ၵိူတ်ႇၾူၼ်တူၵ်းႁၢဝ်ႈႁႅင်းၵၢင်ၶမ်ႈသေ ထိုင်ၵၢင်ၼႂ် ၼမ်ႉၸၢဝ်းငၢဝ်း လူၼ်ႉၾင်ႇ ၶဝ်ႈထူမ်ႈဝဵင်းၵျွၵ်ႉမႄး ၊ လင်ႁိူၼ်းၵူၼ်း ၸိူဝ်းယူႇၸွမ်းသၢပ်ႇၼမ်ႉ ၼပ်ႉႁူဝ်ပၢၵ်ႇထူပ်းၽေးၼမ်ႉ ၊ ၶူဝ်းႁိူၼ်း ၶူဝ်းဝတ်ႉ / ၵျွင်း လူႉသုမ်းၼင်ႇၵၼ် ။

မိူဝ်ႈဝၼ်းသဝ်တီႈ 10/10/2015 ၵၢင်ၶမ်ႈၼၼ်ႉ ၾူၼ်တူၵ်းႁၢဝ်ႈႁႅင်း ၊ ထိုင်မႃးၼႂ်ဝၼ်းဢႃးတိတ်ႉတီႈ 11 ၼၼ်ႉ ၼမ်ႉၸၢဝ်းငၢဝ်း လူၼ်ႉၾင်ႇ ထူမ်ႈထူမ်ႈၼႂ်းပွၵ်ႉၼႂ်းယွမ်ႇ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။


ၸၢႆးတၢၼ်းမွင်ႇ လုၵ်ႈၸုမ်းပႃႊတီႊႁူဝ်သိူဝ် (SNLD) ၵူၼ်းဝဵင်းၵျွၵ်ႉမႄး လၢတ်ႈဝႃႈ - ယွၼ်ႉပိူဝ်ႈၾူၼ်တူၵ်းႁၢဝ်ႈႁႅင်းလႄႈ ၼမ်ႉၸၢဝ်းငၢဝ်းလူၼ်ႉၾင်ႇ ၶဝ်ႈၼႂ်းဝဵင်း ၊ ၾူၼ်ၵေႃႈသမ်ႉပႆႇႁိူတ်ႇလႄႈ ၼမ်ႉၼၢၼ်းယွမ်း ။ ႁိူၼ်းၸိူဝ်းယူႇၸွမ်းႁိမ်းသၢပ်ႇ မႄႈၼမ်ႉၸၢဝ်းငၢဝ်း မွၵ်ႈ 700 လင်ၼႆႉၵေႃႈ ထုၵ်ႇၼမ်ႉထူမ်ႈ ။ ၼမ်ႉထူမ်ႈၶဝ်ႈပႃးၼႂ်းၼမ်ႉမေႃႇ ဢၼ်ၵူၼ်းမိူင်းၸႂ်ႉတိုဝ်းလႄႈ မိူဝ်ႈလဵဝ် ယၢပ်ႇၽိုတ်ႇလွင်ႈၼမ်ႉၸႂ်ႉၼမ်ႉၵိၼ် - ဝႃႈၼႆ ။


တီႈဝဵင်းၵျွၵ်ႉမႄးၼႆႉ ၼမ်ႉထူမ်ႈ ပွၵ်ႉ 3, 4 , 5, 6, 7, 9 ၸိူဝ်းၼႆႉ ၼမ်ႉထူမ်ႈႁၢဝ်ႈႁႅင်း ။ တီႈပွၵ်ႉ 6 ၼႆႉၺႃးၽေးၼမ်ႉႁၢဝ်ႈႁႅင်း လူႉသုမ်းၼမ်လိူဝ်တၢင်ႇပွၵ်ႉ ။ ဢၼ်လူႉသုမ်းၼႆႉ ႁူဝ်ႉဝတ်ႉ /ၵျွင်းၵၢင်မိူင်း ဝတ်ႉတႆး လွင်ႈၵႂႃႇၸွမ်းၼမ်ႉ ။ ဝတ်ႉမုၼ်ၸဝ်ႈမၢၼ်ႈ သတ်ႉထမ်မပႃလ ၵေႃႈႁူဝ်ႉလွင်ႈၵႂႃႇၸွမ်းၼမ်ႉၼင်ႇၵဝ်ႇ ။ ႁူဝ်ႉႁူင်းႁဵၼ်း ဢမၵ 1 ၵေႃႈ ၵူၼ်ႇလွင်ႈၸွမ်းၼမ်ႉမွၵ်ႈ 10 ႁွင်ႈ - ၸၢႆးတၢၼ်းမွင်ႇ လၢတ်ႈ ။


