ၵူၼ်းဝၢၼ်ႈၼမ်ႉပႃတႅပ်း မိူင်းပွၼ် ၊ ဢၼ်တိူဝ်ႉဝၢတ်ႇၸၢၵ်ႇမၢၵ်ႇ / မၢၵ်ႇၵွင်ႈ မိူဝ်ႈတေႁႅၼ်းတၢၼ်းၵၢင်ဝႃႇသႃ ၊ သေလႆႈတႅပ်းၶႃ ၾၢႆႇၶႂႃၵႂႃႇၼၼ်ႉ ထုၵ်ႇသူင်ႇလူင်းယူတ်းယႃတူဝ် တီႈဝဵင်းလိူဝ်ႇ ။ လၢႆမူႇလၢႆၸုမ်းတႆး ဢွၼ်ၵၼ်ၸွႆႈထႅမ် ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 13/09/2015 ယၢမ်းပွတ်းၼႂ် ၊ ၸၢႆးတႃႉ (ၸၢႆးတွင်ႇ) ဢႃယု 40 ပီ ၊ ယူႇဝၢၼ်ႈၼွင်ပႃတႅပ်း မိူင်းပွၼ် ၊ ဢၼ်လႆႈတိူဝ်ႉဝၢတ်ႇ ၸၢၵ်ႇမၢၵ်ႇလူင် / မၢၵ်ႇၵွင်ႈ ဢၼ်သိုၵ်းမၢၼ်ႈယိုဝ်းသႂ်ႇ မိူဝ်ႈဝၼ်းတီႈ 12/09/2015 ၼၼ်ႉ လႆႈႁွတ်ႈၵႂႃႇယူတ်းယႃတူဝ် တီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ။ ၽွင်းယူႇတီႈႁူင်းယႃ ၸဝ်ႈၸၢမ်ႇထုၼ်းၼၼ်ႉ လႆႈတႅပ်းပႅတ်ႈၶႃၶွၼ်ၼိုင်ႈ (ၾၢႆႇၶႂႃ) ။ ၶႅၼ်ၾၢႆႇၶႂႃၵေႃႈ လႆႈယဵပ်ႉလၢႆႁွႆး - ၼႆယဝ်ႉ ။


ၸၢႆးတႃႉၼႆႉ ၶႃမၼ်းၾၢႆႇၶႂႃ လႆႈတႅပ်းပႅတ်ႈတင်ႈတႄႇႁူဝ်ၶဝ်ႇ ။ မိုဝ်းၾၢႆႇၶႂႃၵေႃႈ ယွၼ်ႉတိူဝ်ႉၺႃးမၢၵ်ႇၵွင်ႈသေ ဢဝ်လုပ်ႇမၼ်းၸတ်ႉလႄႈ ဢဵၼ်မၼ်းၵေႃႈၵိုတ်း 2 သဵၼ်ႈၵူၺ်း ။


မေႃၶဝ် တီႈႁူင်းယႃၵေႃႈၼႄႉၼမ်းဝႃႈ - မိူဝ်ႈလဵဝ် မိုဝ်းမၼ်းၼႆႉ ယဵပ်ႉဝႆႉယူႇသေတႃႉၵေႃႈ ဢမ်ႇႁဵတ်းၵၢၼ်ယဝ်ႉ ၊ ပေႃးႁိုင်မႃး တေဢမ်ႇတူင်ႉလႆႈယဝ်ႉ ။  မိူဝ်ႈလဵဝ် မီးဢဵၼ်လိူတ်ႈသွင်သဵၼ်ႈၵူၺ်း ၊ ၼင်ႇႁိုဝ်တေမီးသဵၼ်ႈလိူတ်ႈႁႃၵၼ် တင်းမူတ်းၼၼ်ႉ ႁႂ်ႈဢဝ်လူင်းၵႂႃႇယူတ်းယႃတီႈဝဵင်းလိူဝ်ႇ ၊ ၵွပ်ႈဝႃႈတီႈၼၼ်ႈ မီးၶိူင်ႈမႆႉၶိူင်ႈမိုဝ်းၵၢၼ်ယူတ်းယႃလီ- ၼႄႉၼမ်းၼင်ႇၼႆ ။


