သိုၵ်းမၢၼ်ႈ ဢဝ်ၶိူင်ႈၵွင်ႈလူင် ယိုဝ်းသႂ်ႇတပ်ႉပၢင်သဝ်း ငဝ်ႈငုၼ်းဝၢၼ်ႈႁႆး SSPP/SSA  ႁိမ်းတီႈလၢၼ်ႇ ၵွင်းမူးလွႆ ၊ ၼိူဝ်သဵၼ်ႈတၢင်း လုၵ်ႉငဝ်ႈငုၼ်း ဝၢၼ်ႈႁႆးၵႂႃႇတၢင်းၽႄ သဵၼ်ႈတၢင်းမိူင်းသူႈ လႄႈ မိူင်းၼွင် ၵေးသီး ။

ၶိူင်ႈၶူဝ်းၸႂ်ႉၼႂ်းၵၢၼ်သိုၵ်း ဢၼ်တပ်ႉသိုၵ်းၸိုင်ႈတႆး ႁုပ်ႈယိုတ်းလႆႈၼႂ်းပၢင်တိုၵ်း

မိူဝ်ႈဝၼ်းတီႈ 11/10/2015 ယၢမ်း 13:15 မူင်း ၊ သိုၵ်းမၢၼ်ႈ တပ်ႉဢၼ်ပၵ်းသဝ်းဝႆႉတီႈ လွႆၵိဝ်ႇမွၵ်ႇၶၢဝ် (တပ်ႉၶမယ 575) ဢဝ်ၶိူင်ႈၵွင်ႈလူင် 81mm ယိုဝ်းသႂ်ႇတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) ငဝ်ႈငုၼ်းဝၢၼ်ႈႁႆး ၊ ဢၼ်မီးႁိမ်းလၢၼ်ႇၵွင်းမူးလွႆ ၊ ၾၢႆႇၸၢၼ်းငဝ်ႈငုၼ်းဝၢၼ်ႈႁႆး မွၵ်ႈ 2 လၵ်း 8 လုၵ်ႈ ။ လိူဝ်သေၼၼ်ႉ ဢဝ်ၵွင်ႈ 79mm ယိုဝ်းသႂ်ႇတပ်ႉပၢင်သဝ်း တပ်ႉသိုၵ်းၸိုင်ႈတႆး တၢင်းလွႆၽုၺ်းၵျပၢၼ်ႇ ဢၼ်မီးၸဵင်ႇႁွင်ႇဝၼ်းတူၵ်း လွႆၵိဝ်ႇမွၵ်ႇၶၢဝ် ၊ ၾၢႆႇၸၢၼ်းငဝ်ႈငုၼ်းဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း 4 လုၵ်ႈ ။


ဝၼ်းလဵဝ်ၵၼ်ၼႆႉ ယၢမ်း 12:25 မူင်း ၊ သိုၵ်းမၢၼ်ႈတင်းသိုၵ်းတႆး SSPP/SSA ယိုဝ်းၵၼ်ထႅင်ႈတီႈ လွႆလႃႇၵၢၼ်ႉ  ဢၼ်မီးႁိမ်းမိူင်းၶၢင် တူယႃး ၸဵင်ႇၸၢၼ်းဝၼ်းတူၵ်းတႃႈသၢမ်ပူး ဢိူင်ႇႁၢႆးပႃ ၸႄႈဝဵင်းမိူင်းသူႈ ၸိုင်ႈတႆး ပွတ်းၸၢၼ်း ။


ပၢင်တိုၵ်းၵၼ်တီႈလွႆလႃႇၵၢၼ်ႉၼႆႉ ၾၢႆႇတပ်ႉသိုၵ်းၸိုင်ႈတႆး ႁုပ်ႈယိုတ်းလႆႈ ထူင်ပိူဝ်ႉသိုၵ်းမၢၼ်ႈ 15 လုၵ်ႈ ၊ ၸၢၵ်ႈသၢႆလူမ်း 1 လုၵ်ႈ ၊ ၵွင်ႈၸၢၵ်ႈၸလတ်ႉ ၼိုင်ႈလဝ်း ။  လွင်ႈတၢႆလွင်ႈဝၢတ်ႇလႄႈလူႉသုမ်း ပႆႇလႆႈႁူႉ ၊ ၾၢႆႇတပ်ႉသိုၵ်းၸိုင်ႈတႆး ဝၢတ်ႇၸဵပ်းၵမ်ႈၽွင်ႈ ။


တင်ႈတႄႇ ဝၼ်းတီႈ 6/10/2015 ပူၼ်ႉမႃးၼႆႉ သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး SSPP/SSA  ပဵၼ်ပၢင်တိုၵ်းၵၼ် တေႃႇထိုင်ဝၼ်းမိူဝ်ႈၼႆႉ သဵင်ၵွင်ႈဢမ်ႇထၢတ်ႇသေဝၼ်း ၊ တိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇပဵၼ်တီႈပဵၼ်တီႈ ။


