ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸတ်းပၢင်ၵုမ် ၸုမ်းပွင်ၵၢၼ်လူင်ငဝ်ႈၸိုင်ႈ RCSS တီႈလွႆတႆးလႅင်း၊ ဢွၵ်ႇလိၵ်ႈပိုၼ်ၽၢဝ်ႇ ၵမ်ႉထႅမ် ပိူဝ်ႈတႃႇလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း။

ဝၼ်းတီႈ 03/06/2015 (မိူဝ်ႈဝႃး)ၼႆႉ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်းပၢင်ၵုမ် ၸုမ်းပွင်ၵၢၼ်လူင်ငဝ်ႈၸိုင်ႈ RCSS တီႈငဝ်ႈၸိုင်ႈလွႆတႆးလႅင်း၊ ပၢင်ၵုမ်ယဝ်ႉတူဝ်ႈၵႂႃႇ ယၢမ်းဝၢႆးဝၼ်း၊ ဢုပ်ႇဢူဝ်းလႆႈၶေႃႈတႅပ်းတတ်း ဢွၵ်ႇလိၵ်ႈပိုၼ်ၽၢဝ်ႇ လွင်ႈၵိုတ်းယိုဝ်းတူဝ်ႈမိူင်း 3 ၶေႃႈ။

1.ၶွင်ႊသီႊဢဝ်ၶိုၼ်းၸိုင်ႈတႆး (RCSS)ၼႆႉ ၵဵဝ်ႇၵပ်းလွင်ႈပၼ်ၵႂၢမ်းမၼ်ႈ တႃႇသၢင်ႈလွင်ႈငမ်းယဵၼ်လႄႈ ၵေႃႇသၢင်ႈလွင်ႈၶိုၼ်းလီၵၼ် ၼႂ်းၸိူဝ်ႉၸၢတ်ႈ။ မိူဝ်ႈဝၼ်းတီႈ 12/02/2015 မႅၼ်ႈဝၼ်းၸိုင်ႈမိူင်း ႁူမ်ႈတုမ်ၼၼ်ႉ ႁူဝ်ပဝ်ႈလူင် RCSS ၸဝ်ႈယွတ်ႈသိုၵ်း လႆႈလူင်းလၢႆးမိုဝ်း ႁူမ်ႈၵၼ်တင်း လူင်ပွင်ၸိုင်ႈဝႆႉယူႇယဝ်ႉ။

2.ပိူဝ်ႈတႃႇပဵၼ်ၵၢၼ်လူင်းလၢႆးမိုဝ်း လိၵ်ႈႁူမ်ႈမၢႆၵိုတ်းယိုဝ်းတူဝ်ႈမိူင်း ၼၼ်ႉၵေႃႈ RCSS ႁပ်ႉတွၼ်ႈၵမ်ႉထႅမ်။

3.ၸွမ်းၼင်ႇပိူင်ဢုပ်ႇဢူဝ်းၵၢၼ်မိူင်း ဢၼ်တင်းမူတ်းလႆႈၸႂ်ၵၼ်ၼၼ်ႉသေ ပိူဝ်ႈတႃႇႁႂ်ႈၸၢင်ႈၵႄႈလိတ်ႈ ပၼ်ႁႃၵၢၼ်မိူင်းၼၼ်ႉ ထုၵ်ႇလႆႈဢုပ်ႇဢူဝ်းၵၢၼ်မိူင်းၵၼ်ၵႂႃႇ ဝႆးဝႆး၊ လူၺ်ႈလွင်ႈပဵၼ်ထမ်း၊ ၽဵင်ႇပဵင်း၊ ၶဝ်ႈပႃးၵူႇမူႇၵူႈၸုမ်း လႄႈ ႁႂ်ႈတူင်ႇဝူင်းၵူႈၸိုင်ႈမိူင်း လႆႈၶဝ်ႈပႃးပဵၼ်ၽူႈႁူႉႁၼ်ၸွမ်း။

ၵဵဝ်ႇၵပ်းလွင်ႈၼႆႉ ၸွမ်သိုၵ်းယွတ်ႈသိုၵ်း လၢတ်ႈဝႃႈ- ဢၼ်လႆႈမႃးၸတ်းႁဵတ်း ပၢင်ၵုမ်ၸုမ်းပွင်ၵၢၼ်လူင် ငဝ်ႈၸိုင်ႈၼႆႉ  လုၵ်ႉမႃးတီႈဢၼ် RCSS လႆႈႁူပ်ႉထူပ်းဢူးဢွင်ႇမိၼ်း (UPWC) ဢၼ်မႃးဢႅဝ်ႇယဵမ်ႈ တီႈၵဵင်းမႆႇ မိူဝ်ႈဝၼ်းတီႈ 29/05/2015 ။ မိူဝ်ႈၼၼ်ႉ ဢူးဢွင်ႇမိၼ်း လၢတ်ႈဝႃႈ- ပိူင်ယုၵ်းယၢင်ႇ ၵၢၼ်ၵိုတ်းယိုဝ်းတူဝ်ႈမိူင်း (NCA) ၼႆႉ မၼ်းဢမ်ႇတဵမ်ထူၼ်ႈ။ ၵူၺ်းၵႃႈ ဢမ်ႇတဵမ်ထူၼ်ႈသေတႃႉၵေႃႈ မၼ်းမီးၶေႃႈႁပ်ႉႁွင်း/မၼ်ႈၵႅၼ်ႇ ဝႆႉယူႇ 4 ၶေႃႈ။ မိူဝ်ႈတိုၵ်ႉယူႇၼႂ်းၶၵ်ႉၵၢၼ်လွင်ႈငမ်းယဵၼ်ယူႇၼႆႉ 1.ဢမ်ႇတၢပ်ႈဝၢင်းၵွင်ႈၵၢင်ႇ။ 2.ႁပ်ႉႁွင်းဝႆႉလွၵ်းပိူင် ၾႅတ်ႊၻရႄႊလ် (ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ)။ 3.ႁပ်ႉႁွင်းဝႆႉ လွင်ႈထွၼ်ၸိုဝ်ႈဢွၵ်ႇ ၼႂ်း 17/1 (ဢၼ်ဝႃႈ ပဵၼ်မုၵ်ႉၸုမ်းယူႇၼွၵ်ႈမၢႆမီႈ)။ 4.တေၸတ်းပၢင်ဢုပ်ႇဢူဝ်း တၢင်းၵၢၼ်မိူင်းၸိူဝ်းၼႆႉ- ဝႃႈၼႆ။

