ၶွင်ႊသီႊဢဝ်ၶိုၼ်းၸိုင်ႈတႆး (RCSS) ႁူပ်ႉထူပ်းၵူၼ်းမိူင်း တီႈဝဵင်းတႃႈၶီႈလဵၵ်း ၊ သပ်းလႅင်းလွင်ႈၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ဢၼ်လႆႈၵႂႃႇလူင်းလၢႆးမိုဝ်း မိူဝ်ႈဝၼ်းတီႈ 15/10/2015 တီႈၼေႇပျီႇတေႃႇ ။

မိူဝ်ႈဝၼ်းတီႈ 22/10/2015 ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ႁူပ်ႉထူပ်းၵူၼ်းမိူင်း တီႈဝိႁၢရ်ႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ။ မွၵ်ႇလၢတ်ႈသပ်းလႅင်း ၵဵဝ်ႇၵပ်းလွင်ႈ လူင်းလၢႆးမိုဝ်းၵိၼ်ၵႅၼ်ႇ ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) တီႈၼေႇပျီႇတေႃႇ ပူၼ်ႉမႃးမိူဝ်ႈ ဝၼ်းတီႈ 15/10/2015 ၊ မီးၸုမ်း ပႃႊတီႊႁူဝ်သိူဝ် ၊ ပႃႊတီႊသိူဝ်ၽိူၵ်ႇ ၊ ၸုမ်းႁူဝ်မိူင်းသႂ် လႄႈ ပီႈၼွင်ႉၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းတႃႈၶီႈလဵၵ်း မႃးၶဝ်ႈႁူမ်ႈထွမ်ႇငိၼ်းတင်းၼမ် - ၼႆယဝ်ႉ ။


ႁူဝ်ပဝ်ႈ RCSS/SSA ၸွမ်သိုၵ်းယွတ်ႈသိုၵ်း မွၵ်ႇလၢတ်ႈၵႂၢမ်း သပ်းလႅင်းၼႄလွင်ႈ လႆႈလူင်းလၢႆးမိုဝ်း ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ။ မၼ်းၸဝ်ႈလၢတ်ႈပႃးဝႃႈ NCA ၼႆႉပဵၼ်ပိူဝ်ႈတႃႇၵႄႈလိတ်ႈပၼ်ႁႃ ၵၢၼ်ၸိူဝ်ႉၸၢတ်ႈ ။ ပေႃးဝႃႈဢုပ်ႇဢူဝ်းၵၼ်ယဝ်ႉတင်းမူတ်းယဝ်ႉ ၊ မီးလူင်ပွင်ၸိုင်ႈမႂ်ႇၶိုၼ်ႈမႃးယဝ်ႉ ၼႂ်းၶေႃႈတူၵ်းလူင်း NCA ၵေႃႈ တႅမ်ႈပႃးယူႇဝႃႈ တေၼမ်းဢဝ်ၵႂႃႇလၢတ်ႈၼႂ်းသၽႃး ၊ ႁႂ်ႈသၽႃးႁပ်ႉႁွင်းမၵ်းမၼ်ႈ ။ ပေႃးသၽႃးမၵ်းမၼ်ႈၵေႃႈ လူင်ပွင်ၸိုင်ႈဢၼ်လႂ်ၶိုၼ်ႈမႃးၵေႃႈ တေလႆႈသိုပ်ႇႁဵတ်းၵႂႃႇ ။ ပေႃးဝႃႈလူင်ပွင်ၸိုင်ႈမႂ်ႇၶိုၼ်ႈမႃးသေ ဢမ်ႇသိုပ်ႇႁဵတ်းၵေႃႈ တေလႆႈဢုပ်ႇဢူဝ်းၵၼ်မႂ်ႇ ၊ ပေႃးဢမ်ႇၼၼ်ၵေႃႈ ၶဝ်တေသူင်လိူတ်ႈတႅမ်ႈပိုၼ်းႁိုဝ် ၼႆႉပဵၼ်ၵႂၢမ်းတွပ်ႇ - ဝႃႈၼႆ ။


တီႈပၢင်သပ်းလႅင်းၼၼ်ႉ ၸဝ်ႈယွတ်ႈသိုၵ်း လၢတ်ႈပႃးဝႃႈ - မိူဝ်ႈပဵၼ်ပၢင်တိုၵ်းၵၼ် တီႈဝၢၼ်ႈႁႆး မိူဝ်ႈဝၼ်းတီႈ 14/10/2015 ၼၼ်ႉ မႅၼ်ႈမိူဝ်ႈႁဝ်းမီးတီႈၼေႇပျီႇတေႃႇ ၊ ႁူပ်ႉထူပ်းၵူၼ်းလူင်ၶဝ်လႄႈ ဢူးဢွင်ႇမိၼ်း (ၵႅမ်ႁူဝ်ပဝ်ႈ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် UPWC) ၼၼ်ႉ ႁဝ်းၵေႃႈလႆႈလၢတ်ႈပၼ်ၶဝ်ဝႃႈ ႁႂ်ႈၵိုတ်း၊ ယႃႇပေသိုပ်ႇတိုၵ်း - ဝႃႈၼႆ ။


