တပ်ႉသိုၵ်းၸိုင်ႈတႆး (RCSS/SSA) ၵဵပ်းၵူၼ်းသိုၵ်းမႂ်ႇ ၼႂ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်းလႄႈ ၵူၼ်းၼႂ်းပိုၼ်ႉတီႈပၢၵ်ႇပၢႆ ဢွၵ်ႇပၢႆႈယၢၼ်ႁိူၼ်းယေး တီႈယူႇ။

တပ်ႉသိုၵ်းၸိုင်ႈတႆး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 68 ပီ လွႆတႆးလႅင်း

ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၵဵပ်းသိုၵ်းတီႈၼႂ်းဝဵင်းမိူင်းၵိုင် 9 ပွၵ်ႉ လႄႈ ၼႂ်းဝၢၼ်ႈၼႂ်းဢိူင်ႇၵမ်ႈၽွင်ႈ ဢၼ်မီးလင်ႁိူၼ်း 100 ပၢႆၸိူဝ်းၼႆႉလႄႈ ၵူၼ်းဝၢၼ်ႈၵူၼ်းမိူင်း ၵူၼ်းၼႂ်းပိုၼ်ႉတီႈၼၼ်ႉ သွင်ႉပၢႆႈဢွၵ်ႇယၢၼ်ႁိူၼ်းယေး ၵႂႃႇယူႇတၢင်းဝဵင်းလၢႆးၶႃႈ၊ ဝဵင်းတူၼ်ႈတီး၊ ဝဵင်းပၢင်လူင်လႄႈ ၵမ်ႈၼမ်ပၢႆႈၼီၶဝ်ႈမိူင်းထႆး- ၵူၼ်းၼႂ်းပိုၼ်ႉတီႈလၢတ်ႈ။

ၸၢႆးဢၢႆႈၼႃႉ ၵူၼ်းမိူင်းၵိုင် လၢတ်ႈဝႃႈ- “တၢင်ႇပွၵ်ႉတႄႉဢမ်ႇႁူႉ။ ၼႂ်းဝဵင်းႁဝ်းၶႃႈၸဵတ်းပွၵ်ႉ တင်းၼႂ်းဢိူင်ႇႁူဝ်ၼႃး ဢိူင်ႇဝၢၼ်ႈၽုၺ်း ဢိူင်ႇတူင်ႇလၢဝ်းၸိူဝ်းၼႆႉတင်းမူတ်း သၢႆမၢႆမၼ်းမီး 50 ။ ၵူၼ်းၼႂ်းပိုၼ်ႉတီႈၶဝ်ၵေႃႈ လႆႈၵႂႃႇႁူပ်ႉထူပ်းၵၼ်တင်း ၽူႈမီးပုၼ်ႈၽွၼ်းၸဝ်ႈၼႃႈတီႈ ၼႂ်းၼႃႈလိၼ်မၢႆ 9 ၶွင် RCSS/SSA ။ ႁွင်ႉႁူပ်ႉၵၼ်တီႈၵျွင်း/ဝတ်ႉမုၼ်ၸဝ်ႈ ဝၢၼ်ႈၽုၺ်းသေယဝ်ႉ ၵူၼ်းဝၢၼ်ႈၼႂ်းဢိူင်ႇၵေႃႈ ဢွၼ်ၵၼ်တုၵ်းယွၼ်း ႁႂ်ႈပူၼ်းပွႆႇၽႃႈပၼ်(တွင်းပၢၼ်ႇ)၊ ၵူၺ်းၵႃႈ ဢမ်ႇလႆႈ၊ ၸဝ်ႈၼႃႈတီႈၶဝ်ဝႃႈ ၵူၼ်းၸိူဝ်းပႃးၼႂ်းသဵၼ်ႈမၢႆတင်းသဵင်ႈ တေလႆႈမႃးႁၢပ်ႇၵိုတ်ႉၵၢၼ်သိုၵ်း၊ ဢမ်ႇမႃးဢမ်ႇလႆႈ၊ ႁဝ်းၶႃႈၵေႃႈဢမ်ႇၸၢင်ႈႁဵတ်းႁိုဝ်။ ၵမ်ႈၽွင်ႈ ပေႃးမီးငိုၼ်းတႄႉ ပိူၼ်ႈၵေႃႈၸၢင်ႈၵူၼ်းသေ ၵႂႃႇႁၢပ်ႇၵၢၼ်သိုၵ်းပၼ်- ဝႃႈၼႆ။

