ႁႅင်းၵၢၼ်ယၢၼ်မိူင်း ၼၢင်းယိင်းၵေႃႉၼိုင်ႈ ဢဝ်မၢၵ်ႇႁိၼ် ထုပ်ႉႁူဝ်တူဝ်ၵဝ်ႇ ပေႃးလိုမ်းတူဝ် ယွၼ်ႉၸႂ်လဵၵ်ႉ ၵေႃႉပဵၼ်ၽူဝ် ဢမ်ႇပၼ်မိူဝ်းၸႆးမႄႈ တီႈမိူင်းမၼ်းၼၢင်း ။

မိူဝ်ႈဝၼ်းတီႈ 14 /09/2015 သိုဝ်ႇၶၢဝ်ႇထႆးႁၢႆးငၢၼ်းဝႃႈ - မီးၼၢင်းယိင်း (ဢၼ်ထၢင်ႇဝႃႈပဵၼ်ၵူၼ်းတႆး)  ဢဝ်မၢၵ်ႇႁိၼ် ထုပ်ႉႁူဝ်မၼ်းၼၢင်း ႁိမ်းႁွမ်းဢွင်ႈတီႈႁဵတ်းၵၢၼ် ၵေႃႇသၢင်ႈတီႈဝၢၼ်ႈၼေႊၶျိူဝ်ႊရႃႉ ၊ ဢိူင်ႇၿၢင်ႊမိူင်း ၊ ၸႄႈဝဵင်းမိူင်း ၊ ၸႄႈတွၼ်ႈ သမုတ်ႇပရႃႊၵၢၼ်ႊ ၸိုင်ႈထႆးပွတ်းၵၢင် ။


ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၼႂ်းပိုၼ်ႉတီႈ ၶဝ်ႈၵူတ်ႇထတ်း ထူပ်းႁၼ်ၼၢင်းၾူၼ် ဢႃယု 27 ပီ ၼွၼ်းလိုမ်းတူဝ်သေ ၵွၵ်းႁူဝ်တႅၵ်ႇ ႁိမ်းမၼ်းၼၢင်းသမ်ႉ မီးမၢၵ်ႇႁိၼ်မွၵ်ႈၽႃႇမိုဝ်း ၼႆယဝ်ႉ ။ ဝၢႆးၵူတ်ႇထတ်းယဝ်ႉ ၸဝ်ႈၼႃႈတီႈလႄႈမေႃယႃ ၸင်ႇဢဝ်မၼ်းၼၢင်းၵႂႃႇ ႁူင်းယႃသမုတ်ႇပရႃႊၵၢၼ်ႊ ။


ၸၢႆးမူၼ်းဢႃယု 35 ပီ ၵေႃႉပဵၼ်ၽူဝ် လၢတ်ႈဝႃႈ -“ ဢွၼ်တၢင်းတေပဵၼ်ၼႆႉ ၼၢင်းၾူၼ်လၢတ်ႈတီႈၶႃႈ ဝႃႈမၼ်းၼၢင်းၶႂ်ႈပွၵ်ႈမိူဝ်းႁိူၼ်း ၶႂ်ႈမိူဝ်းၸႆးမႄႈ ၵူၺ်းၵႃႈၶႃႈသမ်ႉပႆႇၶႂ်ႈပၼ်မိူဝ်ယွၼ်ႉဝႃႈ ပႆႇမီးငိုၼ်း ႁဵတ်းၼၼ်သေ မၼ်းၼၢင်းတေၸႂ်လဵၵ်ႉ ၶႂ်ႈႁဵတ်းၶိတ်ႈၶႃႈလႄႈ လႅၼ်ႈၵႂႃႇဢဝ်မၢၵ်ႇႁိၼ် ထုပ်ႉသႂ်ႇ ၵွၵ်းႁူဝ် မၼ်းၼၢင်းပေႃးလိုမ်းတူဝ် ၶႃႈၵေႃႈၼႅတ်ႈၵႂႃႇႁၢမ်ႈ ၵူၺ်းၵႃႈဢမ်ႇတၼ်း ၸင်ႇၼႅတ်ႈၸႅင်ႈ ၸဝ်ႈၼႃႈတီႈ ပလိၵ်ႈၼႆယဝ်ႉ ”။ မိူဝ်ႈလဵဝ်ၼၢင်းၾူၼ် တိုၵ်ႉလႆႈယူတ်းယႃဝႆႉ ယူႇတီႈႁူင်းယႃၼႆယဝ်ႉ ။