ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းမိူင်းတူၼ် ယိူင်းဢၢၼ်းပိူဝ်ႈတႃႇ ႁႂ်ႈမႄႈၼမ်ႉၶူင်း လွတ်ႈပူၼ်ႉ ယၢၼ်ၽေးၼႆသေ ႁူမ်ႈၵၼ်ႁဵတ်းပၢင်ယွၼ်းပွလ်း၊ ယိုၼ်ႈတၢၼ်း။ ထႅင်ႈၾၢႆႇၼိုင်ႈ ယူႇတီႈၵူၼ်းမိူင်းၵေႃႈ တိုၼ်းသၢၼ်ၶတ်း ၶူင်းၵၢၼ်ၵေႃႇသၢင်ႈၾၢႆ ၼမ်ႉၶူင်း မိူင်းတူၼ်။

ပၢင်ယွၼ်းပွလ်း ႁႂ်ႈၼမ်ႉၶူင်းလူင်ပူၼ်ႉယၢၼ်ၽေးၶဵၼ်

ဝၼ်းတီႈ 06/04/2015 ယၢမ်းပွတ်းၼႂ် ၵူၼ်းဝၢၼ်ႈၵူၼ်းမိူင်း ပွတ်းမိူင်းတူၼ် ယိူင်းဢၢၼ်းပိူဝ်ႈတႃႇ ႁႂ်ႈၼမ်ႉၶူင်းလူင် လႆႈပူၼ်ႉလွတ်ႈၽေးၶဵၼ်ၼႆသေ လႆႈၸတ်းႁဵတ်းပၢင်ယွၼ်းပွလ်း/ ႁႅၼ်းတၢၼ်း/ ၵၢပ်ႈသွမ်းသင်ၶၸဝ်ႈ တီႈဝတ်ႉပိတၵၢတ်ႈ ႁူင်းထမ်း ဝဵင်းမိူင်းတူၼ်။ ပၢင်ယွၼ်းပွလ်း ယိုၼ်ႈတၢၼ်းၼႆႉ မီးၵူၼ်းဝၢၼ်ႈၵူၼ်းမိူင်း ၶဝ်ႈႁူမ်ႈပၢၵ်ႇပၢႆ- ၼႆယဝ်ႉ။

ၸၢႆးၼွင်ႉ ၵူၼ်းမိူင်းတူၼ် လၢတ်ႈဝႃႈ- ႁဝ်းၶႃႈလႆႈဢွၼ်ၵၼ်ယွၼ်းပွလ်းဝႃႈ ႁႂ်ႈၼမ်ႉၶူင်းလူင် လွတ်ႈပူၼ်ႉၽေး ၶဵၼ်။ ဢၼ်ပိူၼ်ႈမႃးၵေႃႇသၢင်ႈၾၢႆၸိူဝ်းၼႆႉ ႁဝ်းၶႃႈဢမ်ႇၶႂ်ႈလႆႈ၊ ၵူၼ်းမိူင်းတူၼ်ႁဝ်းၶႃႈတိုၼ်းဢမ်ႇႁပ်ႉလႆႈ။ ၾၢႆႇႁဝ်းၶႃႈၵူၼ်းမိူင်းတႄႉ တိုၼ်းဝႃႈသၢၼ်ၶတ်းတဵမ်တီႈၼၼ်ႉယဝ်ႉ။ ပေႃးဝႃႈပိူၼ်ႈမႃး ႁဵတ်းၾၢႆၼႆႉ ဢၼ်ႁဝ်းၶႃႈၵိူဝ်းယမ်ၼပ်ႉထိုဝ် မိူၼ်ၼင်ႇၸေးၻီး(ၵွင်းမူး)ၸိုဝ်ႈသဵင်ယႂ်ႇ မူၺ်ႇတေႃႇႁူဝ်လိုင်း ၸိူဝ်းၼႆႉ တေလူႉၵွႆမူတ်း၊ ဝၢၼ်ႈၵူၼ်းၼႂ်းမိူင်းတႆးလၢႆလၢႆပိုၼ်ႉတီႈၵေႃႈ ၼမ်ႉတေထူမ်ႈ၊ ၵူၼ်းမိူင်းတႆးတေထူပ်း တၢင်းယၢပ်ႇၽိုတ်ႇ- ဝႃႈၼႆ။

ဝၼ်းတီႈ 6 ယၢမ်းဝၢႆးဝၼ်း မီးၶွမ်ႊပၼီႊ SMEC မိူင်းဢွတ်ႊသထြေႊလီႊယိူဝ်ႊ ဢၼ်တေမႃးၵဵပ်း ၵၢင်ၸႂ်ၵူၼ်းမိူင်း ၵဵဝ်ႇၵပ်းလွင်ႈၵေႃႇသၢင်ႈၾၢႆၼမ်ႉၶူင်း မႃးႁူပ်ႉထူပ်းၵူၼ်းမိူင်း၊ တွင်ႈထၢမ်တူၺ်းၵၢင်ၸႂ် ၵူၼ်းမိူင်းတူၼ်ဝႃႈ တေၽွမ်ႉဢမ်ႇၽွမ်ႉ၊ ပေႃးၵေႃႇသၢင်ႈၾၢႆ မီးၽွၼ်းလီၽွၼ်းၸႃႉၸိူင်ႉႁိုဝ်ၸိူဝ်းၼႆႉ။