ၵေႃႉပဵၼ်မေးၼၢင်း ၸၢႆးတႃႉ ၵေႃႈလၢတ်ႈတီႈ ၽူႈၶဝ်ႈဢွၵ်ႇမေႃယႃၶဝ်ဝႃႈ မိူဝ်ႈလဵဝ် လႆႈတႅပ်းၶႃၵႂႃႇယဝ်ႉ ၊ ယႃႇပေႁႂ်ႈလႆႈတႅပ်းမိုဝ်းထႅင်ႈ - ဝႃႈၼႆ ။


ၸၢႆးတႃႉၼႆႉ လႆႈဢဝ်သူင်ႇၵႂႃႇတီႈႁူင်းယႃ ဝဵင်းလိူဝ်ႇ မိူဝ်ႈဝၼ်းတီႈ 19/09/2015 ၵၢင်ၼႂ်ယၢမ်း 11 မူင်း ။ ပိူဝ်ႈတႃႇၸႂ်ႉၸၢႆႇၵႃႈယူတ်းယႃလႄႈ ၵူႈလွင်ႈလွင်ႈၼၼ်ႉ မီးလၢႆမူႇလၢႆၸုမ်း ဢွၼ်ၵၼ်ၸွႆႈထႅမ် ။


ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) လူႇတၢၼ်းငိုၼ်း 10 သႅၼ်ပျႃး (ၵျၢတ်ႈ) ။ လုၵ်ႈႁဵၼ်းၸၼ်ႉၸွမ် တင်းလူင် တူၼ်ႈတီး 130,000 ပျႃး ။ သင်ၶၸဝ်ႈလႄႈၵူၼ်းမိူင်း မိူင်းပွၼ် 8 သႅၼ် ။ ၸုမ်းၼမ်ႉၶူင်း 7 မိုၼ်ႇပၢႆလႄႈ ဢဝ်ၵႃး Ambulance သူင်ႇထိုင်ပၼ်တီႈဝဵင်းလိူဝ်ႇ (မၼ်းတလေး) ။


ဢၼ်လီမႆႈၸႂ်ထႅင်ႈၼၼ်ႉ ပဵၼ်ၵူၼ်းဝၢတ်ႇၸဵပ်း တီႈလွႆလႅမ် (ၸၢႆးသၢင်ႇသူၺ်ႇ) ၊ ၵေႃႉဢၼ်ၸၢၵ်ႇမၢၵ်ႇ လႄႈမၢၵ်ႇၵွင်ႈ တိူဝ်ႉၺႃးတီႈပုမ် ၊ ၵွပ်ႈၸၢၵ်ႇမၢၵ်ႇတိူဝ်ႉၺႃး ႁူင်းၶဝ်ႈသေ ဢၼ်ၼႆႉၶႅၼ်းလီမႆႈၸႂ်လိူဝ် - ၵူၼ်းၶဝ်ႈဢွၵ်ႇမေႃယႃ တီႈတူၼ်ႈတီး ၵေႃႉၼိုင်ႈလၢတ်ႈ ။


ၵဵဝ်ႇၵပ်းလွင်ႈ ၵူၼ်းဝၢၼ်ႈၵူၼ်းမိူင်း တိူဝ်ႉၺႃးၸၢၵ်ႇမၢၵ်ႇလူင် မၢၵ်ႇၵွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 12/09/2015  သိုၵ်းမၢၼ်ႈ  ဢၼ်တူင်ႉၼိုင်ပွတ်းမိူင်းပွၼ် ၼႂ်းၸႄႈတွၼ်ႈလွႆလႅမ် ယိုဝ်းၵွင်ႈလဵၵ်ႉ / ယႂ်ႇ သႂ်ႇဝိႁၢရ် ( ၵျွင်းမုၼ်ၸဝ်ႈ ) တီႈပၢင်တၢင်းလီ ၵၢင်ဝႃႇ ၊ ႁဵတ်းႁႂ်ႈၵူၼ်းဝၢၼ်ႈ တၢႆထင်တီႈ ၵေႃႉၼိုင်ႈ မၢတ်ႇၸဵပ်း လိူဝ်ႁႅင်း 6 ၵေႃႉ ။