သင်ၶၵွၼ်းဝတ်ႉ ၼႂ်းပိုၼ်ႉတီႈ ဢမ်ႇၶႂ်ႈဢွၵ်ႇၸိုဝ်ႈၸဝ်ႈၼိုင်ႈ လၢတ်ႈဝႃႈ- ႁဵတ်းၵၢၼ်ၸိူဝ်ႉၸၢတ်ႈဢၼ်ဝႃႈၼႆႉ မၼ်းတေလႆႈဢွၼ်ၵၼ်ႁူမ်ႈမိုဝ်းၵၼ်သေ သႂ်ႇၸႂ်သႂ်ႇႁႅင်း ပႃးၸႂ်ပႃးၶေႃးသေႁဵတ်း၊ ၵူၼ်းႁဝ်းမီးပုၼ်ႈၽွၼ်း ႁၢပ်ႇၵၢၼ်ၸိူဝ်ႉၸၢတ်ႈၵူႈၵေႃႉ၊ ၵူၺ်းၵႃႈ တဵၵ်းၶိၼ်ၸႂ်(ဢထမ်ႇမ)ၵၼ်သေႁွင်ႉၼႆႉဢမ်ႇလႆႈ။ ၼင်ႇႁိုဝ်ၵူၼ်းၼႂ်းပိုၼ်ႉတီႈ တေမီးၸႂ်ၶႂ်ႈႁဵတ်းၵၢၼ်ၸိူဝ်ႉၸၢတ်ႈမႃးၼၼ်ႉ ႁဝ်းတေလႆႈလူင်းႁူၺ်းသူၼ်းတႄႉတႄႉဝႃႈဝႃႈ။ ပေႃးဝႃႈ တဵၵ်းၶိၼ်ၸႂ် (ဢထမ်ႇမ) ၵဵပ်းဢဝ်ၸိူင်ႉၼၼ်တႄႉ လႆႈၵူၼ်းၵႂႃႇလၢႆလၢႆၵူၺ်း၊ ဢမ်ႇလႆႈပႃးမၢၵ်ႇႁူဝ်ၸႂ်လႄႈ ဢမ်ႇလႆႈပႃးလွင်ႈၵမ်ႉယၼ်ပၼ်ႁႅင်း တီႈၵူၼ်းႁိူၼ်းမၼ်းၼႆတႄႉ ဢၼ်ဝႃႈၶၢဝ်းတၢင်းယိူင်းမၢႆ ၵၢၼ်ၸိူဝ်ႉၸၢတ်ႈ ဢၼ်မီးဝႆႉပဵၼ်လၵ်းယိူင်းဢၢၼ်းၼၼ်ႉ တေဢမ်ႇႁွတ်ႈလႆႈသေပွၵ်ႈ။ ႁဵတ်းၵၢၼ်သင်ၵေႃႈယဝ်ႉ ၶႂ်ႈႁႂ်ႈဢဝ်ၸႂ်မဵတ်ႉတႃႇၼမ်းၼႃႈသေႁဵတ်းၵႂႃႇ- ဝႃႈၼႆ။

