သိုၵ်းမၢၼ်ႈ တပ်ႉၸုမ်းလူင် (တပ်ႉမ) 99 ယိုဝ်းမၢၵ်ႇလူင် ယိုဝ်းၵွင်ႈသႂ်ႇၼႂ်းထိူၼ်ႇ တီႈဢၼ်ထၢင်ႇထိူမ်ဝႃႈ မီးသိုၵ်းတဢၢင်း ။ ယိုဝ်းသႂ်ႇၶဝ်ႈပႃး ၼႂ်းဝၢၼ်ႈယဝ်ႉ ၶဝ်ႈႁုပ်ႈဢဝ်ၶူဝ်းၶွင် ၵူၼ်းဝၢၼ်ႈ ။

ပူၼ်ႉမႃး မိူဝ်ႈဝၼ်းတီႈ 22/09/2015 သိုၵ်းမၢၼ်ႈ တပ်ႉၸုမ်းလူင် (တပ်ႉမ) 99 လုၵ်ႉတၢင်း ပၢင်ႇသၢႆးမႃးသေ ထိုင်မႃးယၢမ်း ႁူဝ်ၶမ်ႈမွၵ်ႈ 5 မူင်း ၊ မႃးယိုဝ်းၵွင်ႈလူင် / ၵွင်ႈဢွၼ်ႇ သႂ်ႇၼႂ်းထိူၼ်ႇတီႈၼိုင်ႈ ႁိမ်းဝၢၼ်ႈၵွင်းဢႅၼ်ႇ ဢိူင်ႇမေႃႈတွင်း ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ ။ ဢိင်ၼိူဝ် ယိုဝ်းသႂ်ႇၼႂ်းထိူၼ်ႇ ၸမ်ဝၢၼ်ႈၵူၼ်းလႄႈ မၢၵ်ႇလူင်မႃးတူၵ်းတိူဝ်ႉသႂ်ႇ ႁိူၼ်းၵူၼ်းဝၢၼ်ႈလၢႆလင် - ၼႆယဝ်ႉ ။


မိူဝ်ႈသိုၵ်းမၢၼ်ႈၶဝ်မႃးထိုင် တီႈႁိမ်းဝၢၼ်ႈၵွင်းဢႅၼ်ႇၼၼ်ႉ ၶဝ်ထၢင်ႇထိူမ်ဝႃႈ ၼႂ်းထိူၼ်ႇၼၼ်ႉ မီးသိုၵ်းတဢၢင်း (TNLA) ၼႆသေ ၶဝ်ဢဝ်ၵွင်ႈယိုဝ်း ဢဝ်မၢၵ်ႇလူင်ယိုဝ်းသႂ်ႇၼႂ်းထိူၼ်ႇ ၸိူဝ်းၼၼ်ႉ ၶၢဝ်းတၢင်းႁိုင်မွၵ်ႈႁိမ်းၼိုင်ႈၸူဝ်ႈမူင်း။ တီႈတႄႉမၼ်း ၼႂ်းထိူၼ်ႇၼၼ်ႉ ဢမ်ႇမီးသိုၵ်းတဢၢင်း ။ ဢၼ်ၶဝ်ယိုဝ်းၼၼ်ႉ သမ်ႉၸမ်ဝၢၼ်ႈလႄႈ ယိုဝ်းသႂ်ႇၼႂ်းထိူၼ်ႇၵူၺ်းဢမ်ႇၵႃး ယိုဝ်းသႂ်ႇၶဝ်ႈပႃးၼႂ်း ဝၢၼ်ႈၵွင်းဢႅၼ်ႇ - ၵူၼ်းဝၢၼ်ႈၼႂ်းပိုၼ်ႉတီႈ ၶဝ်လၢတ်ႈၼင်ႇၼႆ ။


ဝၢၼ်ႈၵွင်းဢႅၼ်ႇၼႆႉ လင်ႁိူၼ်းဢၼ်တိူဝ်ႉၺႃးမၢၵ်ႇၵွင်ႈ မီးမွၵ်ႈ 10 လင်ပၢႆ ။ တႃႇႁိူၼ်းၼိုင်ႈ ဢၼ်ပဵၼ်ႁိူၼ်းၸၢႆးယီႈၼၼ်ႉ ထုၵ်ႇမၢၵ်ႇလူင်တူၵ်းတိူဝ်ႉသႂ် ။ ၵူၺ်းၵႃႈ မိူဝ်ႈမၢၵ်ႇတူၵ်းၼၼ်ႉ ၸဝ်ႈႁိူၼ်းဢမ်ႇယူႇႁိူၼ်းလႄႈ လွင်ႈတိူဝ်ႉဝၢတ်ႇၸဵပ်းၵေႃႈ ဢမ်ႇမီး - ၼႆယဝ်ႉ ။


