ဢိင်ၼိူဝ်ဢၼ် ၾၢႆႇလူင်ပွင်ၸိုင်ႈမၢၼ်ႈ တုၵ်းယွၼ်းမႃးဝႃႈ ႁႂ်ႈဝႃႉလူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ၊ ပေႃးဢမ်ႇလူင်း ၸၢင်ႈႁၢမ်းႁႅၵ်းတိုဝ်ႉတၢင်း ဢုပ်ႇဢူဝ်းၵၢၼ်မိူင်း လႄႈ တုၵ်းယွၼ်း ၵေႃႇတင်ႈ ၸႄႈမိူင်းဝႃႉ ႁင်းၶေႃၼၼ်ႉၼႆလႄႈ လွင်ႈၼႆႉ လႆႈႁူႉဝႃႈ ငဝ်ႈငုၼ်းပၢင်သၢင်း တိုၵ်ႉၵုမ်ၵၼ်ယူႇ ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 18/09/2015 ၼၼ်ႉ ပႃႊတီႊမိူင်းဝႃႉၽွမ်ႉႁူမ်ႈ (UWSP) ႁဵတ်းပၢင်ၵုမ်လူင် ဢုပ်ႇဢူဝ်းၵိူဝ်းၵုမ်ၵၼ် ၵဵဝ်ႇၵပ်းလွင်ႈၵၢၼ်မိူင်း  တီႈငဝ်ႈငုၼ်းဝဵင်းပၢင်သၢင်း ၊ လွင်ႈလူင်းလၢႆးမိုဝ်း ၵၢၼ်ၵိုတ်းယိုဝ်း ပတ်းပိုၼ်ႉတူဝ်ႈမိူင်း (NCA) ၼၼ်ႉ ၸုမ်းဝႃႉ တေလူင်း ဢမ်ႇလူင်း ။ ပၢင်ဢုပ်ႇဢူဝ်းၼႆႉ မီးၵၢၼ်ထတ်းသၢင် ဢွၵ်ႇၵႂၢမ်းထၢမ်ဝႃႈ ဢဝ်လွင်ႈငမ်းယဵၼ်ဝႆႉယဝ်ႉ ၸွင်ႇၵိုင်ႇလီလူင်းလၢႆးမိုဝ်း ၵိုတ်းတိုၵ်းထႅင်ႈယူႇႁႃႉ - ၼႆယူႇ ။


ၵဵဝ်ႇၵပ်းလွင်ႈ တေလူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းယိုဝ်း ပတ်းပိုၼ်ႉတူဝ်ႈမိူင်း (NCA) ၼၼ်ႉ ၸုမ်းဝႃႉ UWSA ၼႃႈလိၼ်ၶိုၵ်ႉတွၼ်းမၢႆ 2 ဢွၵ်ႇၶေႃႈပိုၼ်ၽၢဝ်ႇ ၽွင်းႁူဝ်လိူၼ်ၼႆႉဝႃႈ  တေဢမ်ႇပဵၼ်လူင်းလၢႆးမိုဝ်း NCA ၸွမ်းတၢင်ႇၸုမ်း ။


ၽူႈမီးၸၼ်ႉၼႂ်းဝႃႉ ဢၼ်ၶဝ်ႈႁူမ်ႈပၢင်ၵုမ် ၸဝ်ႈၼိုင်ႈလၢတ်ႈဝႃႈ - တႃႇတေလႅၵ်ႈလၢႆႈပိူင်မၼ်း ဢၼ်တႅပ်းတတ်းဝႆႉၼၼ်ႉ လႅပ်ႈတေဢမ်ႇမီးယဝ်ႉ။ ၵမ်ႈၼမ်ၵေႃႈႁၼ်ထိုင်ဝႃႈ သုတ်းတီႈပေႃးမီးလွင်ႈငမ်းယဵၼ်ၵၼ်ယဝ်ႉ ၵိုတ်းတိုၵ်းဝႆႉၸဵမ်လႂ်ယဝ်ႉ ၊ ပေႃးၵတ်းယဵၼ်ယူႇယဝ်ႉသေ သမ်ႉတေလႆႈၵႂႃႇလူင်းလၢႆးမိုဝ်း ၵိုတ်းတိုၵ်းႁဵတ်းသင်ထႅင်ႈ ၊ ၵမ်ႈၼမ်တႄႉ ႁၼ်ထိုင်ၸိူင်ႉၼၼ်ဝႆႉ - ဝႃႈၼႆ ။


