လိူၼ်ဢွၵ်ႊထူဝ်ႊၿိူဝ်ႊ (2015) ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းတေလူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ၼၼ်ႉ မီးလၢႆၸုမ်းၵေႃႈယဝ်ႉ ၾၢႆႇလူင်ပွင်ၸိုင်ႈမၢၼ်ႈ ဢၢၼ်းတေႁဵတ်းပၢင်လူင်းလၢႆးမိုဝ်း ။

ဝၢႆးသေ တူဝ်တႅၼ်းၸၼ်ႉသုင် ၸုမ်းၸၢဝ်းၶိူဝ်း SD တင်း လူင်ပွင်ၸိုင်ႈမၢၼ်ႈ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC)  ႁူပ်ႉဢုပ်ႇဢူဝ်းၵၼ် တီႈၼေႇပျီႇတေႃႇ ဝၼ်းတီႈ 09/09/2015 ယဝ်ႉ လူင်ပွင်ၸိုင်ႈမၢၼ်ႈ လႆႈသပ်းလႅင်းၼႄတီႈ ၽူႈတႅၼ်းၸုမ်းယိပ်းၵွင်ႈၶဝ်ဝႃႈ ၼႂ်းလိူၼ်ဢွၵ်ႊထူဝ်ႊၿိူဝ်ႊၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း မီးလၢႆၸုမ်းၵေႃႈယဝ်ႉ တေႁဵတ်းပၢင်လူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) - ၼႆယဝ်ႉ ။


ၶေႃႈလႆႈၸႂ် ဢၼ်ပႃးၼႂ်း NCA လၢတ်ႈဝႆႉဝႃႈ ပေႃးလူင်းလၢႆးမိုဝ်းယဝ်ႉ 30 ဝၼ်း ႁႂ်ႈၶဵၼ်ႇတႅမ်ႈယဝ်ႉတူဝ်ႈ ႁဵတ်းဢွၵ်ႇလႆႈ ပိူင်တိုဝ်းၵမ်သိုၵ်း CoC (Code of Conduct) လႄႈ   ပၵ်းပိူင်ၵဵဝ်ႇလွင်ႈပႂ်ႉတူၺ်း ၵၢၼ်ၵိုတ်းယိုဝ်း TOR (Terms of Reference) ။ လူင်းလၢႆးမိုဝ်းယဝ်ႉ 60 ဝၼ်း ႁႂ်ႈၶဵၼ်ႇတႅမ်ႈယဝ်ႉတူဝ်ႈလႄႈ ဢွၵ်ႇလႆႈ ယူင်ႉၶၢပ်ႈဢုပ်ႇဢူဝ်းတၢင်းၵၢၼ်မိူင်း (Framework) ။ လူင်းလၢႆးမိုဝ်းယဝ်ႉ 90 ဝၼ်း ႁႂ်ႈလႆႈတႄႇ  ၵၢၼ်ဢုပ်ႇဢူဝ်းၵၢၼ်မိူင်း ၵမ်းလဵဝ် - ၼႆယဝ်ႉ ။


ၽူႈလဵပ်ႈႁဵၼ်းၵၢၼ်မိူင်း ၸဝ်ႈၼိုင်ႈ ၸီႉၸမ်ႈၼႄဝႃႈ - ပေႃးဢမ်ႇလူင်းလၢႆးမိုဝ်း  NCA ၼႂ်းလိူၼ်ဢွၵ်ႊထူဝ်ႊၿိူဝ်ႊၼႆႉ မၼ်းဢမ်ႇလႆႈ ။ သင်ဝႃႈလူင်းလၢႆးမိုဝ်းၸိုင် တူဝ်ယၢင်ႇမၼ်း တေလူင်းလိူၼ်ဢွၵ်ႊထူဝ်ႊၿိူဝ်ႊ ဝၼ်းတီႈ 7 ၊ ၼႂ်း 30 ဝၼ်းၼႆႉ ထိုင်မႃးၼူဝ်ႊဝႅမ်ႊၿိူဝ်ႊ 6 ဝၼ်း တေၶဵၼ်ႇတႅမ်ႈယဝ်ႉ ၶေႃႈတိုဝ်းၵမ်သိုၵ်းလႄႈ ပၵ်းပိူင်ၵဵဝ်ႇလူၺ်ႈပႂ်ႉတူၺ်းၵၢၼ်ၵိုတ်းယိုဝ်း ။ ၼႂ်း 60 ဝၼ်း ၻီႊသႅမ်ႊၿိူဝ်ႊ 6 ဝၼ်း ၶဵၼ်ႇတႅမ်ႈယဝ်ႉတူဝ်ႈလႄႈ ဢွၵ်ႇလႆႈ ယူင်ႉၶၢပ်ႈဢုပ်ႇဢူဝ်း တၢင်းၵၢၼ်မိူင်း ။ 90 ဝၼ်း ႁႂ်ႈလႆႈတႄႇ ဢုပ်ႇဢူဝ်းၵၢၼ်မိူင်းၵမ်းလဵဝ် ၊ တေတူၵ်းမွၵ်ႈ လိူၼ်ၵျႅၼ်ႊၼိဝ်ႊရီႊ 5 ဝၼ်း ။ ပေႃးဢမ်ႇယဝ်ႉ မၼ်းပူၼ်ႉပႅၼ်ၶေႃႈတူၵ်းလူင်း ၊ ၵွပ်ႈဝႃႈ ပေႃးလူင်းလၢႆးမိုဝ်းယဝ်ႉ မၼ်းပဵၼ်မၢႆမီႈယဝ်ႉ ၊ ယႃႇႁႂ်ႈလႆႈပူၼ်ႉပႅၼ်မၢႆမီႈ - ဝႃႈၼႆ ။


