ၵူၼ်းႁိူၼ်းလဵဝ် ၶႃႈႁႅမ်ၵၼ်တၢႆသၢမ်ၵေႃႉ တီႈပွၵ်ႉပုင်းထုၼ် တႃႈၶီႈလဵၵ်း
ယွၼ်ႉမႄႈၾၢႆႇမေး ပွင်ႉထႃႉလိုပ်ႈပၢႆႈလႄႈ ၵေႃႉပဵၼ်လုၵ်ႈၶူၺ် ၶႃႈႁႅမ်မႄႈၾၢႆႇမေး တင်း ၼၢင်းမေး ႁူမ်ႈပႃး ၶႃႈႁႅမ်တူဝ်ၵဝ်ႇ၊ ဢဝ်ၾႆးၽဝ်ၵိုၵ်းႁိူၼ်း တၢႆ 3 ၵေႃႉ၊ တီႈပွၵ်ႉပုင်းထုၼ် တႃႈၶီႈလဵၵ်း။
မိူဝ်ႈဝၼ်းတီႈ 08/10/2015 ယၢမ်းၵၢင်ၶိုၼ်း၊ တီႈပွၵ်ႉပုင်းထုၼ် သဵၼ်ႈတၢင်း 9 ၊ ဝဵင်းတႃႈၶီႈလဵၵ်း ၸိုင်ႈတႆးပွတ်းၸၢၼ်း၊ ၵိူတ်ႇပဵၼ်လိူင်ႈ ၵူၼ်းႁိူၼ်းလဵဝ်ၵၼ် ၶႃႈႁႅမ်ၵၼ်တၢႆ 3 ၵေႃႉ။
ၵဵဝ်ႇၵပ်းလွင်ႈၼႆႉ ၽူႈတႅၼ်းပႃႊတီႊႁူဝ်သိူဝ် (SNLD) လုင်းၸၢႆးဢေး လၢတ်ႈၼႄ တီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- လွင်ႈၼႆႉ ၵေႃႉပဵၼ်လုၵ်ႈၶူၺ်ႁဵတ်းႁိူၼ်းပၼ်၊ ႁဵတ်းႁိူၼ်းယဝ်ႉယဝ်ႉ မႄႈၾၢႆႇမေးသမ်ႉဢမ်ႇႁၵ်ႉ လုၵ်ႈၶူၺ် ပွင်ႉပွင်ႉလႃႇလႃႇ လိုပ်ႈပၢႆႈ၊ လုၵ်ႈၶူၺ်ၸႂ်လမ်သေ ဢဝ်မိတ်ႈတႅင်းတီႈဢူၵ်း မႄႈၾၢႆႇမေးမၼ်း၊ ပိတ်းဢိုတ်းၵၢၵ်ႇသေႃးႁိူၼ်းယဝ်ႉ ၶႃႈႁႅမ်ပႃးမေးၼၢင်းမၼ်း ဢဝ်မိတ်ႈပၢတ်ႇၶေႃး၊ ဢဝ်ၼမ်ႉမၼ်းႁူတ်းသေ ဢဝ်ၾႆးၽဝ်ၵိုၵ်းႁိူၼ်း ၶႃႈႁႅမ်ပႃးတူဝ်မၼ်း- ဝႃႈၼႆ။
ၵေႃႉပဵၼ်လုၵ်ႈၶူၺ် ဢၼ်ၶႃႈႁႅမ်တူဝ်ၵဝ်ႇ၊ မေးၼၢင်း လႄႈ မႄႈၾၢႆႇမေးမၼ်းၼႆႉ ၸိုဝ်ႈဝႃႈၸၢႆးၶိတ်ႉ (ပဵၼ်ၸၢဝ်းလွႆ)၊ မေးၼၢင်း ပဵၼ်ၸၢဝ်းၶိူဝ်းဢႃးၶႃႇ၊ သွင်ၵေႃႉၽူဝ်မေးၼႆႉ ဢမ်ႇမီးလုၵ်ႈလၢင်းႁူမ်ႈၵၼ်။ ႁိူၼ်းၶဝ် ဢၼ်ၽဝ်မႆႈၵႂႃႇၼႆႉ မီးႁိမ်းပႃႇႁဵဝ်ႈၽႃၽီ ပွၵ်ႉပုင်းထုၼ် ဝဵင်းတႃႈၶီႈလဵၵ်း။
ၵဵဝ်ႇၵပ်းလွင်ႈၼႆႉ ၾၢႆႇၸဝ်ႈၼႃႈတီႈၵႂႃႇၵူတ်ႇထတ်းသေ ပိုတ်ႇပဵၼ်ၶၻီး (ဢမု)ဝႆႉယဝ်ႉ- ဝႃႈၼႆ။
Tags: General, News
