ဝဵင်း ၸၼ်ႉၸႄႈတွၼ်ႈၵမ်ႈၼမ် ၼႂ်းမိူင်းတႆး ၸတ်းပၢင်ၼႄၵၢင်ၸႂ် ၵမ်ႉထႅမ် ၶၵ်ႉၵၢၼ်လွင်ႈငမ်းယဵၼ် ဢၼ်ၸုမ်းၸၢဝ်းၶိူဝ်း (NCCT) တင်းၸုမ်း လူင်ပွင်ၸိုင်ႈမၢၼ်ႈ (UPWC) လႆႈၸႂ်ႁူမ်ႈၵၼ် လူင်းလၢႆးမိုဝ်း ပိူင်ယုၵ်းယၢင်ႇ တႃႇၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCA) ။

ပၢင်ၼႄၵၢင်ၸႂ် ၵမ်ႉထႅမ်လွင်ႈငမ်းယဵၼ် တီႈဝဵင်းလူင်တူၼ်ႈတီး

ဢၼ်ၶဝ်ႁဵတ်းၵၢင်ၸႂ်ယူႇၼၼ်ႉ တီႈဝဵင်းတူၼ်ႈတီးၵေႃႈ ၵူႈႁွင်ႈၵၢၼ်လူင်ပွင်ၸိုင်ႈ လႄႈ ၵူၼ်းဝၢၼ်ႈၵူၼ်းမိူင်းမိုၼ်ႇပၢႆ လႆႈဢွၵ်ႇၼႄၵၢင်ၸႂ်ၼႂ်းၵၢင်ဝဵင်း ႁပ်ႉတွၼ်ႈၵမ်ႉထႅမ် ၶၵ်ႉၵၢၼ်လွင်ႈငမ်းယဵၼ် လူင်ပွင်ၸိုင်ႈ။ လႅင်ႇၶၢဝ်ႇတၢင်း ပၢႆးယူႇလီ လူင်ပွင်ၸိုင်ႈလၢတ်ႈ။

မိူဝ်ႈဝၼ်းတီႈ 06/04/2015 ယၢမ်းပွတ်းၼႂ်၊ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း၊ မီးၵၢၼ်ၸတ်း ပၢင်ၼႄၵၢင်ၸႂ် ၵမ်ႉထႅမ်ၶၵ်ႉၵၢၼ်လွင်ႈငမ်းယဵၼ် ဢၼ်ၸုမ်းၸၢဝ်းၶိူဝ်း ၸုမ်းၵပ်းသၢၼ် ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCCT) တင်း လူင်ပွင်ၸိုင်ႈမၢၼ်ႈ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) လႆႈၸႂ် လူင်းလၢႆးမိုဝ်း ပိူင်ယုၵ်းယၢင်ႇ တႃႇၵၢၼ်ၵိုတ်းယိုဝ်းပတ်းပိုၼ်ႉ ၸိုင်ႈမိူင်း (NCA) မိူဝ်ႈဝၼ်းတီႈ 31/03/2015 ။

ပၢင်ၼႄၵၢင်ၸႂ် ၵမ်ႉထႅမ်ၶၵ်ႉၵၢၼ်လွင်ႈငမ်းယဵၼ် တီႈဝဵင်းလွႆလႅမ်

ပၢင်ၼႄၵၢင်ၸႂ်ၼႆႉ ၸတ်းႁဵတ်းတီႈဝၢင်းပိတ်ႉမၢၵ်ႇၼင် ဝဵင်းတူၼ်ႈတီး။ မီးၶႃႈႁၢပ်ႇၵၢၼ်ၶုၼ်မၢၼ်ႈၵူႈႁွင်ႈၵၢၼ် ၼႂ်းဝဵင်းတူၼ်ႈတီး၊ ၵူၼ်းမိူင်းၵူႈပွၵ်ႉ 22 ပွၵ်ႉ ၼႂ်းဝဵင်းတူၼ်ႈတီး။ ၼွၵ်ႈသေၼၼ်ႉ မီးၵူၼ်းဝၢၼ်ႈၵူၼ်းမိူင်း ၸိူဝ်းယူႇႁိမ်းဝဵင်းတူၼ်ႈတီး မိူၼ်ၼင်ႇဝၢၼ်ႈတွင်ႇလေးလူင်း၊ ဝၢၼ်ႈပၢၼ်းတိၼ်ႇ၊ ဝၢၼ်ႈၼမ်ႉသီး၊ ဝၢၼ်ႈၼွင်လိူဝ်ႇ၊ ဝၢၼ်ႈၽႃမူၼ်းၸိူဝ်းၼႆႉ ဢွၼ်ၵၼ်ၶိုၼ်ႈမႃးၶဝ်ႈႁူမ်ႈၸွမ်း ပၢင်ၼႄၵၢင်ၸႂ်တီႈဝဵင်းတူၼ်ႈတီး၊ ဢဵၼ်ႁႅင်းၵူၼ်းမီးမွၵ်ႈၼိုင်ႈမိုၼ်ႇ (10,000) ။

