ၵူၼ်းမိူင်းၼႂ်းပိုၼ်ႉတီႈၼပ်ႉႁူဝ်ပၢၵ်ႇ ဢွၼ်ၵၼ်ၶွၼ်ႈတုမ် ၼႄၵၢင်ၸႂ် ဢွင်ႈတီႈၶႄႇ တေမႃးသၢင်ႈၶူဝ်ၼမ်ႉမၢဝ်း တီႈလႅၼ်လိၼ်ၶႄႇ- မၢၼ်ႈ ဝၢၼ်ႈၵုင်းသႃႇ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ၸဝ်ႈၼႃႈတီႈၶႄႇ မႃးပၵ်းတုင်းၶႄႇႁိမ်းၾင်ႇၼမ်ႉမၢဝ်း တႃႇသၢင်ႈၶူဝ်

ပူၼ်ႉမႃးမိူဝ်ႈဝၼ်းတီႈ 03/04/2015 တၢင်းၾၢႆႇၶႄႇ ဢမ်ႇဝွၵ်ႇဢမ်ႇၸႅင်ႈဝႆႉလူင်ႈၼႃႈသေ  ၸဝ်ႈၼႃႈတီႈၶႄႇ 15 ၵေႃႉ ပႃးတင်းႁူမ်ႇလူမ်ႈ 10 ၵေႃႉ (တင်းမူတ်း 25 ၵေႃႉ) ပႃးၵွင်ႈၸေးမိုဝ်း လုၵ်ႉတၢင်းမိူင်းၶႄႇ လူင်းမႃးတီႈဝၢၼ်ႈၵုင်းသႃႇ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇသေပၵ်းလၵ်း တႅၵ်ႈၼႃႈလိၼ် ပိူဝ်ႈတႃႇၵေႃႇသၢင်ႈၶူဝ်ၼမ်ႉမၢဝ်း။ လွင်ႈၼႆႉ ၵူၼ်းၼႂ်းပိုၼ်ႉတီႈလႆႈႁူႉယဝ်ႉၵေႃႈ တေမီးၵူၼ်းမိူင်းၶွၼ်ႈတုမ်ၵၼ်မွၵ်ႈ 500 ၵေႃႉ ၵႂႃႇၼႄၵၢင်ၸႂ်သၢၼ်ၶတ်း ဢမ်ႇဢဝ်ၶူဝ်ၼမ်ႉမၢဝ်း- ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈ ၵႂႃႇၼႄၵၢင်ၸႂ်သၢၼ်ၶတ်း

ဝၢၼ်ႈၵုင်းသႃႇ လႅၼ်လိၼ်သွင်မိူင်း တႆး-ၶႄႇ တီႈဢၼ်တေၵေႃႇသၢင်ႈၶူဝ်ၼႆႉ ယူႇၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ တေႃႇၼႃႈမိူင်းၶႄႇ ဝၢၼ်ႈၼွင်တဝ်း ထုင်ႉမၢဝ်း (သူၺ်ႇလီႇ)။

ၵဵဝ်ႇၵပ်းလွင်ႈၼႆႉ ၽူႈၵွၼ်းၸႄႈဝဵင်းၼမ်ႉၶမ်း တင်းၵူၼ်းၼႂ်းဝၢၼ်ႈဢိူင်ႇၵမ်ႈၽွင်ႈ ၵႂႃႇၸူးတီႈလႅၼ်လိၼ်သေ ဢုပ်ႇၵၼ်တင်း ၸဝ်ႈၼႃႈတီႈၶႄႇ။ ပဵၵ်ႉသမ်ႉၶဝ်လၢတ်ႈဝႃႈ မၼ်းၸၢင်ႈတုမ်ႉတိူဝ်ႉလွင်ႈၸမ်ၸႂ်ၵၼ် သွင်မိူင်း။ ၽွင်းၶဝ်ဢုပ်ႇၵၼ်ယူႇၼၼ်ႉ ၵူၼ်းမိူင်းၵေႃႈယူႇတၢင်းလင်ၶဝ်သေ ၼႄၵၢင်ၸႂ်ႁွင်ႉသႅၼ်ႇဝႃႈ ႁဝ်းဢမ်ႇလႆႈၸႂ်၊ ႁဝ်းသၢၼ်ၶတ်း ။ ၾၢႆႇၸဝ်ႈၼႃႈတီႈၶႄႇၶဝ်ၵေႃႈ ၶိုၼ်းႁုပ်ႈယိုတ်းဢဝ် တုင်းဢၼ်ၶဝ်မႃးပၵ်းဝႆႉၼၼ်ႉ မိူဝ်းၵႂႃႇၶိုၼ်းလီလီ မွၵ်ႈယၢမ်း 11 မူင်း။

