သိုၵ်းမၢၼ်ႈ တင်းသိုၵ်းတႆး RCSS/SSA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၶူဝ်လမ် ၊ ဢၼ်ပဵၼ်တီႈပၵ်း ငဝ်ႈငုၼ်းတိူင်းသိုၵ်းဝၼ်းဢွၵ်ႇၵၢင် ၊ ၾၢႆႇသိုၵ်းမၢၼ်ႈ ၸႂ်ႉႁိူဝ်းဝိၼ် တိုၵ်းလၢႆလမ်း လိုပ်ႈလမ်းငႃးသိုၵ်းတႆး ။

ဝၼ်းတီႈ 16/09/2015 ယၢမ်းၵၢင်ၼႂ် တပ်ႉသိုၵ်းၸိုင်ႈတႆး RCSS/SSA တင်းသိုၵ်းမၢၼ်ႈ လႆႈပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၵွင်း (ၾၢႆႇၸၢၼ်းဝၢၼ်ႈၵွင်း) ဢိူင်ႇၶူဝ်ဢုတ်ႇ ၸႄႈဝဵင်းၶူဝ်လမ် (ၶူဝ်ၶမ်း) ၊ တၢင်းၵႂႃႇၵဵင်းတွင်း ၊ ဢၼ်ယၢၼ်ၵႆဝဵင်းၶူဝ်လမ် 10 လၵ်း ၊ ၸိုင်ႈတႆးပွတ်းၸၢၼ်း ။ ဝၢႆးပၢင်တိုၵ်းယဝ်ႉ သိုၵ်းမၢၼ်ႈ လႆႈဢဝ်ႁိူဝ်းဝိၼ်ယိုဝ်းသိုၵ်း (Jazz Fighter) လမ်းၼိုင်ႈ ၊ ႁိူဝ်းဝိၼ်ယိုဝ်းသိုၵ်း ႁိူဝ်းဝိၼ်မႅင်းမီႈ 4 လမ်းသေ ၵႂၢတ်ႇလၢင်ႉပိုၼ်ႉတီႈ ၊ လမ်းလိုပ်ႈငႃးသိုၵ်း RCSS/SSA ဢၼ်ယူႇပွတ်းတွၼ်ႈၼၼ်ႉ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - သွင်ၾၢႆႇလႆႈပဵၼ်ပၢင်တိုၵ်းၵၼ် တင်ႈတႄႇၵၢင်ၼႂ် 6 မူင်းတေႃႇထိုင် 7 မူင်းပၢႆ ။ ၾၢႆႇသိုၵ်းမၢၼ်ႈ လႆႈတိူဝ်ႉၸဵပ်းႁႅင်းသေ ၶဝ်ၵေႃႈလႆႈဢဝ်ႁိူဝ်းဝိၼ်မႃးၸွႆႈ ။ ပၢင်တိုၵ်းၼႆႉ ဢၼ်သိုပ်ႇယိုဝ်းၵၼ် ဢိတ်းဢွတ်းၼၼ်ႉ တေႃႇထိုင် 10 ပၢႆ သဵင်ၵွင်ႈၸင်ႇယဵၼ် - ဝႃႈၼႆ ။


ၵေႃႉပဵၼ်ၽွင်းတႅၼ်းၸႄႈမိူင်း (ၼမ်ႉၸၢင်) ၸၢႆးသူႇရိၼ်ႇဢူး လၢတ်ႈဝႃႈ - ဢၼ်တိုၵ်းၵၼ်တင်း RCSS/SSA ၼႆႉ ဢိင်ၼိူဝ်သိုၵ်းမၢၼ်ႈ ၸႂ်ႉႁႅင်းသိုၵ်း ႁိူဝ်းဝိၼ်သေ ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်းတူၵ်းၸႂ် ၵူဝ်ႁႄ ၊ ႁဵတ်းႁႂ်ႈလွင်ႈယူႇသဝ်း ၵူၼ်းဝၢၼ်ႈ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ - ဝႃႈၼႆ ။