ၵွပ်ႈသင်ၶဝ် ဢမ်ႇၶႂ်ႈႁႂ်ႈတူၵ်းလိုၼ်း လိူၼ်ၵျႅၼ်ႊၼိဝ်ႊရီႊၼၼ်ႉ ၵွပ်ႈဝႃႈ ပေႃးထိုင်မႃး လိူၼ်ၵျႅၼ်ႊၼိဝ်ႊရီႊၼႆႉ တေမီးသၽႃးမႂ်ႇ ။ မိူဝ်ႈပႆႇမီးသၽႃးမႂ်ႇၼၼ်ႉ ႁႂ်ႈလႆႈႁဵတ်းယဝ်ႉတူဝ်ႈ ။ ပေႃးဝႃႈပႂ်ႉသၽႃးမႂ်ႇ မၼ်းတေသုၵ်ႉသၵ်ႉ ။ သၽႃးၵဝ်ႇၼႆႉ မၼ်းၶဝ်ႈတိၼ်ၶဝ်ႈမိုဝ်းၵၼ်ယဝ်ႉ ၊ လူင်ပွင်ၸိုင်ႈၵဝ်ႇမိူဝ်ႈလဵဝ်ၼႆႉၵေႃႈ မၼ်းၶဝ်ႈတိၼ်ၶဝ်ႈမိုဝ်းၵၼ်ယဝ်ႉ ။ ပေႃးဝႃႈသၽႃးမႂ်ႇ / လူင်ပွင်ၸိုင်ႈမႂ်ႇၼႆ တေလႆႈတႄႇမႂ်ႇၶိုၼ်းတင်းမူတ်း ၊ မၼ်းဢမ်ႇၵပ်းတၢမ်းၵၼ် ၊ ၵွပ်ႈပိူဝ်ႈၼၼ် တေလႆႈႁဵတ်းၸွမ်းၶၵ်ႉတွၼ်ႈ ၼင်ႇၼႆ - ၽူႈလဵပ်ႈႁဵၼ်းၵၢၼ်မိူင်း သိုပ်ႇလၢတ်ႈ ။


ဝၼ်းတီႈ 17-18/09/2015 (မိူဝ်ႈၼႆႉလႄႈ မိူဝ်ႈၽုၵ်ႈ) ၸုမ်းတူဝ်တႅၼ်း ၾၢႆႇဢုပ်ႇဢူဝ်းၵၢၼ်ၵိုတ်းတိုၵ်း SD (EAO’ SDCN) တင်းမူတ်း 15 ၸုမ်းႁူပ်ႉဢုပ်ႇဢူဝ်းၵၼ် တီႈၼႂ်းၵဵင်းမႆႇ ၸိုင်ႈထႆး ။ ပေႃးထိုင်မႃး ဝၼ်းတီႈ 24-26/09/2015 တေမီးၵၢၼ်ၸတ်း ပၢင်ၵုမ်လူင်ၸၼ်ႉသုတ်းယွတ်ႈ (Summit) ထႅင်ႈ ၊ ၸုမ်းၸၢဝ်းၶိူဝ်းယိပ်း ၵွင်ႈၵၢင်ႇ 15 ၸုမ်းၼႆႉ  တေလူင်းလၢႆးမိုဝ်းဢမ်ႇလူင်း ၊ ပေႃးလူင်းသမ်ႉ တေလူင်းလၢႆၸုမ်း ၊ တေဢမ်ႇလူင်းလၢႆၸုမ်း ၸိူဝ်းၼႆႉတေမီးၶေႃႈလႆႈၸႂ်ဢွၵ်ႇမႃး - ၼႆယဝ်ႉ ။