မၢၵ်ႇတႅၵ်ႇတီႈႁိမ်း ႁူင်းၵေႃလိၵ်ႈလၢႆး မိူင်းသူႈ ၊ တိူဝ်ႉၺႃးၵူၼ်း 4 ၵေႃႉဝၢတ်ႇၸဵပ်းလိူဝ်ႁႅင်းသေ တႃႇ 2 ၵေႃႉ သူင်ႇၵႂႃႇယူတ်းယႃတီႈ ဝဵင်းၶူဝ်လမ် ၊ ၼႂ်းၼၼ်ႉ ၵူၼ်းထဝ်ႈယိင်းၵေႃႉၼိုင်ႈ ၵႂႃႇတၢႆတီႈ ၶူဝ်လမ် ။

မႄႈထဝ်ႈလဵၵ်း ၵေႃႉဢၼ်လူႉသဵင်ႈၵႂႃႇ ယွၼ်ႉတိူဝ်ႉဝၢတ်ႇမၢၵ်ႇတႅၵ်ႇ

မီးၸုမ်းဢမ်ႇႁူႉၾၢႆႇ မႃးၵၢင်မၢၵ်ႇပွႆႇဝႆႉသေ မိူဝ်ႈဝၼ်းတီႈ 21/10/2015 (မိူဝ်ႈဝႃး) ယၢမ်းဝၢႆးဝၼ်း 4 မူင်းပၢႆ ၊ မၢၵ်ႇတႅၵ်ႇ  တီႈႁိမ်းႁူင်းၵေႃလိၵ်ႈလၢႆး ၊ တီႈႁိမ်းဝတ်ႉ (ၵျွင်း) ၵၢင်ဝဵင်း ဝဵင်းမိူင်းသူႈ (ၸႄႈတွၼ်ႈလွႆလႅမ် ၼႂ်းၸိုင်ႈတႆး ပွတ်းၸၢၼ်း)။ မၢၵ်ႇတႅၵ်ႇသေ တိူဝ်ႉၸပ်းၵူၼ်း 4 ၵေႃႉ ။ ပဵၼ်ၸဝ်ႈသၢင်ႇဢွၼ်ႇ တီႈဝတ်ႉၵၢင်ဝဵင်း မိူင်းသူႈ 2 တူၼ် ၊ မႄႈထဝ်ႈလဵၵ်း ဢႃယု 75 ပီ လႄႈ ၵေႃႉပဵၼ်လုၵ်ႈယိင်း ၸၢႆးၸၢမ်ႇၺုၼ်ႉ ၼၢင်းၼူၼ်း ၸိုဝ်ႈၼၢင်းၶမ်းၶိၼ်ႇ ၊ ဢႃယု 12 ၊ ယူႇႁူင်းႁဵၼ်းၸၼ်ႉ 6 ။


ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၾၢႆႇပၢႆးယူႇလီ ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈဝႃႈ - ၸိူဝ်းတိူဝ်ႉဝၢတ်ႇၸဵပ်းၼႆႉ ၸၢၵ်ႇမၢၵ်ႇတိူဝ်ႉတီႈပုမ် တီႈဢႅဝ် တီႈတိၼ်ၸိူဝ်းၼႆႉ ဢၼ်လိူတ်ႈဢွၵ်ႇၼမ်ၵေႃႈမီး ။ ဢၼ်တိူဝ်ႉဝၢတ်ႇၸဵပ်းလိူဝ်ႁႅင်း ၊ လႆႈမႆႈၸႂ် ပဵၼ်ဢွၼ်ႇယိင်းၶမ်းၶိၼ်ႇ ၵေႃႉဢႃယု 12 ၼၼ်ႉ ။ မႄႈထဝ်ႈလဵၵ်း တိူဝ်ႉတီႈဢႅဝ် ၊ ၸဝ်ႈသၢင်ႇဢွၼ်ႇတႃႇတူၼ်ၼိုင်ႈ တိူဝ်ႉတီႈၵွၵ်းႁူဝ် ၊ တႃႇတူၼ်ၼိုင်ႈ တိူဝ်ႉတီႈၶႃသေ ၸၢၵ်ႇမၢၵ်ႇတိူဝ်ႉပေႃးၸွတ်ႇၵႂႃႇတင်းတူဝ် ။ ဢွၼ်ႇယိင်းၶမ်းၶိၼ်ႇၼႆႉ တိူဝ်ႉတီႈပုမ်လႄႈ တိူဝ်ႉတီႈႁိမ်းငဝ်ႈႁူသေ ပွင်ႇၵႂႃႇတၢင်းပၢၵ်ႇ - ဝႃႈၼႆ ။


