ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း၊ ဢၼ်ပႃးၸုမ်းယၢင်း 3 ၸုမ်း၊ ၸုမ်းရၶႅင်ႇ၊ ၶျၢင်း၊ ပဢူဝ်း၊ ၸုမ်းလုၵ်ႈႁဵၼ်းမိူင်းမၢၼ်ႈ လႄႈ ၸုမ်းတႆး (RCSS/SSA) လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း တီႈၼေႇပျီႇတေႃႇ ယဝ်ႉတူဝ်ႈၵႂႃႇလီငၢမ်း။

မိူဝ်ႈဝၼ်းတီႈ 15/10/2015 ၼႆႉပွတ်းၼႂ်၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း  1.ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ။ 2.တပ်ႉသိုၵ်းယၢင်း ပိူဝ်ႈၽွၼ်းလီ ၻီႊမူဝ်ႊၶရေႊၸီႊ (DKBA) ။ 3.တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်း (KNU/KNLA-PC) 4.တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ။ 5.ၸုမ်းပူတ်းပွႆႇၸိူဝ်ႉၸၢတ်ႈ ပဢူဝ်း (PNLO) ။ 6.ပႃႊတီႊပူတ်းပွႆႇရၶႅင်ႇ (ALP) ။ 7.တႅမ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ။ 8.ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸိူဝ်းၼႆႉ လႆႈႁူမ်ႈလူင်းလၢႆးမိုဝ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) တင်း လူင်ပွင်ၸိုင်ႈမၢၼ်ႈ ယဝ်ႉတူဝ်ႈၵႂႃႇလီငၢမ်း တီႈဝဵင်းလူင်ၼေႇပျီႇတေႃႇ မိူင်းမၢၼ်ႈ။


ၵဵဝ်ႇၵပ်းလွင်ႈၼႆႉ ဢွၼ်ၼႃႈၼႆႉ ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း ၵေႃႈလၢတ်ႈဝႃႈ လူင်းလၢႆးမိုဝ်း NCA ပဵၼ်ပိူဝ်ႈတႃႇ ၵႄႈလိတ်ႈပၼ်ႁႃၵၢၼ်မိူင်း။


ၾၢႆႇၼိုင်ႈတၢင်းၼိုင်ႈ၊ ပူၼ်ႉမႃးမိူဝ်ႈဝၼ်းတီႈ 08/10/2015 ၵေႃႈ ယူႇတီႈ RCSS/SSA လႆႈၸတ်းႁဵတ်း ပၢင်သပ်းၸႅင်ႈၶၢဝ်ႇသေ မီးၽူႈသိုဝ်ႇၶၢဝ်ႇလၢႆလၢႆၸုမ်း ၶဝ်ႈႁူမ်ႈ။ တီႈပၢင်သပ်းၸႅင်ႈၶၢဝ်ႇၼၼ်ႉ ၸွမ်သိုၵ်းယွတ်ႈသိုၵ်း လၢတ်ႈဝႃႈ- ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ပဵၼ်ပိူဝ်ႈတႃႇ ၵႄႈလိတ်ႈပၼ်ႁႃၵၢၼ်မိူင်း။ မိူဝ်ႈလဵဝ် တိုၵ်ႉမီး 8 ၸုမ်းၵူၺ်း၊ ႁႂ်ႈၵိုင်ႇတင်း ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းၸိုင်ႈမိူင်းႁူမ်ႈတုမ်မၢၼ်ႈ ထုၵ်ႇလႆႈၶဝ်ႈႁူမ်ႈပႃးၵူႈၸုမ်း။


မိူဝ်ႈၼၼ်ႉ ႁူဝ်ပဝ်ႈ RCSS/SSA လၢတ်ႈၼႄဝႃႈ-  တႃႇတေလူင်းလၢႆးမိုဝ်း NCA ဝၼ်းတီႈ 15/10/2015 ၼႆႉ ႁဝ်းႁၼ်ဝႃႈ NCA ၼႆႉ မၼ်းပဵၼ်ပိူဝ်ႈတႃႇတေၵႄႈပၼ်ႁႃၵၢၼ်မိူင်း။ ႁဝ်းတုၵ်းယွၼ်းတီႈလူင်ပွင်ၸိုင်ႈၼႆႉ ၽွင်းယၢမ်းႁဝ်းဢုပ်ႇဢူဝ်းယူင်ႉၶၢပ်ႈၵၢၼ်မိူင်းၵၼ်၊ ၵိုတ်းသိုၵ်းၵၼ်ယဝ်ႉၼၼ်ႉ ဢမ်ႇၶႂ်ႈႁႂ်ႈတပ်ႉသိုၵ်းမၢၼ်ႈ ၵႂႃႇသွၵ်ႈႁႃလမ်းယိုဝ်းၵူၼ်းႁဝ်း ၸိူဝ်းမီးယူႇၼႂ်းထိူၼ်ႇၼႂ်းၶိူဝ်း ၼႂ်းၸႄႈဝဵင်းၼႂ်းမိူင်းတႆးၵူႈတီႈတီႈ။ မီးပၼ်ႁႃသင်ၵၼ်မႃးၵေႃႈ ၶႂ်ႈႁႂ်ႈဢုပ်ႇဢူဝ်းၵၼ်၊ ယဝ်ႉၵေႃႈလုမ်းၵပ်းသၢၼ်ၼၼ်ႉ ၶႂ်ႈႁႂ်ႈဝႆႉလမ်ႇလွင်ႈသေ ႁႂ်ႈလႆႈပိုတ်ႇၵႂႃႇထႅင်ႈၼမ်ၼမ်၊ မၼ်းတေၵႄႈပၼ်ႁႃလႆႈ- ဝႃႈၼႆ။


