ၵူၼ်းဝၢၼ်ႈမႂ်ႇပလွင်ႈ ၵႂႃႇႁဵတ်းႁႆႈပွၵ်ႈႁိူၼ်းၸွမ်းၵၼ် 2 ၵေႃႉ ၶၢဝ်းၵၢင်ၶမ်ႈ၊ ထုၵ်ႇသိုၵ်းမၢၼ်ႈ တပ်ႉ 151 ၵႃလီႉ ဢၼ်ဢဝ်ႁူမ်ႇလူမ်ႈသဵၼ်ႈတၢင်း ၵႃလီႉ - မိူင်းသူႈ ယိုဝ်းတၢႆၵေႃႉၼိုင်ႈ ။


ဝၼ်းတီႈ 20/10/2015 (မိူဝ်ႈဝႃး) ယၢမ်းၵၢင်ၶမ်ႈ 7 မူင်း ၊ ၵူၼ်းဝၢၼ်ႈ ဝၢၼ်ႈမႂ်ႇပလွင်ႈ 2 ၵေႃႉ ၊ ဢႃႇၸိင်ႇၼ တင်းပေႃႈဢၢႆႈယူၺ်း (ၸၢဝ်းၶိူဝ်းပလွင်ႈ) ဢႃယု 25 ပီ ၊ ၵႂႃႇႁဵတ်းႁႆႈသေပွၵ်ႈမႃးႁိူၼ်းၸွမ်းၵၼ် ၊ မႃးၽႃႇၺႃးသိုၵ်းမၢၼ်ႈၸွမ်းတၢင်း ၊ သိုၵ်းမၢၼ်ႈႁွင်ႉၵိုတ်း ၊ သွင်ၶႃတူၵ်းၸႂ်သေ လႅၼ်ႈပၢႆႈ ၊ သိုၵ်းမၢၼ်ႈၵေႃႈ ဢဝ်ၵွင်ႈယိုဝ်းသႂ်ႇ ။


ၵဵဝ်ႇၵပ်းလွင်ႈၼႆႉ လႆႈႁူႉဝႃႈ ၸၢႆးဢႃႇၸိင်ႇၼ လႅၼ်ႈပၢႆႈပူၼ်ႉၵႂႃႇ၊ တိူဝ်ႉဝၢတ်ႇ ဢမ်ႇတိူဝ်ႉဝၢတ်ႇမၢၵ်ႇၵွင်ႈၼၼ်ႉ ဢမ်ႇလႆႈႁူႉ ။ ၵူၺ်းၵႃႈ ပေႃႈဢၢႆႈယူၺ်းၼၼ်ႉ တိူဝ်ႉၸပ်းမၢၵ်ႇၵွင်ႈသေ လႆႈလူႉတၢႆသဵင်ႈၸႂ်ၵႂႃႇ ၊ သိုၵ်းမၢၼ်ႈ ဢဝ်တၢႆတူဝ်မၼ်းၵႂႃႇ ၊ ႁွႆးလိူတ်ႈမၼ်းၵေႃႈ ယင်းႁၼ်ယူႇ ။ ၵူၼ်းဝၢၼ်ႈၵူၼ်းသူၼ်ၶဝ် ၵႂႃႇၶႆႈႁႃၶၢပ်ႈတူဝ်တၢႆမၼ်း ယင်းပႆႇႁၼ် - ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ ။


ၽွင်းၶၢဝ်းတပ်ႉသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ် တၢင်းဝၢၼ်ႈႁႆး ၸိူဝ်းၼႆႉ သဵၼ်ႈတႃႈသၢႆတၢင်းသဵၼ်ႈၼႆႉၵေႃႈ ၾၢႆႇသိုၵ်းမၢၼ်ႈ ဢဝ်လွင်ႈႁူမ်ႇလူမ်ႈၶဵင်ႈၶႅင်မႃးသေ ၵူၼ်းဝၢၼ်ႈလႆႈမႃးထူပ်းၽေးသိုၵ်း ၸိူင်ႉၼႆ ။


ၵူၼ်းဝၢၼ်ႈၵေႃႉၼိုင်ႈ ဢၼ်ႁွတ်ႈမႃးတီႈၵုၼ်ႁဵင် လၢတ်ႈဝႃႈ - တီႈတႄႉမၼ်း တပ်ႉသိုၵ်းၸိုင်ႈတႆး (SSPP/SSA) ၵေႃႈ ပဵၼ်ၸုမ်းဢၼ်ၵိုတ်းတိုၵ်းဝႆႉၼႆ ႁဝ်းၶႃႈလႆႈႁူႉမႃးလၢႆလၢႆပီယဝ်ႉ ။ ႁဵတ်းသင်သမ်ႉမႃးပဵၼ်ပၢင်တိုၵ်းၵၼ် မိူဝ်ႈလဵဝ် ။ ပဵၼ်ပၢင်တိုၵ်းၵၼ်ၼႆႉ ၵူၼ်းဝၢၼ်ႈၵူၼ်းမိူင်းၵေႃႈ တုၵ်ႉၶလိူဝ်ၸႂ် ၊ ဢမ်ႇထၢင်ႇဢမ်ႇထိူမ်သေ ၵူၼ်းဝၢၼ်ႈလႆႈလူႉတၢႆၵႂႃႇၸိူင်ႉၼႆ ။ ပေႃႈဢၢႆႈယူၺ်းၼႆႉ မၼ်းတိုၵ်ႉမီးလုၵ်ႈဢွၼ်ႇလဵၵ်ႉယူႇ ၊ မႆႈၸႂ်လွင်ႈ ၼႃႈႁိူၼ်းတႃယေးမၼ်း ၊ ပေႃးမၼ်းတၢႆၵႂႃႇတႄႉၸိုင် တေႁဵတ်းႁႂ်ႈၼႃႈႁိူၼ်းမၼ်း ထူပ်းတၢင်းယၢပ်ႇၽိုတ်ႇ - ဝႃႈၼႆ ။


သိုၵ်းမၢၼ်ႈတပ်ႉဢၼ်ယိုဝ်းၵူၼ်းဝၢၼ်ႈၼႆႉ ပဵၼ်တပ်ႉ 151 ဢၼ်ပၵ်းတီႈၵႃလီႉသေ ၵႂႃႇဢဝ်ႁူမ်ႇလူမ်ႈ သဵၼ်ႈတၢင်း ၼိူဝ်သဵၼ်ႈတၢင်းမိူင်းသူႈ - ၵႃလီႉ ။ ဝၢၼ်ႈမႂ်ႇပလွင်ႈၼႆႉ မီးၼႂ်းၵႄႈဝၢၼ်ႈႁွင်ႈလိုၵ်ႉလႄႈ ၵႃလီႉ ၊ ၵမ်ႈၼမ်ပဵၼ်ၸၢဝ်းပလွင်ႈ (တဢၢင်း) ယူႇသဝ်း ။