လႆႈႁူႉထႅင်ႈဝႃႈ ၵူၼ်းဝၢတ်ႇၸဵပ်းလိူဝ်ႁႅင်း 2 ၵေႃႉ ၊ ဢွၼ်ႇယိင်းၶမ်းၶိၼ်ႇလႄႈ မႄႈထဝ်ႈလဵၵ်းၼၼ်ႉ ဢဝ်သူင်ႇၵႂႃႇယူတ်းယႃ တီႈဝဵင်းၶူဝ်လမ် (ၶူဝ်ၶမ်း) ၊ မႄႈထဝ်ႈလဵၵ်းၼၼ်ႉ လႆႈၵႂႃႇလူႉသဵင်ႈၵႂႃႇတီႈၶူဝ်လမ် - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၵူၼ်းၸမ်ၸႂ်တီႈႁူင်းယႃၵေႃႉၼိုင်ႈ လၢတ်ႈဝႃႈ - ပဵၼ်ၶေႃႈၸီႉသင်ႇ ၽူႈၵွၼ်းငဝ်ႈငုၼ်း ၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 2 မိူင်းၼွင် ဢၼ်မႃးပၵ်းတီႈမိူင်းသူႈသေ ၵုမ်းၵမ်ၾၢႆႇသိုၵ်းၼၼ်ႉ ၸီႉသင်ႇႁႂ်ႈသူင်ႇၵႂႃႇယူတ်းယႃ တီႈႁူင်းယႃသိုၵ်း တီႈၶူဝ်လမ် ၊ ႁဵတ်းႁႂ်ႈမႄႈထဝ်ႈလဵၵ်းၼႆႉ လႆႈလူႉတၢႆၵႂႃႇ - ဝႃႈၼႆ ။


ဢွၼ်ၼႃႈမၢၵ်ႇတႅၵ်ႇ မိူဝ်ႈၽွင်းဝၢႆးဝၼ်းယၢမ်း 2-3 မူင်းၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉႁိမ်းပွၵ်ႉ 1 ဝဵင်းမိူင်းသူႈ လူင်းမႃးဢၢပ်ႇၼမ်ႉ တီႈၼမ်ႉဝေႃႇၼၢႆးၶၢဝ် ။ ဝၢႆးၶဝ်ပွၵ်ႈမိူဝ်းၵႂႃႇဢမ်ႇႁိုင်ၵေႃႈ မၢၵ်ႇတႅၵ်ႇတီႈႁိမ်းႁူင်းၵေႃလိၵ်ႈလၢႆး ဢၼ်မီးႁိမ်းၵၼ်တင်း ဝတ်ႉ (ၵျွင်း) ၵၢင်ဝဵင်း မိူင်းသူႈ - ၵူၼ်းယူႇပွၵ်ႉၼိုင်ႈ ၵေႃႉၼိုင်ႈလၢတ်ႈ ။


ၵဵဝ်ႇၵပ်းလွင်ႈၼႆႉ ၵူၼ်းပိုၼ်ႉတီႈ ၼႂ်းဝဵင်းမိူင်းသူႈ ၵေႃႈလၢတ်ႈဝႃႈ - ဢၼ်မၢၵ်ႇတႅၵ်ႇၼႆႉ လႅပ်ႈတေပဵၼ်မိုဝ်း တီႈသၢမ် မၢပ်ႇၽၢမ်းႁဵတ်းဢဝ် ။ ပေႃးဝႃႈ မၢၵ်ႇတႅၵ်ႇယဝ်ႉ လွင်ႈႁူမ်ႇလူမ်ႈဝဵင်းမိူင်းသူႈၵေႃႈ တေၶဵင်ႈၶႅင်ၶိုၼ်ႈမႃး ။ ပေႃးပဵၼ်ၸိူင်ႉၼၼ်မႃး တေႁဵတ်းႁႂ်ႈ ၵူၼ်းၵႂႃႇၸွႆႈထႅမ်ၵူၼ်းထူပ်းၽေးသိုၵ်းၶဝ် ယၢပ်ႇၽိုတ်ႇၶိုၼ်ႈမႃး ၊ တေပဵၼ်လွင်ႈပွမ်ပဵၼ်မိုဝ်းတီႈသၢမ်သေ ၽႅၼ်ၵၢၼ်ၵူၺ်း - ဝႃႈၼႆ ။


ၸိူင်ႉၼင်ႇမၢၵ်ႇတႅၵ်ႇ တီႈဝဵင်းမိူင်းသူႈၼႆႉ ၶမ်ႈသိုၼ်း (20/10/2015) ၼၼ်ႉၵေႃႈ မၢၵ်ႇတႅၵ်ႇတီႈႁိမ်း တပ်ႉပလိၵ်ႈ မၢၼ်ႈ ဝဵင်းမိူင်းၸၢင် 2 လုၵ်ႈ ၊ ဢမ်ႇမီးၽႂ်တိူဝ်ႉဝၢတ်ႇၸဵပ်းသေတႃႉ ယွၼ်ႉမၢၵ်ႇတႅၵ်ႇၼႆႉသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းတူၵ်းၸႂ် - ၸၢႆးဢေႃးလူင် ၵူၼ်းဝဵင်းမိူင်းၸၢင် လၢတ်ႈ။