ဝၼ်းငမ်းယဵၼ်လုမ်ႈၾႃႉ ဝၼ်းတီႈ 21/09/2015 ၼႆႉ ၼႂ်းမိူင်းတႆး တပ်ႉသိုၵ်းၸိုင်ႈတႆး (RCSS/SSA) တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ် 2 တီႈ ၊ ၼႂ်းၸႄႈဝဵင်းၼမ်ႉၸၢင် လႄႈ လွၵ်ႈၸွၵ်ႇ ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - မိူဝ်ႈဝႃး (21/09/2015) ယၢမ်းၵၢင်ၼႂ် 8 မူင်း ၊ သိုၵ်းမၢၼ်ႈၶလယ 516 တင်း တပ်ႉသိုၵ်းၸိုင်ႈတႆး (RCSS/SSA) လႆႈပဵၼ်ပၢင်တိုၵ်းၵၼ် ၼႂ်းထိူၼ်ႇတီႈၼိုင်ႈ ႁိမ်းဝၢၼ်ႈၼွင်ၵုင်းမူင်ႈ ၸႄႈဝဵင်းၼမ်ႉၸၢင် ။ လိူဝ်သေၼၼ်ႉ မိူဝ်ႈဝႃးယၢမ်းဝၢႆးဝၼ်းၼႆႉၵေႃႈ လႆႈယိုဝ်းၵၼ်ထႅင်ႈ ၼႂ်းၸႄႈလွၵ်ႈၸွၵ်ႇ ၊ ၾၢႆႇသိုၵ်းမၢၼ်ႈတႄႉ တေမီးလွင်ႈလူႉတၢႆဝၢတ်ႇၽွင်ႈယူႇ ၊ ၾၢႆႇ RCSS/SSA တႄႉဢမ်ႇမီး - ဝႃႈၼႆ ။


ပၢင်တိုၵ်းၵၼ်ဝူင်ႈၵၢင်သွင်ၾၢႆႇ ဢၼ်ပဵၼ်ၼႂ်းဢိူင်ႇမိူင်းယွၼ်း ၸႄႈဝဵင်းလွၵ်ႈၸွၵ်ႇၼႆႉ ၶႂ်ႈႁၢဝ်ႈႁႅင်းဝႆႉ ၊ ယွၼ်ႉပိူဝ်ႈဝႃႈ သိုၵ်းမၢၼ်ႈလမ်းၵႅတ်ႇလိုပ်ႈယိုဝ်း တပ်ႉသိုၵ်းၸိုင်ႈတႆး ။


ၵဵဝ်ႇၵပ်းလွင်ႈပၢင်တိုၵ်းၼၼ်ႉ ၸဝ်ႈသိုၵ်းလူင်ၸၢႆးလႃႉ ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - ယွၼ်ႉပိူဝ်ႈလူင်ပွင်ၸိုင်ႈ ၸႂ်ႉႁႂ်ႈသိုၵ်း RCSS/SSA ၼႂ်းမိူင်းတႆး မႃးပၵ်းၼႂ်းပိုၼ်ႉတီႈမိူင်းထႃး ၊ ၾၢႆႇ RCSS/SSA သမ်ႉဝႃႈ တူင်ႉၼိုင်ႁွတ်ႈၽႅဝ်ဝႆႉ တီႈလႂ်ၵေႃႈ တေတူင်ႉၼိုင်ယူႇၼႂ်းပိုၼ်ႉတီႈၼၼ်ႉၵႂႃႇ ။ ၵွပ်ႈဢမ်ႇယွမ်းထွၼ်သိုၵ်းမႃးလႄႈ တႄႇဢဝ်ၼၼ်ႉမႃးၵေႃႈ သွင်ၾၢႆႇလႆႈပဵၼ်ပၢင်တိုၵ်းၵၼ် ။ ဢၼ်ပဵၼ်ပၢင်တိုၵ်း ပွတ်းၶူဝ်လမ်ၼၼ်ႉၵေႃႈ သိုၵ်းမၢၼ်ႈပေႃးလႆႈၸႂ်ႉႁိူဝ်းဝိၼ်သေယိုဝ်း - ဝႃႈၼႆ ။


ဢိင်ၼိူဝ်သွင်ၾၢႆႇ လႆႈပဵၼ်ပၢင်တိုၵ်းၵၼ်သေ ပၢင်ဢုပ်ႇဢူဝ်းလွင်ႈငမ်းယဵၼ် ဢၼ်ၸတ်းႁဵတ်းမိူဝ်ႈဝၼ်းတီႈ 20/09/2015 ၼၼ်ႉၵေႃႈ ၾၢႆႇ RCSS/SSA ဢမ်ႇလႆႈၵႂႃႇၶဝ်ႈႁူမ်ႈ ။


