သိုၵ်းမၢၼ်ႈ လၢႆတပ်ႉၵွင် ထႅမ်ႁႅင်းသိုၵ်း ၼပ်ႉႁူဝ်ပၢၵ်ႇ ၶဝ်ႈၸူး ၼႃႈလိၼ်ပိုၼ်ႉတီႈ ပၢင်တိုၵ်း ၼႂ်းၸႄႈ ဝဵင်းမိူင်းပွၼ်။ ဝၢႆးပဵၼ် ပၢင်တိုၵ်းၵၼ်တင်း သိုၵ်းတႆး RCSS/SSA တီႈႁိမ်း ဝၢၼ်ႈသၢမ်ပူး ။

ဝၢႆး ပၢင်တိုၵ်း ဝူင်ႈၵၢင် တပ်ႉသိုၵ်းၸိုင်ႈတႆး (RCSS/SSA) တင်း သိုၵ်းမၢၼ်ႈ တီႈႁိမ်း ဝၢၼ်ႈသၢမ်ပူး ၾၢႆႇတူၵ်း ဝၢၼ်ႈၼမ်ႉမေႃႇ လိၼ်လိူင် ၸႄႈဝဵင်း မိူင်းပွၼ် မိူဝ်ႈ ဝၼ်းတီႈ 07/09/2015 ယဝ်ႉ သိုၵ်းမၢၼ်ႈ တပ်ႉၶလယ 247 ၼမ်ႉၸၢင် ၊ တပ်ႉၶလယ 216 ၼမ်ႉၸၢင် ၊ ၶလယ 152 ၶူဝ်လမ် ၊ ၶလယ 12 လွႆလႅမ် တင်း ၶမယ 517 မိူင်းပွၼ် ၸိူဝ်းၼႆႉ ထႅမ်ႁႅင်းသိုၵ်း ၶဝ်ႈၼႂ်းပိုၼ်ႉတီႈ ဢၼ်ပဵၼ် ပၢင်တိုၵ်း ။ ႁွၼ်ႈထဝ်ႇ သွၵ်ႈႁႃသိုၵ်းတႆး ၊ ထၢမ်ၵူၼ်းဝၢၼ်ႈ လွင်ႈၶၢဝ်ႇ သိုၵ်းတႆး ၸိူဝ်းၼႆႉ ။ လွင်ႈၼႆႉ ႁဵတ်းႁႂ်ႈ ၵူၼ်းဝၢၼ်ႈ တူၵ်းၸႂ် - ၼႆယဝ်ႉ ။


တပ်ႉသိုၵ်းမၢၼ်ႈ မီးဝႆႉ ၽႅၼ်ၵၢၼ် ပိူဝ်ႈတႃႇ ႁူမ်ႇငမ်းၵုမ်းၵမ် လႆႈပိုၼ်ႉတီႈ လႄႈ ပိူဝ်ႈတႃႇ ၵႂၢတ်ႇလၢင်ႉ ၾၢႆႇသၢၼ်ၶတ်းၶဝ် ၸိူဝ်းယူႇ ၼႂ်းပိုၼ်ႉတီႈ ။


ၵဵဝ်ႇၵပ်း လွင်ႈၼႆႉ ၽူႈၶၢၼ်ပၢၵ်ႇ (RCSS/SSA) ၸဝ်ႈသိုၵ်း လူင်ၸၢႆးလႃႉ ယၢမ်ႈလၢတ်ႈဝႃႈ - ပၢင်တိုၵ်း ဢၼ်ပဵၼ်ၵႂႃႇၼႆႉ ပဵၼ်ယွၼ်ႉပိူဝ်ႈ သိုၵ်းလူင် ပွင်ၸိုင်ႈ ၶႂ်ႈၶႂၢၵ်ႈ ၼႃႈလိၼ် မႄႇပိုၼ်ႉတီႈ ၊ ၶႂ်ႈၵုမ်း ၼႃႈလိၼ်သေ ၶႂၢၵ်ႈသိုၵ်း ၶဝ်ၶိုၼ်ႈမႃး ။ ၾၢႆႇတပ်ႉ RCSS/SSA ငိူင်ႉဝႄႈယူႇၵေႃႈ ယင်းတိုၵ်ႉပဵၼ် ပၢင်တိုၵ်းယူႇ ။ ၼင်ႇႁိုဝ် ပၢင်တိုၵ်း ပေႃးတေ လူတ်းယွမ်းၵႂႃႇၼၼ်ႉ ပေႃးဝၢႆး ဢုပ်ႇဢူဝ်း လူင်းလၢႆးမိုဝ်း ၵိုတ်းယိုဝ်း ပတ်းပိုၼ်ႉ တူဝ်ႈမိူင်း ၵၼ်ယဝ်ႉ ၊ တမ်းဝၢင်းလႆႈ တီႈယူႇ တီႈသဝ်း ယဝ်ႉတႄႉ တေၸၢင်ႈ လူတ်းယွၼ်ႇလႆႈ ပၢင်တိုၵ်းယူႇ ။ ပိူင်လူင်မၼ်း ၼႂ်းၶၢဝ်းတၢင်း ယၢင်ႈၵႂႃႇၸူး လွင်ႈငမ်းယဵၼ် ယူႇၼႆႉ ၸူဝ်ႈၵႃႈတပ်ႉ တင်းသွင်ၾၢႆႇ ပႆႇလႆႈတမ်း ဝၢင်း တီႈယူႇ ၵၼ်ၼႆႉ ၼင်ႇႁိုဝ် တေဢမ်ႇပဵၼ် ပၢင်တိုၵ်းၼၼ်ႉ ထုၵ်ႇလႆႈ ငိူင်ႉဝႄႈၵၼ် တင်းသွင်ၾၢႆႇယူႇ - ဝႃႈၼႆ ။