ၽူႈဢမ်ႇၶႂ်ႈဢွၵ်ႇၸိုဝ်ႈၼႂ်းဝႃႉ ၵေႃႉၼိုင်ႈၵေႃႈလၢတ်ႈဝႃႈ - ယွၼ်ႉပိူဝ်ႈသင်လႄႈ ႁဝ်းၶႃႈဢမ်ႇတၢပ်ႈ လူင်းလၢႆးမိုဝ်းယဝ်ႉၼႆၸိုင် 25 ပီလုမ်းလုမ်းၼႆႉ ႁဝ်းၶႃႈႁဵတ်းသၢင်ႈ လွင်ႈငမ်းယဵၼ်ၵၼ်မႃးယဝ်ႉ ဢမ်ႇမီးလွင်ႈပိုတ်းယိုဝ်းသိုၵ်းသိူဝ်သင်ၵၼ် ၊ တေၵႂႃႇၵိုတ်းတိုၵ်းႁဵတ်းသင် ။ မၼ်းပေႃးသုင်လိူဝ် လွင်ႈငမ်းယဵၼ်ဝႆႉယဝ်ႉ - ဝႃႈၼႆ ။


တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၼႆႉ တႄႇၵိုတ်းတိုၵ်းမႃး ၸဵမ်မိူဝ်ႈပီ 1989 မႃးတေႃႇထိုင် ယၢမ်းလဵဝ်ၼႆႉ ၸွမ်ၸိၵ်းတပ်ႉသိုၵ်းမၢၼ်ႈ လႅၵ်ႈလၢႆႈၵႂႃႇ 3 ၵေႃႉယဝ်ႉၵေႃႈ မၢၼ်ႈတင်းဝႃႉ ဢမ်ႇတွၼ်ႉပဵၼ်ပၢင်တိုၵ်းၵၼ်မႃးသေပွၵ်ႈ ။ မီးလွင်ႈငမ်းယဵၼ်ဝႆႉယူႇ ။ တင်ႈတႄႇႁဝ်းၶႃႈ ၵိုတ်းတိုၵ်းမႃးၼၼ်ႉ ႁဝ်းပေႃးလၢတ်ႈၵၼ်ဝႆႉဝႃႈ ပေႃးပဵၼ်ပၢင်ဢုပ်ႇဢူဝ်း ၵၢၼ်မိူင်းမႃး တိုၼ်းတေလႆႈၶဝ်ႈဢုပ်ႇဢူဝ်း ၼႂ်းၵၢၼ်မိူင်းၼႆ သမ်ႉပေႃးလၢတ်ႈဝႆႉ ၸဵမ်လႂ်ယဝ်ႉလူး - ၽူႈမီးၸၼ်ႉဝႃႉ သိုပ်ႇလၢတ်ႈၼင်ႇၼႆ ။


မိူဝ်ႈလဵဝ် တီႈငဝ်ႈငုၼ်းဝႃႉ မိူင်းပၢင်သၢင်းၼႆႉ တိုၵ်ႉႁဵတ်းပၢင်ၵုမ်ၵၼ်ဝႆႉယူႇ။ ၵဵဝ်ႇၵပ်းလွင်ႈလူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈ (NCA) တေလူင်း ဢမ်ႇလူင်းၼၼ်ႉ ယူႇတီႈပၢင်ၵုမ် တေၸၢင်ႈဢွၵ်ႇလိၵ်ႈ ၶေႃႈပိုၼ်ၽၢဝ်ႇထႅင်ႈၽိုၼ်ၼိုင်ႈယူႇ - လႆႈႁူႉၼင်ႇၼႆ ။


