ၸဝ်ႈၼႃႈတီႈပလိၵ်ႈမၢၼ်ႈ ၾၢႆႇၵုမ်းသဵၼ်ႈတၢင်း/ ရူတ်ႉၵႃး ဝဵင်းတူၼ်ႈတီး ပိုၼ်ၽၢဝ်ႇၶေႃႈႁၢမ်ႈ တႃႇၶၢဝ်းၽွင်း သွၼ်းၼမ်ႉ လိူၼ်ႁႃႈၼႆႉ 12 ၶေႃႈ၊ တေၸႂ်ႉႁႅင်း ပလိၵ်ႈၼပ်ႉႁူဝ်ႁဵင် ဝၢင်းႁူမ်ႇလူမ်ႈ ၼႂ်းဝဵင်းတူၼ်ႈတီးလၢႆလၢႆတီႈ။

Photo: ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း

ဢွၼ်ၼႃႈၶၢဝ်းၽွင်းသင်ၶၢၼ်(သၢင်းၵျၢၼ်ႇ 2015)ၼႆႉ ၸဝ်ႈၼႃႈတီႈပလိၵ်ႈမၢၼ်ႈ ၾၢႆႇၵုမ်းသဵၼ်ႈတႃႈသၢႆတၢင်း/ ရူတ်ႉၵႃး ၼႂ်းဝဵင်းတူၼ်ႈတီး ဢွၵ်ႇလိၵ်ႈပိုၼ်ၽၢဝ်ႇႁၢမ်ႈတၢပ်ႈ တႃႇၶၢဝ်းၽွင်းသင်ၶၢၼ်(သၢင်းၵျၢၼ်ႇ) ပွႆးသွၼ်းၼမ်ႉ တင်းမူတ်း 12 ၶေႃႈ။ လိၵ်ႈဢၼ်သူင်ႇထိုင်ၵူၼ်းဝၢၼ်ႈၵူၼ်းမိူင်းၵေႃႈမီး။ ၼွၵ်ႈသေၼၼ်ႉ ၶီႇရူတ်ႉၵႃးပႃးတင်းၶိူင်ႈမႄႇသဵင်(ဢူတ်ႇဢူဝ်)သေ ပိုၼ်ၽၢဝ်ႇႁွင်ႉသႅၼ်ႇ ၼႂ်းၵိဝ်ႇဝဵင်း ၵူႈၵိဝ်ႇ ၵူႈပွၵ်ႉ ၵူႈဝၼ်း။

ၶေႃႈပိုၼ်ၽၢဝ်ႇႁၢမ်ႈတၢပ်ႈ 12 ၶေႃႈၼၼ်ႉ - တေဢမ်ႇလႆႈၼုင်ႈၶူဝ်းပိတ်းပွတ်း/ ၵႃႈႁၢင်ႈႁၢႆႉႁၢင်ႈဝူၺ်ႇ။ တေဢမ်ႇလႆႈၵိၼ်လဝ်ႈမဝ်းၵႅပ်ႇသေ ႁေႃႈရူတ်ႉၵႃး၊ တေဢမ်ႇလႆႈႁေႃႈရူတ်ႉၵႃး ဢၼ်ဢမ်ႇမီးပၢႆႉ (လၢႆႊသႅၼ်ႊ)၊ တေဢမ်ႇလႆႈတဵၵ်းႁွၼ်းၵႃး။ တေဢမ်ႇလႆႈႁေႃႈၵႃးႁိမ်တၢင်းၵၼ်(သႅင်း)ၶၢမ်ႈၵၼ်။ တေဢမ်ႇလႆႈတိတ်းသတိၵ်ႊၵိူဝ်ႊ ၸွမ်းရူတ်ႉၵႃး ဢၼ်ဢွၵ်ႇႁၢင်ႈၾၢင်ဢမ်ႇၶႅမ်ႉလႅပ်ႈ၊ တေဢမ်ႇလႆႈတႅမ်ႈလိၵ်ႈ ၶေႃႈၵႂၢမ်းဢၼ်ဢမ်ႇယဵၼ်ႇငႄႈ ၸိူဝ်းၼႆႉ။ ပိူင်လူင်မၼ်း ၼႂ်းပီၼႆႉ ၵွပ်ႈလႆႈငိၼ်းဝႃႈ တေမီးၵၢၼ်ၶၢႆယႃႈယႃ သူၼ်းႁႅင်းၵႃမၸိူဝ်းၼႆႉလႄႈ  တေၵူတ်ႇထတ်း ႁၢၼ်ႉၶၢႆယႃႈယႃ၊ ၵူတ်ႇထတ်းယႃႈမဝ်းၵမ် လႄႈ လဝ်ႈ ၸိူဝ်းၼႆႉ။ ပေႃးဝႃႈပူၼ်ႉပႅၼ်ၵူတ်းမၢႆ ပိူင်ႁၢမ်ႈႁႅတ်ႉၸိူဝ်းၼႆႉ တေတီႉၺွပ်းပၼ်တူတ်ႈ(တၢမ်ႇ)ၼၵ်းၼႃ- ၼႆယဝ်ႉ။