ပူၼ်ႉမႃး မိူဝ်ႈဝၼ်းတီႈ 05/01/2015 ၼၼ်ႉ လုင်းဢၢႆႈပီး ၽူႈၵွၼ်းဝၢၼ်ႈတိုင်းၶဵဝ် ၸႄႈဝဵင်းၼွင်တဝ်း ၼႂ်းထုင်ႉမၢဝ်း ယၢမ်ႈမႃးလၢတ်ႈၼႄ ၽူႈၵွၼ်းဢိူင်ႇဝၢၼ်ႈၵုင်းသႃႇဝႃႈ ၸဝ်ႈၼႃႈတီႈၶႄႇၶဝ်တေမႃးတႅၵ်ႈ တီႈလိၼ် တႃႇတေႁဵတ်းၶူဝ်- ၼႆယူႇ။ ၵူၺ်းၵႃႈ ဝၼ်းဢၼ်ၶဝ်မႃးၵမ်းၼႆႉ ၶဝ်ဢမ်ႇတၵ်းသဵင်သင်လႄႈၶဝ်ႈၸင်ႇ မႃးတႅၵ်ႈတီႈလိၼ်သေ ပၵ်းလၵ်း။

ၼၢႆးငိုၼ်းသႂ် တင်း ၼၢႆးၶမ်းလႅင် ဢႃယု 90 ပၢႆ

ၼၢႆးငိုၼ်းသႂ် တင်း ၼၢႆးၶမ်းလႅင် ဢႃယု 90 ပၢႆ ၵေႃႈလၢတ်ႈဝႃႈ- ပိုၼ်ႉတီႈၼႃႈလိၼ်ၸိူဝ်းၼႆႉ ဢမ်ႇၸႂ်ႈလိၼ်ၶႄႇ၊ ၸဵမ်မိူဝ်ႈႁဝ်းၵေႃႉလဵၵ်ႉလဵၵ်ႉၼၼ်ႉ ပူႇမွၼ်ႇၼၢႆးယႃႈႁဝ်းၵေႃႈလၢတ်ႈဝႃႈ ၼႆႉပဵၼ်လိၼ်မိူင်းတႆး၊ ဢမ်ႇၸႂ်ႈလိၼ်ၶႄႇ၊ ၶဝ်သမ်ႉတေမႃးဢဝ်လႆႈၸိူင်ႉႁိုဝ်။ ပေႃးၶဝ်မႃးဢဝ်တႄႉ လႆႈဝႃႈၶဝ်ပူၼ်ႉပႅၼ်ၶဝ်ႈမႃးၼႂ်းမိူင်းႁဝ်းယဝ်ႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၾၢႆႇၶႄႇၶဝ်လၢတ်ႈဝႃႈ ပဵၼ်ႁိုဝ်ၵေႃႈယဝ်ႉ၊ ၵူၼ်းမိူင်းၵႃႈၶႂ်ႈၼႄၵၢင်ၸႂ်ၸိူင်ႉႁိုဝ်ၵေႃႈယဝ်ႉ ၵဵဝ်ႇၵပ်းလွင်ႈၵၢၼ်ၵေႃႇသၢင်ႈၶူဝ်ၼႆႉ တၵ်းတေႁဵတ်းသၢင်ႈၵႂႃႇတိၵ်းတိၵ်း- ဝႃႈၼႆ။