ပူၼ်ႉမႃးမိူဝ်ႈဝၼ်းတီႈ 12/09/2015 ၾၢႆႇလူင်ပွင်ၸိုင်ႈမၢၼ်ႈ တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ႁူပ်ႉထူပ်းၵၼ်တီႈၵဵင်းတုင် တီႈငဝ်ႈလုမ်းတိူင်းသိုၵ်း သၢမ်ၸဵင်ႇ (ၵဵင်းတုင်) ။ ၵေႃႉပဵၼ်တူဝ်တႅၼ်း လူင်ပွင်ၸိုင်ႈမၢၼ်ႈ ၸွမ်သိုၵ်းယႃႇပျေႉ လၢတ်ႈတီႈၸုမ်းဝႃႉဝႃႈ -  ၼႂ်းပၢင် ဢၼ်တေၵိုတ်းယိုဝ်း ပတ်းပိုၼ်ႉတူဝ်ႈမိူင်း (NCA) ၼႆႉ သင်ၸိူဝ်ႉဝႃႈ တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA)  ဢမ်ႇၶဝ်ႈႁူမ်ႈ လူင်းလၢႆးမိုဝ်း ၸွမ်းတၢင်ႇမူႇတၢင်ႇၸုမ်းၸိုင် သုၼ်ႇလႆႈဢုပ်ႇဢူဝ်းၵၢၼ်မိူင်းလႄႈ သုၼ်ႇလႆႈယွၼ်းၸႄႈမိူင်းႁင်းၵူၺ်းၼၼ်ႉ တေၸၢင်ႈလုတ်ႈႁၢမ်းၵႂႃႇ ။


ၵူၼ်းဝၢၼ်ႈ ၵူၼ်းမိူင်း ၼႂ်းမိူင်းဝႃႉ ၵမ်ႈၼမ်ႁၼ်ထိုင်ဝႃႈ - တေဢဝ်ႁူဝ်ပဝ်ႈ ပဝ်းယဵဝ်ႇသျႅင် ၼႄသဵၼ်ႈတၢင်းသေ တေႁဵတ်းၵႂႃႇၸွမ်းဢမ်ႇပိူင်ႈ ဢမ်ႇဢွၵ်ႇၶွပ်ႇဢွၵ်ႇတူင်ႇမၼ်း ။


ၵူၺ်းၵႃႈ ၾၢႆႇဝႃႉယင်းတုၵ်းယွၼ်း တီႈလူင်ပွင်ၸိုင်ႈမၢၼ်ႈဝႃႈ ဢၼ်ထုၵ်ႇလႆႈၵိုတ်းတိုၵ်းၼႆႉ ပဵၼ်ၸုမ်းၸိူဝ်းဢၼ်ပဵၼ်ပၢင်တိုၵ်းဝႆႉယူႇ မိူၼ်ၼင်ႇၸုမ်းၵူဝ်းၵၢင်ႉ ၊ ၸုမ်းသိုၵ်းတဢၢင်း ၊ ၸုမ်းသိုၵ်းရၶႅင်ႇ ဢၼ်ပဵၼ်ပၢင်တိုၵ်းယူႇၼႂ်း မိူင်းတႆးပွတ်းႁွင်ႇလႄႈ ၸုမ်းၶၢင် ၸိူဝ်းၼႆႉ ။ ၸုမ်းဝႃႉတႄႉ ၵွပ်ႈဝႃႈလႆႈလွင်ႈငမ်းယဵၼ်ယဝ်ႉ ဢမ်ႇတိုၵ်းယိုဝ်းၵၼ်ယဝ်ႉလႄႈ ဢမ်ႇထုၵ်ႇလႆႈၵိုတ်းတိုၵ်းယဝ်ႉ ။ ၵွပ်ႈၼၼ် ၸုမ်းဝႃႉ လႆႈတုၵ်းယွၼ်းႁႂ်ႈၸုမ်းၸိူဝ်းၼႆႉ လႆႈၶဝ်ႈပႃးၼႂ်းၵၢၼ် လူင်းလၢႆးမိုဝ်း ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ။ ၵူၺ်းၵႃႈ ၾၢႆႇလူင်ပွင်ၸိုင်ႈမၢၼ်ႈ သမ်ႉပၢၵ်ႈပႅတ်ႈဝႆႉ ၸုမ်းၸိူဝ်းၼႆႉ ။