ၵူၼ်းဝၢၼ်ႈၼႃးႁႆးလူင် တေၶိုၼ်ႈၵႂႃႇတူၺ်းၼမ်ႉ တၢင်းႁူဝ်ၼမ်ႉ ဢၼ်မီးၵၢၼ်ၶုတ်းၶမ်း ထုၵ်ႇယိုဝ်းတၢႆ
ၵူၼ်းဝၢၼ်ႈၵူၼ်းမိူင်း ၼႃးႁႆးလူင် ဢွၼ်ၵၼ်တေၶိုၼ်ႈၵႂႃႇၸႂ်းတူၺ်းၼမ်ႉ တၢင်းႁူဝ်ၼမ်ႉ ဢၼ်ၶွမ်ႊပၼီႊၶဝ်ၶုတ်းၶမ်း၊ လႆႈထုၵ်ႇသိုၵ်းမၢၼ်ႈယိုဝ်း တၢႆၼိုင်ႈၵေႃႉ။
 |
| ဢွင်ႈတီႈၶုတ်းၶမ်း ပွတ်းဝၢၼ်ႈၼႃးႁႆးလူင် |
ယွၼ်ႉပိူဝ်ႈၵၢၼ်ၶုတ်းၶမ်းသေ ၵူၼ်းဝၢၼ်ႈၵူၼ်းမိူင်း ဝၢၼ်ႈၼႃးႁႆးလူင် လႆႈလူႉသုမ်းလိၼ်သူၼ်ႁႆႈၼႃးၵူၺ်းပႆႇပေႃး၊ မိူဝ်ႈလဵဝ်ၵေႃႈ တႃႇၵၢၼ်ၽုၵ်ႇသွမ်ႈ ႁဵတ်းၼႃးႁဵတ်းသူၼ်ၵေႃႈ ၼမ်ႉဢမ်ႇလႆလူင်းမႃးလႄႈ ၵူၼ်းဝၢၼ်ႈၵူၼ်းမိူင်း ၼႃးႁႆးလူင်ၵမ်ႈၽွင်ႈ ဢွၼ်ၵၼ်တေၶိုၼ်ႈၵႂႃႇၸႂ်းတူၺ်း တၢင်းႁူဝ်ၼမ်ႉ ဢၼ်မီးၶွမ်ႊပၼီႊၶဝ်မႃးႁဵတ်းမိူင် ၶုတ်းၶမ်း။ ၵူၺ်းၵႃႈ မိူဝ်ႈဝၼ်းတီႈ 14/10/2015 ၽွင်းၶိုၼ်ႈၵႂႃႇၼၼ်ႉ ယၢမ်းတဵင်ႈဝၼ်း လႆႈထုၵ်ႇသိုၵ်းမၢၼ်ႈ ယိုဝ်းတၢႆၵေႃႉၼိုင်ႈ- ၼႆယဝ်ႉ။
ၵေႃႉထုၵ်ႇယိုဝ်း ၸိုဝ်ႈလုင်းၸၢႆးသၢမ် ဢႃယု 53 ပီ၊ သိုၵ်းမၢၼ်ႈတပ်ႉဢၼ်ယိုဝ်း ပဵၼ်ၶမယ 330 မိူင်းၽျၢၵ်ႈ ဢၼ်ဢဝ်ႁူမ်ႇလူမ်ႈဝႆႉပၼ်မိူင်ၶမ်း တီႈၶွမ်ႊပၼီႊၶဝ်ၶုတ်းၶမ်းၼၼ်ႉ။
ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 14/10/2015 ၵၢင်ၼႂ်ယၢမ်း 10 မူင်း၊ ၵူၼ်းဝၢၼ်ႈ ၸုမ်းလုင်းၸၢႆးသၢမ်ၶဝ် လုၵ်ႉတီႈၼႃးႁႆးလူင်သေ တေၶိုၼ်ႈၵႂႃႇတၢင်းႁူဝ်ၼမ်ႉၶမ်း၊ တေၵႂႃႇတူၺ်းၼမ်ႉ ပိူဝ်ႈတႃႇၸႂ်ႉၼႂ်း ၵၢၼ်ၽုၵ်ႇသွမ်ႈဝႃႈ ၵွပ်ႈသင်လႄႈၼမ်ႉႁႅင်ႈ။ ၽိူဝ်ႇၶိုၼ်ႈၵႂႃႇၵေႃႈ ၵႂႃႇၺႃးယိုဝ်း- ၼႆယဝ်ႉ။
