ၵေႃၵပ်းသၢၼ်ၵူၼ်းၼုမ်ႇတႆး လႄႈ တပ်ႉသိုၵ်းၵူၼ်းမိူင်း ထုင်ႉမိူင်းၸီး ဢွၼ်ႁူဝ်ပိုတ်ႇပၢင်ၵႅဝ်ႈ ပၢင်သွၼ်ပိုၼ်ႉထၢၼ် ဢိင်းၵလဵတ်ႈ ပွၵ်ႈၵမ်း 1 တီႈဝတ်ႉ(ၵျွင်း) ဝၢၼ်ႈၵုင်းသႃႇ ဢိူင်ႇမိူင်းၸီး။ မီးပေႃႈမႄႈၵူၼ်းမိူင်း မေႃသွၼ် လုၵ်ႈႁဵၼ်း ၶဝ်ႈႁူမ်ႈတင်းၼမ်။

မိူဝ်ႈဝၼ်းၸၼ်တီႈ 12/10/2015 ၵၢင်ၼႂ်ယၢမ်း 9 မူင်းထိုင်ဝၢႆးဝၼ်း 3 မူင်း၊ ၵေႃၵပ်းသၢၼ်ၵူၼ်းၼုမ်ႇတႆး (Shan Youth Network-SYN) လႄႈ တပ်ႉသိုၵ်းၵူၼ်းမိူင်း ထုင်ႉမိူင်းၸီး (ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ) ဢွၼ်ႁူဝ်ပိုတ်ႇပၢင်ၵႅဝ်ႈ ပၢင်သွၼ်ပိုၼ်ႉထၢၼ် ဢိင်းၵလဵတ်ႈ ပွၵ်ႈၵမ်း 1 ၊ တီႈဝတ်ႉ/ၵျွင်း ဝၢၼ်ႈၵုင်းသႃႇ ဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ မီး ႁူဝ်ပဝ်ႈၾၢႆႇတပ်ႉသိုၵ်းၵူၼ်းမိူင်း (ႁိုဝ်) ပီႇတုၸိတ်ႉမိူင်းၸီး၊ ၽူႈယႂ်ႇၵူၼ်းလူင်ဢိူင်ႇ/ၸုမ်း/ဝၢၼ်ႈ၊ ႁူဝ်ပဝ်ႈလႄႈ ၽွင်းတႅၼ်းပႃႊတီႊႁူဝ်သိူဝ် ၸႄႈဝဵင်းၵူတ်ႉၶၢႆ၊ ပေႃႈမႄႈၵူၼ်းမိူင်းၼႂ်းပိုၼ်ႉတီႈ ဢိၵ်ႇလုၵ်ႈႁဵၼ်း ၶိုၼ်ႈႁွတ်ႈ 150 ၵေႃႉပၢႆ။ ၸုမ်းမေႃသွၼ်မီး 7 ၵေႃႉ၊ လုၵ်ႈႁဵၼ်းမီး 50 ၵေႃႉပၢႆ- ၼႆယဝ်ႉ။


ႁူဝ်ပဝ်ႈတပ်ႉသိုၵ်းၵူၼ်းမိူင်း ထုင်ႉမိူင်းၸီး လုင်းၸၢႆးဢုင်းၶႅင်ႇ လၢတ်ႈဝႃႈ- “ႁဝ်းၶႃႈယိၼ်းလီႁူမ်ၸူမ်း တႃႇၸွႆႈထႅမ်ၵူၺ်းပႆႇပေႃး၊ ၶွပ်ႈၸႂ်ထိုင်ၸုမ်းမေႃသွၼ် ဢၼ်တေမႃးပိုတ်ႇႁူလႅင်းတႃပၼ်ႁဝ်းၶႃႈ တႄႉတႄႉဝႃႈဝႃႈယူႇ”- ဝႃႈၼႆ။

ႁူဝ်ပဝ်ႈၸုမ်းၵူၼ်းၼုမ်ႇ ထုင်ႉမိူင်းၸီး ၸၢႆးထုၼ်းလႃႉ “ႁဝ်းၶႃႈ ယွမ်းၼွမ်းလွင်ႈယူပ်ႈယွမ်း မိူင်းၼွၵ်ႈၼႃးပၢင်ႇႁဝ်းၶႃႈယူႇ။ ၼွၵ်ႈသေၼၼ်ႉ ႁဝ်းၶႃႈတေဢဝ်ႁႅင်းတူဝ်ႁႅင်းၸႂ်သေ ႁဵတ်းသၢင်ႈၸွႆႈထႅမ် တႃႇပၼ်ပၢင်သွၼ်ၼႆႉ ၵႂႃႇတေႃႇထိုင်တီႈယွတ်ႈ ႁွတ်ႈတီႈပၢႆ”- ဝႃႈၼႆ။