ၵူၺ်းၵႃႈ ၽွင်းသိုၵ်းမၢၼ်ႈၶဝ် တိုၵ်ႉယိုဝ်းၵွင်ႈယူႇၼၼ်ႉ မႅၼ်ႈၽွင်း ၼၢင်းတီႇတီႇၶၢႆႇ ၵႂႃႇႁဵတ်းႁႆႈ ၶီႇလူတ်ႉၶိူင်ႈ တၢင်ႇမႃးပႃးမႄႈထဝ်ႈၵေႃႉၼိုင်ႈ ပွၵ်ႈမႃးႁိူၼ်း တီႈၼႂ်းဝၢၼ်ႈၵွင်းဢႅၼ်ႇ ၊ မၢၵ်ႇၵွင်ႈလႆႈၽၢတ်ႈ တိူဝ်ႉၶႃလူင်မၼ်းၼၢင်း။ ၵူၺ်းၵႃႈ မႄႈထဝ်ႈဢၼ်ၼင်ႈသွၼ်ႉမႃးၼၼ်ႉတႄႉ ဢမ်ႇပဵၼ်သင် - ၼႆယဝ်ႉ ။


ပေႃးဝႃႈသဵင်ၵွင်ႈသဵင်မၢၵ်ႇယဵၼ်ယဝ်ႉၵေႃႈ သိုၵ်းမၢၼ်ႈၶဝ်ႈမႃးၼႂ်းဝၢၼ်ႈ ။ မိူဝ်ႈၼၼ်ႉ တီႈၼႂ်းဝၢၼ်ႈသမ်ႉၵူၼ်းဝၢၼ်ႈဢမ်ႇယူႇ ၊ ၵွပ်ႈၵႂႃႇႁဵတ်းၵၢၼ်တၢင်းၼွၵ်ႈ ပႆႇပွၵ်ႈမႃး ၊ ၵူၼ်းဝၢၼ်ႈၶဝ် သႂ်ႇသေႃးႁိူၼ်းဝႆႉၵူၺ်း ။  သိုၵ်းမၢၼ်ႈၵေႃႈၶဝ်မႃးယႃႉမၢၵ်ႇသေႃးႁိူၼ်း ၵူၼ်းဝၢၼ်ႈသေ ၶဝ်ႈသွၵ်ႈတဝ်ဢဝ်ၶူဝ်းၶွင်ၵူၼ်းဝၢၼ်ႈ ။


ၵူၼ်းမူႇၸႄႈၵေႃႉၼိုင်ႈ ဢၼ်လႆႈၵႂႃႇ ႁွတ်ႈထိုင်တီႈဝၢၼ်ႈၼၼ်ႉ လၢတ်ႈဝႃႈ - တီႈႁိူၼ်းလင်ၼိုင်ႈ မီးပေႃႈထဝ်ႈၵေႃႉလဵဝ်ဢႃယုမွၵ်ႈ 60 ပီ ၊ ပဵၼ်ပေႃႈၸၢႆးဢၢႆႈသူဝ်းပဝ်း ။ သိုၵ်းမၢၼ်ႈဢဝ်ၵွင်ႈ ထုပ်ႉပၼ်တီႈၵွင်းလင် / ပိၵ်ႇၵႆႇၾၢႆႇၶႂႃသေ ပၢႆဢဝ်ၵႂႃႇငိုၼ်းၶႄႇထႅင်ႈ 50,500 ယႂၼ် ( တူၵ်းငိုၼ်းမၢၼ်ႈ 15 သႅၼ် ) ၊ ငိုၼ်းၶႄႇၵေႃႈဢဝ်ၵႂႃႇ ငိုၼ်းမၢၼ်ႈၵေႃႈ ဢဝ်ၵႂႃႇၼင်ႇၵၼ် ။


