ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) ပိုတ်ႇလၢတ်ႈဝႃႈ သိုၵ်းမၢၼ်ႈတဵၵ်းဢဝ် ၵူၼ်းမိူင်းမွၵ်ႈ 30 ႁဵတ်းႁူဝ်ႉၶႄတူဝ် ၽွင်းပဵၼ်ပၢင်တိုၵ်း ၼႂ်းၸႄႈဝဵင်းၵုၼ်ႁဵင် ။


ၼႂ်းၽိုၼ်ႁၢႆးငၢၼ်း ဢၼ်ဢွၵ်ႇမိူဝ်ႈဝၼ်းတီႈ 17/09/2015 ၼႆႉ လၢတ်ႈဝႃႈ - မိူဝ်ႈဝၼ်းတီႈ 25/08/2015 မွၵ်ႈယၢမ်း 10 မူင်းၵၢင်ၼႂ် ၊ သိုၵ်းမၢၼ်ႈ ပႃႈတႂ်ႈတပ်ႉၸုမ်းလူင် 99 လၢင်းၶိူဝ်း တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် ႁိမ်းဝၢၼ်ႈသၢႆးၶၢဝ် ဢိူင်ႇသၢႆးၶၢဝ် ၼႂ်းၸႄႈဝဵင်းၵုၼ်ႁဵင် (ယၢၼ်ဝဵင်းၵုၼ်ႁဵင်မွၵ်ႈ 25 လၵ်း) ၸိုင်ႈတႆးပွတ်းၸၢၼ်း ။


ဝၢႆးပဵၼ်ပၢင်တိုၵ်းယဝ်ႉ သိုၵ်းမၢၼ်ႈၶဝ်ႈၵႂႃႇၼႂ်းဝၢၼ်ႈသၢႆးၶၢဝ်သေ ၵိုတ်းလိုဝ်ႈတီႈဝတ်ႉ (ၵျွင်း) ၼႂ်းပိုၼ်ႉတီႈ ပိူဝ်ႈတႃႇယူတ်းယႃၵူၼ်းဝၢတ်ႇၸဵပ်းၶဝ် ။ ၽွင်းၼၼ်ႉ မီးၵူၼ်းဝၢၼ်ႈယူႇဝႆႉတီႈဝတ်ႉမွၵ်ႈ 15 ၵေႃႉ ႁူမ်ႈပႃးၼၢင်းယိင်း 10 ၵေႃႉ ၵွပ်ႈပဵၼ်ၽွင်းႁၢင်ႈႁႅၼ်းၶူဝ်းလူႇၶူဝ်းတၢၼ်းႁူဝ်သိလ် ၼႂ်းဝႃႇ ။ သိုၵ်းမၢၼ်ႈၸီႉသင်ႇ ၵူၼ်းဝၢၼ်ႈၸိူဝ်းၼၼ်ႉ သိုပ်ႇယူႇတီႈဝတ်ႉသေ ႁွင်ႉဢဝ်ၵူၼ်းၸၢႆးၼႂ်းဝၢၼ်ႈမႃးထႅင်ႈ 10 ၵေႃႉ ႁႂ်ႈမႃးယူႇၼႂ်းဝတ်ႉထႅင်ႈ ၊ ဢဝ်ႁဵတ်းမိူၼ်ပဵၼ်ႁူဝ်ႉၶႄတူဝ် ၼင်ႇႁိုဝ်သိုၵ်းတႆး တေဢမ်ႇၸၢင်ႈယိုဝ်းၶဝ် ။


ဝၼ်းၼၼ်ႉ ႁူဝ်ၶမ်ႈယၢမ်း 5 မူင်း သိုၵ်းမၢၼ်ႈၸီႉသင်ႇ ႁႂ်ႈၵူၼ်းဝၢၼ်ႈ 7 ၵေႃႉ ပႃးတင်းၵူၼ်းလူင်ဝၢၼ်ႈ ဢဝ်ႁဵတ်းႁူဝ်ႉၶႄတူဝ် ၵႂႃႇၸွမ်းၶဝ်တီႈဝၢၼ်ႈၼွင်ၶမ်း (ဝၢၼ်ႈတဢၢင်း / ပလွင်ႈ) ဢၼ်ယၢၼ်ဝဵင်းၵုၼ်ႁဵင် 12 လၵ်း ။ ၵူၼ်းဝၢၼ်ႈၸိူဝ်းၼႆႉ လႆႈထုၵ်ႇသိုၵ်းမၢၼ်ႈၸႂ်ႉတဵင်ႇ / ႁၢပ်ႇၶူဝ်းၶဝ်ၵႂႃႇၸွမ်း ။ ၽွင်းၵႂႃႇၸွမ်းတၢင်းၼၼ်ႉ ၶဝ်တဵၵ်းႁွင်ႉဢဝ်ၵူၼ်းဝၢၼ်ႈ ဢၼ်တိုၵ်ႉႁဵတ်းၵၢၼ်ယူႇၼွၵ်ႈဝၢၼ်ႈထႅင်ႈ 3 ၵေႃႉ ၵႂႃႇၸွမ်း ။


