ဢိင်ၼိူဝ် မၢၵ်ႇတႅၵ်ႇ တီႈၵၢင်ဝဵင်းလူင် မိူင်းၵွၵ်ႇသေ ၸဝ်ႈၼႃႈတီႈ ထႆးၶဝ်ႈ ၵူတ်ႇထတ်း လၢႆပိုၼ်ႉတီႈ ၵမ်ႈၼမ် ပဵၼ်ဢွင်ႈတီႈ ႁႅင်းၵၢၼ် ယၢၼ်မိူင်း ယူႇသဝ်း ။

မိူဝ်ႈ ဝၼ်းတီႈ 10/09/2015 သိုဝ်ႇၶၢဝ်ႇထႆး ႁၢႆးငၢၼ်းဝႃႈ - သိုၵ်းထႆး ၊ ပလိၵ်ႈ လႄႈ ၸဝ်ႈၼႃႈ တီႈၾၢႆႇ ဢုပ်ႉပိူင်ႇ ၶဝ်ႈၵူတ်ႇထတ်း လၢႆပိုၼ်ႉတီႈ ၼႂ်းဢိူင်ႇ သၼ်သၢႆး ၸႄႈဝဵင်း မႄႈၸၼ် ၸႄႈတွၼ်ႈ ၵဵင်းႁၢႆး ၸိုင်ႈထႆး ပွတ်းႁွင်ႇ ဢၼ်ထၢင်ႇထိူမ် ဝႃႈမီးလွင်ႈ ၵႃႉၶၢႆ ယႃႈမဝ်းၵမ် ၊ ၵႃႉၶၢႆၵူၼ်း လႄႈ ပိုၼ်ႉတီႈဢၼ် ႁႅင်းၵၢၼ် ယၢၼ်မိူင်း ယူႇသဝ်း မိူၼ်ၼင်ႇ ပိုၼ်ႉတီႈ ၵေႃႇသၢင်ႈ ၵၢၼ်ၽုၵ်ႇသွမ်ႈ ၸိူဝ်းၼႆႉ ၼႆယဝ်ႉ ။


ၸဝ်ႈၼႃႈတီႈ ၶဝ်ယင်းယွၼ်း လွင်ႈႁူမ်ႈမိုဝ်း ၵူၼ်းမိူင်း ႁႂ်ႈၸွႆႈ ပၵ်းတႃတူၺ်း သင်ထူပ်းႁၼ် လွင်ႈပႅၵ်ႇပိူင်ႇ ၵဵဝ်ႇလွင်ႈၽိတ်း မၢႆမီႈ လႄႈ ႁႅင်းၵၢၼ်ယၢၼ်မိူင်း ၼႆ တိတ်းတေႃႇ ၸဝ်ႈၼႃႈလႆႈ 24 ၸူဝ်ႈမူင်း ဝႃႈၼႆ ။


ၵဵဝ်ႇလူၺ်ႈ လွင်ႈၼႆႉ မိူဝ်ႈ ဝၼ်းတီႈ 08 /09/2015 ၼၼ်ႉ ၸဝ်ႈၼႃႈတီႈ ပလိၵ်ႈထႆး ၊ သိုၵ်းထႆး လႄႈ ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈမိူင်း 200 ၵေႃႉ ၶဝ်ႈၵူတ်ႇထတ်း ႁႅင်းၵၢၼ် ယၢၼ်မိူင်း 7တီႈ ၼႂ်းၸႄႈဝဵင်း မႄႈသၢႆ ၸႄႈတွၼ်ႈ ၵဵင်းႁၢႆး လႅၼ်လိၼ်တႆး - ထႆး တီႉၺွပ်းႁႅင်းၵၢၼ် ယၢၼ်မိူင်း 80 ၵေႃႉပၢႆ ။