ၾၢႆႇၼိုင်ႈ တၢင်းၼိုင်ႈ ဝၼ်းတီႈ 10/09/2015 တီႈၵိူဝ်းၵုမ် လုမ်းသုၼ်ၵၢင် လွင်ႈငမ်းယဵၼ် မၢၼ်ႈ (MPC) ဢူးလႃႉမွင်ႇသူၺ်ႇ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ -  ဢၼ်ပဵၼ် ပၢင်တိုၵ်းၵၼ်ၼႆႉ ပဵၼ်တၢင်း ပၢႆမၼ်းၵူၺ်း ။ ၵွပ်ႈၼၼ်လႄႈ ႁဝ်းလူင်းလၢႆးမိုဝ်း ၵၢၼ်ၵိုတ်းယိုဝ်း ပတ်းပိုၼ်ႉ တူဝ်ႈမိူင်း (NCA) ယဝ်ႉ တေဢမ်ႇပဵၼ် ပၢင်တိုၵ်းၼႆ ဢမ်ႇမီးၽႂ် ႁပ်ႉႁွင်းလႆႈ ၊ ၼႂ်းလုမ်ႈၾႃႉၵေႃႈ ဢမ်ႇမီးပိုၼ်း မၼ်းမႃး ။ ၵွပ်ႈၼၼ် ပေႃးၵိုတ်းယိုဝ်း ပတ်းပိုၼ်ႉ တူဝ်ႈမိူင်းယဝ်ႉသေ ပဵၼ်ဢုပ်ႇဢူဝ်း ၵၢၼ်မိူင်းၵၼ်ၵွၼ်ႇ ၸင်ႇတေ လူတ်းယွၼ်ႇလႆႈ ဢၼ်ပဵၼ် ပၢင်တိုၵ်းၵၼ်ၼႆႉ ၵမ်းၸၼ်ႉၸၼ်ႉ ၊ ပေႃးလူင်း လၢႆးမိုဝ်းၵၢၼ် မိူင်းၵၼ်ယဝ်ႉၵေႃႈ ပၢင်တိုၵ်းၼႆႉ ၸင်ႇတေ ၸၢင်ႈမွတ်ႇ ယဵၼ်ၵႂႃႇ လႆႈယဝ်ႉ - ဝႃႈၼႆ ။


ထႅင်ႈၾၢႆႇၼိုင်ႈ တၢင်းၼိုင်ႈ မိူဝ်ႈ ဝၼ်းတီႈ 09/09/2015 ပွတ်းၼႂ်ၼၼ်ႉ ရူတ်ႉၵႃး သိုၵ်းမၢၼ်ႈ 4 လမ်း တၢင်ႇၵူၼ်း သိုၵ်းတဵမ်ပိၵ်း လႄႈ ၵႃးတၢင်ႇ ၵွင်ႈလူင် 1 လမ်း လုၵ်ႉတၢင်း ၵႃလိ ထႅမ်ႁႅင်းသိုၵ်း ၶိုၼ်ႈၵႂႃႇ တၢင်းဝၢၼ်ႈႁႆး ငဝ်ႈငုၼ်း တပ်ႉသိုၵ်းၸိုင်ႈတႆး (SSPP/SSA) ။ ၵွင်ႈလူင်ၼၼ်ႉ ပဵၼ်ၵွင်ႈလူင် သႅၼ်း 105mm - ၵူၼ်းႁူႉလွင်ႈ သိုၵ်းၵေႃႉၼိုင်ႈ လၢတ်ႈၼင်ႇၼႆ ။


