ပွႆးလူင်းပၢင်သွၼ် ပူၵ်းပွင်ၼမ်ႉၵတ်ႉ ၵူၼ်းၼုမ်ႇတႆး တီႈလုမ်းၵၢပ်းသၢၼ် ဝဵင်းတူၼ်ႈတီး ၸိုင်ႈတႆးပွတ်းၸၢၼ်း မီးၽူႈယႂ်ႇၵူၼ်းလူင်လႄႈ ပီႈၼွင်ႉၶႅၵ်ႇၶဝ်းႁူမ်ႈပၢင်ပွႆး တင်းၼမ်တင်းလၢႆ ။

ဝၼ်းတီႈ 02/06/2015 တႄႇၶၢဝ်းယၢမ်း 17.00 မူင်း ႁူဝ်ၶမ်ႈ - 20.00 မူင်းၵၢင်ၶမ်ႈ လုမ်းၵၢပ်းသၢၼ်တူၼ်ႈတီး (ၶွင်ႊသီႊဢဝ်ၶိုၼ်းၸိုင်ႈတႆး) ဢွၼ်ႁူဝ်ၼမ်းၼႃႈၸတ်းႁဵတ်း ပွႆးလူင်ပၢင်သွၼ် တီႈလုမ်းၵၢပ်းသၢၼ် ဝဵင်းတူၼ်ႈတီး ၸိုင်ႈတႆးပွတ်းၸၢၼ်း မီးၽူႈၶိုၼ်ႈႁွတ်ႈ မွၵ်ႈ 163 ၵေႃႉပၢႆၼႆယဝ်ႉ။ ၽူႈၶိုၼ်ႈႁွတ်ႈပွႆးလူင်ပၢင်သွၼ် ၸိူင်ႉၼင်ႇ ၾၢႆႇလူလွမ်ပႂ်ႉပႃးၶွမ်ႊမတီႊပွင်သၢင်ႈလွင်ႈငမ်းယဵၼ် ၶွင်ႊသီႊဢဝ်ၶိုၼ်းၸိုင်ႈတႆး၊ ပႃႊတီႊႁူဝ်သိူဝ်၊ ပႃႊတီႊသိူဝ်ၽိူၵ်ႇ၊ ၸုမ်းၶႅၵ်ႇလီၵိုၼ်းၶွၼ်ႈ(ၼမ်ႉၶူင်း)၊ ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး၊ ၸုမ်းၵူၼ်းၼုမ်ႇတႆး (TYO- တူၼ်ႈတီး)၊ ၽူႈမီးပုတ်ႈၽွၼ်ႈလုမ်းၵၢပ်းသၢၼ် ၶွင်ႊသီႊဢဝ်ၶိုၼ်းၸိုင်ႈတႆး ၸိူဝ်ႉၼႆႉ။