ၽူႈၸတ်းၵၢၼ် ၼႂ်းၸုမ်းလူင်ပွင်ၸိုင်ႈမိူင်းတႆး ဢူးၵွင်းၸၼ်ႇဢူး မွၵ်ႇလၢတ်ႈၶေႃႈၵႂၢမ်း တီႈပၢင်ၼႄၵၢင်ၸႂ်ဝႃႈ- ပဵၼ်ပၢင်ၼႄၵၢင်ၸႂ် ၵမ်ႉထႅမ်ဢၼ်ၾၢႆႇလူင်ပွင်ၸိုင်ႈ UPWC လႄႈ ၾၢႆႇၸၢဝ်းၶိူဝ်း NCCT ၶဝ် လႆႈလူင်းလၢႆးမိုဝ်း ပိူင်ယုၵ်းယၢင်ႇ တႃႇၵၢၼ်ၵိုတ်းယိုဝ်းပတ်းပိုၼ်ႉ ၸိုင်ႈမိူင်း (NCA) ၊ ဢၼ်ၶဝ်လႆႈလူင်းလၢႆးမိုဝ်းပူၼ်ႉမႃးမိူဝ်ႈဝၼ်းတီႈ 31/03/2015 ၼၼ်ႉ- ဝႃႈၼႆ။

ဢူးၵွင်းၸၼ်ႇဢူး လႆႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- လွင်ႈၼႆႉ မၼ်းပဵၼ်ၵၢင်ၸႂ်ၵူၼ်းမိူင်း ၶႂ်ႈလုၵ်ႉၶိုၼ်ႈမႃးၼႄၵၢင်ၸႂ်ႁင်းၵူၺ်း။ ဢမ်ႇၸႂ်ႈၾၢႆႇလူင်ပွင်ၸိုင်ႈ လႆႈၸီႉသင်ႇ လႆႈတဵၵ်းငႅၼ်းသေႁဵတ်းမႃး။ ၾၢႆႇလူင်ပွင်ၸိုင်ႈၸႄႈမိူင်းတႄႉ လႆႈၼႄႉၼမ်းဝႃႈ ထုၵ်ႇလီႁဵတ်းၸိူင်ႉၼၼ် ၸိူင်ႉၼႆၸိူဝ်းၼႆႉၵူၺ်း။ ဢၼ်ဝႃႈ တေလႆႈမႃးၼႄၵၢင်ၸႂ်၊ ဢမ်ႇမႃးၼႄၵၢင်ၸႂ်ဢမ်ႇလႆႈၸိူဝ်းၼႆႉတႄႉ ႁဝ်းဢမ်ႇလႆႈဢွၵ်ႇၶေႃႈၸီႉသင်ႇ- ဝႃႈၼႆ။

ပၢင်ၼႄၵၢင်ၸႂ် ၵမ်ႉထႅမ်ၶၵ်ႉၵၢၼ်ငမ်းယဵၼ် တီႈဝဵင်းတႃႈၶီႈလဵၵ်း

တင်ႈတႄႇႁူဝ်လိူၼ်ဢေႊပရိူဝ်ႊလ် (2015)ၼႆႉမႃး ၼႂ်းၸႄႈတွၼ်ႈလႃႈသဵဝ်ႈ၊ မူႇၸေႈ၊ ၵျွၵ်ႉမႄး ၸိုင်ႈတႆးပွတ်းႁွင်ႇၸိူဝ်းၼႆႉလႄႈသင်။ ၸိုင်ႈတႆးပွတ်းၸၢၼ်း (တူၼ်ႈတီး) လၢင်းၶိူဝ်း၊ လွႆလႅမ် ၸိူဝ်းၼႆႉလႄႈသင်။ ၸိုင်ႈတႆးပွတ်းဢွၵ်ႇ တႃႈၶီႈလဵၵ်း ၵဵင်းတုင် ၸိူဝ်းၼႆႉလႄႈသင်၊ ဢၼ်ပဵၼ်ဝဵင်း ၸၼ်ႉၸႄႈတွၼ်ႈၵမ်ႈၼမ်ၼႆႉ ၼိုင်ႈဝဵင်း မီးၵူၼ်းဝၢၼ်ႈၵူၼ်းမိူင်းၼပ်ႉႁူဝ်ပၢၵ်ႇ ယိပ်းပၢႆႉလိၵ်ႈသေ ဢွၼ်ၵၼ်ပႆႁႄႇၼႄၵၢင်ၸႂ် ၸွမ်းတၢင်း ၵူႈၸႄႈတွၼ်ႈ၊ ၵမ်ႉထႅမ်ၶၵ်ႉၵၢၼ်ငမ်းယဵၼ်။