ၸဝ်ႈသိုၵ်းလူင်ၸၢႆးလႃႉ သိုပ်ႇလၢတ်ႈထႅင်ႈဝႃႈ - ယွၼ်ႉပိူဝ်ႈသိုၵ်းမၢၼ်ႈ ၶိုင်ႁဵတ်းႁႂ်ႈဢမ်းၼၢၸ်ႈ (ဢႃႇၼႃႇ) သိုၵ်း သုမ်ႇငမ်းပိုၼ်ႉတီႈသေ ၵႂၢတ်ႇလၢင်ႉပိုၼ်ႉတီႈလႄႈ ၸင်ႇလႆႈပဵၼ် ပၢင်တိုၵ်းၵၼ် ။ ဢၼ်လႆႈပဵၼ်ပၢင်တိုၵ်းၸိူဝ်းၼႆႉ ၾၢႆႇသိုၵ်းမၢၼ်ႈၼႆႉ မိူၼ်ၼင်ႇသိုၵ်းတႆးတုၵ်းယွၼ်းဝႆႉ တႃႇတေပၵ်းသဝ်းတပ်ႉသေ တႃႇတေယူႇသဝ်းႁဵတ်းၵၢၼ် ၽုၵ်ႇသွမ်ႈ လဵင်ႉလူသတ်း တႃႇ 16 ပိုၼ်ႉတီႈၼၼ်ႉ ၾၢႆႇသိုၵ်းမၢၼ်ႈဢမ်ႇပၼ်ၵူၺ်းဢမ်ႇၵႃး သမ်ႉၵႂၢတ်ႇလၢင်ႉပိုၼ်ႉတီႈသေ ၶိုင်ႁဵတ်းႁႂ်ႈ ဢမ်းၼၢၸ်ႈ (ဢႃႇၼႃႇၸၢၵ်ႈ) သိုၵ်း သုမ်ႇငမ်း ၊ ၶဝ်ဢမ်ႇၶႂ်ႈႁႂ်ႈ RCSS/SSA ၵႂႃႇမႃးတူင်ႉၼိုင်လႄႈ ၸင်ႇလႆႈပဵၼ်ၸိူင်ႉၼႆ ။ ၵွပ်ႈၼၼ် သင်ၸိူဝ်ႉႁူႉဝႃႈ တေပဵၼ်ၸိူင်ႉၼႆၸဵမ်ပိုင်းတႄႉ တႃႇတေၵိုတ်းတိုၵ်း ၸၼ်ႉၸႄႈမိူင်းၵေႃႈလီ ၊ မိူင်းႁူမ်ႈတုမ်ၵေႃႈလီ ႁဝ်းၶႃႈဢမ်ႇႁဵတ်းယဝ်ႉ ။


ႁဝ်းၶႃႈၼႆႉ ယူႇၼႂ်းပိုၼ်ႉတီႈႁဝ်းၵူၺ်း ၊ ဢမ်ႇၸႂ်ႈဝႃႈၵႂႃႇႁဵတ်းပၼ်ႁႃၵၢၼ် ပဵၼ်ပၢင်တိုၵ်းသိုၵ်းသိူဝ် ၊ ၵွပ်ႈၼၼ်လႄႈ တေပဵၼ်ပၢင်တိုၵ်း ဢမ်ႇပဵၼ်ပၢင်တိုၵ်းထႅင်ႈတၢင်းၼႃႈၼၼ်ႉ မၼ်းယူႇတီႈ လူင်ပွင်ၸိုင်ႈတင်းမူတ်း ၊ ၵူၺ်းၵႃႈ လွင်ႈၼႆႉတႄႉ မၼ်းတိုၼ်းတုမ်ႉတိူဝ်ႉၵၢၼ်ႁဵတ်း လွင်ႈငမ်းယဵၼ်ယဝ်ႉ - ၸဝ်ႈသိုၵ်းလူင်ၸၢႆးလႃႉလၢတ်ႈ ။


ၾၢႆႇၼိုင်ႈတၢင်းၼိုင်ႈ ပူၼ်ႉမႃးမိူဝ်ႈဝၼ်းတီႈ 15/09/2015 သိုၵ်းမၢၼ်ႈတင်းသိုၵ်းတႆး RCSS/SSA ယိုဝ်းၵၼ် တၢင်းဝၢၼ်ႈသလွင်း ဢၼ်မီးၾၢႆႇၸၢၼ်းဝဵင်းလၢင်းၶိူဝ်း ။ လွင်ႈၼႆႉ ပဵၼ်သိုၵ်းမၢၼ်ႈတင်းသိုၵ်းပီႇတုၸိတ်ႉ ႁူမ်ႈၵၼ်မီးဢဵၼ်ႁႅင်းမွၵ်ႈ 40 ပၢႆ လမ်းယိုဝ်း RCSS/SSA လႄႈ လႆႈပဵၼ်ပၢင်တိုၵ်းၵၼ် ။


တင်ႈတႄႇ RCSS/SSA ပိုၼ်ၽၢဝ်ႇမိူဝ်ႈဝၼ်းတီႈ 17/08/2015 ဝႃႈတူဝ်ႈတၼ်း တႃႇတေလူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA)ယဝ်ႉၼႆႉ ဝူင်ႈၵၢင်သိုၵ်းမၢၼ်ႈတင်း RCSS/SSA ပဵၼ်ပၢင်တိုၵ်းၵၼ်မႃး 7 ပွၵ်ႈ ၊ ပဵၼ်ၼႂ်းၸႄႈဝဵင်းၼမ်ႉၸၢင် လွႆလႅမ် ၵုၼ်ႁဵင် မွၵ်ႇမႆႇ လၢင်းၶိူဝ်း ၵျွၵ်ႉမႄး ၸိူဝ်းၼႆႉ - ၼႆယဝ်ႉ ။