ၼႂ်းၶၢဝ်းတၢင်း 7-8 ဝၼ်းၼႆႉ ၵူၼ်းပၢႆႈၽေးသိုၵ်း တၢင်းၼႃႈလိၼ်ၵူဝ်းၵၢင်ႉ ႁွတ်ႈမႃးထိုင်တီႈ ဝၢၼ်ႈသူႈ ၸႄႈဝဵင်းလႃႈသဵဝ်ႈ သဵၼ်ႈမၢႆမီးသီႇႁဵင်ပၢႆ။ ၸိူဝ်းပၢႆႈဢမ်ႇပူၼ်ႉ ထုၵ်ႇယိုဝ်းတၢႆၵေႃႈ မီးၼပ်ႉပၢၵ်ႇ။

Photo: Facebook

တင်ႈတႄႇဝၼ်းတီႈ 09/02/2015 မႃး ဢိင်ၼိူဝ်ၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉ ၸုမ်းၽိူင်ၵျႃးသိုၵ်း လႄႈ တပ်ႉသိုၵ်းမၢၼ်ႈ ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးသိုၵ်း ႁွတ်ႈမႃးတီႈဝတ်ႉ/ၵျွင်းဝၢၼ်ႈသူႈၼႆႉ သဵၼ်ႈမၢႆမၼ်းမီးသီႇႁဵင်ပၢႆယဝ်ႉ- ၸဝ်ႈၵွၼ်းဝတ်ႉ တီႈဝိႁၢရ်ဝၢၼ်ႈသူႈလၢတ်ႈ။

ဢိင်ၼိူဝ်လႆႈပဵၼ်ပၢင်တိုၵ်း တင်ႈတႄႇႁူဝ်လိူၼ်ၾႅပ်ႊၿိဝ်ႊရီႊ (2015)ၼႆႉမႃးသေ တေႃႇထိုင်ယၢမ်းလဵဝ် ၵူၼ်းၼႂ်းပိုၼ်ႉတီႈၵမ်ႈၼမ် ဢွၼ်ၵၼ်ပၢႆႈၶဝ်ႈၵႂႃႇၼႂ်းမိူင်းၶႄႇ မီးမိုၼ်ႇပၢႆ၊ ဢၼ်ပၢႆႈမႃးတၢင်းလႃႈသဵဝ်ႈသေ ပၢႆႈလူင်းၵႂႃႇတၢင်းမိူင်းမၢၼ်ႈ မီးသီႇႁဵင်ပၢႆ- ၼႆယဝ်ႉ။

Photo: Facebook

ၵဵဝ်ႇၵပ်းလွင်ႈၼႆႉ ၸဝ်ႈတူၼ်ၶူးဝိႁၢရ်ဝၢၼ်ႈသူႈ လၢတ်ႈဝႃႈ- သဵၼ်ႈမၢႆဢၼ်ၵဵပ်းဝႆႉၼႆႉ မီးသီႇႁဵင်ပၢႆယဝ်ႉ၊ တေႃႇထိုင်မိူဝ်ႈလဵဝ်ၵေႃႈ တိုၵ်ႉၶဝ်ႈဢွၵ်ႇယူႇတိၵ်းတိၵ်း။ လူတ်ႉၵႃးၶွမ်ႊပၼီႊဢေႊသျိူဝ်ႊဝိူဝ်ႊလ်ႁပ်ႉသူင်ႇပၼ်၊ ၵူၼ်းၵေႃႈမီးၵူႈၶိူဝ်းၶိူဝ်း၊ ပဵၼ်ၵူၼ်းသီႇပေႃႉ ၵျွၵ်ႉမႄး ၼမ်ႉသၼ်ႇၸိူဝ်းၼႆႉ။ ၵမ်ႈၼမ်တႄႉ ပဵၼ်ၵူၼ်းတၢင်းမိူင်းမၢၼ်ႈ။ ဢွၵ်ႇမိူဝ်းၵႂႃႇၵေႃႈၼပ်ႉႁူဝ်ပၢၵ်ႇ ဢၼ်ၶဝ်ႈမႃးထႅင်ႈၵေႃႈၼပ်ႉႁူဝ်ပၢၵ်ႇယဝ်ႉ၊ မိူဝ်ႈၼႆႉၵူၺ်း သဵၼ်ႈမၢႆဢၼ်မီးယူႇမီး 400 ပၢႆ၊ ဢၼ်ၶဝ်ႈမႃးထႅင်ႈသမ်ႉ မီး 300 ပၢႆ- ဝႃႈၼႆ။

