သိုၵ်းမၢၼ်ႈ သိုပ်ႇတိုၵ်းယိုဝ်း တပ်ႉသိုၵ်းၸိုင်ႈတႆး SSPP/SSA ႁိမ်းႁွမ်းဝၢၼ်ႈႁႆး ၊ သွင်ၾၢႆႇပဵၼ်ပၢင်တိုၵ်းၵၼ် ၶၢဝ်းၵၢင်ဝၼ်း တေႃႇထိုင်ၵၢင်ၶမ်ႈ ။ တၢင်းပၢင်ႇၸွႆးၵေႃႈ ပဵၼ်ပၢင်တိုၵ်းၵၼ် ႁဵတ်းႁႂ်ႈၵူၼ်းၶဝ်ႈၵၢတ်ႇ တူၵ်းၸႂ်တိုၼ်ႇသၢၼ်ႈၵၢတ်ႇႁၢမ်း ။

ၵူၼ်းၼႂ်းပိုၼ်ႉတီႈ ၸိူဝ်းပၢႆႈၽေးသိုၵ်း ႁွတ်ႈၽႅဝ်ယူႇသဝ်းဝႆႉတီႈ ဝတ်ႉမုၼ်ၸဝ်ႈႁၢႆးပႃ

ဝၼ်းတီႈ 27/10/2015 (မိူဝ်ႈဝႃး) တင်ႈတႄႇယၢမ်းဝၢႆးဝၼ်းမွၵ်ႈ 1 မူင်း ၊ သိုၵ်းမၢၼ်ႈလေႃႇတိုၵ်းတပ်ႉ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တီႈၵွင်းမုင်ႈမိူင်း ႁိမ်းဝၢၼ်ႈလူၺ် ဢၼ်ဢဝ်ႁူမ်ႇလူမ်ႈငဝ်ႈငုၼ်းဝၢၼ်ႈႁႆး ။ သွင်ၾၢႆႇ ပဵၼ်ပၢင်တိုၵ်းၵၼ်တေႃႇ ႁိမ်းၵၢင်ၶမ်ႈလပ်းသိင်ႇ- ၽူႈမီးပုၼ်ႈၽွၼ်း တီႈငဝ်ႈငုၼ်းဝၢၼ်ႈႁႆး ၸၼ်ႉၸဝ်ႈသိုၵ်း ၵေႃႉၼိုင်ႈလၢတ်ႈ ။


လိူဝ်သေၼၼ်ႉ တင်ႈတႄႇယၢမ်းဝၢႆးဝၼ်း 1 မူင်းၶိုင်ႈ ၊ သိုၵ်းမၢၼ်ႈတပ်ႉၶလယ 149 မိူင်းသူႈ ႁႅၼ်းသိုၵ်းလေႃႇတိုၵ်း SSPP/SSA ဢၼ်မီးတီႈႁိမ်းပၢင်ႇၸွႆး ၊ တၢင်းၵႂႃႇလွႆသႅင် ဝဵင်းမိူင်းသူႈသေ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း တေႃႇထိုင်ႁိမ်းႁူဝ်ၶမ်ႈ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ လုင်းၸၢႆးလူး ၵူၼ်းဝဵင်းမိူင်းသူႈ လၢတ်ႈဝႃႈ - သဵင်ၵွင်ႈတႄႇတႅၵ်ႇ ႁိမ်း 1 မူင်းဝၢႆးဝၼ်း တေႃႇထိုင်ၵၢင်ၶမ်ႈ ။ ၵွင်ႈလူင်ၵေႃႈ ယူႇယူႇဢွၵ်ႇ ၊ ၵွင်ႈဢွၼ်ႇၵေႃႈငိၼ်းၸွမ်း ။ သမ်ႉပဵၼ်ဝၼ်းၵၢတ်ႇဝၼ်းၽိတ်ႈ ဢွၵ်ႇဝႃႇသႃ ၊ ပေႃးဝႃႈငိၼ်းသဵင်ၵွင်ႈ သဵင်မၢၵ်ႇလူင်မေႃးယဝ်ႉၼႆၵေႃႈ ၵၢတ်ႇၵိုၼ်းဢိုၵ်ႉဢိုၵ်ႉၼႆႉ ၵူၼ်းဢွၼ်ၵၼ်တူၵ်းၸႂ်လႂ်တိုၼ်ႇသေၽူင်ႉပၢႆႈ ၊ ႁိပ်ႈၼႅတ်ႈပွၵ်ႈၶိုၼ်းသေ ၵၢတ်ႇၵေႃႈဝၢႆးလူင်ၵႂႃႇ သိုဝ်ႈၼႃႈတၼ်းတႃ ၊ ၵူၼ်းၶၢႆႁၢၼ်ႉ / သႅင်ႇၶဝ်ၵေႃႈ ဢိုတ်းႁၢၼ်ႉၶဝ်သေပွၵ်ႈ - ဝႃႈၼႆ ။