ၶူးသွၼ်ၼၢင်းလႃႈ ၵေႃႉဢၼ်ၵႂႃႇၶတ်းၸႂ် တႃႇတေလႆႈၶိုၼ်းတူဝ်တၢႆလုင်းၸၢႆးသၢမ် လၢတ်ႈဝႃႈ- ၼင်ႇႁိုဝ်တေဢမ်ႇမီးၵၢၼ်ၶုတ်းၶမ်းၼၼ်ႉ ႁဝ်းၶႃႈၵေႃႈလၢတ်ႈဝႆႉ တီႈၽွင်းလူင်လုင်းၸၢႆးဢၢႆႈပဝ်းယဝ်ႉ၊ မၼ်းၸဝ်ႈၵေႃႈတေမႃးၵူတ်ႇထတ်းတူၺ်း။ လိူဝ်ၼၼ်ႉမၼ်းၸဝ်ႈၵေႃႈ ယင်းမႃးၵူတ်ႇထတ်းတူၺ်းၵမ်းၼိုင်ႈယဝ်ႉ၊ ၵူၺ်းၵႃႈ တေႃႇထိုင်တေႃႈလဵဝ်ၼႆႉ ၵၢၼ်ၶုတ်းၶမ်းယင်းဢမ်ႇၵိုတ်း၊ တိုၵ်ႉသိုပ်ႇၶုတ်းယူႇတိၵ်းတိၵ်း။ ၼမ်ႉႁွင်ႈၵေႃႈၸႂ်ႉဢမ်ႇလႆႈယဝ်ႉ။ မိူဝ်ႈလဵဝ်ၼႆႉ ၾူၼ်ၵေႃႈသမ်ႉတူၵ်းႁႅင်းပူၼ်ႉသေ ၼမ်ႉၵေႃႈၶႂ်ႈလႆၸိူင်ႉႁိုဝ်လႆ၊ ၶႂ်ႈလူၼ်ႉၸိူင်ႉႁိုဝ်ၵေႃႈလူၼ်ႉယူႇတိၵ်းတိၵ်း။ တႃႇတေလႆႈၸႂ်ႉၼမ်ႉဢၼ်လီမၼ်းၼႆႉ ႁဝ်းၶႃႈဢၢင်ႈၶိုၼ်ႈၵႂႃႇ တူၺ်းတီႈၼိူဝ်လွႆ။ သမ်ႉလႆႈငိၼ်းၶၢဝ်ႇဝႃႈ ၶွမ်ႊပၼီႊမႂ်ႇၵေႃႈ မႃးၶုတ်းၶမ်းထႅင်ႈၼႆလႄႈ ႁဝ်းၶႃႈဢၢင်ႈၶိုၼ်ႈၵႂႃႇတူၺ်း၊ ၽိူဝ်ႇၶိုၼ်ႈၵႂႃႇယဝ်ႉၵေႃႈ ၺႃးသိုၵ်းမၢၼ်ႈယိုဝ်းလႄႈ လုင်းသၢမ်ပေႃးလႆႈတၢႆ- ဝႃႈၼႆ။
တေႃႇထိုင်မိူဝ်ႈလဵဝ် တူဝ်တၢႆလုင်းသၢမ်ၵေႃႈ ၽႂ်ပႆႇႁၼ်၊ ၾၢႆႇႁူမ်ႇလူမ်ႈသိုၵ်းၶဝ် ယိုၼ်ယၼ်လၢတ်ႈဝႃႈ လုင်းသၢမ်ၼႆႉ မၼ်းတၢႆတႄႉယဝ်ႉ၊ မၼ်းလႆႈတိူဝ်ႉဝၢတ်ႇၸဵပ်းမၢၵ်ႇၵွင်ႈသေ ဢဝ်ၵႂႃႇတီႈႁူင်းယႃမိူင်းၽျၢၵ်ႈ လႄႈၵႂႃႇတၢႆတီႈႁူင်းယႃမိူင်းၽျၢၵ်ႈ။ ၵူၼ်းဝၢၼ်ႈၵူၼ်းမိူင်းတၢင်းၼႃးႁႆးလူင်ၵေႃႈ ဢွၼ်ၵၼ်ၶတ်းၸႂ် တႃႇတေလႆႈၶိုၼ်းတူဝ်တၢႆမၼ်းယူႇ၊ မိူဝ်ႈလဵဝ် ဢွၼ်ၵၼ်ၽႅဝ်ဝႆႉတီႈမိူင်းၽျၢၵ်ႈ - ၼႆယဝ်ႉ။