ပွႆးလူင်းပၢင်သွၼ်ၼႆႉဢၼ်ၽူႈၶိုၼ်ႈႁွတ်ႈမွၵ်ႇလၢတ်ႈၶေႃႈၵႂၢမ်း ၸဝ်ႈမျႃႉဝတီႇ ၵေႃႉပဵၼ် ၾၢႆႇလူလွမ်ပႂ်ႉပႃးၶွမ်ႊမတီႊပွင်သၢင်ႈလွင်ႈငမ်းယဵၼ် ၶွင်ႊသီႊဢဝ်ၶိုၼ်းၸိုင်ႈတႆး ပိုတ်ႇလၢတ်ႈဝႃႈ ၵၢၼ်သွၼ်ၼႆႉႁဵၼ်းဢဝ်ၵႂႃႇ ႁႂ်ႈမေႃၸႂ်ႉတိုဝ်း ပုၼ်ႈပၢင်ႈၽွၼ်းလီတူဝ်ၵဝ်ႇလႄႈ ပုၼ်ႈပၢင်ႈၵူၼ်းတင်းၼမ်၊ ၵူၼ်းၼုမ်ႇႁဝ်းဝၼ်းမိူဝ်ႈၼႆႉယႃႇပေယူႇၼူၵ်ႇ ႁႂ်ႈမီးၸႂ်ၶႂ်ႈႁဵၼ်းႁူႉႁႃၵူႈမိူဝ်ႈ ယႃႇပေယူႇမဝ်ၵိၼ်မၢင် ၼႆယဝ်ႉ။
ၽူႈၸတ်းၵၢၼ်လုမ်းၵၢပ်းသၢၼ် တူၼ်ႈတီး ၸဝ်ႈႁၢၼ်ၸၢႆးဢူး ၵၢဝ်ႇလၢတ်ႈၶေႃႈၵႂၢမ်း၊ မေႃသွၼ် ၸၢႆးသႅမ်း မွၵ်ႇလၢတ်ႈသပ်းလႅင်းၼႄပၼ် လွင်ႈလႆႈပူင်သွၼ်ၵႂႃႇၽႃသႃၵၢၼ်သွၼ်၊ ၸၢႆးဢူၼ်ႈဢွၼ်ႇ တၢင်တူဝ်လုၵ်ႈႁဵၼ်းၵၢသ်ႇလၢတ်ႈၶေႃႈၵႂၢမ်းယိၼ်းၸူမ်းၶွပ်ႈၸႂ်။

ၽူႈၶိုၼ်ႈႁွတ်ႈပွႆးလူင်းပၢင်သွၼ်လႄႈလုၵ်ႈႁဵၼ်းဢိၵ်ႇပႃးပီႈၼွင်ႉၶႅၵ်ႇ လႆႈႁူမ်ႈၵၼ်ယွၼ်းၵႂၢမ်းတိူင်ႇၵၢဝ်ႇ ၵတိသတ်ႉၸႃႇ (4) ၶေႃႈ ၼႂ်းပွႆးလူင်းပၢင်သွၼ်-
1.    ၵဝ်ၼႆႉ ပဵၼ်ၵူၼ်းႁၵ်ႉၸိူဝ်ႉၸၢတ်ႈ
2.    ၵဝ်ၼႆႉ ပဵၼ်ၵူၼ်းႁၵ်ႉဝၢၼ်ႈမိူင်းၸိုင်ႈတႆး
3.    ၵဝ်ၼႆႉ ပဵၼ်ၵူၼ်းႁၵ်ႉၾိင်ႈငႄႈလိၵ်ႈလၢႆး၊ ၵႂၢမ်းလၢတ်ႈလႄႈ ၾိင်ႈၶိူဝ်းၸဝ်ႈၵဝ်ႇ
4.    ၵဝ်ၼႆႉ ၵတိသတ်ႉၸႃႇပၼ်ဝႆႉၼိူဝ်ႉၸိူဝ်ႉၸၢတ်ႈဝၢၼ်ႈမိူင်း လႄႈၾိင်ႈငႄႈ၊ လိၵ်ႈလၢႆး၊ ၵႂၢမ်းလၢတ်ႈ ၾိင်ႈၶိူဝ်းၸဝ်ႈၵဝ်ႇၼၼ်ႉ ဢမ်ႇပၼ်လူႉလႅဝ်လႃးလႃး ၼႆယဝ်ႉ။