ၾၢႆမိူင်းတူၼ် ဢၼ်တေႁဵတ်းၼႆႉ မီးၾၢႆႇႁွင်ႇဝၢၼ်ႈတႃႈသႃလႃး မွၵ်ႈ 20 ၵီႊလူဝ်ႊ။

ၽူႈၶဝ်ႈပႃးၼႂ်းပႃႊတီႊၵၢၼ်မိူင်း ၼႂ်းမိူင်းတူၼ် ၵေႃႉၼိုင်ႈၵေႃႈလၢတ်ႈဝႃႈ- ၶွမ်ႊပၼီႊၸိူဝ်းဢၼ် ၵေႃႇသၢင်ႈၾၢႆၸိူဝ်းၼႆႉ ၶဝ်ယင်းပႆႇလၢတ်ႈသင်တီႈၵူၼ်းမိူင်း၊ ၶဝ်ပေႃးမႃးၶုတ်းမႃးၸူင်လွႆယူႇယဝ်ႉ၊ ၶဝ်တေႁဵတ်းသင်ၵေႃႈဢမ်ႇႁူႉ။ လွင်ႈၼႆႉ ၵူၼ်းမိူင်းၵေႃႈဢမ်ႇလႆႈႁူႉၸွမ်းလွင်ႈၶဝ်။ တီႈတႄႉမၼ်း ၶဝ်တေႁဵတ်းသင်ၵေႃႈ ၶဝ်ထုၵ်ႇလီလႆႈ လၢတ်ႈၼႄၵူၼ်းမိူင်း။ ထႅင်ႈလွင်ႈၼိုင်ႈၵေႃႈ ၶဝ်ဢမ်ႇပၼ်ၵူၼ်းမိူင်း ၶဝ်ႈၵႂႃႇႁိမ်းႁွမ်း ဢွင်ႈတီႈဢၼ်ၶဝ်တေၵေႃႇသၢင်ႈၾၢႆၼၼ်ႉ၊ ၶဝ်ဝၢင်းလွင်ႈႁူမ်ႇလူမ်ႈဝႆႉၼႅၼ်ႈၼႃ- ဝႃႈၼႆ။

ၵူၼ်းဝၢၼ်ႈၵူၼ်းမိူင်း ၸိူဝ်းယူႇတၢင်းၼွၵ်ႈဝဵင်းမိူင်းတူၼ်၊  ဢၼ်ဝၢၼ်ႈယူႇႁိမ်းၸမ်ၶူင်းၵၢၼ် ၾၢႆၼၼ်ႉလႄႈသင်၊ ၵူၼ်းဝၢၼ်ႈၸိူဝ်းယူႇႁိမ်း သဵၼ်ႈတၢင်းၵႃးၸိူဝ်းၼၼ်ႉလႄႈသင်၊ ၶဝ်ဢွၼ်ၵၼ်ဝႃႈ လႆႈငိၼ်းသဵင်ရူတ်ႉၵႃးၶဝ်ႈၶဝ်ႈဢွၵ်ႇဢွၵ်ႇ ၶိုၼ်ႈၶိုၼ်ႈလူင်းလူင်း ၵၢင်ၶိုၼ်းၵူႈၶိုၼ်း၊ ၶဝ်တေႃႉသင်တႄႉဢမ်ႇႁူႉ။

ၶွမ်ႊပၼီႊ SMEC ၸိုင်ႈမိူင်းဢွတ်ႊသထြေႊလီႊယိူဝ်ႊၼႆႉ  ပဵၼ်ၶွမ်ႊပၼီႊ ဢၼ်လူင်ပွင်ၸိုင်ႈမၢၼ်ႈ လႄႈ ၶွမ်ႊပၼီႊ ဢၼ်တေၵေႃႇသၢင်ႈၾၢႆ မိူၼ်ၼင်ႇၶွမ်ႊပၼီႊမိူင်းထႆး မိူင်းၶႄႇၶဝ် လႆႈၸၢင်ႈမႃး ပိူဝ်ႈတႃႇ လဵပ်ႈႁဵၼ်းတူၺ်းၼႂ်းပိုၼ်ႉတီႈဝႃႈ ပေႃးၵေႃႇသၢင်ႈၾၢႆမႃး တေမီးၽွၼ်းလီၽွၼ်းၸႃႉၸိူင်ႉႁိုဝ်။ တေမႃးတွင်ႈထၢမ်ၵၢင်ၸႂ်ၵူၼ်းမိူင်း တေၽွမ်ႉဢမ်ႇၽွမ်ႉ လွင်ႈၵၢၼ်ၵေႃႇသၢင်ႈၾၢႆ ၸိူဝ်းၼႆႉ။

ၾၢႆမိူင်းတူၼ်ၼႆႉ ဢွၼ်တၢင်းႁဵၵ်ႈၸိုဝ်ႈဝႃႈ ၾၢႆတႃႈသၢင်း။ ၵူၺ်းၵႃႈ ဢိင်ၼိူဝ်ၵူၼ်းဝၢၼ်ႈၵူၼ်းမိူင်း ၼႄၵၢင်ၸႂ်သၢၼ်ၶတ်းသေ လႆႈၵိုတ်းၵႂႃႇၵမ်းၼိုင်ႈ။ ထိုင်မႃးၼႂ်းပီ 2013 လႆႈၶိုၼ်းတႄႇၶူင်းၵၢၼ် ၵေႃႇသၢင်ႈၾၢႆသေ ပိၼ်ႇၸိုဝ်ႈပဵၼ် ၾၢႆမိူင်းတူၼ်။ ၾၢႆမိူင်းတူၼ်ၼႆႉ တေႃႇထိုင်မိူဝ်ႈလဵဝ်ၵေႃႈ တိုၵ်ႉမီးၽႅၼ်ၵၢၼ်တေသိုပ်ႇႁဵတ်းၵႂႃႇယူႇ။