ဢိင်ၼိူဝ် လူင်ပွင်ၸိုင်ႈမၢၼ်ႈ တင်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ 8 ၸုမ်း လူင်းလၢႆးမိုဝ်းၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ၽွင်းၵၢင်လိူၼ်ၼႆႉသေ မီးလၢႆတီႈလၢႆၸႄႈဝဵင်း ၼႂ်းၸိုင်ႈတႆး ၸတ်းပၢင်ၵမ်ႉထႅမ် ။

မိူဝ်ႈဝၼ်းတီႈ 23/10/2015 မီးၵၢၼ်ၸတ်း ပၢင်ႁူမ်ၸူမ်းၵမ်ႉထႅမ် ၵၢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း (NCA) တီႈႁူင်းလဵၼ်ႈႁႅင်း ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၊ ၵူၼ်းမႃးၶဝ်ႈႁူမ်ႈမီးမွၵ်ႈ 4,000 ၵေႃႉပၢႆ ။


တီႈပၢင်ၼၼ်ႉ ၵေႃႉႁပ်ႉပုၼ်ႈၽွၼ်း ၽူႈၼင်ႈၸိုင်ႈ ပဵၼ်ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ၸၢႆးဢွင်ႇသႃႇ ။ ယူႇတီႈ ၸၢႆးဢွင်ႇသႃႇသေ လၢတ်ႈဝႃႈ ႁဝ်းၶႃႈႁူမ်ၸူမ်းၵမ်ႉထႅမ် ႁပ်ႉတွၼ်ႈ ၵၢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ဢၼ်လမ်ႇလွင်ႈ တွၼ်ႈတႃႇၸိုင်ႈမိူင်းႁဝ်းတႄႉတႄႉၼၼ်ႉ - ဝႃႈၼႆ ။


ၸၢႆးၼုတ်း ၽူႈၼမ်းၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ၵေႃႈလၢတ်ႈဝႃႈ - “ ႁဝ်းၶႃႈၵေႃႈ ဢွၼ်ၵၼ်ႁူမ်ၸူမ်းႁပ်ႉတွၼ်ႈ တႄႉတႄႉဝႃႈဝႃႈယူႇ ။ ႁဝ်းၶႃႈမုင်ႈမွင်းဝႆႉဝႃႈ ပေႃးလူင်းလၢႆးမိုဝ်း NCA ယဝ်ႉ တေႁဵတ်းႁႂ်ႈပၢင်တိုၵ်းသိုၵ်းသိူဝ် ၼႂ်းၸိုင်ႈတႆးၼႆႉ ၵိုတ်းယဵၼ်ၵႂႃႇ ၊ ႁဝ်းၶႃႈယုမ်ႇယမ်ၸိူင်ႉၼၼ် ”- ဝႃႈၼႆ ။


ၸၢႆးဢွင်ႇသႃႇ လၢတ်ႈထႅင်ႈဝႃႈ - “ ပၢင်တိုၵ်း ဢၼ်ပဵၼ်ယူႇတၢင်းၸိုင်ႈတႆးပွတ်းႁွင်ႇၼၼ်ႉ ႁဝ်းၶႃႈမႃးလဵပ်ႈႁဵၼ်းတူၺ်းတႄႉ မၼ်းပဵၼ်ယွၼ်ႉပိူဝ်ႈ ၼႃႈလိၼ်လႄႈငဝ်းလၢႆး ။ ယွၼ်ႉပိူဝ်ႈပၢင်တိုၵ်းသေ ႁဝ်းၶႃႈၵေႃႈလႆႈယိၼ်းၸႂ်ဢမ်ႇလီၸွမ်း တင်းသွင်ပႃႈသွင်ၾၢႆႇ။ ဢၼ်တုမ်ႉတိူဝ်ႉလိူဝ်ႁႅင်းတႄႉ ပဵၼ်ၵူၼ်းမိူင်းၸိူဝ်းလႆႈၺႃးၸၢၵ်ႇပၢင်တိုၵ်း ၊ ႁဝ်းၶႃႈၵေႃႈ ယိၼ်းဢေးလူ ႁူႉထိုင်ၵၢင်ၸႂ်ၵူၼ်းမိူင်း ၸိူဝ်းထူပ်းၽေးသိုၵ်းၸိူဝ်းၼၼ်ႉယူႇ ”- ဝႃႈၼႆ ။