ပၢင်သွၼ်ၼႆႉ တႄႇဝၼ်းတီႈ 16/05/2015-02/06/2015 ၶၢဝ်းတၢင်း (15) ဝၼ်း။ လုၵ်းႁဵၼ်းဢၼ်မႃးၶိုၼ်ႈႁွတ်ႈၽိုၵ်းၾွၼ်ႉ မီးမွၵ်ႈ 30 ၵေႃႉပၢႆ၊ လုၵ်ႈႁဵၼ်းဢၼ်မႃးၶိုၼ်ႈၽိုၵ်းၾွၼ်ႉၼႆႉ ဝွၵ်ႇၸိူၼ်းၵူၼ်းၼုမ်ႇတႆး  ၼႂ်းမိူင်းတႆးပတ်ႉပိုၼ်ႉ ၼိုင်ႈဝဵင်းလႂ် 1-2 ၵေႃႉ။ ပၢင်သွၼ်ပွၵ်ႈၵမ်းၼႆႉ တႃႇသွၼ်ပၼ်ၵူၼ်းၼုမ်ႇ ႁႂ်ႈမီးၼမ်ႉၵတ်ႉၶႅၼ်ႇသေၶိုၼ်းမိူဝ်းပိုၼ်ၽႄႈပၼ်မိူင်းၽႂ် မိူင်းမၼ်း ၵဵဝ်ႇၵပ်းလူၺ်ႈ  ၵၢၼ်မိူင်း၊ ၵၢၼ်ဢဝ်ၶၢဝ်ႇ၊ ၶွမ်ႊပိဝ်ႊတိူဝ်ႊ၊ တတ်းတေႃႇႁၢင်ႈသဵင် လွင်ႈၸႂ်ႉတိူဝ်းဢိၼ်ႊထိူဝ်ႊၼဵတ်ႊ လႄႈၵၢၼ်ၵပ်းသိုပ်ႇၵပ်းသၢၼ်ၶဝ်ႈဢွၵ်ႇၵၼ် ၼႆယဝ်ႉ။

ပွႆးလူင်းပၢင်သွၼ်ၼႆႉ ႁွင်ႈၵၢၼ်လူင်ၾၢႆႇပိုၼ်ၽၢဝ်ႇၶွင်ႊသီႊဢဝ်ၶိုၼ်းၸိုင်ႈတႆး လႆႈၸႅၵ်ႇတွၼ်ႈ ပပ်ႉၵႂၢမ်းၾၢၵ်ႇတွၼ်ႈၸွမ်သိုၵ်း ယွတ်ႈသိုၵ်း ႁူဝ်ပဝ်ႈလူင် ၶွင်ႈသီႇဢဝ်ၶိုၼ်ႈၸိုင်ႈတႆး (57 ပီ ဝၼ်းလုၵ်ႉၽိုၼ်ႉ ၵႅတ်ႇၶႄႇဢဝ်ၶိုၼ်းမိူင်းၸိုင်ႈတႆး) လႄႈ ၶႅပ်း ထီႊဝီႊ(VDO)ဢၼ်လုၵ်ႈႁဵၼ်းၶဝ် လူင်းႁဵတ်းတူဝ်ထူပ်း ၼႂ်းၽွင်းယၢမ်းပၢင်သွၼ် ပၼ်ၽူႈယႂ်ႇၵူၼ်းလူင်လႄႈ ပီႈၼွင်ႉၶႅၵ်ႇ ဢၼ်မႃးၶဝ်ႈႁွတ်ႈပွႆးလူင်းပၢင်သွၼ် ၵမ်းၼႆႉ ။

ပွႆးလူင်းပၢင်သွၼ်ၼႆႉ မီးတၢင်းၵႃႈပၢၼ်မႂ်ႇ၊ တၢင်းၵႃႈၼူၵ်ႉႁၢင်ႈလီ၊ ယွင်ႈယေႃးၼမ်ႉၸႂ်ၶူးသွၼ်မေႃသွၼ်။ ဝၢႆးၼၼ်ႉၵေႃႈ ပိုၼ်ၽၢဝ်ႇပၢင်ၵႅဝ်ႈယဝ်ႉတူဝ်ႈလီငၢမ်းသေ ဝွၵ်ႇၸိူၼ်းၽူႈယႂ်ႇၵူၼ်းလူင်လႄႈ ၶႅၵ်ႇပီႈၼွင်ႉၵိၼ်ၶဝ်ႈႁူမ်ႈမူႇၵၼ် ။

ၶေႃႈမုၼ်း- ၸၢႆးတ
ၸၢႆးတႆးမၢဝ်း (ၸုမ်းၶၢဝ်ႇတႆးလွတ်ႈလႅဝ်း)