ၸၢႆးတဵင်းဢွင်ႇ ႁွင်ႉ ၸၢႆးသၢႆလႅင်းၶိူဝ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းတႃႈၶီႈလဵၵ်း လၢတ်ႈဝႃႈ- ၵဵဝ်ႇၵပ်းလွင်ႈၼႆႉ ၸၢႆးသၢမ်တိပ်ႉၽေႇ ၵေႃႉပဵၼ်ၼေႃႇၽူႈတႅၼ်းမိူင်းၽျၢၵ်ႈ ၵေႃႈၵႂႃႇၸွႆႈထႅမ်ယူႇ၊ တေႁဵတ်းႁိုဝ်ၵႂႃႇထႅင်ႈၼႆတႄႉ ပႆႇလႆႈတႅပ်းတတ်းၸိူင်ႉႁိုဝ်၊ တိုၵ်ႉႁႃၵဵပ်းၶေႃႈမုလ်းၶၢဝ်ႇသၢရ်မၼ်းယူႇ၊ တႃႇတေလႆႈၶိုၼ်းတူဝ်တၢႆ လုင်းၸၢႆးသၢမ်ၼႆႉ။
“ဢၼ်ၶႃႈႁဝ်း ဢမ်ႇယိုၼ်ယၼ်လႆႈတႄႉၵေႃႈ လႆႈငိၼ်းဝႃႈလုင်းၸၢႆးသၢမ်ၼႆႉ ထုၵ်ႇယိုဝ်းသေ တူၵ်းတၢႆၼႂ်းႁူၺ်ႈၼႂ်းပႃႇယဝ်ႉ၊ တူဝ်တၢႆမၼ်းဢမ်ႇထိုင်မိူင်းၽျၢၵ်ႈ၊ လႆႈငိၼ်းၼင်ႇၼႆ”- ၸၢႆးတဵင်းဢွင်ႇ လၢတ်ႈ။
ပူၼ်ႉမႃးၸဵမ်မိူဝ်ႈပီ 2007 ၶွမ်ႊပၼီႊလၢႆလၢႆဢၼ် မႃးၶုတ်းၶမ်းတီႈၼိူဝ်သၼ်လွႆၶမ်း တီႈႁူဝ်ၼမ်ႉၶမ်း ႁိမ်းဝၢၼ်ႈၼႃးႁႆးလူင် ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ဢိင်ၼိူဝ်ၵူၼ်းဝၢၼ်ႈတုၵ်းယွၼ်းလႄႈ မိူဝ်ႈၼႂ်းၵၢင်ပီ 2014 ၼၼ်ႉ ၼင်ႇႁိုဝ်ၶွမ်ႊပၼီႊၶဝ် တေၵိုတ်းယိုတ်း ၵၢၼ်ၶုတ်းၶမ်းလႄႈ ၽွင်းလူင်ၾၢႆႇပႃႇမႆႉ/ႁိၼ်ႁႄႈ လူင်ပွင်ၸိုင်ႈမိူင်းတႆး လုင်းၸၢႆးဢၢႆႈပဝ်း ၵေႃႈလႆႈလူင်းမႃးၼႂ်းပိုၼ်ႉတီႈသေ မႃးၸီႉသင်ႇႁႂ်ႈၶွမ်ႊပၼီႊၶဝ် ဢွၼ်ၵၼ်ၵိုတ်းၵၢၼ်ၶုတ်းၶမ်းယဝ်ႉ 2 ပွၵ်ႈ၊ ၵူၺ်းၵႃႈ တေႃႇထိုင်ဝၼ်းမိူဝ်ႈလဵဝ် ၵၢၼ်ၶုတ်းၶမ်းယင်းပႆႇၵိုတ်း။
ၶွမ်ႊပၼီႊယႂ်ႇလူင် ဢၼ်ၶုတ်းၶမ်းယူႇယၢမ်းလဵဝ်ၼႆႉ ပဵၼ်ၶွမ်ႊပၼီႊၸၢႆးၸၢႆး ၸၢႆႉပျူဝ်းယေး၊ ၸၢႆးတိပ်ႉ၊ လွႆၶမ်းလူင်လႄႈ ၶွမ်ႊပၼီႊဢွၼ်ႇလၢႆၶွမ်ႊပၼီႊ- ၵူၼ်းၼႂ်းပိုၼ်ႉတီႈလၢတ်ႈ။
Tags: Human Right, News