ၵူၼ်းမိူင်းတၢႆယွၼ်ႉၽေးသိုၵ်း ၼႂ်းၼႃႈလိၼ်ၵူဝ်းၵၢင်ႉ Photo: Facebook

ၸၢႆးလႅင်လူင် လၢဝ်ႇၵၢႆး ဢၼ်ပၢႆႈၽေးသိုၵ်း ႁွတ်ႈမႃးတီႈၶျိၼ်းသူၺ်ႇႁိူဝ် လၢတ်ႈဝႃႈ- မိူဝ်ႈလဵဝ်ၼႆႉ ၵူၼ်းမိူင်းမၢၼ်ႈမႃးၵိၼ်ၸၢင်ႈတႅပ်းဢွႆႈ၊ ၵေႃႇသၢင်ႈ ႁဵတ်းတၢင်း ၼႂ်းၼႃႈလိၼ်လၢဝ်ႇၵၢႆးၵမ်ႈပႃႈၼမ်၊ ပၢႆႈမႃးတၢင်းၶျိၼ်းသူၺ်ႇႁိူဝ် ၵုၼ်လူင်-ႁူဝ်ပၢင်ႇသေ ဢွၵ်ႇမိူဝ်းၵႂႃႇတၢင်းလႃႈသဵဝ်ႈ၊ ဢၼ်တိုၵ်ႉၶမ်ယူႇမီးၵူၼ်း 300 ပၢႆ။ သိုၵ်းသွင်ၾၢႆႇၼႆႉ ဢမ်ႇပႆႇပိုတ်ႇပၼ်တၢင်းၵၼ်လႄႈ ၵူၼ်းၸိူဝ်းၼႆႉတိုၵ်ႉၶမ်ယူႇ ပႆႇၸၢင်ႈၵႂႃႇႁပ်ႉမႃး။ ၾၢႆႇၼိုင်ႈၵေႃႈ ၵူၼ်းၼႂ်းပိုၼ်ႉတီႈ ၸိူဝ်းဢၼ်ပၢႆႈပူၼ်ႉၶဝ်ႈၵႂႃႇတၢင်းမိူင်းၶႄႇတႄႉ ဢမ်ႇပေႃးမီးပၼ်ႁႃ။ ၸိူဝ်းဢၼ်ဢမ်ႇပၢႆႈပူၼ်ႉသေ ဢမ်ႇမေႃၵႂၢမ်းမၢၼ်ႈၼႆႉ လႆႈထုၵ်ႇၸီႉၼႄးဝႃႈ ပဵၼ်ၵူၼ်းၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၼႆသေ ၺႃးယိုဝ်းတၢႆၸွမ်းတႃႈၸွမ်းတၢင်းၵေႃႈမီး၊ ယွၼ်ႉပိူဝ်ႈၸုမ်းၽိူင်ၵျႃးသိူင်း ဢၼ်လုၵ်ႉၽိုၼ်ႉၼႆႉ ယိပ်းၵွင်ႈၵၢင်ႇသေ သႂ်ႇသိူဝ်ႈၶူဝ်းၵူၼ်းဝၢၼ်ႈၵူၼ်းမိူင်း၊ ၶီႇလူတ်ႉၶိူင်ႈ ၶီႇလူတ်ႉၵႃးသေ သၢင်ႇထုၵ်ႇၸိူင်ႉႁိုဝ်ၵေႃႈ ၸၢင်ႈယိုဝ်းၾၢႆႇလူင်ပွင်ၸိုင်ႈ ယူႇၵူႈၶၢဝ်းယၢမ်း။ ယွၼ်ႉပိူဝ်ႈၼၼ်လႄႈ ၵူၼ်းဝၢၼ်ႈၵူၼ်းမိူင်း ဢၼ်လႆႈတၢႆယွၼ်ႉပၢင်တိုၵ်းၼႆႉ မီးၵႂႃႇပၢၵ်ႇပၢႆယဝ်ႉ- ဝႃႈၼႆ။

ၸုမ်းၽိူင်ၵျႃးသိူင်းၼႆႉ ပူၼ်ႉမႃးမိူဝ်ႈပီ 2009 ယွၼ်ႉပိူဝ်ႈဢမ်ႇႁပ်ႉလႆႈ ဢၼ်ၸုမ်းသိုၵ်းမၢၼ်ႈတဵၵ်းႁႂ်ႈ လႅၵ်ႈလၢႆႈႁဵတ်းတပ်ႉပႂ်ႉလႅၼ်လိၼ်သေ တင်းသိုၵ်းမၢၼ်ႈ လႆႈပဵၼ်ပၢင်တိုၵ်းၵၼ်။ ၾၢႆႇသိုၵ်းမၢၼ်ႈၵမ်ႉယၼ်ပၼ်ႁႅင်း ၸုမ်းပၢႆသႅဝ်ႇၶျိူၼ်သေ လေႃႇတိုၵ်းၸုမ်းၽိူင်ၵျႃးသိူင်း၊ ၸုမ်းၽိူင်ၵျႃးသိူင်းၶဝ် လႆႈငိူင်ႉဝႄႈဢွၵ်ႇၼႃႈလိၼ်ၵူဝ်းၵၢင်ႉ။ ၼႂ်းၶၢဝ်းတၢင်း 6 ပီၼႆႉ ၵဵပ်းတွမ်ႁွမ်ႁႅင်းသေ ၽိူင်ၵျႃးသိူင်း ၶိုၼ်းမႃးလေႃႇတိုၵ်းယိုဝ်းဢဝ် ၼႃႈလိၼ်ၵူဝ်းၵၢင်ႉ ဢၼ်ပဵၼ်ၼႃႈလိၼ်မိူင်းၵိူတ်ႇတူဝ်ၵဝ်ႇ၊ ပွၵ်ႈၵမ်းၼႆႉ ပဵၼ်ပွၵ်ႈဢွၼ်တၢင်းသုတ်း။