ပိူဝ်ႈတႃႇၸွႆႈထႅမ် ၵူၼ်းထူပ်းၽေးသိုၵ်းသေ ၵူၼ်းၼုမ်ႇၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဢႅဝ်ႇႁႃၵဵပ်းငိုၼ်းတၢင်းလူႇတၢင်းတၢၼ်း ႁႃတၢင်းတႃႇတေၸွႆႈထႅမ် ။

ဝၼ်းတီႈ 22/10/2015 (မိူဝ်ႈဝႃး) ယၢမ်းပွတ်းၼႂ် ၵူၼ်းၼုမ်ႇၼႂ်းၸႄႈဝဵင်းၼမ်ႉၶမ်း ၊ ပႃးၸဵမ်ဝူင်းမဵတ်ႉတႃႇ ၊ ၵူၼ်းၼုမ်ႇပွတ်းထုင်ႉလွႆႁူဝ်သိူဝ် ၊ ၸုမ်းမေႃၵႂၢမ်းၼႂ်းဝဵင်းၼမ်ႉၶမ်း ၊ ၸုမ်းတွႆႇတိုင်ႈ ၼမ်ႉမၢဝ်းၶမ်း (ၸုမ်းတွႆႇတိုင်ႈၼမ်ႉၶေးမၢဝ်း) ၸိူဝ်းၼႆႉႁူမ်ႈၵၼ်သေ ၸတ်းႁဵတ်းပၢင်မူၼ်ႈသိူဝ်း တီႈပၢင်ပွႆးဝဵင်းၼမ်ႉၶမ်း ၊  လႆႈဢွၵ်ႇႁႃဢႅဝ်ႇၸွမ်းပွၵ်ႉၸွမ်းယွမ်ႇ ၸွမ်းဝၢၼ်ႈၸွမ်းသူၼ် ယွၼ်းၵဵပ်းငိုၼ်း တႃႇၵမ်ႉၸွႆႈၵူၼ်းထူပ်းၽေးသိုၵ်း - ၼႆယဝ်ႉ ။


လုင်းဢၢႆႈပီး ၵူၼ်းဝဵင်းၼမ်ႉၶမ်း လၢတ်ႈဝႃႈ - ငိုၼ်းဢၼ်ဝူင်းမဵတ်ႉတႃႇ တင်းၸုမ်းၵူၼ်းၼုမ်ႇၼမ်ႉၶမ်း ၊ ၵူၼ်းမိူင်းၼႂ်းပိုၼ်ႉတီႈ ထုင်ႉလွႆႁူဝ်သိူဝ် ႁူမ်ႈၵၼ်ႁႃၵဵပ်းလႆႈမႃးဢွၼ်ၼႃႈၼႆႉ တင်းၼမ်သႅၼ်မၼ်း ပေႃးမီး 70 ယဝ်ႉ ၊ ပိူဝ်ႈတႃႇတေၸွႆႈထႅမ် ၵူၼ်းထူပ်းၽေးသိုၵ်းၼႆႉ ။ ငိုၼ်းဢၼ်လႆႈမႃး 70 သႅၼ်ၼႆႉ ပႃးတင်းသင်ၶၸဝ်ႈ 3 တူၼ် ၵႃး 3 လမ်းသေ ၵႂႃႇၸွႆႈၵူၼ်းထူပ်းၽေးသိုၵ်း တၢင်းမိူင်းသူႈ ဝၼ်းတီႈ 22/10/2015 (မိူဝ်ႈဝႃး)ယဝ်ႉ - ဝႃႈၼႆ ။


ၽူႈဢၼ်ၵႂႃႇၸွမ်း ၵၢၼ်ဢႅဝ်ႇႁႃၵဵပ်းငိုၼ်း (ဝၼ်းတီႈ 22/10/2015) ၸၢႆးသႅင်ၸၢႆး လၢတ်ႈဝႃႈ - ဢၼ်ၵဵပ်းလႆႈမိူဝ်ႈဝႃးၼႆႉ လႆႈ 20 သႅၼ် ၊ မိူဝ်ႈၼႆႉၵေႃႈ တိုၵ်ႉသိုပ်ႇၵႂႃႇၵဵပ်းထႅင်ႈ ။ ဢၼ်ၵဵပ်းလႆႈမႃးငိုၼ်းလႄႈ ၶူဝ်းၶွင်ၸိူဝ်းၼႆႉ တေႁဵတ်းပၢင်ၵုမ်ၵၼ်သေ တေၵႂႃႇၸွႆႈၵူၼ်းၸိူဝ်းထူပ်းၽေးၶဝ်ထႅင်ႈ - ဝႃႈၼႆ ။


မေႃၵႂၢမ်း ၼၢင်းၶမ်းၵေႃ ၵေႃႉၵႂႃႇၸွႆႈၵဵပ်းငိုၼ်း တႃႇၵမ်ႉထႅမ်ၵူၼ်းပၢႆႈၽေး လၢတ်ႈဝႃႈ - ဢၼ်ၵႂႃႇႁႃၵဵပ်းငိုၼ်းတၢင်ႇလူႇတၢင်းတၢၼ်း ၸွမ်းဝၢၼ်ႈၸွမ်းသူၼ်ၼႆႉ ႁိူဝ်ႉၵေႃႈႁိူဝ်ႉ ၊ မူၼ်ႈၵေႃႈမူၼ်ႈ၊ ၵူၺ်းၵႃႈ မၼ်းပဵၼ်ၸႂ်ပိတိၸူမ်းသိူဝ်းၸွမ်း ၼႃႈၵၢၼ်ဢၼ်လႆႈတူင်ႉၼိုင် - ဝႃႈၼႆ ။


ယွၼ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) တင်ႈတႄႇၽွင်းႁူဝ်လိူၼ်ၼႆႉ မႃးသေ မီးၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင်လႆႈပၢႆႈၽေးသိုၵ်းဝႆႉ ၼႂ်းၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။ တီႈဝတ်ႉ (ၵျွင်း) မုၼ်ၸဝ်ႈႁၢႆးပႃ (ၸဵင်ႇၸၢၼ်းဝၼ်းတူၵ်းမိူင်းသူႈ) မီး 3,000 ပၢႆ ။ ၸိူဝ်းပၢႆႈၵႂႃႇမီးယူႇတီႈ ဝၢၼ်ႈသေႃႉ 1,200 ပၢႆ ။ ၸိူဝ်းပၢႆႈၵႂႃႇမီးတီႈမိူင်းၼွင်ၵေႃႈမွၵ်ႈ 200 ။ ၸိူဝ်းပၢႆႈယူႇသဝ်းမီးဝႆႉတီႈငဝ်ႈငုၼ်း SSPP/SSA တီႈဝၢၼ်ႈႁႆးၵေႃႈ မီး 800 ပၢႆ ။