ပႃႊတီႊ ငဝ်ႈငုၼ်း ၻီႊမွၵ်းၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊ ႁူဝ်သိူဝ် ၸႄႊဝဵင်း ၼမ်ႉၸၢင် လူင်း သူၼ်းတုမ် ၵူၼ်းမိူင်း ပွၵ်ႈဢွၼ်တၢင်းသုတ်း ဝၢႆးၶွမ်ႊမသျိၼ်ႊ ပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇ ပဵၼ်တၢင်းၵၢၼ် မိူဝ်ႈ ဝၼ်းတီႈ 8 လိူၼ် သႅပ်ႊထႅမ်ႊပိူဝ်ႊ ႁႂ်ႈၼေႃႇၽူႈတႅၼ်း လူင်းသူၼ်းတုမ်လႆႈ ။

မိူဝ်ႈ ဝၼ်းတီႈ 14/09/2015 ႁူဝ်ပဝ်ႈ ပႃႊတီႊႁူဝ်သိူဝ် ၸႄႈဝဵင်း ၼမ်ႉၸၢင် ၸိုင်ႈတႆး ပွတ်းၸၢၼ်း ဢွၼ်ႁူဝ် လုၵ်ႈၸုမ်း လူင်းတၢင်ႇပၢႆႉ တီႈ 8 လၵ်းလႄႈ ဝၢၼ်ႈမႆႉ ႁုင်းၸူႉတၢင်ႇပၢႆႉ 2 တီႈ ၊ ဝၢႆးၼၼ်ႉ လူင်းသူၼ်းတုမ် ၵူၼ်းမိူင်း တီႈ ဝၢၼ်ႈမႆႉ ႁုင်းၸူႉ လႄႈ ဝၢၼ်ႈမၢၵ်ႇမူင်ႈ သပ်းလႅင်းၼႄ လွင်ႈပေႃႊရႃႊသီႊ ပႃႊတီႊ ၊ လွင်ႈၾႅတ်ႇတရႄႊ ၊ မၢႆမီႈ ၸိုင်ႈမိူင်းလႄႈ လွင်ႈတွတ်ႈၶႅပ်းၵၢင်ၸႂ် ၵူၼ်းၶဝ်ႈႁူမ်ႈမီး 200 ၵေႃႉပၢႆ ။


ၸၢႆးၵျေႃႇဝိၼ်း ႁူဝ်ပဝ်ႈ ပႃႊတီႊ ႁူဝ်သိူဝ် ၸႄႊဝဵင်း ၼမ်ႉၸၢင် လၢတ်ႈဝႃႈ “ ႁဝ်းၶႃႈ သပ်းလႅင်းၼႄ လွင်ႈတူင်ႉၼိုင် ပႃႊတီႊ လွင်ႈပေႃႊရႃႊသီႊ ၸိူဝ်းၼႆႉၶႃႈ ။ လွင်ႈဝႃႈ တေႁဵတ်းပၼ် ဢၼ်ၼၼ်ႉ ဢၼ်ၼႆႉ ၼႆတႄႉဢမ်ႇပၼ် ၶေႃႈမၼ်းၵႅၼ်ႇ သင်တီႈ ၵူၼ်းမိူင်း ” ။


မၼ်းၸၢႆး သိုပ်ႇလၢတ်ႈ ထႅင်ႈဝႃႈ - “ သင်ၶဝ်ႈလႆႈ ၼႂ်းသၽႃးၼႆတေ ၵႄႈလိတ်ႈ ပၵ်းပိူင် မၢႆမီႈၸိုင်ႈမိူင်း ၼင်ႇႁိုဝ် ဝၢၼ်ႈမိူင်း ပေႃးၶိုၼ်ႈယႂ်ႇမႂ်ႇ သုင်လႄႈ ၵူၼ်းမိူင်း ပေႃးယူႇငၢႆႈ လူမ်ၸႂ် ” ၼႆယဝ်ႉ ။


ၼွၵ်ႈသေ ပႃႊတီႊ ႁူဝ်သိူဝ်ယဝ်ႉ ပႃႊတီႊ တၢင်ႇဢၼ် ဢၼ်တေလူင်းၶႄႉ ၶႅင်ႇလိူၵ်ႈတင်ႈ ၼႂ်းၼမ်ႉၸၢင်ၼႆႉ မီးပႃႊတီႊ ၸၢဝ်းၶိူဝ်း ၽွမ်ႉႁူမ်ႈ (NUP) ႁိုဝ် ပႃႊတီႊ ႁူင်းၶဝ်ႈ ၊ ပႃႊတီႊ ငဝ်ႈငုၼ်း ၻီႊမူဝ်ႊၶရေႊၸီႊ ၸိူဝ်ႉၸၢတ်ႈ (NLD) ႁိုဝ် ပႃႊတီႊ ၼူၵ်ႉယုင်း ၊ ပႃႊတီႊ သၢင်ႇသီႈ USDP ၊ ၻီႊမွၵ်းၶရႅတ်ႊတိၵ်ႊ ပႃႊတီႊ ၸိူဝ်ႉၶိူဝ်းတႆး (SNDP) ႁိုဝ် ပႃႊတီႊ သိူဝ်ၽိူၵ်ႇလႄႈ ပႃႊတီႊ ပူၵ်းပွင်ၸိူဝ်ႉ ၸၢတ်ႈလႃးႁူႇ (LNDP) ၸိူဝ်းၼႆႉ - ဝႃႈၼႆ ။