ၵဵဝ်ႇၵပ်းလွင်ႈၼႆႉ လုင်းဢႃယု 50 ပၢႆၵေႃႉၼိုင်ႈ ဢၼ်ယူႇဝဵင်းလွႆလႅမ် လၢတ်ႈဝႃႈ- မိူဝ်ႈၼႆႉၵၢင်ၼႂ် ဝၼ်းတီႈ 6 လိူၼ်ဢေႊပရိူဝ်ႊလ်ၼႆႉ  တီႈလွႆလႅမ်ၵေႃႈ လႆႈႁဵတ်းပၢင်ၼႄၵၢင်ၸႂ်၊ မီးၵူၼ်းဝၢၼ်ႈၵူၼ်းမိူင်း ၶဝ်ႈႁူမ်ႈ မွၵ်ႈသၢမ်ႁဵင် (3,000)  ပၢႆ၊ ပဵၼ်ၵူၼ်းၼႂ်းၸႄႈဝဵင်းမိူင်းပွၼ် လွႆႈလႅမ် ။ ၵၢင်ၼႂ် 8 မူင်း ဢွၵ်ႇတီႈပွၵ်ႉ 1 သေ ႁႄႇပႆၵႂႃႇတေႃႇထိုင်ထမ်ႇမႃႇရူင်ႇ ပွၵ်ႉ 4 ၊ လႆႈပႆတၢင်းၵႂႃႇမွၵ်ႈ 40 မိၼိတ်ႉ၊ ၵူၼ်းမႃးၼႄၵၢင်ၸႂ်ၸိူဝ်းၼႆႉ ဢမ်ႇလႆႈၵိၼ်ၶဝ်ႈ၊ ဢွၼ်ၵၼ်ၶၢင်းတွင်ႉမႆႈၶဝ်ႈၵၼ်ယူႇ။ တၢင်းၵျွၵ်ႉမႄးတႄႉ ၵူၼ်းၵႂႃႇၼႄၵၢင်ၸႂ်ၶဝ်ၼႆႉ ယင်းလႆႈငိုၼ်းၵေႃႉႁဵင်ႁႃႈပၢၵ်ႇ (1,500) ၼႆလူးၵွၼ်ႇ၊ မၼ်းပဵၼ်ႁူဝ်ပဝ်ႈဝၢၼ်ႈဢိူင်ႇ သင်ႇလၢတ်ႈမႃးလႄႈ ႁဝ်းၶႃႈလႆႈမႃးၼႄၵၢင်ၸႂ်- ဝႃႈၼႆ။

တီႈဝဵင်းၼမ်ႉၶမ်းၼၼ်ႉ ၾၢႆႇၵွၼ်းၸႄႈဝဵင်း လႆႈတႅမ်ႈလိၵ်ႈၸီႉသင်ႇလူင်းၸူး ၽူႈၵွၼ်းဢိူင်ႇၶဝ် ႁႂ်ႈၵူၼ်းဝၢၼ်ႈၵူၼ်းမိူင်းၶဝ်ႈႁူမ်ႈပၢင်ပွႆးၼႄၵၢင်ၸႂ်- ၵူၼ်းၼမ်ႉၶမ်းၶဝ်လၢတ်ႈ။

ပၢင်ၼႄၵၢင်ၸႂ်ၵမ်ႉထႅမ် ၶၵ်ႉၵၢၼ်လွင်ႈငမ်းယဵၼ်ၼႆႉ ၵူၼ်းၵႂႃႇၼႄၵၢင်ၸႂ်ၶဝ် လႆႈႁွင်ႉပၢဝ်ႇ 5 ၶေႃႈ- 1.တႃႇႁႂ်ႈၵိုတ်းယိုဝ်းပတ်းပိုၼ်ႉၸိုင်ႈမိူင်းၼႆႉ ပဵၼ်ပုၼ်ႈၽွၼ်းႁဝ်း။ 2.တႃႇႁႂ်ႈၶၵ်ႉၵၢၼ်လွင်ႈငမ်းယဵၼ် တေပဵၼ်ၵၢၼ်လႆႈၶႅမ်ႉလႅပ်ႈလီငၢမ်း (ဢွင်ႇ)ၼႆႉ ပဵၼ်ပုၼ်ႈၽွၼ်းႁဝ်း။ 3.တႃႇႁႂ်ႈပၢင်ဢုပ်ႇၵုမ်ၵၢၼ်မိူင်း တေပဵၼ်မႃးဝႆးဝႆးၼႆႉ ပဵၼ်ပုၼ်ႈၽွၼ်းႁဝ်း။ 4.ၵူၼ်းဢၼ်ယႃႉၵဝ်း ၶၵ်ႉၵၢၼ်လွင်ႈငမ်းယဵၼ်ၼႆႉ ပဵၼ်ၽူႈၶဵၼ်ႁဝ်း။ 5.ပၢင်လူင်းလၢႆးမိုဝ်း ၵမ်ႉထႅမ်လွင်ႈငမ်းယဵၼ် ႁႂ်ႈၸဵဝ်းပဵၼ်ၵၢၼ်သေၵမ်း။ ၼွၵ်ႈသေၼၼ်ႉ ယင်းလႆႈယိပ်းပၢႆႉလိၵ်ႈသေ ၼႄၵၢင်ၸႂ်ၼႂ်းၵၢင်ဝဵင်းၵႂႃႇ- ၼႆယဝ်ႉ။