ၵူၼ်းဝၢၼ်ႈသိပ်းၵေႃႉ ၸိူဝ်းထုၵ်ႇႁွင်ႉၵႂႃႇၸွမ်းသိုၵ်းမၢၼ်ႈၼၼ်ႉ 1.လုင်းၼၼ်ႇတႃႇ (ႁူဝ်ၼႃး ဝၢၼ်ႈသၢႆးၶၢဝ်) ။ 2. ၸၢႆးၼၼ်ႇတိယ ။ 3. ၸၢႆးၺႃႇၼိ ။ 4. လုင်းၺႃႇလိင်ႇတ ။ 5. ၸၢႆးဢွင်ႇယွတ်ႈ ။ 6. ၸၢႆးသေႃးလိယ။ 7. လုင်းဢေႃးလိင်ႇ။ 8. လုင်းၵေႃးလိင်ႇ ။ 9. လုင်းယၼ်ႇၼ ။ 10. ၸၢႆးဝိလိင်ႇ ၸိူဝ်းၼႆႉ ။


ၽွင်းၶဝ်ၽႅဝ်ၵႂႃႇတီႈဝၢၼ်ႈၼွင်ၶမ်း ယၢမ်းၵၢင်ၶိုၼ်းမွၵ်ႈ 10 မူင်းၶိုင်ႈၼၼ်ႉ သိုၵ်းမၢၼ်ႈၸီႉသင်ႇၵူၼ်းဝၢၼ်ႈ ၸိူဝ်းၵႂႃႇၸွမ်းၶဝ် ႁႂ်ႈၵႂႃႇႁႃၵႃးႁႃထူဝ်ႈ မႃးပၼ်ၶဝ်တီႈၼႂ်းဝၢၼ်ႈ ၊ ၵူၺ်းၵႃႈ ဢမ်ႇမီးၵႃးၽႂ်ထူဝ်ႈၽႂ် ၊ ၵူၼ်းဝၢၼ်ႈၶဝ်ၵေႃႈ လႆႈၼွၼ်းတီႈဝၢၼ်ႈၼွင်ၶမ်း ၶိုၼ်းၼိုင်ႈသေ ၵၢင်ၼႂ်မိူင်းလႅင်းမႃး ၸင်ႇလႆႈပွၵ်ႈ - ၼႆယဝ်ႉ ။


ၼွၵ်ႈသေၼၼ်ႉ ၼႂ်းၽိုၼ်တၢမ်းငဝ်းလၢႆး ယင်းလၢတ်ႈၼႄဝႃႈ ပၢင်တိုၵ်းဢၼ်ၵိူတ်ႇပဵၼ်မိူဝ်ႈ ဝၼ်းတီႈ 25/08/2015 သွင်တီႈ ၼႂ်းၸႄႈဝဵင်းၵုၼ်ႁဵင်ၼၼ်ႉ လႅပ်ႈပဵၼ်ၽႅၼ်သိုၵ်းမၢၼ်ႈ ပိုတ်ႇၼႃႈသိုၵ်း ၵႂၢတ်ႇလၢင်ႉတပ်ႉသိုၵ်းၸိုင်ႈတႆး (RCSS/SSA) ၊ လႅပ်ႈမီးသၢႆငၢႆၵွင်ႉၵၢႆႇတင်းၽႅၼ်ၵၢၼ်ၾၢႆၼမ်ႉၶူင်း ဢၼ်ၶွမ်ႊပၼီႊၶႄႇလႄႈထႆး ဢၢၼ်းၵေႃႇသၢင်ႈသေ ပဵၼ်ၾၢႆဢၼ်တေ ႁဵတ်းႁႂ်ႈၼမ်ႉလုပ်ႇထူမ်ႈ ပိုၼ်ႉတီႈၵႂၢင်ႈၶႂၢင် ၼႂ်းၸႄႈဝဵင်းၵုၼ်ႁဵင် - ၼႆယဝ်ႉ ။