ႁူဝ်ပဝ်ႈပႃႊတီႊ ႁူဝ်သိူဝ် တင်း ႁူဝ်ပဝ်ႈပႃႊတီႊ သိူဝ်ၽိူၵ်ႇ လူင်းၼႂ်းပိုၼ်ႉတီႈ သူၼ်းတုမ်ႁႃသဵင် ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႈ ၸိုင်ႈတႆးပွတ်းႁွင်ႇ ၊ ပိူဝ်ႈတႃႇတေပေႉၵၢၼ်လိူၵ်ႈတင်ႈ ။

မိူဝ်ႈပႃႊတီႊႁူဝ်သိူဝ် တင်း ပႃႊတီႊသိူဝ်ၽိူၵ်ႇ လူင်းသူၼ်းတုမ်ႁႃသဵင် တီႈဝဵင်းၼမ်ႉၶမ်း

မိူဝ်ႈဝၼ်းတီႈ 24/10/2015 ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP)  ၸၢႆးဢၢႆႈပဝ်း လႄႈတင်း ၵေႃႉပဵၼ်ၼေႃႇၽူႈတႅၼ်း သၽႃးၸိူဝ်ႉၸၢတ်ႈ ၊ ဢၼ်ပဵၼ်ပႃး ၽူႈတႅၼ်းသၽႃး ၸိူဝ်ႉၸၢတ်ႈလႄႈ ပဵၼ်ၵႅမ်ၶုၼ်ၽွင်းလူင် လူင်ပွင်ၸိုင်ႈမိူင်းႁူမ်ႈတုမ် ၻွၵ်ႊတိူဝ်ႊၵျေႃႇဢူင်းၶဝ်ၸိူဝ်းၼႆႉ မႃးၸွမ်းလုင်းၸၢႆးဢၢႆႈပဝ်ႈ ၊ ႁဵတ်းပၢင်ႁူပ်ႉထူပ်းၵူၼ်းမိူင်း ၊ ၸတ်းပၢင်သူၼ်းတုမ် ႁႃသဵင်တီႈၵၢင်ပၢင်ႇ ၵၢင်ဝဵင်းၼမ်ႉၶမ်း ။ မီးၵူၼ်းဝဵင်းၼမ်ႉၶမ်း မႃးၶဝ်ႈႁူမ်ႈထွမ်ႇငိၼ်း လုင်းၸၢႆးဢၢႆႈပဝ်း သူၼ်းတုမ်ႁႃသဵင် ၼပ်ႉႁူဝ်ႁဵင် - ၸၢႆးလူင် ၵေႃႉၵႂႃႇၶဝ်ႈႁူမ်ႈပၢင် ႁူပ်ႉထူပ်းၵူၼ်းမိူင်းၼၼ်ႉ လၢတ်ႈ ။


ၸၢႆးလူင် သိုပ်ႇလၢတ်ႈထႅင်ႈဝႃႈ - ၶုၼ်ထုၼ်းဢူးမႃးၵႂႃႇမိူဝ်ႈဝၼ်းတီႈ 21 ။ လုင်းၸၢႆးဢၢႆႈပဝ်းသမ်ႉ မႃးၵႂႃႇမိူဝ်ႈဝႃးၼႆႉ (24/10/2015) ။ ၸူးၸႂ်ႁဝ်းၶႃႈတႄႉ ၶႂ်ႈႁႂ်ႈမီးပႃႊတီႊဢၼ်လဵဝ်ၵူၺ်း ။ ၵွပ်ႈၼၼ်လႄႈ ၵမ်ႉထႅမ်ပႃႊတီႊသိူဝ်ၽိူၵ်ႇမႃး ႁႂ်ႈပႃႊတီႊသိူဝ်ၽိူၵ်ႇလႆႈပေႉၵၢၼ်လိူၵ်ႈတင်ႈၵူၺ်း ။ ဢိင်ၼိူဝ်ပႃႊတီႊႁူဝ်သိူဝ် ၶဝ်ႈမႃးႁႃသဵင်ၼႂ်းဝဵင်းၼမ်ႉၶမ်းၼႆႉသေ ၵူၼ်းဝဵင်းၼမ်ႉၶမ်းၵေႃႈ ၵမ်ႈၽွင်ႈၵေႃႈၵမ်ႉထႅမ်ပဵၼ်ၸႂ်ပႃႊတီႊသိူဝ်ၽိူၵ်ႇ ၊ ၵမ်ႈၽွင်ႈၵေႃႈပဵၼ်ၸႂ်ပႃႊတီႊႁူဝ်သိူဝ် ၊ ၵူၼ်းႁိူၼ်းလဵဝ်ၵၼ်ၵေႃႈ ယင်းတႅၵ်ႇၵၼ်ယဝ်ႉ ၊ ၵၢၼ်ၵမ်ႉထႅမ်ပႃႊတီႊၼႆႉ မၼ်းဢမ်ႇမိူၼ်ၵၼ်ယဝ်ႉ - ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸၢႆးလူႇ ၵေႃႈလၢတ်ႈဝႃႈ - ၵဝ်ၶႃႈတႄႉ ပႃႊတီႊမီးလၢႆဢၼ် ဢၼ်ဝႃႈၼႆႉ မၼ်းဢမ်ႇမီးပၼ်ႁႃ ၊ ပႃႊတီႊတႆးမီးမႃးလၢႆဢၼ်ၼႆႉ မၼ်းပဵၼ်တိုဝ်ႉတၢင်းဢၼ်ၼိုင်ႈ ပိူဝ်ႈတႃႇႁဝ်းလဵပ်ႈႁဵၼ်းၵၢၼ်မိူင်း ဝႃႈ  ၵၢၼ်မိူင်းဢၼ်ဝႃႈၼၼ်ႉ မၼ်းပဵၼ်သင်တႄႉတႄႉ ။ ၵွပ်ႈၼၼ်လႄႈ ႁဝ်းၶႃႈထုၵ်ႇလႆႈလဵပ်ႈႁဵၼ်းဝႃႈ ပႃႊတီႊဢၼ်လႂ်လီ ၊ ၼေႃႇၽူႈတႅၼ်းၵေႃႉလႂ်လီ ၊ ပၵ်းပိူင်လွၵ်းၸုၵ်းပႃႊတီႊဢၼ်လႂ် ထုၵ်ႇမႅၼ်ႈၸိုဝ်ႈၸႂ်ႈၵေႃႈ ႁဝ်းၶႃႈထုၵ်ႇလႆႈလိူၵ်ႈ ၵမ်ႉထႅမ် တွတ်ႈၶႅပ်းၵၢင်ၸႂ်ပၼ်ၼၼ်ႉၵူၺ်း - ဝႃႈၼႆ ။