ၵူၼ်းၼႂ်းပိုၼ်ႉတီႈလၢတ်ႈဝႃႈ - ပၢင်ပွႆးသွၼ်းၼမ်ႉမိူဝ်ႈပီၵၢႆ ပီဢွၼ်ၼႆႉ ၵူၼ်းၵိုၼ်းၶွၼ်ႈၼမ်၊ ပီၼႆႉလႆႈငိၼ်းဝႃႈ ယိင်ႈၶႅၼ်းတေၵိုၼ်းလိူဝ်ၵူႈပီ၊ ၵူၼ်းတၢင်ႇတီႈတၢင်ႇလႅၼ် တေမႃးၶဝ်ႈပွႆးသင်ၶၢၼ်(သၢင်းၵျၢၼ်ႇ) တူၼ်ႈတီးၼမ်။ ၵူၺ်းၵႃႈ လၢႆပီပူၼ်ႉမႃးၼႆႉ ႁူတ်းၼမ်ႉၵၼ်ၵေႃႈ ဢဝ်ၼမ်ႉဢမ်ႇၸိုၼ်ႈသႂ်သေ ႁူတ်းၵၼ်၊ မိူၼ်ၼင်ႇဢဝ်ၼမ်ႉတူႇၼမ်ႉၼဝ်ႈ မႃးႁူတ်းၵၼ်ၵေႃႈမီးလႄႈႁဵတ်းႁႂ်ႈၾိင်ႈသွၼ်းၼမ်ႉႁၢင်ႈႁၢႆႉမႃးတိၵ်းတိၵ်း- ဝႃႈၼႆ။

ပီၼႆႉ ၶဵင်ႇႁူတ်းၼမ်ႉၼႂ်းမိူင်းတႆး ဢၼ်ယႂ်ႇမၼ်း ၸွမ်းၼင်ႇဢၼ်လႆႈၵဵပ်းသၢႆမၢႆမၼ်းဝႆႉၼၼ်ႉ မီးတင်းမူတ်း 60 ၶဵင်ႇပၢႆ၊ တီႈဝဵင်းတူၼ်ႈတီး မီး 10 ၶဵင်ႇ၊ ၼွၵ်ႈသေၼၼ်ႉ ယင်းတေမီးၶဵင်ႇဢွၼ်ႇၶဵင်ႇဢိတ်းထႅင်ႈ။

ၼႂ်းဝဵင်းတူၼ်ႈတီးၼႆႉ ၸွမ်းသဵၼ်ႈတၢင်းလူင် တေၸႂ်ႉဢဵၼ်ႁႅင်းပလိၵ်ႈၵုမ်းသဵၼ်ႈတၢင်း 70 ပၢႆ၊ တေပႂ်ႉတူၺ်းသေၵူတ်ႇထတ်းထဵတ်ႈႁၢဝ်ႈႁႅင်း။ ၶၢဝ်းသွၼ်းၼမ်ႉၼႆႉ တီႈၼႂ်းဝဵင်းတူၼ်ႈတီးမၢင်ပွၵ်ႉ ဢမ်ႇပၼ်ရူတ်ႉၵႃး ၵႂႃႇမႃးသူၼ်တၢင်းၵၼ်၊ မိူၼ်ၼင်ႇသဵၼ်ႈတၢင်း ၵူင်ႇတႄႇလၢၼ်း၊ ယေႇထွတ်ႉဢူးလၢၼ်း၊ မျၢတ်ႉလေးလၢၼ်း၊ ဢွင်ႇမိၼ်ႇၵလႃႇလၢၼ်း၊ ပၢၼ်းတေးလၢၼ်း ၸိူဝ်းၼႆႉ တေဝႆႉသၢႆဢၼ်ၵႂႃႇလၢႆလၢႆၵူၺ်း။

ပီပူၼ်ႉမႃးၼႆႉ ၼႂ်းၶၢဝ်းၽွင်းသင်ၶၢၼ်(သၢင်းၵျၢၼ်ႇ) ႁူတ်းၼမ်ႉၵူၺ်း မီးၽေးဢုပၢတ်ႈရူတ်ႉၵႃးၽႃႇၵၼ် 15 ၵမ်း၊ ဢၼ်ႁေႃႈရူတ်ႉၶိူင်ႈ ဢမ်ႇၸွမ်းၵူတ်းမၢႆ(ပၵ်းပိူင်)သေ ထုၵ်ႇတီႉၺွပ်းမီး 300 ပၢႆ။ တပ်ႉပလိၵ်ႈၶဝ်ၵေႃႈလၢတ်ႈဝႃႈ ပီၼႆႉတေၽိူမ်ႉထႅမ်လွင်ႈႁူမ်ႇလူမ်ႈ၊ တေၵူတ်ႇထတ်းသဵၼ်ႈမၢႆၶႅၵ်ႇထီႇထူၼ်ႈ၊ တေၵူတ်ႇထတ်းၼႂ်းပွၵ်ႉ ၼႂ်းဢိူင်ႇ ၼႂ်းဝၢၼ်ႈ၊ တေၶိုၼ်ႈထတ်းပႃးတင်းႁိူၼ်းၶႃႈႁၢပ်ႇၵၢၼ်ၶုၼ်ၶဝ်၊ တေၵူတ်းထတ်းၸွမ်းၸိူဝ်းတႃႈရူတ်ႉၵႃး လူတ်ႉၾႆး၊ ၶူင်ႇႁိူဝ်းဝိၼ်ၸိူဝ်းၼႆႉၵေႃႈ တေပႂ်ႉၵူတ်ႇထတ်းထဵတ်ႈႁၢဝ်ႈႁႅင်း၊ တေတိတ်းတင်ႈၵွင်ႈထၢႆႇၵမ်းသိုဝ်ႈ CCTV ၸွမ်းၶဵင်ႇႁူတ်းၼမ်ႉၵူႈၶဵင်ႇသေတေတမ်းႁူမ်ႇလူမ်ႈဢဵၼ်ႁႅင်းပလိၵ်ႈ 2,000 ပၢႆ တႃႇပႂ်ႉဢဝ်ႁူမ်ႇလူမ်ႈ ၶၢဝ်းၽွင်းသင်ၶၢၼ်(သၢင်းၵျၢၼ်ႇ)ၼႆႉ- ၼႆယဝ်ႉ။