ဢိင်ၼိူဝ် ၶိူင်ႈၸႂ်ၾႆးၾႃႉႁႅင်းလႅတ်ႇ သျွတ်ႉတီႈ သၢႆၾႆးသေ ၵိူတ်ႇပဵၼ်ၾႆးလုၵ်ႉမႆႈ၊ ႁဵတ်းႁႂ်ႈ ၾႆးမႆႈႁိူၼ်း ၵူၼ်းဝၢၼ်ႈၵွင်းလၢင်း 5 လင်။ ထႅင်ႈတၢင်းၼိုင်ႈ ၾႆးမႆႈၵၢတ်ႇမိူင်းပွၵ်ႉ မီးလွင်ႈလူႉသုမ်းၼမ်။

ႁွႆးသၢၵ်ႈၾႆးမႆႈ တီႈဝၢၼ်ႈၵွင်းလၢင်း ဢိူင်ႇဝၢၼ်ႈဝၢပ်ႈ

ပူၼ်ႉမႃးမိူဝ်ႈဝၼ်းတီႈ 15/02/2015 ၵၢင်ဝၼ်းယၢမ်း 12 မူင်းၼၼ်ႉ ၶိူင်ႈၾႆးၾႃႉ ၸႂ်ႉႁႅင်းသၢႆလႅတ်ႇ ၵိူတ်ႇသျွတ်ႉတီႈသၢႆၾႆး လႄႈၵိူတ်ႇၾႆးလုၵ်ႉမႆႈ ၼိူဝ်လင်ၶႃးႁိူၼ်း ၵူၼ်းဝၢၼ်ႈၵွင်းလၢင်းႁိူၼ်းၼိုင်ႈ ဢိူင်ႇဝၢၼ်ႈဝၢပ်ႈ ၸႄႈဝဵင်းၵေးသီး။ ႁဵတ်းႁႂ်ႈၾႆးလုၵ်ႉမႆႈလၢမ်းၵႂႃႇ တိူဝ်ႉသႂ်ႇႁိူၼ်းႁိမ်းႁွမ်းထႅင်ႈ တင်းမူတ်း 5 လင်။ ၵႃႈၶၼ်ငိုၼ်းတွင်း ဢၼ်လႆႈလူႉသုမ်းၵႂႃႇၸွမ်းၾႆးမႆႈၵမ်းၼႆႉ ၼပ်ႉႁူဝ်ပၢၵ်ႇသႅၼ်။

ၵဵဝ်ႇၵပ်းလွင်ႈၼႆႉ ပႃႈၶမ်းယိင်း လၢတ်ႈဝႃႈ- ၵူၼ်းဝၢၼ်ႈႁၼ်ပဵဝ်ၾႆးလုၵ်ႉမႆႈၼိူဝ်လင်ၶႃးႁိူၼ်း ပႃႈမေႃႈ၊ ၵူၼ်းဝၢၼ်ႈၶဝ်ႁွင်ႉသႅၼ်ႇဝႃႈ ၾႆးမႆႈၾႆးမႆႈၼႆသေ ပႃႈမေႃႈ(ၸဝ်ႈႁိူၼ်း) လႅၼ်ႈၵႂႃႇတူၺ်းၼႂ်းႁွင်ႈမိုဝ်ႉ ၵေႃႈဢမ်ႇႁၼ်ၾႆး၊ လႅၼ်ႈၶဝ်ႈတူၺ်းၼႂ်းႁိူၼ်းၵေႃႈ ဢမ်ႇႁၼ်ၾႆး၊ ၽိူဝ်ႇငွၵ်ႈတူၺ်းၼိူဝ်လင်ၶႃးမုင်းႁိူၼ်းၼၼ်ႉ ၾႆးပေႃးတႄႇလုၵ်ႉယဝ်ႉ၊ ၾႆးမႆႈၵႂႃႇတေႃႇထိုင်ဝၢႆးဝၼ်း 2 မူင်းၵေႃႈ မႆႈပႃးႁိူၼ်းႁိမ်းႁွမ်းထႅင်ႈလၢႆလင်။

လွင်ႈတၢင်းၾႆးမႆႈၼႆႉ ယွၼ်ႉပိူဝ်ႈလၢႆးတိတ်းတင်ႈ ၶိူင်ႈႁႅင်းၾႆးၾႃႉသၢႆလႅတ်ႇ တေဢမ်ႇထုၵ်ႇပိူင်မၼ်း၊ ဢမ်ႇမီးၶိူင်ႈဢၼ်ၵုမ်းႁႅင်းၾႆးလႄႈ ႁဵတ်းႁႂ်ႈႁႅင်းၾႆးၽုပ်ႉသေ လႆႈမႆႈၵႂႃႇ။ ဢိင်ၼိူဝ်ၾႆးမႆႈသေ မႆႈလၢမ်းပႃးလူတ်ႉၶိူင်ႈ၊ ထၢင်ၼမ်ႉမၼ်းၸိူဝ်ႉၾႆး (ထၢတ်ႈသီႇ)ၵေႃႈတႅၵ်ႇ၊ ႁိူၼ်းမၢင်လင်ၼႆႉ တူဝ်ငိုၼ်းၵူၺ်း ဢၼ်ၾႆးမႆႈၵႂႃႇ 50-60 သႅၼ်ၵေႃႈမီး။ ၵွပ်ႈၼၼ် ပေႃးပႃးၵႃႈၶၼ်ႁိူၼ်းယေး ဢၼ်လႆႈလူႉသုမ်းၵႂႃႇၼႆႉ ၼပ်ႉႁူဝ်ပၢၵ်ႇမၼ်း- ဝႃႈၼႆ။