ထႅင်ႈႁိူၼ်းၼိုင်ႈ ၸဝ်ႈမၼ်းဢမ်ႇယူႇ ၊ ၶဝ်ပိုတ်ႇဝႆႉႁၢၼ်ႉၶၢႆၶွင် ၊ သိုၵ်းမၢၼ်ႈတွႆႇမၢၵ်ႇသေႃးၵွႆသေ ၶဝ်ႈၵႂႃႇဢဝ်ငိုၼ်းၶမ်းပိူၼ်ႈ ၊ တူၵ်းမႅၼ်ႈၵႃႈၶၼ်ငိုၼ်း 6 သႅၼ် ။ လိူဝ်သေၼၼ်ႉ ဢဝ်ၶူဝ်းၶွင်ၼႂ်းႁၢၼ်ႉ မိူၼ်ၼင်ႇၶဝ်ႈမုၼ်း ၊ ၶဝ်ႈသွႆးမႃးမႃႉ ၊ ၼိူဝ်ႉဢႅပ်ႇပႃးဢႅဝ်ႇ ၊ မျၢၼ်ႇမႃႇၿီႊယိူဝ်ႊၸိူဝ်းၼႆႉ တူၵ်းၵႃႈၶၼ်ငိုၼ်းမွၵ်ႈ 4 သႅၼ် ။ ထႅင်ႈႁိူၼ်းၼိုင်ႈ ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႈ ပိုတ်ႇဝႆႉႁၢၼ်ႉၶၢႆၶွင်ၼင်ႇၵဝ်ႇ ။ သိုၵ်းမၢၼ်ႈၶဝ်ၵႂႃႇ ဢဝ်တၢင်းၵိၼ်တၢင်းယႅမ်ႉ မႅၼ်ႈၵႃႈၶၼ်ငိုၼ်းမွၵ်ႈ 4 သႅၼ်ၼင်ႇၵဝ်ႇ - ၵူၼ်းမူႇၸႄႈသိုပ်ႇလၢတ်ႈ ။


ၵူၼ်းဝၢၼ်ႈၶဝ်လၢတ်ႈဝႃႈ - ဢၼ်သိုၵ်းမၢၼ်ႈႁဵတ်းၸိူင်ႉၼႆၼႆႉ မၼ်းမိူၼ်ၸူၼ်ဢဝ်ၶူဝ်းၶွင်ၵူၼ်းဝၢၼ်ႈ ။ တီႈဢၼ်ၶဝ်မႃးယိုဝ်းသႂ်ႇၼႂ်းထိူၼ်ႇၼၼ်ႉ တီႈတႄႉမၼ်း သိုၵ်းတဢၢင်းၵေႃႈဢမ်ႇမီး ၊ ၵူၺ်းၵႃႈ ၶဝ်သမ်ႉဢၢင်ႈဝႃႈမီးသိုၵ်းတဢၢင်း ၼႆသေယိုဝ်း ။


ၸဝ်ႈႁိူၼ်း (ၸၢႆးယီႈ) ဢၼ်မၢၵ်ႇလူင် တူၵ်းတိူဝ်ႉသႂ်ႇႁိူၼ်းၼၼ်ႉ မိူဝ်ႈလဵဝ် ဢမ်ႇႁတ်းယူႇတီႈဝၢၼ်ႈယဝ်ႉ ၊ ပၢႆႈမႃးယူႇတီႈႁိူၼ်းပီႈႁိူၼ်းၼွင်ႉ တီႈဝဵင်းမူႇၸႄႈယဝ်ႉ - လႆႈႁူႉၼင်ႇၼႆ ။


ဝၢၼ်ႈၵွင်းဢႅၼ်ႇၼႆႉ မီးယၢၼ်ၵႆတင်းလၢၼ်ႇ / ၵဵတ်ႉ 105 လၵ်း မွၵ်ႈ 7 လၵ်း ။ မီးၵႄႈၵၢင်မူႇၸႄႈလႄႈ လႃႈသဵဝ်ႈ ။


ဝၼ်းၼၼ်ႉၵူၺ်းၼင်ႇၵဝ်ႇ ယၢမ်းမွၵ်ႈ 12 မူင်း သိုၵ်းတဢၢင်း တင်းသိုၵ်းမၢၼ်ႈ ၶဝ်လႆႈပဵၼ်ပၢင်တိုၵ်းၵၼ် တီႈဝၢၼ်ႈတူၼ်ႈၶၢင် ၼႂ်းၵႄႈလၢၼ်ႇ 105 လၵ်း တင်းပၢင်ႇသၢႆး ၼိုင်ႈပွၵ်ႈ - ၼႆယဝ်ႉ ။