ပႃႊတီႊသိူဝ်ၽိူၵ်ႇ (SNDP) ၼႆႉ ၵမ်ႉထႅမ်လွၵ်းပိူင် 14 ၸႄႈမိူင်း / တိူင်း ၊ ၶႂ်ႈပဵၼ်လူင်ပွင်ၸိုင်ႈမိူင်းတႆး ။ ပႃႊတီႊႁူဝ်သိူဝ် သမ်ႉ ၵမ်ႉထႅမ်လွၵ်းပိူင် 8 ၸႄႈမိူင်း / တိူင်း ၊ မိူင်းမၢၼ်ႈဢၼ်ယူႇထုင်ႉပဵင်းၼႆႉ မီးလၢႆတိူင်းၵေႃႈယဝ်ႉ ထုၵ်ႇလႆႈပဵၼ် 1 ၸႄႈမိူင်း / တိူင်းသေ မီးသုၼ်ႇလႆႈၽဵင်ႇပဵင်း ပဵင်းမိူင်းတႆးလႄႈ ၵူႈၸႄႈမိူင်းၶွင်ၸၢဝ်းၶိူဝ်း ။ ၶႂ်ႈၵေႃႇတင်ႈၸိုင်ႈမိူင်း ၾႅတ်ႊၻရႄႊလ် လူၺ်ႈလွၵ်းပိူင် ၻီႊမူဝ်ႊၶရေႊၸီႊ ၊ ၶႂ်ႈမူၼ်ႉမႄး ပိူင်ငဝ်ႈပိုင်းမိူင်း (လၵ်းမိူင်း) 2008 ။


ၸိူင်ႉႁိုဝ်ၵေႃႈယဝ်ႉ မိူင်းမၢၼ်ႈၼႆႉ ဢိင်ၼိူဝ်မၢၼ်ႈပဵၼ်လူင်ပွင်ၸိုင်ႈသေ ပေႃးပႃးတိူင်းၶိုၵ်ႉတွၼ်းလူင် ၼေႇပျီႇတေႃႇၼႆႉ ထုင်ႉမၢၼ်ႈယူႇသဝ်း မီး 8 တိူင်း။ ၽွင်းဢဝ်ပိူင်ငဝ်ႈပိုင်းမိူင်း 2008 ၽွင်းငမ်းဝၢၼ်ႈမိူင်းဝႆႉယူႇၼႆႉ ပဵၼ် 15 တိူင်း / ၸႄႈမိူင်းဝႆႉ၊ ဢမ်ႇၸႂ်ႈလွၵ်းပိူင် 14 တိူင်း / ၸႄႈမိူင်း။ ၵႃႈၸႂ်ႉၸၢႆႇၵူႈလွင်ႈလွင်ႈၵေႃႈ တိူင်းၼေႇပျီႇတေႃႇၼႆႉ ၼမ်လိူဝ်တိူင်းတႃႈၵုင်ႈ 2 ပုၼ်ႈ - ၼႆယဝ်ႉ ။