ၾၢႆႇၼိုင်ႈတၢင်းၼိုင်ႈ ၸဝ်ႈသိုၵ်းလူင်ၸၢႆးလႃႉ လၢတ်ႈတီႈၸုမ်းၶၢဝ်ႇၼွၵ်ႈမိူင်း BBC ဝႃႈ - တင်ႈတႄႇဝၼ်းတီႈ 7 လိူၼ်သႅပ်ႊထႅမ်ႊၿိူဝ်ႊမႃးၼႆႉ RCSS/SSA တင်းသိုၵ်းမၢၼ်ႈ လႆႈပဵၼ်ပၢင်တိုၵ်းၵၼ်လႄႈ ၵူၼ်းဝၢၼ်ႈၵူၼ်းမိူင်းၵေႃႈ ၺႃးသိုၵ်းမၢၼ်ႈယိုဝ်း ။ ၵွပ်ႈၼၼ် ပၢင်ၵုမ်ဢၼ်ႁဵတ်းတီႈတႃႈၵုင်ႈၼႆႉၵေႃႈ ႁဝ်းဢမ်ႇလႆႈၵႂႃႇၶဝ်ႈႁူမ်ႈယဝ်ႉ ။ ဢိင်ၼိူဝ်ပဵၼ်ပၢင်တိုၵ်းၵၼ် ၼႂ်းမိူင်းတႆးသေ ပိူဝ်ႈတႃႇၵႄႈလိတ်ႈပၼ်ႁႃၵၼ် ၊ ပိူဝ်ႈတႃႇၶဝ်ႈပႃးၼႂ်း ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း ႁိုဝ် ဢမ်ႇၶဝ်ႈပႃးၼၼ်ႉ တေဝူၼ်ႉၵႂႃႇယူႇ - ဝႃႈၼႆ ။


ဢိင်ၼိူဝ် ဢၼ်ပဵၼ်ပၢင်တိုၵ်းၼႆႉသေ ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် (SNLD) ၸၢႆးၼုတ်း လၢတ်ႈဝႃႈ - တီႈဝဵင်းတႃႈၵုင်ႈၵေႃႈ ဢုပ်ႇဢူဝ်းၵၼ်ယူႇ ။ တၢင်းၸၼ်ႉပႃႈတႂ်ႈသမ်ႉ ၶိုင်ယူႇလၢႆးၼိုင်ႈ ။ ဢၼ်လႆႈပဵၼ်ပၢင်တိုၵ်းၼႆႉ ဢမ်ႇလိူဝ်လႆႈသေ လႆႈပဵၼ်ႁႃႉ ၊ ဢမ်ႇၼၼ်ၵေႃႈ မီးယိူင်းဢၢၼ်းသေဢၼ်ဢၼ် တၢင်းလင်မၼ်းလႄႈ လႆႈပဵၼ်ႁႃႉ ၸိူဝ်းၼႆႉ ၵိုင်ႇလီမီးၵႂၢမ်းထၢမ် ။ ဢၼ်လႆႈပဵၼ်ပၢင်တိုၵ်းၼႆႉတႄႉ မၼ်းတိုၼ်းတုမ်ႉယွၼ်ႈ လွင်ႈယုမ်ႇယမ်ၼႂ်းၵႄႈၵၼ်လႄႈ တိုၼ်းတုမ်ႉယွၼ်ႈပႃး ၵၢၼ်ႁဵတ်းသၢင်ႈ လွင်ႈငမ်းယဵၼ်ယဝ်ႉ - ဝႃႈၼႆ ။


ၸွမ်းၼင်ႇဢၼ် ၾၢႆႇလူင်ပွင်ၸိုင်ႈမၢၼ်ႈ ႁၢင်ႈႁႅၼ်းဝႆႉၼၼ်ႉ တင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း တေလူင်းလၢႆးမိုဝ်း ၵၢၼ်ၵိုတ်းယိုဝ်း ပတ်းပိုၼ်ႉတူဝ်ႈမိူင်း (NCA) ၼႂ်းဝူင်ႈႁႅၵ်ႈသုတ်း လိူၼ်ဢွၵ်ႊထူဝ်ႊၿိူဝ်ႊ ။ ၵူၺ်းၵႃႈ ၾၢႆႇၸၢဝ်းၶိူဝ်းၵမ်ႈၼမ် တိုၵ်ႉတုၵ်းယွၼ်းသုၼ်ႇလႆႈဢၼ်ဝႃႈ ထုၵ်ႇလႆႈၶဝ်ႈပႃးၵူႈမူႇၵူႈၸုမ်း ၼၼ်ႉယူႇ ။


ၵူၼ်းၸိူဝ်းလဵပ်ႈႁဵၼ်း လွင်ႈၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း ၵမ်ႈၽွင်ႈလၢတ်ႈဝႃႈ - ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ၼႆႉ လႅပ်ႈတေပႆႇပဵၼ်လႆႈငၢႆႈငၢႆႈ ။