မိူဝ်ႈၼၼ်ႉ ၽွင်းလူင်ၸိူဝ်းမႃးၸွမ်းဢူးဢွင်ႇမိၼ်း မီးၽွင်းလူင်တီႈလုမ်းၸွမ်ၸိုင်ႈ၊ ဢူးၶိၼ်ႇမွင်ႇၸူဝ်း (ၽွင်းလူင်ၾၢႆႇႁႅင်းၾႆးၾႃႉ)၊ ဢူးတၢၼ်းထေး (ၽွင်းလူင်ၾၢႆႇတေႃႉသူင်ႇ လူတ်ႉၾႆး)၊ ၸွမ်သိုၵ်း တႅတ်ႉၼၢႆႇဝိၼ်း (ၽွင်းလူင်ၾၢႆႇလႅၼ်လိၼ်) ၸိူဝ်းၼႆႉ။ ၶဝ်ၸိူဝ်းၼႆႉ ၵေႃႉၼိုင်ႈယဝ်ႉၵေႃႈၼိုင်ႈ ဢွၼ်ၵၼ်တိုၵ်းသူၼ်း တီႈၸဝ်ႈယွတ်ႈသိုၵ်း ႁႂ်ႈ RCSS ၵႂႃႇၶဝ်ႈႁူမ်ႈ ပၢင်ၵုမ်လူင် တီႈလေႃႇၶီးလႃႇ မိူင်းယၢင်း။ ပေႃးၸဝ်ႈယွတ်ႈသိုၵ်း တွပ်ႇလၢတ်ႈဝႃႈ တၢင်း RCSS ပႆႇမီးၽႅၼ်ၵၢၼ်ၶဝ်ႈပၢင်ၵုမ်ၼၼ်ႉၼႆၵေႃႈ ၶိုၼ်းဢွၼ်ၵၼ်တိုၵ်းသူၼ်းဝႃႈ ႁႂ်ႈဢွၵ်ႇလိၵ်ႈပိုၼ်ၽၢဝ်ႇ ၵမ်ႉထႅမ် NCA - ၼႆယဝ်ႉ။

မိူဝ်ႈၼၼ်ႉ ၸဝ်ႈယွတ်ႈသိုၵ်း ထုၵ်ႇတိုၵ်းသူၼ်းဝႃႈ- RCSS ၼႆႉ ပဵၼ်မူႇၸုမ်းယႂ်ႇလူင်၊ ပေႃးဝႃႈ RCSS ၵမ်ႉထႅမ်ၼႆၸိုင် မၼ်းၵေႃႈပၼ်ႁႅင်းဢီး ပၼ်တီႈပၢင်ၵုမ်လူင် လေႃႇၶီးလႃႇ။ ၸဝ်ႈယွတ်ႈသိုၵ်း တွပ်ႇလၢတ်ႈဝႃႈ ႁဝ်းၶႃႈတိုၼ်းတေဢွၵ်ႇ လိၵ်ႈပိုၼ်ၽၢဝ်ႇယူႇ၊ ၵူၺ်းၵႃႈ တေဢွၵ်ႇၸိူင်ႉႁိုဝ်၊ တေဢွၵ်ႇမိူဝ်ႈလႂ်ၼၼ်ႉတႄႉ ႁႂ်ႈလႆႈဢုပ်ႇဢူဝ်းၵၼ်တင်း ၸုမ်းပွင်ၵၢၼ်လူင်ငဝ်ႈၸိုင်ႈၵွၼ်ႇ။ ႁူဝ်ပဝ်ႈလူင် RCSS ၸဝ်ႈယွတ်ႈသိုၵ်း လၢတ်ႈမိူဝ်ႈဝၼ်းတီႈ 29/05/2015 ၼင်ႇၼႆ။

ပၢင်ၵုမ်လေႃႇၶီႇလႃႇ ဢၼ်ၸတ်းတီႈမိူင်းယၢင်း မိူဝ်ႈလဵဝ်ၼႆႉ မီးၽူႈတႅၼ်း ၸၢတ်ႈၸိုင်ႈၽွမ်ႉႁူမ်ႈ (UN) ဝီႊၵျေႊ ၼမ်ႊၿီႊယိူဝ်ႊ (Vijay Nambiar) ၊ ၽူႈတႅၼ်းၶႄႇ သုၼ်းၵေႃသႅင်း မႃးၶဝ်ႈႁူမ်ႈ။ ဢိင်ၼိူဝ်မီးသိုဝ်ႇၶၢဝ်ႇဢွၵ်ႇမႃးၼၼ်ႉ တင်းသွင်ၵေႃႉၼႆႉ တိုၵ်းသူၼ်းႁႂ်ႈၸဵဝ်းမီး ၵၢၼ်လူင်လၢႆးမိုဝ်း ၵိုတ်းယိုဝ်းတူဝ်ႈမိူင်း (NCA) ။