လွင်ႈၼႆႉ ၵိူတ်ႇပဵၼ်ဝၢႆးသေ သိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် ဝၼ်းတီႈ 07/09/2015 ယဝ်ႉ သိုၵ်းမၢၼ်ႈ ထႅမ်ႁႅင်းသိုၵ်း ဢမ်ႇယွမ်း 10 တပ်ႉၵွင် တူင်ႉၼိုင် ၾၢႆႇၸၢၼ်း လွႆလႅမ် ။ ၼႂ်းၼၼ်ႉ ငႃးသိုၵ်းမၢၼ်ႈငႃးၼိုင်ႈ ႁွတ်ႈၽႅဝ် ႁိမ်းဝၢၼ်ႈ ဝၢၼ်ႈၼွင်ပႃတႅပ်း ဢိူင်ႇၼွင်လႅင် မူၽိူၵ်ႇ ၊ ၾၢႆႇၸၢၼ်း ဝဵင်းမိူင်းပွၼ် ယၢၼ် 18 လၵ်း ၊ ယူႇၼွၵ်ႈဝၢၼ်ႈသေ မုင်ႈႁၼ်ၵူၼ်းမီးၼမ်လႄႈ ယိုဝ်းၵွင်ႈလူင်သႂ်ႇ ၊ ယိုဝ်းၵွင်ႈၵူႈသႅၼ်းသႂ်ႇ တီႈၾုင် ၵူၼ်းၽွင်းႁႅၼ်းတၢင်းလူႇတီႈဝတ်ႉ မိူဝ်ႈၶၢဝ်းယၢမ်း 11 မူင်းၵၢင်ၼႂ် ။ ပၢင်ပွႆးတႅၵ်ႇယၢႆႈ ပၢႆႈၽူင်ႉၵေႃႉႁူး ၵေႃႉတၢင်း ။


ယွၼ်ႉသိုၵ်းမၢၼ်ႈယိုဝ်းမၢၵ်ႇလူင် ၵွင်ႈလူင်သႂ်ႇလႄႈ ပႃႈၵျႃႇ ဢႃယု 60 တၢႆထင်တီႈ။ လိူဝ်ႈသေၼၼ်ႉ မီးၵူၼ်းဝၢတ်ႇၸဵပ်း လုင်းၸၢႆးတွင်ႇ ဢႃႇယု 40 တိူဝ်ႉတိၼ် မိုဝ်းၾၢႆႇၶႂႃ ။ ၸၢႆးသၢင်ႇသူၺ်ႇ ဢႃယု 30 တိူဝ်ႉၺႃးတွင်ႉ/ပုမ်။ ၼၢင်းၶမ်းမူဝ်း ဢႃယု 30 တိူဝ်ႉၺႃးမိုဝ်း ၊ ၸၢႆးဢၢႆႈၽေႇ တိူဝ်ႉတိၼ် ၊ ၸၢႆးမေး တိူဝ်ႉၺႃးၸၢၵ်ႇ မၢၵ်ႇတင်းတူဝ် - ၵူၼ်းၼွင်လႅင် ႁွတ်ႈမိူင်းပွၼ် လၢတ်ႈၼႄၼင်ႇၼႆ ။ ( ၼၢင်းၶမ်းမူဝ်း ၊ ၸၢႆးဢၢႆႈၽေႇ လႄႈ ၸၢႆးမေးၼႆႉ ပဵၼ်ပီႈၼွင်ႉၵၼ် ) ။