ၸၢႆးၶုၼ်ႇဢွင်ႇ ၵေႃႉၶဝ်ႈႁူမ်ႈ ပၢင်ၵမ်ႉထႅမ် တီႈတူၼ်ႈတီး သမ်ႉလၢတ်ႈဝႃႈ - ၵူၼ်းလူင်ႁွင်ႉလႄႈႁဝ်းၶႃႈမႃးၵူၺ်း၊ ႁဝ်းၶႃႈဢမ်ႇႁူႉဢွၼ်တၢင်းဝႃႈ တေမႃးႁဵတ်းသင် ၊ ၽိူဝ်ႇမႃးၽႅဝ်တီႈၼႆႉ ၸင်ႇလႆႈႁူႉဝႃႈ ပဵၼ်ပၢင်ၵမ်ႉထႅမ် NCA - ဝႃႈၼႆ ။


ဝၼ်းလဵဝ်ၵၼ် ဝၼ်းတီႈ 23/10/2015 ၼၼ်ႉ တီႈၸႄႈဝဵင်းလႃႈသဵဝ်ႈၵေႃႈ ယွၼ်ႉၽူႈၵွၼ်းၸႄႈဝဵင်းၶဝ် ၸီႉသင်ႇလၢတ်ႈၼႄသေ ၵူၼ်းမိူင်းၵူႈပွၵ်ႉၵူႈယွမ်ႇ ၼႂ်းဝဵင်းလႃႈသဵဝ်ႈ လႆႈဢွၼ်ၵၼ်မႃးႁူမ်ႈၵၼ်တီႈ ဝတ်ႉ (ၵျွင်း) ဝၢၼ်ႈသူႈသေ ၼႄၵၢင်ၸႂ်ဝႃႈ ၵမ်ႉထႅမ် NCA ၊ ၵူၼ်းမႃးၶဝ်ႈႁူမ်ႈတီႈလႃႈသဵဝ်ႈ မီးမွၵ်ႈ 400-500 ၵေႃႉၵူၺ်း ၊ ၵမ်ႈၼမ် ပဵၼ်ၶႃႈႁၢပ်ႇၵၢၼ်ၶုၼ်လႄႈ ၵူၼ်းဝၢၼ်ႈၵူၼ်းမိူင်းဢိတ်းဢွတ်း ဢၼ်လုၵ်ႉမႃးၵူႈပွၵ်ႉၵူႈယွမ်ႇ - ၼႆယဝ်ႉ ။


ၼွၵ်ႈသေၼၼ်ႉ တၢင်ႇတီႈတၢင်ႇဝဵင်း မိူၼ်ၼင်ႇတၢင်းမူႇႄၸႈ လႄႈလၢႆလၢႆတီႈၵေႃႈ ငိၼ်းဝႃႈတေၸတ်းႁဵတ်း ပၢင်ၵမ်ႉထႅမ် NCA ယူႇ လႆႈႁူႉၼင်ႇၼႆ ။


ပူၼ်ႉမႃးမိူဝ်ႈဝၼ်းတီႈ 15/10/2015 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း တင်း လူင်ပွင်ၸိုင်ႈမၢၼ်ႈ ဢၼ်ၸွမ်ၸိုင်ႈတဵင်းၸဵင်ႇ ဢွၼ်ႁူဝ် လႄႈ တူဝ်တႅၼ်းလူင်ပွင်ၸိုင်ႈ 9 ၵေႃႉ လႆႈလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ၵၼ် တီႈၼေႇပျီႇတေႃႇ ။


ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်းၼၼ်ႉ 1. ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ။ 2. တပ်ႉသိုၵ်းယၢင်း ပိူဝ်ႈၽွၼ်းလီ ၻီႊမူဝ်ႊၶရေႊၸီႊ (DKBA) ။ 3. တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်း (KNU/KNLA-PC) 4. တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ။ 5. ၸုမ်းပူတ်းပွႆႇၸိူဝ်ႉၸၢတ်ႈ ပဢူဝ်း (PNLO) ။ 6. ပႃႊတီႊပူတ်းပွႆႇရၶႅင်ႇ (ALP) ။ 7. တႅမ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ။ 8. ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸိူဝ်းၼႆႉ ။