ပႃႊတီႊ ၻီႊမွၵ်းၶရႅတ်ႊတိၵ်ႊပႃႊတီႊၸိူဝ်ႉၶိူဝ်းတႆး (SNDP) ႁိုဝ်ပႃႊတီႊသိူဝ်ၽိူၵ်ႇ ၸႄႊဝဵင်းၵဵင်းတုင် ၸတ်းႁဵတ်းပၢင်ႁူပ်ႉထူပ်း လုၵ်ႈၸုမ်းသပ်းလႅင်းၼႄ လွၵ်းလၢႆးလူင်းသူၼ်းတုမ် ၼင်ႇႁိုဝ် လုၵ်ႈၸုမ်းတေဢမ်ႇၵႂင် ။

ပၢင်ၸီႉၸႅင်ႈပွင်ႇလႅင်းပွၵ်ႈၵမ်းၼႆႉ လႆႈၸတ်းႁဵတ်းတီႈ ႁူင်းႁေႃတႆးလိုဝ်ႉ ဝၢၼ်ႈၼွင်ၶမ်းပွၵ်ႉ 3 ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မိူဝ်ႈဝၼ်းတီႈ 14/09/2015 တင်ႈတႄႇၶၢဝ်းယၢမ်း 13:00-15:30 မူင်း ၊ ၸၢႆးသိူဝ်ႁၢၼ် ၊ တွၵ်ႊတိူဝ်ႇၸၢႆးယွတ်ႈႁွင် ၊ ၸၢႆးဝုၼ်းသီ ၊ ၸၢႆးဝုၼ်းတိပ်ႉ လႄႈလုင်းၸၢႆးလူင် မိူင်းယၢင်း လႄႈလုၵ်ႈၸုမ်းၶဝ်ႈႁူမ်ႈ 100 ၵေႃႉပၢႆ ။


ၸၢႆးဝုၼ်းတိပ်ႉ ၽူႈပွင်ၵၢၼ် ပႃႊတီႊသိူဝ်ၽိူၵ်ႇ လၢတ်ႈဝႃႈ - ဢၼ်ႁဝ်းၶႃႈ ၸတ်းႁဵတ်းပၢင်ႁူပ်ႉၼႆႉ ယႃႇႁႂ်ႈလုၵ်ႈၸုမ်းပႃႊတီႊႁဝ်းၶႃႈ ပေႃးတေဢမ်ႇလႆႈ လုတ်ႈတွတ်ႈၶႅပ်းၵၢင်ၸႂ် တိုၵ်းသူၼ်းႁႂ်ႈ ဢွၼ်ၵၼ်ၵႂႃႇတူၺ်း ၸွမ်းပွၵ်ႉ / ဢိူင်ႇၽႂ်းမၼ်း သင်ဝႃႈၽိတ်းပိူင်ႈ ဢမ်ႇမီးၸိုဝ်ႈၸဝ်ႈၵဝ်ႇၼႆ ႁႂ်ႈပွင်ႇၶၢဝ်ႇလၢတ်ႈပၼ် ၸဝ်ႈၼႃႈတီႈၶဝ် ဝႃႈၼႆ ။


ၼႂ်းပၢင်ၸီႉၸႅင်ႈပွင်လႅင်းၼၼ်ႉ ၽူႈၼမ်းပႃႊတီႊ လႆႈလၢတ်ႈၼႄ လွင်ႈပႃႊတီႊတႆး 3 ဢၼ် ၊ ပိူင်တွတ်ႈၶႅပ်းၵၢင်ၸႂ် ၊ ပိူင်ၶွတ်ႇၽွတ်ႈလူင်ပွင်ၸိုင်ႈ ၸဵမ်ၸိူဝ်းၼႆႉ ။


မိူဝ်ႈလဵဝ် ၵူၼ်းမိူင်းၵဵင်းတုင် တိုၵ်ႉၵႂင်ယူႇ ၵွပ်ႈပိူဝ်ႈ ပႃႊတီႊၵၢၼ်မိူင်း တိုၵ်ႉလူင်းသူၼ်းတုမ် ၊ မၢင်ပႃႊတီႊ ဢမ်ႇပႆႇလၢတ်ႈလၵ်းၼမ်း (ပေႃႇလသီႊ) ၶေႃႈယိူင်းဢၢၼ်းလႄႈ လွင်ႈတေႁဵတ်းသၢင်ႈ ပၼ်ၵူၼ်းမိူင်း ။


ၶွမ်ႊမသျိၼ်ႊ ပၢင်လိူၵ်ႈတင်ႈ ပိုၼ်ၽၢဝ်ႇ ဝႆႉတႃႇလူင်းသူၼ်းတုမ် လိူၵ်ႈတင်ႈၼႆႉ ႁဵတ်းလႆႈၵႂႃႇတေႃႇထိုင် ဝၼ်းတီႈ 8 သႅပ်ႊထႅမ်ႊၿိူဝ်ႊ ၊ ၼႂ်းၸႄႈဝဵင်းၵဵင်းတုင် ၼွၵ်ႈသေ ပႃႊတီႊသိူဝ်ၽိူၵ်ႇယဝ်ႉ မီး ပႃႊတီႊသၢင်ႇသီႈ (USDP) ၊ ပႃႊတီႊၽွမ်ႉႁူမ်ႈၸိူဝ်ႉၸၢတ်ႈ ဝ (WNUP) ၊ ပႃႊတီႊဢဵၼ်ႁႅင်းၻီႊမူဝ်ႊၶရေႊသီႊၸိူဝ်ႉၸၢတ်ႈ (NDF) ၊ ပႃႊတီႊႁုၼ်ႈမုၼ်းမႂ်ႇသုင်ၻီႊမူဝ်ႊၶရေႊတိၶ်ႉ ၸိုင်ႈတႆးပွတ်းဢွၵ်ႇၶူင်း (ESSDDP) ၊ ငဝ်ႈငုၼ်းၻီႊမူဝ်ႊၶရေႊသီႊ (NLD) ၊ ပႃႊတီႊငဝ်ႈငုၼ်းၻီႊမူဝ်ႊၶရေႊသီႊၸိူဝ်ႉၶိူဝ်းတႆး (SNLD) ၊ ပႃႊတီႊၸၢဝ်းၶိူဝ်းၽွမ်ႉႁူမ်ႈ (NUP) ၊ ပႃႊတီႊၸိူဝ်ႉၸၢတ်ႈႁုၼ်ႈမုၼ်း (NDP) ၊ ပႃႊတီႊႁုၼ်ႈမုၼ်းမႂ်ႇသုင်ၸိူဝ်ႉၸၢတ်ႈ ဢႃႇၶႃႇ (ANDP) ၊ ပႃႊတီႊႁုၼ်ႈမုၼ်းမႂ်ႇသုင်ၸိူဝ်ႉၸၢတ်ႈ လႃးႁူႇ (LNDP) လႄႈ သုၼ်ႇတူဝ် (ပုၵ်ႇၶူလ်း-ပုၵ်ၵလ) ၵေႃႈလူင်းၶႄႉၶႅင်ႇ ။