ၼွၵ်ႈသေၼၼ်ႉ မၼ်းၸဝ်ႈ ယင်းပၼ်ၵႂၢမ်းသင်ႇသွၼ် တႃႇၸိူဝ်ႉၶိူဝ်းတႆးဝႃႈ - လုၵ်ႈဢွၼ်ႇပဵၼ်ႁႅင်းမိူင်း ၊ ထုၵ်ႇလႆႈႁဵၼ်းတၢင်းႁူႉ ၊ ယႃႇပေၵုမ်ႇၵႂႃႇမဝ်းလဝ်ႈ မဝ်းယႃႈ ။ ပေႃးၽူႈၸၢႆးႁဝ်း ၵုမ်ႇၵႂႃႇႁႃမဝ်းလဝ်ႈ ၽူႈယိင်းႁဝ်းၵေႃႈပိူၼ်ႈဢဝ်ၵႂႃႇတိၵ်းတိၵ်း ။ ၵွပ်ႈၼႆ ၸင်ႇဝႃႈလုၵ်ႈဢွၼ်ႇၼုမ်ႇၼႆႉ ႁႂ်ႈလဵပ်ႈႁဵၼ်း ႁႂ်ႈႁဵၼ်းသွၼ် ပုၼ်ႈတႃႇၵၢၼ်မိူင်းႁဝ်းမိူဝ်းၼႃႈ ။ ပေႃႈမႄႈၵေႃႈ ထုၵ်ႇလႆႈၼႄတၢင်း သင်ႇသွၼ်ပၼ်လုၵ်ႈလၢင်း ယႃႇႁႂ်ႈလုၵ်ႈလၢင်းလႆႈၵႂႃႇ တၢင်းၽိတ်း။ ပေႃးဝႃႈ လုၵ်ႈလၢင်းၵႂႃႇတၢင်းၽိတ်း သူၸဝ်ႈသွၼ်ဢမ်ႇလႆႈ မိူဝ်းပၼ်ၶႃႈႁဝ်းလႄႈ ၶႃႈႁဝ်းတေသွၼ်ပၼ် ။ ယႃႇဝႃႈ လူင်းလၢႆးမိုဝ်းၵိုတ်းသိုၵ်းယဝ်ႉ ဢမ်ႇတၢပ်ႈမီးသိုၵ်း ။ ၵူၺ်းၵဝ်ၶႃႈ ၶႂ်ႈလႆႈၶႂ်ႈမီးပလိၵ်ႈ ၊ ပလိၵ်ႈၼႆႉတေလႆႈမီးၼမ်ၼမ် ၊ ပေႃးဢမ်ႇမီးပလိၵ်ႈၼႆႉ တေႁဵတ်းႁိုဝ်ၽွင်းငမ်း - ဝႃႈၼႆ ။


ဢွၼ်ၼႃႈၼႆႉ မိူဝ်ႈဝၼ်းတီႈ 18/10/2015 RCSS/SSA လႆႈႁူပ်ႉထူပ်းၵူၼ်းမိူင်း တီႈဝဵင်းလိူဝ်ႇ (မၼ်းတလေး) ၊ သပ်းလႅင်းၼႄ ၵဵဝ်ႇၵပ်းလွင်ႈ NCA ။ ထိုင်မႃးဝၼ်းတီႈ 19/10/2015 RCSS/SSA မႃးႁူပ်ႉထူပ်းၵူၼ်းမိူင်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။


ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ဢၼ်ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈ ယၢမ်းလဵဝ်ၼႆႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်း ၵေႃႇသၢင်ႈလွင်ႈငမ်းယဵၼ် တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ပူၼ်ႉမႃးမိူဝ်ႈႁူဝ်ပီ 2012 ။ ထိုင်မႃးမိူဝ်ႈ ဝၼ်းၸိုင်ႈမိူင်းႁူမ်ႈတုမ် ၶွပ်ႈၶူပ်ႇ 68 ပီ ဝၼ်းတီႈ 12/02/2015 ၵေႃႈ လႆႈလူင်းလၢႆးမိုဝ်း ႁူမ်ႈပၼ်ၵႂၢမ်းမၼ်ႈၵႅၼ်ႇၵၼ် တင်းလူင်ပွင်ၸိုင်ႈမၢၼ်ႈ လွင်ႈတေႁူမ်ႈၵၼ်ၵေႃႇသၢင်ႈလွင်ႈငမ်းယဵၼ် ။


ဢိင်ၼိူဝ် လွင်ႈၶတ်းၸႂ်ၵေႃႇသၢင်ႈလွင်ႈငမ်းယဵၼ်သေ ထိုင်မႃးမိူဝ်ႈဝၼ်းတီႈ 15/10/2015 ပွတ်းၼႂ် ၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း  1. ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ။ 2.တပ်ႉသိုၵ်းယၢင်း ပိူဝ်ႈၽွၼ်းလီ ၻီႊမူဝ်ႊၶရေႊၸီႊ (DKBA) ။ 3. တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်း (KNU/KNLA-PC) 4. တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ။ 5. ၸုမ်းပူတ်းပွႆႇၸိူဝ်ႉၸၢတ်ႈ ပဢူဝ်း (PNLO) ။ 6. ပႃႊတီႊပူတ်းပွႆႇရၶႅင်ႇ (ALP) ။ 7. တႅမ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ။ 8. ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸိူဝ်းၼႆႉ လႆႈႁူမ်ႈလူင်းလၢႆးမိုဝ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) တင်း လူင်ပွင်ၸိုင်ႈမၢၼ်ႈ တီႈဝဵင်းလူင်ၼေႇပျီႇတေႃႇ မိူင်းမၢၼ်ႈ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း ၵေႃႈလၢတ်ႈဢွၼ်ၼႃႈၼၼ်ႉဝႃႈ ၵၢၼ်လူင်းလၢႆးမိုဝ်း NCA ပဵၼ်ပိူဝ်ႈတႃႇ ၵႄႈလိတ်ႈပၼ်ႁႃၵၢၼ်မိူင်း ။