ဢိင်ၼိူဝ်သိုၵ်းမၢၼ်ႈ တင်းသိုၵ်းတဢၢင်း (လွႆ) ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းၸႄႈဝဵင်း ၼမ်ႉတူႈသေ ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ ၼပ်ႉႁူဝ်ပၢၵ်ႇ ဢွၼ်ၵၼ်ပၢႆႈၽၢတ်ႇ ႁိူၼ်းယေး တီႈယူႇ။

ၵူၼ်းဝၢၼ်ႈၵူၼ်းမိူင်းၵမ်ႈၽွင်ႈ ၸိူဝ်းပၢႆႈၽေးႁွတ်ႈထိုင်တီႈ ႁူင်းႁဵၼ်းလုၵ်းလိူဝ်ႇ

ဢိင်ၼိူဝ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) တူင်ႉၼိုင်ၵႂႃႇမႃးႁိမ်းဝၢၼ်ႈႁိမ်းသူၼ် ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇသေ တင်ႈတႄႇဝၼ်းတီႈ 1-2-3/06/2015 မႃးၼႆႉ သိုၵ်းမၢၼ်ႈ ၽိူမ်ႉထႅမ်ႁႅင်းသိုၵ်း ၽိုတ်ႉၶဝ်ႈဢိူမ်ႈၸမ်ငႃၵၼ်ဝႆႉ၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ ဢွၼ်ၵၼ်ၵူဝ်သဵင်ၵွင်ႈတႅၵ်ႇ ႁိမ်းဝၢၼ်ႈႁိမ်းသူၼ်လႄႈ ဢွၼ်ၵၼ်ပၢႆႈၽၢတ်ႇႁိူၼ်းယေး တီႈယူႇ။

ၵူၼ်းဝၢၼ်ႈၼႂ်းပိုၼ်ႉတီႈ ဢၼ်ပၢႆႈၵမ်ႈၼမ်ၼႆႉ ပဵၼ်ပွတ်းတွၼ်ႈ ဢၼ်ယူႇတၢင်းၸဵင်ႇၸၢၼ်းဝၼ်းဢွၵ်ႇ ၸႄႈဝဵင်းၼမ်ႉတူႈ မိူၼ်ၼင်ႇဝၢၼ်ႈလွႆပီး၊ ၼမ်ႉၵတ်း၊ ပၢင်ၶိင်၊ ၵွင်းမူးၸၢင်ႉၶုပ်ႉ၊ ၶၢႆးႁဵဝ်း ၸိူဝ်းၼႆႉ။ ၵမ်ႈၼမ်ဢွၼ်ၵၼ်ပၢႆႈၵႂႃႇယူႇ ႁိမ်းဝဵင်းၼမ်ႉတူႈ လႄႈ ႁိမ်းဝဵင်းလႃႈသဵဝ်ႈ။ ပၢႆႈၵႂႃႇယူႇႁိမ်းႁွမ်းဝၢၼ်ႈယႂ်ႇ ဝၢၼ်ႈလူင် မိူၼ်ၼင်ႇ တီႈႁိမ်းဝၢၼ်ႈၼႃးသၢႆး၊ ဝၢၼ်ႈလုၵ်းလိူဝ်ႇ၊ ဝၢၼ်ႈၸၢမ်ၸိူဝ်းၼႆႉ ။