ၵူၼ်းမိူင်းသူႈ ၼၢင်းၺုၼ်ႉ လၢတ်ႈဝႃႈ - မိူဝ်ႈၼႆႉ (27/10/2015) ပဵၼ်ၵၢတ်ႇဝၼ်းၽိတ်ႈ ၊ ၵူႈပီႈၼႆႉ ၵၢတ်ႇဝၼ်းၽိတ်ႈဢွၵ်ႇဝႃႇ (လိူၼ်သိပ်းဢဵတ်းမူၼ်း) ၼႆႉ ၵိုၼ်းလိူဝ်ၵၢတ်ႇထမ်းမၻႃး ဢၼ်ပဵၼ်ယူႇတႃႇသေႇ ။ ၵၢတ်ႇလႂ်ၵေႃႈ ဢမ်ႇတွၼ်ႉၵိုၼ်းမိူၼ်ၵၢတ်ႇ ဝၼ်းၽိတ်းဢွၵ်ႇဝႃႈသေပွၵ်ႈ ။ ၵူၺ်းၵႃႈ ယွၼ်ႉသဵင်ၵွင်ႈမႃးတႅၵ်ႇႁိမ်းဝဵင်းသေ ႁဵတ်းႁႂ်ႈၵူၼ်းမႃးသိုဝ်ႉမႃးၶၢႆ မႃးၶဝ်ႈၵၢတ်ႇၶဝ်ၸိူဝ်းၼႆႉ တူၵ်းၸႂ်လႂ်တိုၼ်ႇပၢႆႈသေ ၵၢတ်ႇၵေႃႈလူႉၵႂႃႇ - ဝႃႈၼႆ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တင်းလူင်ပွင်ၸိုင်ႈမၢၼ်ႈ ပူၼ်ႉမႃးမိူဝ်ႈ ဝၼ်းတီႈ 28/01/2012 တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။ ဢိင်ၼိူဝ် ၶႂ်ႈႁႂ်ႈဝၢၼ်ႈမိူင်းၵတ်းယဵၼ်ၼိမ်သဝ်းသေ SSPP/SSA တုၵ်းယွၼ်းတီႈလူင်ပွင်ၸိုင်ႈမၢၼ်ႈဝႃႈ  ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်းၼႆႉ (NCA) ၼႆႉ ၶႂ်ႈႁႂ်ႈၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ လႆႈၶဝ်ႈပႃးၵူႈမူႇၵူႈၸုမ်း ။ ပေႃးပႆႇၶဝ်ႈပႃးၵူႈမူႇၵူႈၸုမ်းၸိုင် SSPP/SSA ပႆႇတူဝ်ႈတၼ်း တႃႇလူင်းလၢႆးမိုဝ်း NCA ။ ၵူၺ်းၵႃႈ ၾၢႆႇလူင်ပွင်ၸိုင်ႈ သမ်ႉဢမ်ႇႁပ်ႉၵူႈမူႇၵူႈၸုမ်း ၶဝ်ႈပႃးၼႂ်း NCA ။


တႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ် သိုၵ်းမၢၼ်ႈႁၢင်ႈႁႅင်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းမိူင်းသူႈ ႁၢဝ်ႈႁႅင်း ၊ သွင်ၾၢႆႇပဵၼ်ပၢင်တိုၵ်းၵၼ်ဢမ်ႇယွမ်းမွၵ်ႈ 50 ပွၵ်ႈ ။ မီးၵူၼ်းဝၢၼ်ႈၵူၼ်းမိူင်း လႆႈပၢႆႈၽေးသိုၵ်းယဝ်ႉ 3,000 ပၢႆ ။