သိုၵ်းတႆး RCSS / SSA တင်းသိုၵ်းမၢၼ်ႈ ပဵၼ် ပၢင်တိုၵ်းၼႂ်း ၸႄႈဝဵင်း မိူင်းပွၼ် ၊ ယွၼ်ႉ သိုၵ်းမၢၼ်ႈ လႆႈၶၢဝ်ႇ သိုၵ်းတႆးၵႂႃႇ တူင်ႉၼိုင် သူၼ်းတုမ် ၵူၼ်းမိူင်း ပွတ်းတွၼ်ႈၼၼ်ႉလႄႈ သူင်ႇငႃးသိုၵ်း ၶဝ်ႈသွၵ်ႈတဝ် ၊ သွင်ၾၢႆႇ လူႉသုမ်း ၼင်ႇၵၼ် ။

ဝၼ်းတီႈ 07/09/2015 တင်ႈတႄႇ ယၢမ်း 5 မူင်းပၢႆ တေႃႇထိုင် 6 မူင်းၶိုင်ႈ ႁူဝ်ၶမ်ႈ (ၶၢဝ်းတၢင်း 1 ၸူဝ်ႈမူင်းပၢႆ) တပ်ႉသိုၵ်း ၸိုင်ႈတႆး (RCSS / SSA) တင်းသိုၵ်းမၢၼ်ႈ တပ်ႉ 517 မိူင်းပွၼ် ပဵၼ်ပၢင်တိုၵ်းၵၼ် ႁိမ်းဝၢၼ်ႈ သၢမ်ပူး ၾၢႆႇတူၵ်းဝၢၼ်ႈ ၼမ်ႉမေႃႇ လိၼ်လိူင် ၾၢႆႇဢွၵ်ႇ မိူင်းပွၼ် မွၵ်ႈ 10 လၵ်း ၊ ၼႂ်းၸႄႈဝဵင်း မိူင်းပွၼ် လႅၼ်ၶႅၼ်ႈ မိူင်းပွၼ် - လွႆလႅမ် ၸိုင်ႈတႆး ပွတ်းၸၢၼ်း ။ လႆႈႁူႉဝႃႈ ၾၢႆႇသိုၵ်းမၢၼ်ႈ တၢႆ 3 ၵေႃႉ ၊ ပႃးၶုၼ်သိုၵ်းလူင် ၵေႃႉၼိုင်ႈ ၊ ဝၢတ်ႇၸဵပ်း 2-3 ၵေႃႉ ၊ ၾၢႆႇတပ်ႉသိုၵ်း ၸိုင်ႈတႆး RCSS / SSA တူၵ်းသုမ်း 1 ၵေႃႉ ၊ လွင်ႈဝၢတ်ႇၸဵပ်း ပႆႇလႆႈႁူႉ ။


ဢၼ်ပဵၼ် ပၢင်တိုၵ်းၵၼ် ပွၵ်ႈၼႆႉ ၾၢႆႇသိုၵ်းမၢၼ်ႈ တပ်ႉ ၶမယ 517 မီးဢဵၼ်ႁႅင်း မွၵ်ႈ 30 ၵေႃႉ ။ ၾၢႆႇသိုၵ်းတႆး RCSS/SSA မီး ဢဵၼ်ႁႅင်းသိုၵ်း 40 ပၢႆ ။ ဢွၼ်ၼႃႈၼႆႉ ၾၢႆႇသိုၵ်းမၢၼ်ႈ လႆႈၶၢဝ်ႇဝႃႈ သိုၵ်းတႆး RCSS/SSA မႃး တူင်ႉၼိုင် သူၼ်းတုမ် ၵူၼ်းမိူင်း ပွတ်းတွၼ်ႈ ၼၼ်ႉသေ သူင်ႇႁႅင်းသိုၵ်းၵႂႃႇ သွင်ငႃး ၊ တပ်ႉ 517 မိူင်းပွၼ် ႁႅင်းမွၵ်ႈ 30 တင်းတပ်ႉ ၶလယ 12 လွႆလႅမ် (တႂ်ႈတိူင်းသိုၵ်း ဝၼ်းဢွၵ်ႇ ဢွၵ်ႇၵၢင် ၶူဝ်လမ်) ႁႅင်းမွၵ်ႈ 20 ပၢႆ ၶဝ်ႈၵႂႃႇ တူင်ႉၼိုင် သွၵ်ႈတဝ်ႁႃ သိုၵ်းတႆး ၊ သွင်ၾၢႆႇ လႆႈယိုဝ်းၵၼ် ။ မိူဝ်ႈၼႆႉ ပွတ်းၼႂ် သိုၵ်းတႆး ၶဝ်ႈၵူတ်ႇထတ်း ဢွင်ႈတီႈ ပဵၼ်ပၢင်တိုၵ်း ၊ ယိုတ်းလႆႈ ထူင်ပိူဝ်ႉ ၶူဝ်းသိုၵ်းမၢၼ်ႈ ၵမ်ႈၽွင်ႈလႄႈ မၢၵ်ႇမိုဝ်ႈ ၸိုၼ်းယၢမ်း ၵမ်ႈၽွင်ႈ - ၵူၼ်းယူႇၼႂ်း ပိုၼ်ႉတီႈ ၸႄႈဝဵင်းမိူင်းပွၼ် ၵေႃႉၼိုင်ႈလၢတ်ႈ ။


ၾၢႆႇၼိုင်ႈ တၢင်းၼိုင်ႈ မိူဝ်ႈၼႆႉ ပွတ်းၼႂ် သိုၵ်းမၢၼ်ႈတပ်ႉ 516 တင်းတပ်ႉ 247 ႁူမ်ႈၵၼ် ႁႅင်းသိုၵ်းမွၵ်ႈ 140 ပၢႆ လုၵ်ႉတၢင်း ၼမ်ႉၸၢင် ထႅမ်ႁႅင်းသိုၵ်း ၶိုၼ်ႈၵႂႃႇ တၢင်းတိၼ်လွႆ တၢင်းၶိုၼ်ႈ ပၢင်လႅမ်း ။ သိုၵ်းမၢၼ်ႈ မိူင်းပွၼ်ၵေႃႈ ထႅမ်ႁႅင်းသိုၵ်း မုင်ႈၼႃႈၵႂႃႇၸူး ပိုၼ်ႉတီႈ ဢၼ်ပဵၼ် ပၢင်တိုၵ်းထႅင်ႈ - ၵူၼ်းၼႂ်းပိုၼ်ႉတီႈ မိူင်းပွၼ် ။


ၵဵဝ်ႇၵပ်းလွင်ႈ ပၢင်တိုၵ်းၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင် ၸၢႆးလႃႉ ယိုၼ်ယၼ် လၢတ်ႈဝႃႈ ပၢင်တိုၵ်းလႆႈ ပဵၼ်တႄႉ ။


“ ပၢင်တိုၵ်း ဢၼ်ပဵၼ်ၵႂႃႇၼႆႉ ပဵၼ်ယွၼ်ႉပိူဝ်ႈ သိုၵ်းလူင် ပွင်ၸိုင်ႈ ၶႂ်ႈၶႂၢၵ်ႈၼႃႈ လိၼ်ပိုၼ်ႉတီႈ ၊ ၶႂ်ႈၵုမ်း ၼႃႈလိၼ်သေ ၶႂၢၵ်ႈသိုၵ်းၶဝ် ၶိုၼ်ႈမႃး ။ သင်ၸိူဝ်ႉဝႃႈ ၶဝ်ႁဵတ်းၼႆယူႇ တိၵ်းတိၵ်းတႄႉ ပၢင်တိုၵ်းတေ ဢမ်ႇယဵၼ် ၊ တေပဵၼ်ယူႇ တိၵ်းတိၵ်း ။ ၵဵဝ်ႇၵပ်း လွင်ႈၼႆႉ လႆႈတၢင်ႇလိၵ်ႈ ထိုင် ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် (UPWC) ဢူးဢွင်ႇမိၼ်း ၶဝ်ယူႇ ။ ပိူင်လူင်မၼ်း ၼႂ်းၶၢဝ်း တၢင်းယၢင်ႈၵႂႃႇၸူး လွင်ႈငမ်းယဵၼ်ယူႇၼႆႉ ၸူဝ်ႈၵႃႈ တပ်ႉတင်းသွင်ၾၢႆႇ ပႆႇလႆႈတမ်းဝၢင်း တီႈယူႇၵၼ်ၼႆႉ ၼင်ႇႁိုဝ် တေဢမ်ႇပဵၼ် ပၢင်တိုၵ်းၼၼ်ႉ ထုၵ်ႇလႆႈငိူင်ႉဝႄႈၵၼ် တင်းသွင်ၾၢႆႇယူႇ ။ မိူဝ်ႈလဵဝ်ၵေႃႈ ယုမ်ႇယမ်ဝႃႈ ငိူင်ႉဝႄႈၵၼ်လႄႈ ပဵၼ်ပၢင်တိုၵ်း ၵႂႃႇၵူၺ်း ၊ ပိူင်လူင်မၼ်း ယွၼ်ႉပိူဝ်ႈ သိုၵ်းလူင် ပွင်ၸိုင်ႈ ၶႂၢၵ်ႈၼႃႈလိၼ် လႄႈ ပဵၼ်မႃးၵူၺ်း ”-  ၽူႈၶၢၼ်ပၢၵ်ႇ RCSS/SSA လၢတ်ႈ ။


