ႁွင်ႈၼႄပိုၼ်းတႆး ဢၼ်ပဵၼ်ႁွင်ႈၵိုၵ်းပိုၼ်း တီႈၸႄႈဝဵင်း မႄႈသရဵင်းၸႄႈတွၼ်ႈ မႄႈႁွင်ႈသွၼ် ၸိုင်ႈထႆးပွတ်းႁွင်ႇ ၼၼ်ႉၺႃးၾႆးမႆႈ လူႉၵွႆႈပႅတ်ႈတင်းလင် ။

မိူဝ်ႈဝၼ်းတီႈ 11/10/2015 သိုဝ်ႇၶၢဝ်ႇထႆးရတ်ႉႁၢႆးငၢၼ်းဝႃႈ မိူဝ်ႈၶၢဝ်းယၢမ်းၵၢင်ၶမ်ႈ 06:00 ၼၼ်ႉ ၾႆးမႆႈႁွင်ႈၼႄပိုၼ်းတႆး ဢၼ်ၵိုၵ်းမိူင်းမႄႈသရဵင်းၼႆ ၸဝ်ႈၼႃႈတီႈၶဝ်လႆႈၵႂႃႇၸွႆႈၶႄၾႆး ၊ ၸႂ်ႉၶၢဝ်းယၢမ်းၸူဝ်ႈမူင်းပၢႆၾႆးၸင်ႇမွတ်ႇ ဝႃႈၼႆ ။ ဢွင်ႈတီႈၾႆးမႆႈၼၼ်ႉ မီးၵူၼ်းၺႃးမၢတ်ႇ ၸဵပ်း1ၵေႃႉ ။


ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၵေႃႉၼိုင်ႈ ယူႇၼႂ်းဢွင်ႈတီႈၾႆးမႆႈလၢတ်ႈဝႃႈ - “ လႆႈႁၼ်ၵႂၼ်းၾႆးဢွၵ်ႇမႃးတီႈ ၸၼ်ႉတႂ်ႈယွၼ်ႉပိူဝ်ႈမီး 2 ၸၼ်ႉ ဝၢႆးၼၼ်ႉဢမ်ႇႁိုင် ၾႆးၵေႃႈလုၵ်ႈမႆႈ ယွၼ်ႉဝႃႈပဵၼ်မႆႉလႄႈ ၾႆးလၢမ်းမႆႉဝႆးတႄႉတႄႉ မႆႈပႅတ်ႈတင်းလင် ။


ပေႃးမႃးၼပ်ႉသွၼ်ႇ တူၺ်းၵႃႈၶၼ်မၼ်းတႄႉ ႁႃတီႈဝႃႈပေႃးဢမ်ႇမီးၶႃႈယဝ်ႉ တႃႇတေၵေႃႇသၢင်ႈၶိုၼ်ႈ ႁႂ်ႈမိူၼ်ၵဝ်ႇၵေႃႈဢမ်ႇငၢႆႈၶႃႈ ” - သိုပ်ႇလၢတ်ႈထႅင်ႈၼင်ႇၼႆ ။


ႁွင်ႈၼႄပိုၼ်းၼႆႉမီး 2 ၸၼ်ႉ ပွတ်းတႂ်ႈမၼ်းပဵၼ်ပုၼ် ၊ ပွတ်းၼိူဝ်မၼ်းပဵၼ်မႆႉ ပဵၼ်ၾၢင်ႁၢင်ႈႁိူၼ်းတႆးမိူဝ်ႈၵွၼ်ႇ ။ ၼႂ်းမၼ်းၼၼ်ႉၵဵပ်းၶူဝ်းၶွင် ၵဝ်ႇၵႄႇၵိုၵ်းမိူင်းမႄႈသရဵင်း မိူၼ်ၼင်ႇ လွင်ႈၾိင်ႈငႄႈၾိင်ႈထုင်း ၊လွင်ႈႁႃၵိၼ်လဵင်ႉတွင်ႉ လႄႈ ၶေႃႈမုလ်းၾိင်ႈထုင်း တၢင်ႇဢၼ် ၸိူဝ်းၼႆႉ ။


လိူဝ်သေႁွင်ႈၼႄပိုၼ်းတႆးယဝ်ႉ ၼႂ်းမိူင်းမႄႈသရဵင်း ၼႆႉယင်းၼႄဝႆႉပိုၼ်းတၢင်ႇၸၢဝ်းၶိူဝ်း မိူၼ်ၼင်ႇ ၸၢဝ်းၶိူဝ်းယၢင်း တင်း လဝႃႉ ။ ႁွင်ႈၼႄပိုၼ်းၸိူဝ်း ၼႆႉတႄႇပိုတ်ႇမိူဝ်ႈပီ 2006 သေ ပဵၼ်ပိုၼ်ႉတီႈလဵပ်ႈႁဵၼ်း တၢင်းႁူႉလႄႈပဵၼ်ဢွင်ႈတီႈ ဢႅဝ်ႇယဵမ်ႈတီႈၼိုင်ႈၼႂ်းၸႄႈဝဵင်း မႄႈသရဵင်းၸႄႈတွၼ်ႈမႄႈႁွင်ႈသွၼ် ၸိုင်ႈထႆး ။