ပေႃးမႃးတူၺ်းငဝ်းလၢႆးၵၢၼ်မိူင်းယၢမ်းလဵဝ် ၾၢႆႇၼိုင်ႈတၢင်းၼိုင်ႈၵေႃႈ ၶတ်းၸ်ႂဢုပ်ႇဢူဝ်းၵိူဝ်းၵုမ်ၵၼ် ၼင်ႇႁိုဝ်သမ်ႉပေႃး တေလႆႈလွင်ႈငမ်းယဵၼ် ၸိုၼ်ႈၸၢင်ႇ ၊ ၼင်ႇႁိုဝ်ပေႃးတေလႆႈ လွင်ႈၵိုတ်းတိုၵ်း ပတ်းပိုၼ်ႉတူဝ်ႈမိူင်း ။ ၵူၺ်းၵႃႈ ၾၢႆႇၼိုင်ႈၵေႃႈ တပ်ႉသိုၵ်းမၢၼ်ႈ သမ်ႉပိုတ်ႇၼႃႈသိုၵ်းတေႃႇၸုမ်းၸၢဝ်းၶိူဝ်း ယိပ်းၵွင်ႈၵၢင်ႇယူႇလၢႆမူႇလၢႆၸုမ်း - ၽူႈလဵပ်ႈႁဵၼ်းၵၢၼ်မိူင်း ၵေႃႉၼိုင်ႈလၢတ်ႈ ။


သိုပ်ႇလၢတ်ႈထႅင်ႈဝႃႈ - လွင်ႈသိုၵ်းမၢၼ်ႈၶဝ် ပိုတ်ႇၼႃႈသိုၵ်း ပိုတ်းယိုဝ်းတေႃႇၸုမ်း ၸၢဝ်းၶိူဝ်းယိပ်းၵွင်ႈၵၢင်ႇၼႆႉ ယွၼ်ႉဝႃႈပၢင်လိူၵ်ႈတင်ႈၵေႃႈ ၸမ်ၽႅဝ်ၵေႃႈပိူင်ၼိုင်ႈ ၊ ၼင်ႇႁိုဝ်ၵူၼ်းမိူင်းတေဢမ်ႇ ၸၢင်ႈတွတ်ႈၶႅပ်း ၵၢင်ၸႂ်ၼၼ်ႉ ၶဝ်တင်ႈၸႂ်ယႃႉၵဝ်းလွၵ်ႇငိုတ်ႈ ႁႂ်ႈၵူၼ်းမိူင်းၵူဝ် ၊ ဢမ်ႇႁတ်းၵႂႃႇတွတ်ႈၶႅပ်းၵၢင်ၸႂ် ၵေႃႈပဵၼ်လႆႈ - ဝႃႈၼႆ ။


ပူၼ်ႉမႃးမိူဝ်ႈဝၼ်းတီႈ 7/10/2015 ပဵၼ်ပၢင်တိုၵ်းၵၼ် 2 ၵမ်း တီႈၼႂ်းမိူင်းၸၢင် ၸႄႈဝဵင်းမိူင်းသူႈ ၊ ၶၢဝ်းယၢမ်းၵၢင်ၼႂ် 06:10-08:20 မူင်း ၵမ်းၼိုင်ႈ ၊ ယၢမ်း 12:30-13:30 မူင်း ထႅင်ႈၵမ်းၼိုင်ႈ ။ ယွၼ်ႉပိူဝ်ႈပဵၼ်ပၢင်တိုၵ်းႁၢဝ်ႈႁႅင်းလႄႈ သိုၵ်းမၢၼ်ႈထႅမ်ႁႅင်းသိုၵ်း ၶဝ်ႈမႃးဢဝ်တီႈယူႇ တၢင်းမိူင်းၸၢင် တပ်ႉၶမယ 520 ၊ ၶမယ 524 ၊ ၶရယ 117 မီးဝႆႉသီႇတပ်ႉၵွင် ႁႅင်းသိုၵ်း 300 ပၢႆ -ၼႆယဝ်ႉ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ယိပ်းၵမ်ဝႆႉၶေႃႈတိုဝ်းၵမ်ဝႃႈ သင်ၸိူဝ်ႉဝႃႈ ၵူႈမူႇၵူႈၸုမ်း ဢမ်ႇၶဝ်ႈပႃး လူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ၼႆ ပႃႊတီႊမႂ်ႇသုင်ၸိုင်ႈတႆး တိုၼ်းတေဢမ်ႇလူင်း၊ တေၶတ်းၸႂ်ဢုပ်ႇဢူဝ်းၵိူဝ်းၵုမ် ၼင်ႇႁိုဝ်ၵူႈမူႇၵူႈၸုမ်း ပေႃးတေၶဝ်ႈပႃးၼႂ်း ၶၵ်ႉၵၢၼ်လူင်းလၢႆးမိုဝ်းၵိုတ်းတိုၵ်းၵွၼ်ႇ ။


ၽူႈမီးၸၼ်ႉ ၼႂ်းပႃႊတီႊမႂ်ႇသုင်ၸိုင်ႈတႆး ၵေႃႉၼိုင်ႈလၢတ်ႈဝႃႈ - ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆးၼႆႉ လႆႈလူင်းလၢႆးမိုဝ်းၵၼ် ၸၼ်ႉၸိုင်ႈမိူင်းႁူမ်ႈတုမ် တင်းလူင်ပွင်ၸိုင်ႈ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း မိူဝ်ႈဝၼ်းတီႈ 28/01/2012 ။ ၵူၺ်းၵႃႈ တေႃႇထိုင်မိူဝ်ႈလဵဝ်ၵေႃႈ သိုၵ်းမၢၼ်ႈတိုၵ်ႉပိုတ်ႇၼႃႈသိုၵ်း တိုၵ်းယိုဝ်း တပ်ႉသိုၵ်းၸိုင်ႈတႆးယူႇ ။ လွင်ႈၼႆႉ ပဵၼ်လွင်ႈသိုၵ်းမၢၼ်ႈၶဝ် ၶႂ်ႈလွၵ်ႇငိုတ်ႈ မိပ်ႇငႅၼ်း ႁႂ်ႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး လူင်းလၢႆးမိုဝ်းဝႆးဝႆး ၵေႃႈၸၢင်ႈပဵၼ်လႆႈ - ဝႃႈၼႆ ။