ၽူႈသူၼ်းတုမ် ၵေႃၵပ်းသၢၼ်ၵူၼ်းၼုမ်ႇတႆး မိူင်းတႆးပတ်းပိုၼ်ႉ ၸၢႆးသႅင်ၸိင်ႇမျႅတ်ႈ လၢတ်ႈဝႃႈ-“ႁဝ်းၶႃႈယၢပ်ႇတုၵ်ႉၵႃႈႁိုဝ်၊ ၵႆယၢၼ်ၵၼ်ၵႃႈႁိုဝ်ၵေႃႈယဝ်ႉ တိုၼ်းတေသိုပ်ႇသူၼ်းတုမ် ဢဝ်ၵူၼ်းၼုမ်ႇတႆးႁဝ်းၶိုၼ်ႈယႂ်ႇမႂ်ႇသုင်ၶိုတ်းၸၼ်ႉ လုမ်ႈၾႃႉၵႂႃႇၼၼ်ႉယူႇ”- ဝႃႈၼႆ။

ၽူႈၵွၼ်းႁူင်းႁဵၼ်း ၵေႃၵပ်းသၢၼ်ၵူၼ်းၼုမ်ႇတႆး ၸဝ်ႈမူၼ်းသႅင်ၸိုၼ်ႈ လၢတ်ႈဝႃႈ- “ၸုမ်းႁဝ်းၶႃႈ မေႃသွၼ်တႄႉ ဢမ်ႇမုင်ႈမွင်းသင်၊ လိူဝ်သေဝႃႈ ၶႂ်ႈႁႂ်ႈၵူၼ်းၼုမ်ႇဝၢၼ်ႈၼွၵ်ႈၼႃးပၢင်ႇႁဝ်းမီး တၢင်းႁူႉၶိုတ်းၵၢပ်ႈပၢၼ်ၼၼ်ႉၵူၺ်း၊ ႁဝ်းၶႃႈၵေႃႈ ဢဝ်ၼမ်ႉၸႂ် (Volunteer) သေ မႃးသွၼ်ပၼ်ၵူၺ်းၶႃႈ”- ဝႃႈၼႆ။


ဝၢႆးသေပွႆးပိုတ်ႇပၢင်သွၼ်ယဝ်ႉတူဝ်ႈၵႂႃႇ ဢွၼ်ၵၼ်သိုပ်ႇၶွတ်ႇၽွတ်ႈ ၵေႃပွင်ၵၢင်ပၢင်သွၼ်လႄႈ ၶွမ်ႊမတီႊမုၵ်ႉၸုမ်း ၵေႃၵပ်းသၢၼ်ၵူၼ်းၼုမ်ႇတႆး ထုင်ႉမိူင်းၸီးၵႂႃႇယူႇ။ လုၵ်ႉတီႈၽူႈယႂ်ႇၵူၼ်းလူင်ၵမ်ႈၽွင်ႈ လႄႈ ပေႃႈမႄႈၵူၼ်းမိူင်း ထုင်ႉမိူင်းၸီး ၽိတ်ႈမွၵ်ႇလႄႈ ၵေႃၵပ်းသၢၼ်ၵူၼ်းၼုမ်ႇတႆး (SYN) ၸင်ႇလႆႈမႃးပိုတ်ႇပၢင်သွၼ်။ ယွၼ်ႉၸၢဝ်းၶိူဝ်းၼမ်၊ သိုၵ်းၶၢင် သိုၵ်းတႆး သိုၵ်းလွႆၵေႃႈမီးဝႆႉ ၼႂ်းပိုၼ်ႉတီႈ။


ၵေႃၵပ်းသၢၼ်ၵူၼ်းၼုမ်ႇတႆး (SYN) ၼႆႉပဵၼ်ၸုမ်းဢၼ်ပိုတ်ႇပၢင်သွၼ် (English Speaking) တီႈၼမ်ႉႁူးၼွႆႉ ဝဵင်းသီႇပေႃႉၼၼ်ႉသေ တီႈမိူင်းယဵၼ် ၸႄႈဝဵင်းၼမ်ႉတူႈ ၵေႃႈတိုၵ်ႉပိုတ်ႇဝႆႉပၼ်ၶၢဝ်းပွတ်း 15 ဝၼ်း။