ဝၢၼ်ႈၵွင်းလၢင်း ဢိူင်ႇဝၢၼ်ႈဝၢပ်ႈၼႆႉ မိူဝ်ႈပၢင်တိုၵ်း တင်ႈတႄႇလိူၼ်ၵျုၼ်ႊ ပီ 2014 တေႃႇထိုင် ႁူဝ်လိူၼ်ဢွၵ်ႊထူဝ်ႊၿိူဝ်ႊၼၼ်ႉၵေႃႈ ၺႃးၽေးသိုၵ်း ဢၼ်သိုၵ်းမၢၼ်ႈႁၢင်ႈသိုၵ်းတေႃႇ တပ်ႉသိုၵ်းၸိုင်ႈတႆး (SSPP/SSA) ယဝ်ႉၵမ်းၼိုင်ႈ။ ယၢမ်းလဵဝ် မႃးၺႃးၽေးၾႆးမႆႈထႅင်ႈ။ ႁၢၼ်ႉတေႃႇထိုင်ယၢမ်းလဵဝ် ၵူၼ်းတၢင်ႇတီႈတၢင်ႇလႅၼ် ဢၼ်ၶဝ်ႈၵႂႃႇၸွႆႈထႅမ်ပႆႇမီး၊  တိုၵ်ႉမီးၵူၼ်းၼႂ်းပိုၼ်ႉတီႈၼင်ႇၵၼ် ၸိူဝ်းဝႃႈလႆႈပွင်ပဵၼ်ၼၼ်ႉ ၵႂႃႇၸွႆႈထႅမ်ၵၼ်ၵူၺ်း- ၼႆယဝ်ႉ။

မိူဝ်ႈလဵဝ် ၵူၼ်းထူပ်းၽေးၾႆးၸိူဝ်းၼႆႉ လႆႈၵႂႃႇပိုင်ႈဢိင်ယူႇသဝ်း တႂ်ႈၸၢႆးၶႃႈပီႈၼွင်ႉတၢင်ႇႁိူၼ်း၊ ႁဵတ်းသုမ်ႉ မုင်းၽႃႈယၢင်သေ ပိုင်ႈယူႇသဝ်းၼႂ်းဝၢင်းႁိူၼ်း တၢင်ႇႁိူၼ်းဝႆႉၸိူဝ်းၼႆႉ။

ၾၢႆႇၼိုင်ႈတၢင်းၼိုင်ႈ ဝူင်ႈဝၢင်ႈၼႆႉ ၼႂ်းၸိုင်ႈတႆးပွတ်းဢွၵ်ႇၶူင်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ တီႈမိူင်းပွၵ်ႉၵေႃႈ ၵူၼ်းမိူင်းထူပ်းၽေးၾႆးၼင်ႇၵၼ်။

ၵူၼ်းမိူင်းပွၵ်ႉ လုင်းသႆႇၼပ်း လၢတ်ႈဝႃႈ- တီႈမိူင်းပွၵ်ႉႁဝ်းၶႃႈၵေႃႈၾႆးမႆႈ။ ၾႆးမႆႈၵၢတ်ႇလူင်မိူင်းပွၵ်ႉသေ လၢမ်းမႆႈပႃးလင်ႁိူၼ်းၵူၼ်းဝၢၼ်ႈလႄႈ ႁွင်ႈၶၢတ်ႈ ဢၼ်ယူႇႁိမ်းႁွမ်းၵၢတ်ႇ ၸိူဝ်းၼႆႉတင်းၼမ်။ ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၶဝ် သူင်ႇရူတ်ႉၶႄၾႆးမႃးဢမ်ႇၶိုတ်းတၼ်း ၵူၼ်းဝၢၼ်ႈလႆႈၶႄႁင်းၵူၺ်း၊ ဢမ်ႇပေႉလႆႈလႄႈၾႆးလႆႈမႆႈၵႂႃႇတင်းၼမ်။

ယွၼ်ႉပိူဝ်ႈၾႆးမႆႈသေ ၵႃႈၶၼ်ငိုၼ်းတွင်း ငိုၼ်းၶႄႇ ဢၼ်လူႉသုမ်းၵႂႃႇၸွမ်းၾႆးပွၵ်ႈၵမ်းၼႆႉ ၼပ်ႉႁူဝ်လၢၼ်ႉ၊ ၵူၼ်းဢၼ်ၺႃးၽေးၾႆးၼႆႉ ပဵၼ်ၸၢဝ်းၶႄႇၵမ်ႈၼမ်၊ တႆးလႄႈဝႃႉ ၵမ်ႈဢေႇ။

မိူင်းပွၵ်ႉ ၼႃႈလိၼ်ၽွင်းငမ်းတူဝ်ၵဝ်ႇဝႃႉၼႆႉ ပေႃးဢဝ်ၵၢၼ်ၽွင်းငမ်းဝႃႉတမ်းဝႆႉ ပဵၼ်ၸၼ်ႉၸႄႈတွၼ်ႈ။ ပေႃးဢဝ်ၵၢၼ်ၽွင်းငမ်းမၢၼ်ႈ (ပိူင်ငဝ်ႈပိုင်းမိူင်း 2008)ဝႃႈ ပဵၼ်ၸၼ်ႉဢိူင်ႇ ယူႇပႃႈတႂ်ႈၸႄႈဝဵင်းမိူင်းယၢင်း ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇ။