ႁူဝ်ပဝ်ႈ ပႃႊတီႊ သိူဝ်ၽိူၵ်ႇ SNDP ၸၢႆးဢၢႆႈပဝ်း တွပ်ႇလၢတ်ႈဝႃႈ ပၢင်လိူၵ်ႈတင်ႈ 2015 ၼႆႉ ယုမ်ႇယမ်ဝႃႈ ပႃႊတီႊ သိူဝ်ၽိူၵ်ႇ တေပေႉ ၼႂ်းမိူင်းတႆးလႄႈ တၢင်ႇၸႄႈမိူင်း / တိူင်း ။ ပေႃးပဵၼ် လူင်ပွင်ၸိုင်ႈ မိူင်းတႆးယဝ်ႉ ဢၢၼ်းၵႄႈ ၶႆပၼ်ႁႃ တီႈလိၼ် ႁႆႈ ၼႃး ဢွၼ်တၢင်းသုတ်း ။ လွင်ႈၼႆႉ ၸုမ်းၶၢဝ်ႇ ၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၼင်ႇၼႆ ။

(သိုပ်ႇမႃးတွၼ်ႈ 1)


( ၸၢႆးဢၢႆႈပဝ်းလၢတ်ႈ ) ဢၼ်မီး ပၼ်ႁႃ လိူဝ်သေပိူၼ်ႈၼၼ်ႉ မိူင်းတႆး ႁဝ်းၼႆႉ 75% ပဵၼ်ၸဝ်ႈႁႆႈ ၸဝ်ႈၼႃး ၊ တီႈလိၼ်ၼႃးၼႆႉ ႁွင်ႈၵၢၼ်ၾၢႆႇ ၵဵဝ်ႇၶွင်ႈလႄႈ တပ်ႉသိုၵ်း ႁုပ်ႈယိုတ်းဝႆႉ ဢမ်ႇပႆႇ လႆႈၶိုၼ်း မီးတင်းၼမ် ၊ ပေႃးႁဝ်း ပေႉၼမ် ႁဝ်းၶိုၼ်ႈပဵၼ် လူင်ပွင်ၸိုင်ႈ မိူင်းတႆး ။ ဢွၼ်တၢင်းသုတ်း လွင်ႈပၼ်ႁႃ ႁႆႈ ၼႃး ၼင်လိၼ် ပိူၼ်ႈယိုတ်း ႁႆႈ ၼႃး ၸိူဝ်းၼႆႉ ႁဝ်းတေ ၵႄႈၶႆ ဝႆးဝႆး ။ ႁဝ်းၵႄႈၶႆယဝ်ႉ တေပူၵ်းပွင် ႁႂ်ႈၸဝ်ႈႁႆႈ ၸဝ်ႈၼႃး ၾၢႆႇၽုၵ်ႇ သွမ်ႈ ၾၢႆႇလဵင်ႉလူ တူဝ်သတ်း ၸိူဝ်းၼႆႉ ။ ႁဝ်းဢဵၼ်းဢၢၼ်း ၵပ်းၵၢႆႇ တင်းၼွၵ်ႈမိူင်းသေ ႁႂ်ႈၵူၼ်းႁဝ်း ၾၢႆႇၽုၵ်ႇသွမ်ႈၵေႃႈ ၶိုတ်းၵၢပ်ႈ ၶိုတ်းပၢၼ် ။ ၶဝ်ဢမ်ႇမီး ပၼ်ႁႃတီႈ လိၼ်ယဝ်ႉ ၊ ၶဝ်တေ လႆႈၶတ်းၸႂ် ႁႂ်ႈၾၢႆႇ ၽုၵ်ႇသွမ်ႈ ႁႂ်ႈၶိုၼ်ႈယႂ်ႇ မႂ်ႇသုင် ၵူၺ်းယဝ်ႉ ။ ၾၢႆႇၽုၵ်ႇသွမ်ႈ ၵူၺ်းဢမ်ႇၵႃး ၾၢႆႇလဵင်ႉလူ တူဝ်သတ်းၵေႃႈ လမ်ႇလွင်ႈ ၊ မိူင်းထႆးၼႆႉ ႁဝ်းႁၼ် ၶဝ်ၵတ်ႉၶႅၼ်ႇ ၾၢႆႇၽုၵ်ႇသွမ်ႈ ၾၢႆႇလဵင်ႉလူ တူဝ်သတ်း ၊ ၶဝ်ယင်းၶႂ်ႈၵတ်ႉၶႅၼ်ႇ လိူဝ်မိူင်းၶႄႇ ၊ ႁဝ်းထုၵ်ႇလႆႈ ဢဝ်ပၺ်ၺႃၶဝ် ၊ ႁဝ်းတင်းၶဝ် ထုၵ်ႇလႆႈမႃး ႁူမ်ႈႁွမ်းၵၼ် သေႁဵတ်း ။


လိူဝ်သေၼၼ်ႉ  ပၢႆးပၺ်ၺႃၵေႃႈ ႁဝ်းတေလႆႈ ႁွင်ႉၵူၼ်း ၼွၵ်ႈမိူင်းမႃး ၸွႆႈႁဝ်း ၊ မႃးပူၵ်းပွင် ႁႂ်ႈၵူၼ်းႁဝ်း ႁႂ်ႈလႆႈၵၢၼ် ၊ ၵူၼ်းမိူင်းတႆးႁဝ်း ၵႂႃႇယူႇတီႈ မိူင်းထႆး မီးပဵၼ်လၢၼ်ႉ ပၢႆၸိူဝ်းၼႆႉ ႁဝ်းၶႂ်ႈႁႂ်ႈ ပွၵ်ႈမႃး ၊ ၼင်ႇႁိုဝ် ၵူၼ်းၼုမ်ႇႁဝ်း ပေႃးမီး ၵၢၼ်ငၢၼ်း ။ ပေႃးမီး ၵၢၼ်ငၢၼ်း ၽႂ်ၵေႃႈ ဢမ်ႇၶႂ်ႈၵႂႃႇ ဝၢၼ်ႈပိူၼ်ႈ မိူင်းပိူၼ်ႈ ၊ ၵွပ်ႈဢမ်ႇၶႂ်ႈ ၽၢတ်ႇဝၢၼ်ႈ သူၼ်ႁဝ်း ႁိူၼ်းႁဝ်း ပီႈၼွင်ႉႁဝ်း တီႈမိူင်းတႆး ။ ဢၼ်ႁဝ်းၶႂ်ႈ ပူၵ်းပွင်ၼႆႉ မီးၼမ်ၼႃႇ ၊ ပၢႆးပၺ်ၺႃၵေႃႈ ႁဝ်းၶႂ်ႈ ပူၵ်းပွင်ပၼ် ။ တႆးႁဝ်းၼႆႉ ပၺ်ၺႃၼႆႉ ပေႃးၵႂႃႇ တႅၵ်ႈၼိူင်းတူၺ်း တင်းၵူၼ်း ၶိူဝ်းဢွၼ်ႇ ၼႂ်းၸိုင်ႈမိူင်း ႁူမ်ႈတုမ်မၢၼ်ႈ ႁဝ်းၼႆႉ ႁဝ်းတူၵ်းတႅမ်ႇ ။ ဢၼ်ၼႆႉႁဝ်းၶႂ်ႈ ပူၵ်းပွင်ၾၢႆႇ ပၢႆးပၺ်ၺႃ ၊ ပၢႆးယူႇလီၸိူဝ်းၼႆႉ ။


ထၢမ် - ပိူဝ်ႈတႃႇ ၶဝ်ႈလိူၵ်ႈတင်ႈ ႁႂ်ႈပေႃးပေႉၼၼ်ႉ ႁူဝ်ပဝ်ႈ လႆႈႁၢင်ႈႁႅၼ်းဝႆႉ ၸိူင်ႉႁိုဝ်ၶႃႈ ?။


တွပ်ႇ - ႁဝ်းသူၼ်းတုမ်ဝႆႉ ၵူႈဝဵင်းယဝ်ႉ ၊ ၵူၺ်းၵႃႈ ႁဝ်းၶႂ်ႈလၢတ်ႈ ပေႃႈမႄႈ ၵူၼ်းမိူင်း တႆးႁဝ်းတင်းသဵင်ႈ ယႃႇပေ ၵႂင်ပေၵႃး ၊ ပေႃႈမႄႈ ၵူၼ်းမိူင်းတႆး ၵေႃႈဝႃႈ ၶႂ်ႈၸွႆႈထႅမ် ပႃႊတီႊ တႆးၵူၺ်း ၊ ပႃႊတီႊတႆး ၸိုၼ်ႈၸၢင်ႇ ( ၸႅတ်ႈၸၢင်ႇ ) ၼႆႉ မီးပႃႈတီႊ သိူဝ်ၽိူၵ်ႇၵူၺ်း ။ ပေႃႈမႄႈ ၸၢဝ်းၶိူဝ်းတႆး မိူင်းတႆး ပႃးၸဵမ် မိူင်းၶၢင် ၊ တိူင်းၸႄႈၵႅင်ႇ (ၸၵၢႆး) ၊ တိူင်း ဝဵင်းတႃႈလိူဝ်ႇ (မၼ်းတလေး) ပႃးၸဵမ် မိူင်းယၢင်းလႅင် ယႃႇပေၵႂင် ပေၵႃး ၊ လူဝ်ႇဢွၼ်ၵၼ် ၸွႆႈထႅမ် တွတ်ႈၶႅပ်း ၵၢင်ၸႂ်လိူၵ်ႈ ပႃႊတီႊ သိူဝ်ၽိူၵ်ႇ ၊ ပေႃးဝႃႈ တွတ်ႈၶႅပ်း ၵၢင်ၸႂ်လိူၵ်ႈ ပႃႊတီႊ သိူဝ်ၽိူၵ်ႇၸိုင် ၽဝၵမ် ၸႃတႃ (ၵၢမ်ႇၵျမ်ႇမႃႇ) တႆးႁဝ်း ၸင်ႇတေ လႅၵ်ႈလၢႆႈသေ ၶိုၼ်ႈယႂ်ႇမႂ်ႇ သုင်ၵႂႃႇ ဝၼ်းတႃ မိူဝ်းၼႃႈ ။


ထၢမ် - ၵၢၼ်လိူၵ်ႈတင်ႈ ၼႂ်းပီ 2015 ၼႆႉ ၼႂ်းမိူင်းတႆးၼႆႉ ပဵၼ်ပႃႊတီႊ ဢၼ်လႂ်ၶႃႈ ဢၼ်တေလႆႈ ၶႄႉၶႅင်ႇ တႄႉတႄႉ ?။


တွပ်ႇ - ပႃႊတီႊ မၼ်းမီးၼမ် ၊ ဢၼ်ႁဝ်း ႁၼ်တႄႉ မီးပႃႊတီႊ သၢင်ႇသီႈ (USDP) တင်းပႃႊတီႊ ၼူၵ်ႉယုင်း (NLD) ၊ ႁဝ်းယုမ်ႇယမ်ဝႃႈ ပႃႊတီႊ သိူဝ်ၽိူၵ်ႇ ႁဝ်းႁႅင်း သေပိူၼ်ႈ ၊ ပေႃႈမႄႈ ၵူၼ်းမိူင်းၵေႃႈ ပၼ်ႁႅင်း ႁဝ်းယူႇ ၊ ၵူၺ်းၵႃႈ ၼင်ႇႁိုဝ် ပေႃႈမႄႈ ၵူၼ်းမိူင်း တေပၼ်ႁႅင်း ႁဝ်းႁူဝ်ပၢၵ်ႇ (100%) တဵမ်ထူၼ်ႈၼႆႉ ႁဝ်းၶႂ်ႈႁႂ်ႈ ပေႃႈမႄႈ ၵူၼ်းမိူင်းႁဝ်း ယႃႇပေၵႂင် ပေၵႃး ၊ ဢွၼ်ၵၼ် ပၼ်ႁႅင်း ပႃႊတီႊ သိူဝ်ၽိူၵ်ႇ ဢၼ်ပဵၼ်တႆး ၸိုၼ်ႈၸၢင်ႇ ၼၼ်ႉၵူၺ်း ၊ ႁဝ်းၶႂ်ႇလၢတ်ႈ တိုၵ်းသူၼ်း မဵတ်ႉတႃႇ တုင်းႁပ်ႉ တီႈပေႃႈမႄႈ ၵူၼ်းမိူင်းတႆး ၼင်ႇၼႆ ။


ထၢမ် - မိူဝ်ႈပီ 2010 တႄႉ ၼႂ်းမိူင်းတႆးၼႆႉ ပႃႊတီႊ တႆးၵေႃႈ မီးပႃႊတီႊ သိူဝ်ၽိူၵ်ႇၵူၺ်း ၊ ပီ 2015 ၼႆႉ ပႃႊတီႊတႆး ပႃႊတီႊ သိူဝ်ၽိူၵ်ႇ ၵေႃႈမီး ၊ ပႃႊတီႊ ႁူဝ်သိူဝ်ၵေႃႈမီး ။ လွင်ႈတေလႆႈ ၶႄႉၶႅင်ႇၵၼ် တင်း ပႃႊတီႊ ႁူဝ်သိူဝ်ၼႆႉ တၢင်းႁၼ်ထိုင် ႁူဝ်ပဝ်ႈ မီးၸိူင်ႉႁိုဝ်ၶႃႈ ?။


တွပ်ႇ - ဢၼ်ၼႆႉ မိူၼ်ၼင်ႇ ႁဝ်းလၢတ်ႈၵႂႃႇယဝ်ႉ ၊ ပႃႊတီႊတႆး ၸိုၼ်ႈၸၢင်ႇ (ၸႅတ်ႈၸၢင်ႇ) ပဵၼ်ပႃႊတီႊ သိူဝ်ၽိူၵ်ႇ ၊ ႁဝ်းယုမ်ႇယမ်ဝႃႈ ပေႃႈမႄႈ ၵူၼ်းမိူင်းတႆး ၸၢဝ်းၶိူဝ်းတႆး မီးတီႈမိူင်းတႆး ၵူၺ်းဢမ်ႇၵႃး မီးတီႈ မိူင်းၶၢင် ၊ တိူင်းၸႄႈၵႅင်ႇ (ၸၵၢႆး) ၊ တိူင်း ဝဵင်းတႃႈလိူဝ်ႇ (မၼ်းတလေး) ပႃးၸဵမ် မိူင်းယၢင်းလႅင် ၸိူဝ်းၼႆႉၵေႃႈ တေပၼ်ႁႅင်း ပႃႊတီႊ သိူဝ်ၽိူၵ်ႇ ႁဝ်းယူႇ ဢၼ်ဝႃႈၼၼ်ႉ ႁဝ်းယုမ်ႇယမ် ႁူဝ်ပၢၵ်ႇတဵမ် ။


ထၢမ် - ဢၼ်တေလႆႈ ၶႄႉၶႅင်ႇ တင်းပႃႊတီႊ ႁူဝ်သိူဝ်ၼႆႉ ၼႂ်းၸႂ်ႁူဝ်ပဝ်ႈ မီးၸိူင်ႉႁိုဝ်ၶႃႈ ?။


တွပ်ႇ - ပၢင်လိူၵ်ႈတင်ႈၼႆႉ ဢၼ်ၶႄႉၶႅင်ႇ ဢမ်ႇၸႂ်ႈ ပႃႊတီႊသွင် ဢၼ်ၵူၺ်း ၊ ၼူၵ်ႉယုင်းမီး ၊ သၢင်ႇသီႈမီး ၊ ပႃႊတီႊ ၸၢဝ်းၶိူဝ်းဢွၼ်ႇ ၵေႃႈမီး ၊ လွင်ႈၼႆ ယူႇတီႈ ပေႃႈမႄႈ ၵူၼ်းမိူင်းၵူၺ်း ၊ ႁဝ်းတႄႉၶပ်း ၶိုင်မႃး ၸဵမ်မိူဝ်ႈ 2 ပီပၢႆယဝ်ႉ ။ မိူဝ်ႈလဵဝ် ၽူႈၶဝ်ႈပႃႊတီႊ ႁဝ်းမီး 4 သႅၼ်ပၢႆ 5 သႅၼ်ယဝ်ႉ ၊ တီႈမိူင်း သီႇပေႃႉ တီႈလဵဝ်ၵူၺ်း ၽူႈၶဝ်ႈ ပႃႊတီႊ ႁဝ်းမီး 4 မိုၼ်ႇပၢႆ ။ ၵွပ်ႈပိူဝ်ႈၼႆ ႁဝ်းၸင်ႇဝႃႈ ဢမ်ႇတၢပ်ႈ မႆႈၸႂ်သင် ။ ပႃႊတီႊ သိူဝ်ၽိူၵ်ႇႁဝ်း တီႈၼမ်ႉၶမ်းၵူၺ်း မိူဝ်ႈလဵဝ်ၼႆႉ ၶႂ်ႈမီး 2 မိုၼ်ႇယဝ်ႉ ၊ ၵူၼ်းၸိူဝ်း တေတွတ်ႈ ၶႅပ်းၵၢင်ၸႂ် တီႈၼမ်ႉၶမ်း မၼ်းဢမ်ႇပူၼ်ႉ လႆႈ 5 - 6 မိုၼ်ႇ ။


ထၢမ် - ယူႇတီႈ ႁူဝ်ပဝ်ႈသေ ၵဵဝ်ႇလူၺ်ႈ ၵၢၼ်လိူၵ်ႈတင်ႈ ပီ 2015 ၼႆႉ ၶႂ်ႈသင်ႇထိုင် ပေႃႈမႄႈ ၵူၼ်းမိူင်းတႆး ၸိူင်ႉႁိုဝ်ၽွင်ႈၶႃႈ ?။


တွပ်ႇ - ႁဝ်းၶႂ်ႈယွၼ်း မဵတ်ႉတႃႇ တုင်းႁပ်ႉ ယွမ်းၼွမ်း (တွင်းပၢၼ်ႇ) ပေႃႈမႄႈ ၵူၼ်းမိူင်းတႆးႁဝ်း မိူင်းတႆး ပတ်းပိုၼ်ႉ ၵူၺ်းဢမ်ႇၵႃး ၸၢဝ်းၶိူဝ်းတႆးႁဝ်း ဢၼ်မီး တီႈမိူင်းၶၢင် တိူင်းၸၵၢႆး ၊ တိူင်းမၼ်းတလေး ပႃးၸဵမ်မိူင်း ယၢင်းလႅင် ၸိူဝ်းၼႆႉ ယႃႇပေၵႂင်ပေၵႃး ၊ ၽဝၵမ် ၸႃတႃ (ၵၢမ်ႇၵျမ်ႇမႃႇ) တႆးႁဝ်း တႃႇတေ လႅၵ်ႈလၢႆႈၼႆႉ ၶၢဝ်းယၢမ်းမၼ်း ထိုင်မႃးယဝ်ႉ ၊ ၵိုတ်းထႅင်ႈ သွင်လိူၼ် ၵူၺ်းယဝ်ႉ ၊ ႁဝ်းတေလႆႈ တႅပ်းတတ်း ပုတ်းၶၢတ်ႇသေ ပၼ်ႁႅင်း ပႃႊတီႊ သိူဝ်ၽိူၵ်ႇ ဢၼ်ဝႃႈၼၼ်ႉ ႁဝ်းၶႂ်ႈယွၼ်း မဵတ်ႉတႃႇတုင်းႁပ်ႉ ယွၼ်းၼွမ်း (တွင်းပၢၼ်ႇ) ပေႃႈမႄႈ ၵူၼ်းမိူင်းတႆးႁဝ်း တင်းသဵင်ႈ ။ ပေႃႈမႄႈ ၵူၼ်းမိူင်းႁဝ်း တင်းသဵင်ႈ ႁႂ်ႈယူႇလီ မီးငိုၼ်း ၶႂ်ႈသူးတွင်းမုင်ႈမွင်း ပၼ်ၼင်ႇၼႆ ။