၶတ်းသေႃး ၊ မၼ်းပဵၼ်လုၵ်ႈလၢင်း ၸဝ်ႈတႃႇၼ ဢၼ်ႁူမ်ႈလူႇႁူမ်ႈတၢၼ်းၵွင်းမူးၼၼ်ႉၵမ်ႈၽွင်ႈ မႃးၶတ်းသေႃးၽၵ်းတူဝၢင်းပႅတ်ႈ ၊ ထၢင်ႇတႄႉ တေမီးၸုမ်းဢၼ်ယူႇတၢင်းလင်မၼ်းယူႇ ။ ၵူၺ်းၵႃႈ ဢၼ်ပဵၼ်မႃးၸိူင်ႉၼႆၼႆႉ ႁဝ်းၶႃႈဢမ်ႇႁၼ်ထိုင်ဝႃႈ မၼ်းပဵၼ်တၢင်းယၢပ်ႇၽိုတ်ႇ ။ မၼ်းပဵၼ်ၸိူင်ႉၼႆၼႆႉ မၼ်းပဵၼ်ၵွပ်ႈသင်ၼႆ ႁဵတ်းႁႂ်ႈၵူၼ်းၼုမ်ႇ ၸိူဝ်းမႃးၶဝ်ႈႁူမ်ႈပၢင်ယွၼ်းသူးၼႆႉ လႆႈတိုဝ်ႉတၢင်းႁဵၼ်းႁူႉ ၵၢၼ်ဝၢၼ်ႈၵၢၼ်မိူင်း ၊ ႁဵၼ်းႁူႉလွင်ႈပိူင်ပဵၼ်ၸိူဝ်းၼႆႉ - ဝႃႈၼႆ ။


ၵူၼ်းဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ ၼႂ်းတူင်ႇဝူင်းၸဝ်ႈၼႃႈတီႈ ၼႂ်းသႅၼ်ဝီ လၢတ်ႈဝႃႈ - လွင်ႈတၢင်းၸိူဝ်းၼႆႉတႄႉ ဢမ်ႇလႆႈႁူႉၸွမ်း ၊ မၼ်းၵဵဝ်ႇၵပ်းၵေႃးပၵၵူၺ်း ။ ၾၢႆႇၼိုင်ႈ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်တိတ်းတေႃႇၾၢႆႇၵေႃးပၵလၢႆလၢႆၵမ်းၵေႃႈ ဢမ်ႇလႆႈတိုဝ်ႉတၢင်းဢုပ်ႇဢူဝ်းတွင်ႈထၢမ် ။


ၽူႈဢၼ်မႃးၶဝ်ႈႁူမ်ႈပၢင်ယွၼ်းသူး တိူင်ႇၵၢဝ်ႇ ႁႂ်ႈပၢင်တိုၵ်းသိုၵ်းသိူဝ်ၵိုတ်း လႄႈ ႁႂ်ႈၵူၼ်းမိူင်းတႆးၵႆယၢၼ်ၽေးသိုၵ်း ၼၢင်းဢေၶမ်း လၢတ်ႈဝႃႈ - ဢၼ်ႁဝ်းၶႃႈမႃးႁဵတ်းပၢင်ယွၼ်းသူးၼႆႉ ႁဵတ်းၸွမ်းၸိူင်ႉၼင်ႇၾိင်ႈထုင်းတၢင်းယုမ်ႇယမ် ၸိူဝ်ႉၶိူဝ်းတႆး ၊ ၵၼ်ႇတေႃးပုတ်ႉထ / ၽြႃး၊ ထမ်းမ / တြႃး သင်ၶ ဝႆႈသႃၸူးထိုင်ပေႃႈမႄႈ သြႃႇၶူးဝႃးသေ ယွၼ်းသူးၵူၺ်းဢမ်ႇၵႃး ၊ တိူင်ႇၵၢဝ်ႇထိုင် ၸဝ်ႈပႂ်ႉၼမ်ႉတီႈၵိၼ် ၸဝ်ႈပႂ်ႉလိၼ်တီႈယူႇ ၸဝ်ႈဝၢၼ်ႈၸဝ်ႈမိူင်း ၊ ႁႂ်ႈတူၺ်းလူလွမ်ပၼ်မိူင်းတႆးႁဝ်းၶႃႈ ႁႂ်ႈၵႆယၢၼ်ၽေးသိုၵ်း ၊ ႁႂ်ႈပၢင်တိုၵ်းၸိူဝ်းၼႆႉ ၸဵဝ်းယဝ်ႉၸဵဝ်းတူဝ်ႈသေ ႁႂ်ႈၵူၼ်းမိူင်းတႆး လႆႈယူႇလီၵတ်းယဵၼ် - ဝႃႈၼႆ ။


ၸၢႆးသႅင်မိူင်း လၢတ်ႈထႅင်ႈဝႃႈ - ဢိင်ၼိူဝ် တိုဝ်ႉတၢင်းဢၼ်ႁဵတ်းပၢင်တိူင်ႇၵၢဝ်ႇယွၼ်းသူး ႁႂ်ႈပၢင်တိုၵ်းသိုၵ်းၵိုတ်း ၊ ႁႂ်ႈၵူၼ်းၺႃးၽေးသိုၵ်း လႆႈၵတ်းယဵၼ်ၼႆႉသေ ႁဝ်းၶႃႈၵဵပ်းငိုၼ်းလူႇတၢၼ်း မိူဝ်ႈဝႃးၼႆႉ လႆႈတင်းၼမ်သႅၼ်မၼ်း 90 ပၢႆ ။ ၵွပ်ႈၼၼ် ဢမ်ႇႁိုင်ဢမ်ႇၼၢၼ်း ၼႂ်းဝၼ်းသွင်ဝၼ်းၼႆႉ ႁဝ်းၶႃႈတေၵႂႃႇၸွႆႈထႅမ်ၵူၼ်းပၢႆႈၽေး ။ ပေႃးယဝ်ႉၵေႃႈ ၼင်ႇႁိုဝ်ပၢင်တိုၵ်းသိုၵ်းသိူဝ် တေၵိုတ်းၼၼ်ႉ ႁဝ်းၶႃႈတေတႅမ်ႈလိၵ်ႈယွၼ်းထိုင် ၸွမ်ၸိုင်ႈ ႁႂ်ႈသင်ႇၵိုတ်းပၼ်ပၢင်တိုၵ်း ဢၼ်ပဵၼ်ယူႇ - ဝႃႈၼႆ ။


တင်ႈတႄႇဝၼ်းတီႈ 06/10/2015 မႃး ယွၼ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းမိူင်းသူႈ ၊ ၵေးသီး ၊ မိူင်းၼွင် ၊ မိူင်းၸၢင်ၸိူဝ်းၼႆႉသေ သွင်ၾၢႆႇပဵၼ်ပၢင်တိုၵ်းၵၼ်ဢမ်ႇယွမ်း 50 ပွၵ်ႈ ၊ ၵူၼ်းဝၢၼ်ႈၵူၼ်းမိူင်း သၢမ်ႁဵင်ပၢႆ လႆႈပၢႆႈယၢၼ်ႁိူၼ်းယေးတီႈယူႇ ။


တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵၢၼ်ၵေႃႇသၢင်ႈလွင်ႈငမ်းယဵၼ် ၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တင်းလူင်ပွင်ၸိုင်ႈမၢၼ်ႈ ပူၼ်ႉမႃးမိူဝ်ႈႁူဝ်ပီ 2012 ။