ၼႃႈလိၼ် ဢၼ်ပဵၼ် ပၢင်တိုၵ်းၼႆႉ ယွၼ်ႉပိူဝ်ႈ တပ်ႉပၢင်သဝ်း သိုၵ်းမၢၼ်ႈ ထွႆထွၼ်ၵႂႃႇသေ တိူင်းသိုၵ်းၶူဝ်လမ် သမ်ႉသူင်ႇႁႅင်းသိုၵ်း ၶိုၼ်ႈၵႂႃႇ ၵုမ်းၶိုၼ်း ပွတ်းတွၼ်ႈ ၼႃႈလိၼ်ၼၼ်ႉ လႄႈ ၸင်ႇလႆႈပဵၼ် ပၢင်တိုၵ်းၵၼ် ။


မိူဝ်ႈ ဝၼ်းတီႈ 17/08/2015 ၶွင်ႊသီႊ ဢဝ်ၶိုၼ်းၸိုင်ႈတႆး (RCSS)  တင်းၸုမ်းယၢင်း 3 ၸုမ်း ႁူမ်ႈတုမ် ၸိူဝ်ႉၸၢတ်ႈ ယၢင်းၽိူၵ်ႇ (KNU) ၊ KNLA-PC ၊ တပ်ႉသိုၵ်း ယၢင်းပုတ်ႉထ (DKBA) ၶဝ် ႁဵတ်း ပၢင်ၵုမ်ၵၼ်သေ လႆႈၸႂ်ၵၼ် ဢွၵ်ႇၶေႃႈ ပိုၼ်ၽၢဝ်ႇဝႃႈ - တူဝ်ႈတၼ်း ပိူဝ်ႈတႃႇ တေလူင်း လၢႆးမိုဝ်း ၵိုတ်းယိုဝ်း ပတ်းပိုၼ်ႉ တူဝ်ႈမိူင်း (NCA) ယဝ်ႉ- ဝႃႈၼႆ ။


ဝၢႆးလင် ဢွၵ်ႇၶေႃႈပိုၼ် ၽၢဝ်ႇယဝ်ႉ ဢမ်ႇလၢႆ ဝၼ်းၵူၺ်း သိုၵ်း လူင်ပွင်ၸိုင်ႈ မၢၼ်ႈတင်း သိုၵ်းတႆး RCSS/SSA ပဵၼ် ပၢင်တိုၵ်းၵၼ် ၼႂ်းဢိူင်ႇ သၢႆးၶၢဝ် ၸႄႈဝဵင်း ၵုၼ်ႁဵင် ပွၵ်ႈၵမ်း တီႈၼိုင်ႈ ၊ ယွၼ်ႉ ပၢင်တိုၵ်းသေ သိုၵ်းမၢၼ်ႈ တီႉၺွပ်း ၵူၼ်းဝၢၼ်ႈ ၵႂႃႇ 7 ၵေႃႉ ၊ ႁွင်ႉၵႂႃႇၸွမ်း ငႃးသိုၵ်းမၢၼ်ႈၶဝ် ထႅင်ႈဝၼ်းၼိုင်ႈ ၸင်ႇပွႆႇပၼ်ၶိုၼ်း ။ ပွၵ်ႈၼႆႉ ပဵၼ်ပၢင်တိုၵ်းၵၼ် ဝူင်ႈၵၢင်သွင်ၾၢႆႇ ပွၵ်ႈၵမ်းတီႈ 2 ။