လိူဝ်သေၼၼ်ႉ တၢင်းမိူင်းတၢင်ႈၵေႃႈ ယွၼ်ႉပိူဝ်ႈၼမ်ႉထူမ်ႈလႄႈ ႁႆႈၼႃးမွၵ်ႈ 10 ဢေႊၵႃႊပၢႆလႆႈလူႉသုမ်း။ ၵူၼ်းဝၢၼ်ႈၵူၼ်းသူၼ် ၵႂႃႇမႃးယၢပ်ႇ ၊ ၵွပ်ႈဝႃႈၶူဝ်ၽႅၼ်ၸိူၵ်ႈလဵၵ်း ဢၼ်ၵူၼ်းဝၢၼ်ႈၵူၼ်းသူၼ်ၶဝ် ၸႂ်ႉၶၢမ်ႈၵႂႃႇမႃးၼၼ်ႉၶၢတ်ႇသေ လွင်ႈၸွမ်းၼမ်ႉ ။


တၢင်းမိူင်းတၢင်ႈၼႆႉ ၶႂ်ႈလႆႈၼမ်ႉၵိၼ်တႄႉတႄႉဝႃႈဝႃႈ ၊ ၵူၼ်းၸိူဝ်းၵႂႃႇၸွႆႈထႅမ်တႄႉ ပဵၼ်ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၵျွၵ်ႉမႄး ၸုမ်းတူင်ႉၼိုင်တူင်ႇဝူင်းၵူၼ်း ၊ ၸုမ်းၸွႆႈထႅမ်တီႈ ႁူင်းတူၺ်းလူၵူၼ်းထဝ်ႈၸိူဝ်းၼႆႉလႄႈ တင်းပႃႊတီႊၵၢၼ်မိူင်းၸိူဝ်းၼႆႉၵေႃႈ ၵႂႃႇၸွႆႈႁင်းၽႂ်ႁင်းမၼ်းၵူၺ်း ။ လူင်ပွင်ၸိုင်ႈတႄႉ ပႆႇၵႂႃႇၸွႆႈ။ ၼႂ်ၼႆႉၵေႃႈ လႆႈၶူဝ်ႈၶႆႇၵႆႇတင်းၶဝ်ႈသေ သႂ်ႇဢႅပ်ႇသေၵႂႃႇယိုၼ်ႈၵႂႃႇမႅင်ႇၶဝ် ၊ ၶဝ်ပႆႇၸၢင်ႈသႂ်ႇၽိုၼ်းၾႆး ပႆႇၸၢင်ႈႁုင်ၶဝ်ႈ ၊ ယွၼ်ႉၼၼ်လႄႈ ၶဝ်ယၢပ်ႇၽိုတ်ႇလွင်ႈၵိၼ်လွင်ႈယႅမ်ႉ - ၸၢႆးတၢၼ်းမွင်ႇ လၢတ်ႈ ။


သိုပ်ႇလၢတ်ႈဝႃႈ - မိူဝ်ႈပီၵၢႆၵေႃႈ ၼမ်ႉထူမ်ႈၸိူင်ႉၼႆပွၵ်ႈၼိုင်ႈယူႇ၊ ယွၼ်ႉပိူဝ်ႈယုၵ်းယၵ်း ၶႅၵ်ႉၸိူဝ်းၼႆႉ လွင်ႈမႃးၶၢင်ႉၶမ်ၸွမ်းၼႂ်း ႁွင်ႈၼမ်ႉၸိူဝ်းၼႆႉသေ ၾၢႆႇလိူမ်ႈလႆႇၶဝ်သမ်ႉ ဢမ်ႇၵႂႃႇၽဵဝ်ႈ ဢမ်ႇၵႂႃႇလၢင်းႁွင်ႈလႄႈ ၼမ်ႉၸင်ႇလႆႈလူၼ်ႉၾင်ႇ ထူမ်ႈမႃး - ဝႃႈၼႆ ။


ထႅင်ႈလွင်ႈၼိုင်ႈ ၵူၼ်းဝဵင်းၵျွၵ်ႉမႄးၶဝ် ဢွၼ်ၵၼ်ပွင်ႉၶၢင်းဝႃႈ - ၼိူဝ်သၼ်လွႆႁိမ်းႁွမ်းဝဵင်းၵျွၵ်ႉမႄးၸိူဝ်းၼႆႉ ဢမ်ႇမီးတူၼ်ႈမႆႉယႂ်ႇတူၼ်ႈမႆႉလူင်ယဝ်ႉ ၊ ပႃႇမႆႉထိူၼ်ႇလူႉလႄႈ ဢမ်ႇမီးဢၼ်ၵုမ်းဝႆႉၼမ်ႉ ၊ ၵွပ်ႈၼၼ်လႄႈ ပေႃးၾူၼ်တူၵ်းႁႅင်းဢိတ်းၼိုင်ႈ ၼမ်ႉပႃႇၼမ်ႉလွႆၵေႃႈလႆႈထူမ်ႈ ၸင်ႇပဵၼ်ထူမ်ႈဝဵင်းမႃး - ဝႃႈၼႆ ။