မၢၵ်ႇတႅၵ်ႇ ႁိမ်းတပ်ႉပလိၵ်ႈၵၢင်ဝဵင်းတူၼ်ႈတီး တေႃႇၼႃႈႁၢၼ်ႉ ဢွင်ႇသတူဝ်း။ ႁဵတ်းႁႂ်ႈရူတ်ႉၵႃးလႄႈရူတ်ႉၶိူင်ႈလူႉၵွႆ ၊ ၵူၼ်းမိူင်း တိူဝ်ႉၺႃးၸၢၵ်ႇမၢၵ်ႇ ။


ဝၼ်းတီႈ 25/10/2015 ၵၢင်ၶမ်ႈယၢမ်း 20:20 မူင်း ၊ မၢၵ်ႇတႅၵ်ႇတီႈၼႂ်းၵၢင်ဝဵင်းတူၼ်ႈတီး ၊ ဢၼ်မီးႁိမ်းတပ်ႉပလိၵ်ႈၵၢင်ဝဵင်း ၊ ပွၵ်ႉလၢၼ်းမတေႃႇ ၼိူဝ်သဵၼ်ႈတၢင်းပူဝ်ႇၶျူၵ်ႈဢွင်ႇသၢၼ်း ၊ ဢၼ်တေႃႇၼႃႈႁၢၼ်ႉ ဢွင်ႇသတူဝ်း။ ႁဵတ်းႁႂ်ႈရူတ်ႉၵႃး 4 လမ်း ၊ ရူတ်ႉၶိူင်ႈ 2 လမ်းလူႉၵွႆ ။ ၵူၼ်းၵႂႃႇမႃးႁိမ်းၼၼ်ႉ 3 ၵေႃႉ တိူဝ်ႉၺႃးၸၢၵ်ႇမၢၵ်ႇ - ၼႆယဝ်ႉ ။


လွင်ႈမၢၵ်ႇတႅၵ်ႇၼႆႉ ၸဝ်ႈၼႃႈတီႈၾၢႆႇတပ်ႉပလိၵ်ႈ ၸႄႈဝဵင်း / ၸႄႈတွၼ်ႈ / ၸႄႈမိူင်းလႄႈ ၵႅမ်ၽူႈၵွၼ်းတိူင်းသိုၵ်းဝၼ်းဢွၵ်ႇ (ယပၶ) ၶဝ်ၵေႃႈ ဢွၼ်ၵၼ်မႃး ၵူတ်ႇထတ်းတူၺ်းယူႇ ။ မၢၵ်ႇဢၼ်တႅၵ်ႇၼႆႉ ပဵၼ်မၢၵ်ႇဢၼ်ၸႂ်ႉၼႂ်းသိုၵ်း သႅၼ်းဢၼ်ဝိုတ်ႉထိုမ်ႈ။ မီးၵူၼ်းဢဝ်ဝိုတ်ႉထိုမ်ႈၶဝ်ႈတႂ်ႈရူတ်ႉၵႃးသေတႅၵ်ႇ ။ ဢမ်ႇၸႂ်ႈသႅၼ်းဢၼ်တဵၵ်းၼဵၼ် - ၽူႈၵွၼ်းပလိၵ်ႈမိူင်းတႆး ဢွင်ႇဢွင်ႇ ယိုၼ်ယၼ်လၢတ်ႈ ။


သိုပ်ႇလၢတ်ႈပႃးဝႃႈ - မိူဝ်ႈလဵဝ်ၵူၼ်းမိူင်းၼႆႉ သူၼ်ၸႂ်လွင်ႈပၢင်တိုၵ်းလႄႈ လွင်ႈၵူၼ်းပၢႆႈၽေးသိုၵ်းၼမ်တႄႉတႄႉ ။ ၶႂ်ႈႁႂ်ႈၵူၼ်းမိူင်း ယႃႇမီးၸႂ်ၸပ်းပႅၼ်းလွင်ႈၼၼ်ႉသေ ၸင်ႇမႃးႁဵတ်းႁႂ်ႈမၢၵ်ႇတႅၵ်ႇပွၵ်ႈၵမ်းၼႆႉ ၵေႃႈပဵၼ်လႆႈ။ ပဵၼ်ႁိုဝ်ၵေႃႈယဝ်ႉ တေထတ်းတူၺ်းသေ ဢဝ်လိူင်ႈၵႂႃႇၼၵ်းၼၵ်းၼႃၼႃ ၊ မိူဝ်ႈလဵဝ်တႄႉ ပိုတ်ႇၶၻီး (ဢမု)ဝႆႉ လွင်ႈၵၢၼ်ႁုၵ်းႁၢႆႉ - ဢွင်ႇဢွင်ႇ လၢတ်ႈၼႄတီႈၸုမ်းၶၢဝ်ႇ ဢၼ်မႃးတွင်ႈထၢမ်ၶဝ်ၼင်ႇၼႆ ။