သိုၵ်းမၢၼ်ႈတီႉၺွပ်းၸႂ်ႉၵူၼ်းဝၢၼ်ႈ ၼႂ်းၸႄႈဝဵင်းမွၵ်ႇမႆႇ ၼုင်ႈၶူဝ်းသိုၵ်းပႃးၵွင်ႈ ၼမ်းၼႃႈငႃးသိုၵ်းမၢၼ်ႈ ဢွၵ်ႇတၢင်း တူင်ႉၼိုင်ၵၢၼ်သိုၵ်း ၊ ၵွပ်ႈဝႃႈ ပွတ်းတွၼ်ႈၼၼ်ႉ သိုၵ်းမၢၼ်ႈ ထႅမ်ႁႅင်းသိုၵ်း တူင်ႉၼိုင်သေ လၢႆဝၼ်းမႃးၼႆႉ သဵင်ၵွင်ႈၵႆႉတႅၵ်ႇ ။

ဝၼ်းတီႈ 17/09/2015 ယၢမ်းၵၢင်ၼႂ် 11:00 မူင်း၊ သိုၵ်းမၢၼ်ႈၶလယ 247 (ၼမ်ႉၸၢင်) ၶဝ်ႈမႃးၼႂ်းဝၢၼ်ႈမိူင်းၸၢင် ဢိူင်ႇႁူဝ်လွႆ ( ၸႄႈဝဵင်းမွၵ်ႇမႆႇ ၊ ၸႄႈတွၼ်ႈလၢင်းၶိူဝ်း ၊ ၸိုင်ႈတႆးပွတ်းၸၢၼ်း ) သေ  မႃးတီႉၺွပ်းဢဝ်ၵူၼ်းဝၢၼ်ႈ ၵႂႃႇ 6 ၵေႃႉ ။ သိုၵ်းမၢၼ်ႈ ၸႂ်ႉၼုင်ႈၶူဝ်းသိုၵ်းမၢၼ်ႈ ယိပ်းၵွင်ႈ ဢွၵ်ႇတၢင်းၵႂႃႇၼႃႈသိုၵ်း ၸွမ်းၶဝ် ။


ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈ ၸိူဝ်းထုၵ်ႇတီႉၺွပ်းၶဝ်လၢတ်ႈဝႃႈ - ႁဝ်းဢမ်ႇၸႂ်ႈလုၵ်ႈသိုၵ်း၊ ႁဝ်းဢမ်ႇမေႃယိပ်းၵွင်ႈ / ယိုဝ်းၵွင်ႈ ။ ႁဝ်းဢမ်ႇၶႂ်ႈၼုင်ႈၶူဝ်းသိုၵ်း ၊ ႁဝ်းပဵၼ်ၵူၼ်းဝၢၼ်ႈၵူၺ်းၼႆၵေႃႈ သိုၵ်းမၢၼ်ႈၶဝ် ဢဝ်မိတ်ႈၸမ်ႈပဵမ်ႉ ပၢပ်းမႅပ်ႉၸိူဝ်းၼႆသေ ၸႂ်ႉၼုင်ႈၶူဝ်းသိုၵ်း ။


ပွတ်းတွၼ်ႈၼႆႉ မိူဝ်ႈဝၼ်းတီႈ 16/09/2015 ၼၼ်ႉ သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈ ၵုင်းမၢၵ်ႇလၢင်း ၼႂ်းဢိူင်ႇႁူဝ်လွႆ ။ ဝၼ်းတီႈ 17/09/2015 (မိူဝ်ႈဝႃး) ၼႆႉ သွင်ၾၢႆႇလႆႈႁူပ်ႉၵၼ်သေ တိုၵ်းယိုဝ်းၵၼ် 2-3 ၵမ်း ။ ၵူၺ်းၵႃႈ ပၢင်တိုၵ်းၸိူဝ်းၼႆႉ သွင်ၾၢႆႇလႆႈလူႉသုမ်း တိူဝ်ႉဝၢတ်ႇၸိူင်ႉႁိုဝ်တႄႉ ပႆႇလႆႈႁူႉၸွမ်း ။


ၼႂ်းပိုၼ်ႉတီႈၼႃႈလိၼ်တွၼ်ႈၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼွၵ်ႈၼိူဝ်သေ တပ်ႉသိုၵ်းၸိုင်ႈတႆး (RCSS/SSA)ယဝ်ႉ ယင်းမီးသိုၵ်းပဢူဝ်း ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၶဝ်ၵႂႃႇမႃးတူင်ႉၼိုင် ။ သိုၵ်းမၢၼ်ႈၼႆႉ ပိူဝ်ႈတႃႇတေသုမ်ႇငမ်းပိုၼ်ႉတီႈၼၼ်ႉ ၶဝ်ထႅမ်ႁႅင်းသိုၵ်းၵၼ်သေ တူင်ႉၼိုင်မႃးမီး လၢႆလၢႆဝၼ်းယဝ်ႉ ၊ ၵွပ်ႈၼၼ်လႄႈ တၢင်းပွတ်းတွၼ်ႈၼႆႉ ယူႇယူႇသဵင်ၵွင်ႈၵႆႉတႅၵ်ႇတိၵ်းတိၵ်း ၊ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၵူဝ်ႁႄ - ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈ ။


ပီႈၼွင်ႉၵူၼ်းဢၼ်ၸမ်ၸႂ်ၵူၼ်းဝၢၼ်ႈ ဢၼ်ထုၵ်ႇတီႉၺွပ်းၵႂႃႇၵေႃႉၼိုင်ႈ ၵေႃႈလၢတ်ႈဝႃႈ - သိုၵ်းမၢၼ်ႈတီႉၵႂႃႇၼႆႉ တေႃႇထိုင်ၵၢင်ၶမ်ႈၼႆႉ 7 မူင်း ၊ လုၵ်ႈလၢင်းမေးၼၢင်း ပႂ်ႉၵိၼ်ၶဝ်ႈၵုမ်းမူႇၵၼ်ၵေႃႈ ဢမ်ႇလႆႈပွၵ်ႈႁိူၼ်း ၊ ဢွၼ်ၵၼ်မႆႈၸႂ် ပဵၼ်ၼမ်ႉႁူၼမ်ႉတႃ ။ လွင်ႈၼႆႉ ၵႂႃႇတၢင်ႇလၢတ်ႈဝႆႉတီႈပႃႊတီႊႁူဝ်သိူဝ် ပႃႊတီႊသိူဝ်ၽိူၵ်ႇလႄႈ ၾၢႆႇၽွင်းငမ်း ( ၽူႈၵွၼ်းဢိူင်ႇ ) ၶဝ်ဝႆႉယဝ်ႉ - ဝႃႈၼႆ ။