NCA ၼႆႉ ပေႃးလူင်းလၢႆးမိုဝ်းၵႂႃႇယဝ်ႉ ၶႂ်ႈႁႂ်ႈသၢင်ႈလွင်ႈယုမ်ႇယမ်ၵၼ်၊ မီးသင်ၵေႃႈဢုပ်ႇၵၼ်၊ ဢၼ်ၼႆႉလမ်ႇလွင်ႈသေပိူၼ်ႈ။ NCA ၼႆႉ ႁႂ်ႈမၼ်းၵိုင်ႇ NCA ၊ မိူဝ်ႈလဵဝ်ၼႆႉ တိုၵ်ႉမီး 8 ၸုမ်းၵူၺ်း၊ ဢၼ်ၵိုတ်းၸိူဝ်းၼၼ်ႉၵေႃႈ ၶႂ်ႈႁႂ်ႈၶဝ်ႈမႃးႁူမ်ႈ ၵူႈၸုမ်းၸုမ်း ၼႂ်းမိူင်းႁူမ်ႈတုမ်မိူင်းမၢၼ်ႈၼႆႉ၊ ႁႂ်ႈၵိုတ်းသိုၵ်းမိူၼ်ၵၼ်မူတ်း။ ၵိုတ်းသိုၵ်းၸုမ်းၼိုင်ႈသေ ဢဝ်ဢဵၼ်ႁႅင်းသိုၵ်း ၵႂႃႇတိုၵ်းယိုဝ်းမင်ထႅင်ႈ ၸုမ်းၼိုင်ႈၼၼ်ႉ ႁဝ်းဢမ်ႇၶႂ်ႈႁႂ်ႈပဵၼ်၊ လွင်ႈၼၼ်ႉ ႁဝ်းဢမ်ႇပၼ်ႁႅင်း၊ ႁဝ်းဢမ်ႇႁၼ်လီ၊ ၶႂ်ႈႁႂ်ႈလူင်ပွင်ၸိုင်ႈ ဝႆႉၸႂ်ယၢဝ်းယၢဝ်းသေဢုပ်ႇဢူဝ်းၵၼ် ၵႄႈပၼ်ႁႃၼႆႉ လီသေပိူၼ်ႈ။