ၵူၼ်းၸမ်ၸႂ် ၾၢႆႇတပ်ႉ SSPP/SSA ၵေႃႉၼိုင်ႈ လၢတ်ႈဝႃႈ - လွင်ႈၼႆႉ ဢမ်ႇၸႂ်ႈသိုၵ်းမႂ်ႇ ၊ ပဵၼ်သိုၵ်းမၢၼ်ႈ ၶဝ်ပုတ်ႈ လၢႆႈၶၢႆႉတပ်ႉ ၵၼ်ၵူၺ်း ၊ လႅပ်ႈတေ ဢမ်ႇၸႂ်ႈလွင်ႈ လၢၵ်ႇလၢႆးသင် ။ ၵူၺ်းၵႃႈ ၵူၼ်းဝၢၼ်ႈ ၼႂ်းပိုၼ်ႉတီႈ ဢၼ်ႁၼ်သိုဝ်ႈၼႃႈ ၵေႃႉၼိုင်ႈဝႃႈ - သိုၵ်းမၢၼ်ႈ ၶီႇၵႃးပဵၼ် 4 လမ်း ၊ ၵႃးတၢင်ႇၵွင်ႈ လူင် 1 လမ်းသေ ၶိုၼ်ႈၵႂႃႇၸူး ၼႃႈလိၼ် တပ်ႉသိုၵ်းၸိုင်ႈတႆး (SSPP/SSA) ၼႆႉ ငဝ်းလၢႆးမၼ်း ဢမ်ႇပေႃးလီ - ဝႃႈၼႆ ။


ၵဵဝ်ႇၵပ်း လွင်ႈပၢင်တိုၵ်း တၢင်းမိူင်းပွၼ် ဢၼ်ႁဵတ်းႁႂ်ႈ သိုၵ်းမၢၼ်ႈ လၢႆတပ်ႉ ထႅမ်ႁႅင်းသိုၵ်း ပွၵ်ႈၼႆႉ ပူၼ်ႉမႃး မိူဝ်ႈ ဝၼ်းတီႈ 07/09/2015 တင်ႈတႄႇယၢမ်း 5 မူင်းပၢႆ တေႃႇထိုင် 6 မူင်းၶိုင်ႈ ႁူဝ်ၶမ်ႈ ( ၶၢဝ်းတၢင်း 1 ၸူဝ်ႈမူင်းပၢႆ ) တပ်ႉသိုၵ်းၸိုင်ႈတႆး (RCSS/SSA) တင်းသိုၵ်းမၢၼ်ႈ တပ်ႉၶလယ 12 လွႆလႅမ် ပဵၼ် ပၢင်တိုၵ်းၵၼ် ႁိမ်းဝၢၼ်ႈသၢမ်ပူး ၾၢႆႇတူၵ်း ဝၢၼ်ႈၼမ်ႉမေႃႇ လိၼ်လိူင် ၾၢႆႇဢွၵ်ႇ မိူင်းပွၼ် မွၵ်ႈ 10 လၵ်း ၊ ၼႂ်းၸႄႈဝဵင်း မိူင်းပွၼ် လႅၼ်ၶႅၼ်ႈ မိူင်းပွၼ် - လွႆလႅမ် ၸိုင်ႈတႆး ပွတ်းၸၢၼ်း ။ လႆႈႁူႉဝႃႈ ၾၢႆႇသိုၵ်းမၢၼ်ႈတၢႆ 3 ၵေႃႉ ၊ ပႃးႁူဝ်သိုၵ်းလူင် ၵေႃႉၼိုင်ႈ ၊ ဝၢတ်ႇၸဵပ်း 4 ၵေႃႉ ၊ ၾၢႆႇတပ်ႉသိုၵ်း ၸိုင်ႈတႆး RCSS/SSA တူၵ်းသုမ်း 1 ၵေႃႉ - ၼႆယဝ်ႉ ။


ဢၼ်ပဵၼ် ပၢင်တိုၵ်းၵၼ် ပွၵ်ႈၼႆႉ ၾၢႆႇသိုၵ်းမၢၼ်ႈ တပ်ႉၶလယ 12  မီးဢဵၼ်ႁႅင်းမွၵ်ႈ 20 ၵေႃႉပၢႆ ။ ၾၢႆႇသိုၵ်းတႆး RCSS/SSA မီးဢဵၼ်ႁႅင်းသိုၵ်း 40 ပၢႆ ။ ဢွၼ်ၼႃႈၼႆႉ ၾၢႆႇသိုၵ်းမၢၼ်ႈ လႆႈၶၢဝ်ႇဝႃႈ သိုၵ်းတႆး RCSS/SSA မႃးတူင်ႉၼိုင် သူၼ်းတုမ်ၵူၼ်းမိူင်း ပွတ်းတွၼ်ႈၼၼ်ႉသေ သူင်ႇႁႅင်းသိုၵ်း ၵႂႃႇသွင်ငႃး ၊ တပ်ႉ 517 မိူင်းပွၼ် ႁႅင်းမွၵ်ႈ 30 တင်းတပ်ႉၶလယ 12 လွႆလႅမ် ( တႂ်ႈတိူင်းသိုၵ်း ဝၼ်းဢွၵ်ႇဢွၵ်ႇၵၢင် ၶူဝ်လမ် ) ႁႅင်းမွၵ်ႈ 20 ပၢႆၶဝ်ႈၵႂႃႇ တူင်ႉၼိုင် သွၵ်ႈတဝ်ႁႃ သိုၵ်းတႆး ၊ သွင်ၾၢႆႇ ၸင်ႇလႆႈယိုဝ်းၵၼ် - ၼႆယဝ်ႉ ။