ၸၢႆးဢေး လၢတ်ႈဝႃႈ- ယၢမ်းလဵဝ်ၼႆႉ ပဵၼ်ၶၢဝ်းဢၼ်ဢဝ်လုၵ်ႈဢွၼ်ႇၵႂႃႇၾၢၵ်ႇႁူင်းႁဵၼ်း၊ သမ်ႉပဵၼ်ၶၢဝ်းၽုၵ်ႇၶဝ်ႈၵၢပ်ႇ။ မိူဝ်ႈလဵဝ် ယွၼ်ႉပိူဝ်ႈမီးၵၢၼ်ၶဵင်ႈၶႅင်ၵၢၼ်သိုၵ်းၵၼ် ၸိူဝ်းၼႆႉသေ လုၵ်ႈႁဝ်းၶႃႈၵေႃႈဢမ်ႇလႆႈၶဝ်ႈႁူင်းႁဵၼ်း၊ လႆႈပႃးၵၼ်ပၢႆႈၽၢတ်ႇႁိူၼ်းယေး တီႈယူႇ။ ပေႃးပၢႆႈၵႂႃႇၸွမ်းတႃႈ ၸွမ်းတၢင်း ၵႂႃႇၺႃးသိုၵ်းမၢၼ်ႈၵေႃႈလႆႈၵူဝ်၊ ၵႂႃႇၺႃးသိုၵ်းထိူၼ်ႇၵေႃႈလႆႈၵူဝ်။ မိူၼ်ၼင်ႇ ၺႃးသိုၵ်းမၢၼ်ႈၵေႃႈ ၸၢင်ႈသွၵ်ႈထူင်သွၵ်ႈထွင်း၊ ၸၢင်ႈပေႃႉထုပ်ႉပၢပ်းမႅပ်ႉ။ ၺႃးသိုၵ်းထိူၼ်ႇသမ်ႉ ၸၢင်ႈၼႄးဝႃႈၼႂ်းထူင်ၼႂ်းထွင်းမီး ယႃႈၾိၼ်ႇယႃႈမႃႉၼႆသေ ၸၢင်ႈတဵၵ်းယွၼ်းငိုၼ်း၊ ၵွပ်ႈၼၼ်လႄႈ လႆႈၵူဝ်ယူႇၵူႈၾၢႆႇယဝ်ႉ- ဝႃႈၼႆ။

တေႃႇထိုင်ဝၼ်းတီႈ 03/06/2015 (မိူဝ်ႈဝႃး) သိုၵ်းမၢၼ်ႈ တိုၵ်ႉပၵ်းပႂ်ႉဢဝ်တီႈယူႇဝႆႉၸွမ်း ႁွပ်ႈႁွပ်ႈဝၢၼ်ႈၼႃးသၢႆး။ ၾၢႆႇၼိုင်ႈ သိုၵ်းတဢၢင်းၵေႃႈ သမ်ႉတူင်ႉၼိုင်ယူႇႁိမ်းႁွမ်းၼၼ်ႉ။ လွင်ႈၼႆႉ ႁဵတ်းႁႂ်ႈသဵင်ၵွင်ႈ ၸၢင်ႈတႅၵ်ႇၵူႈၶၢဝ်းယၢမ်း။ ထႅင်ႈၾၢႆႇၼိုင်ႈၵေႃႈ ဢိင်ၼိူဝ်သွင်ၾၢႆႇၶဵင်ႈၶႅင်ၵၢၼ်သိုၵ်း တေႃႇၵၼ်သေ ဝၼ်းတီႈ 03/06/2015 မိူဝ်ႈဝႃးၼႆႉ ရူတ်ႉၵႃး ဢၼ်လႅၼ်ႈၼႂ်းၵႄႈၼမ်ႉတူႈ တင်းလႃႈသဵဝ်ႈ ၵိုတ်းၵႂႃႇ 2 ၸူဝ်ႈမူင်းပၢႆ၊ ဢမ်ႇမီးၵႃးႁတ်းၵႂႃႇႁတ်းမႃး- ၼႆယဝ်ႉ။

ၸိူင်ႉႁိုဝ်ၵေႃႈလီ ၵဵဝ်ႇၵပ်းလွင်ႈၼႆႉၽူႈၶၢၼ်ပၢၵ်ႇ ႁွင်ႈၵၢၼ်ၾၢႆႇၸႅင်ႈၶၢဝ်ႇ တပ်ႉသိုၵ်းတဢၢင်း၊ ၶုၼ်သိုၵ်းလူင် တႃႉဢၢႆႈၵျေႃႇ လၢတ်ႈဝႃႈ- လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉ မီးၵူႈတီႈယဝ်ႉ၊ ဢၼ်ငႃၵၼ်ဝႆႉၸိူင်ႉၼႆ ဢမ်ႇၵွမ်ႉၵႃႈမီးတီႈၼမ်ႉတူႈၵူၺ်း။ ဢၼ်ၵူၼ်းမိူင်းပၢႆႈဢွၵ်ႇဝၢၼ်ႈသူၼ်ၼႆႉၵေႃႈ တပ်ႉသိုၵ်းတဢၢင်းသေ ၸွႆႈထႅမ် သူင်ႇပၼ်ႁႂ်ႈမီးလွင်ႈႁူမ်ႇလူမ်ႈယူႇ၊ ၵူၺ်းၵႃႈ ၵူၼ်းဝၢၼ်ႈ ၵူၼ်းမိူင်းတႄႉဝႃႈ သိုၵ်းတဢၢင်းၼႆႉ တဵၵ်းယွၼ်းဢဝ်ငိုၼ်းတိၵ်းတိၵ်း- ဝႃႈၼႆ။

ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ၽူႈၶၢၼ်ပၢၵ်ႇ ၸၢႆးလဵၵ်ႉ ၵေႃႈလၢတ်ႈဝႃႈ-  ဢၼ်ထုၵ်ႇလီႁူႉၼႆႉ သိုၵ်းလူင်ပွင်ၸိုင်ႈၵေႃႈလီ၊ သိုၵ်းၸၢဝ်းၶိူဝ်း မိူၼ်ၼင်ႇဢၼ်ယူႇသဝ်းၼႂ်းမိူင်းတႆးပွတ်းႁွင်ႇ သိုၵ်းၶၢင် (KIA) ၊ သိုၵ်းလွႆ (TNLA) ဢၼ်ပဵၼ်ပၢင်တိုၵ်း တၢင်းၵူဝ်းၵၢင်ႉၸိူဝ်းၼႆႉၵေႃႈလီ၊ ပႃးၸဵမ်တပ်ႉသိုၵ်း ၸိုင်ႈတႆး RCSS/SSA ၵေႃႈလီ၊ ဢၼ်ပဵၼ်ပၢင်တိုၵ်းၸိူဝ်းၼႆႉ မၼ်းတုမ်ႉယွၼ်ႈၵူၼ်းဝၢၼ်ႈၵူၼ်းမိူင်း၊ ဢၼ်ၺႃးၽေးသိုၵ်းၼႆႉ ပဵၼ်ၵူၼ်းမိူင်းတႆးၵမ်ႈၼမ်။ ၵွပ်ႈၼၼ် ယူႇၼိူဝ်ၽႅၼ်ႇလိၼ်မိူင်းတႆးသေ ဢၼ်ႁဵတ်းႁႂ်ႈၽွၼ်းပၢင်ႈ ၵူၼ်းမိူင်းတႆးလူႉသုမ်းၸိူဝ်းၼႆႉ ဢမ်ႇလႆႈတင်ႈၸႂ်သေတႃႉၵေႃႈ ထုၵ်ႇလီႁူႉလွင်ႈၼႆႉ။ ၵွပ်ႈၼၼ် ၶႂ်ႈတိုၵ်းသူၼ်းဝႃႈ ႁႂ်ႈၵိုတ်းပၢင်တိုၵ်းသေ ၵိုတ်းယိုဝ်းၵၼ်လႆႈသေၵမ်း- ဝႃႈၼႆ။

ယွၼ်ႉမီးၵၢၼ်ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ပူၼ်ႉမႃးမိူဝ်ႈၼႂ်းလိူၼ်မေႊ ဝၼ်းတီႈ 23 ၼၼ်ႉၵေႃႈ ၵူၼ်းဝၢၼ်ႈၵူၼ်းမိူင်း 400 ပၢႆ လႆႈပၢႆႈၽၢတ်ႇယၢၼ်ႁိူၼ်းယေးတီႈယူႇ။ ဢွၼ်ၼႃႈၼႆႉ ႁၼ်ဝႃႈငဝ်းလၢႆး လီၶိုၼ်းယဝ်ႉ၊ ဢမ်ႇပဵၼ်ပၢင်တိုၵ်းယဝ်ႉၼႆသေ ဢၢင်ႈတေပွၵ်ႈမိူဝ်းၶိုၼ်း ဝၢၼ်ႈသူၼ်ၽႂ်မၼ်း ပိူဝ်ႈတႃႇမိူဝ်းၽုၵ်ႇသွမ်ႈ ႁဵတ်းၵၢၼ်သူၼ် ႁႆႈ ၼႃးၽႂ်မၼ်း၊ ပိူဝ်ႈတႃႇပွၵ်ႈမိူဝ်းဢဝ်လုၵ်ႈလၢင်းၾၢၵ်ႇႁူင်းႁဵၼ်း။ ၵူၺ်းၵႃႈမိူဝ်ႈလဵဝ် ငဝ်းလၢႆးသမ်ႉၶဵင်ႈၶႅင်ၶိုၼ်းလႄႈ ၵူၼ်းမိူင်းၵေႃႈ ဢမ်ႇလႆႈပွၵ်ႈမိူဝ်းၽုၵ်ႇသွမ်ႈ။