ၶေႃႈၸုၵ်းမၼ်ႈႁဝ်း ဢၼ်ႁဝ်းလူင်းလၢႆးမိုဝ်း NCA ၼႆႉ ၶႂ်ႈႁႂ်ႈၵႄႈပၼ်ႁႃၵၢၼ်မိူင်း၊ ၶႂ်ႈႁႂ်ႈပဵၼ်မႃး ၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် /ဢၼ်ထုၵ်ႇမႅၼ်ႈမၼ်း။ တႃႇႁဝ်းတေလူင်းလၢႆးမိုဝ်း NCA ၼႆႉၵေႃႈ ႁဝ်းလႆႈဝူၼ်ႉလၢႆၾၢႆႇလၢႆတၢင်း၊ ၵွပ်ႈဝႃႈ ၵူၼ်းမိူင်းႁဝ်းႁၼ်ဝႃႈ လိၵ်ႈႁူမ်ႈမၢႆပၢင်လူင်ၼၼ်ႉ မၢၼ်ႈယင်းၸၢင်ႈႁၵ်းလင်ႁဝ်း။ ၵိုတ်းသိုၵ်းၵၼ်မႃး 20 ပီပၢႆယဝ်ႉ ယင်းမီးပၢင်တိုၵ်းၵၼ်ယူႇ။ လူင်းလၢႆးမိုဝ်းၵမ်းၼႆႉၵေႃႈ ဢမ်ႇယုမ်ႇလႆႈ ဢၼ်ဝႃႈၼၼ်ႉၵေႃႈ မီးၵူၼ်းထတ်းသၢင်တင်းၼမ်။ ၵွပ်ႈၼႆလႄႈ ႁဝ်းႁၼ်ဝႃႈ ငဝ်းလၢႆးဢၼ်ပူၼ်ႉမႃးလႄႈ ငဝ်းလၢႆးဢၼ်တေပဵၼ်ၵႂႃႇတၢင်းၼႃႈၼႆႉ မၼ်းၸၢင်ႈလႅၵ်ႈလၢႆႈယူႇ။ ႁဝ်းၵေႃႈမုင်ႈမွင်းဝႆႉဝႃႈ လူင်ပွင်ၸိုင်ႈတဵင်းၸဵင်ႇၼႆႉ လွင်ႈၽွမ်ႉႁူမ်ႈ/ လွင်ႈမူၼ်ႉမႄးဝၢၼ်ႈမိူင်းၼႆႉ တေဢဝ်သႂ်ႇၸႂ်ယူႇ။ ႁဝ်းဢတိတ်ႉထၢၼ် (ယွၼ်းသူး)ဝႆႉဝႃႈ ၽူႈဢွၼ်ႁူဝ်ၵူႈၵေႃႉၵေႃႉ ၸိူဝ်းမႃးဢမ်းၼၢၸ်ႈ (ဢႃႇၼႃႇ)ၼၼ်ႉ ႁဝ်းထုၵ်ႇလႆႈမႃးႁူမ်ႈၵၼ်ၵႄႈလိတ်ႈပၼ်ႁႃ မၼ်းၸင်ႇတေငၢႆႈလီ။ တႃႇတေၵႄႈပၼ်ႁႃၼႆႉ တေလႆႈသိုဝ်ႈယူဝ်းတေႃႇၵၼ်- ၸဝ်ႈယွတ်ႈသိုၵ်း သိုပ်ႇလၢတ်ႈၵႂႃႇၼင်ႇၼႆ။


ၼွၵ်ႈသေၼၼ်ႉ လိၵ်ႈပိုၼ်ၽၢဝ်ႇ ၶွင် RCSS/SSA ဢၼ်ဢွၵ်ႇ မိူဝ်ႈဝၼ်းတီႈ 08/10/2015 တင်းမူတ်း 8 ၶေႃႈ၊ ၶေႃႈတီႈ 8 လၢတ်ႈဝႃႈ-ပၼ်ႁႃၵၢၼ်မိူင်းလႄႈ ၵၢၼ်ၸိူဝ်ႉၸၢတ်ႈၼၼ်ႉ လူဝ်ႇၽွမ်ႉၵၼ်ၵႄႈၶႆလႄႈ တႃႇတေယူႇႁူမ်ႈသဝ်း ၸွမ်းၵၼ်လႆႈ ၼင်ႇၵတ်းၵတ်းယဵၼ်ယဵၼ်ၼႆႉ ထုၵ်ႇလႆႈသၢင်ႈလွင်ႈယုမ်ႇယမ်ၵၼ်လႄႈ ဝူၼ်ႉမႄး ပိူင်ပိုင်းၸိုင်ႈမိူင်းၼၼ်ႉယဝ်ႉ။ ပုၼ်ႈတႃႇတေၵေႃႇတင်ႈလႆႈ မိူင်းႁူမ်ႈတုမ် ၸႅတ်ႈၸၢင်ႇဢၼ်ႁပ်ႉႁွင်းပၼ်လႆႈၶိုၼ်း သုၼ်ႇလႆႈသုၼ်ႇပဵၼ်လွင်ႈၽဵင်ႇပဵင်း၊ လွင်ႈတႅပ်း တတ်းတူဝ်ၵဝ်ႇ ပိူင်ၾႅတ်ႊၻရႄႊလ် ၻီႊမူဝ်ႊၶရေႊၸီႊ ၸွမ်းၼင်ႇၶေႃႈလႆႈၸႂ်ပၢင်လူင်သေ တင်ႈမိူင်းႁူမ်ႈတုမ် မႃးၸွမ်းၵၼ်ၼၼ်ႉလႄႈ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ၸင်ႇလႆႈတႅပ်းတတ်း လူင်းလၢႆးမိုဝ်း ၽိုၼ်လိၵ်ႈမၼ်ႈၵႅၼ်ႇၵိုတ်းယိုဝ်းၵၼ် ၸိုင်ႈမိူင်းပတ်းပိုၼ်ႉ (Nationwide Ceasefire Agreement-NCA) သေ တေသိုပ်ႇၶဝ်ႈႁူမ်ႈပၢင်ဢုပ်ႇ ဢူဝ်းၵၢၼ်မိူင်းသေ ႁူမ်ႈၵၼ်ၵႄႈၶႆပၼ်ႁႃၵၢၼ်မိူင်း ၵႂႃႇ- ၼႆယဝ်ႉ။