ၵဵဝ်ႇၵပ်းလွင်ႈ တပ်ႉသိုၵ်းၸိုင်ႈတႆး ၵဵပ်းသိုၵ်းၼႂ်းၸႄႈဝဵင်းမိူင်းၵိုင်ၼႆႉသေ ႁူဝ်ပဝ်ႈၾၢႆႇၽွင်းငမ်း ၼႂ်းၸႄႈဝဵင်းမိူင်းၵိုင် ၸၢႆးလူင် တင်းမူႇၸုမ်းၵူၼ်းမိူင်းၵိုင်ၵမ်ႈၽွင်ႈ လႆႈႁူပ်ႉၵၼ်တင်း ၸဝ်ႈပွင်ၶိူဝ်း ဢၼ်ပဵၼ်ၽူႈၼမ်း ၾၢႆႇဢုပ်ႇၵုမ်လွင်ႈငမ်းယဵၼ် RCSS/SSA မိူဝ်ႈဝၼ်းတီႈ 15/02/2015  သေ တၢင်ႇၼႄ ၸဝ်ႈပွင်ၶိူဝ်း လွင်ႈၵဵပ်းသိုၵ်းၼႆႉ။

ၵဵဝ်ႇၵပ်းလွင်ႈၼႆႉ ၸဝ်ႈပွင်ၶိူဝ်း ၶိုၼ်းလၢတ်ႈတီႈၵူၼ်းမိူင်းဝႃႈ- ဢၼ်မႃးတဵၵ်းငႅၼ်ႉၵဵပ်းသိုၵ်းၼႆႉ ဢမ်ႇၸႂ်ႈတၢင်းၼိူဝ်ဢွၵ်ႇၶေႃႈၸီႉသင်ႇလူင်းမႃး၊ တီႈငဝ်ႈငုၼ်း RCSS/SSA ဢမ်ႇမီးပေႃႇလသီႇ တႃႇတေတဵၵ်းၶိၼ်ၵဵပ်းသိုၵ်း တီႈၵူၼ်းမိူင်းၸိူင်ႉၼႆ၊ လွင်ႈၼႆႉ ၸၢင်ႈပဵၼ်လွင်ႈၶဝ်ႈၸႂ်ၵၼ်ပိူင်ႈဝႆႉသေတီႈတီႈယူဝ်ႉ၊ ႁဝ်းၶႃႈတေဢဝ်ပုၼ်ႈၽွၼ်း ၵူတ်ႇထတ်းတူၺ်းၵႂႃႇ- ဝႃႈၼႆ။

ၸွမ်သိုၵ်းယွတ်ႈသိုၵ်း ၵေႃႈယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ၵူၼ်းမိူင်းတႆး ဢၼ်ဢႃႇယုတဵမ် 18 ၵူႈၵေႃႉ တေလႆႈမေႃၵၢၼ်သိုၵ်းၼႆတႄႉ မီးပေႃႇလသီႇဝႆႉၸိူင်ႉၼၼ်ယူႇ၊ ၼင်ႇႁိုဝ်တေၸႂ်ႉလႆႈၵူၼ်းၸိူဝ်းဢႃႇယုတဵမ် 18 ၼၼ်ႉ ႁွင်ႉမႃးသေမႃးၾိုၵ်းသွၼ်ပၼ်ၵၢၼ်သိုၵ်း ၶၢဝ်းပွတ်းတႄႉမီးယူႇ၊ ပေႃးဝႃႈၾိုၵ်းၵၢၼ်သိုၵ်းယဝ်ႉယဝ်ႉ ၶိုၼ်းသူင်ႇမိူဝ်းႁိူၼ်းသေ ႁႂ်ႈမိူဝ်းၸွႆႈၵၢၼ်ပေႃႈမႄႈၵူၼ်းႁိူၼ်းၶိုၼ်း၊ သင်ၸိူဝ်ႉဝႃႈ ၶႂ်ႈသိုပ်ႇယူႇၼႂ်းသိုၵ်း ၶႂ်ႈႁၢပ်ႇၵိုတ်ႉၵၢၼ်သိုၵ်းၵႂႃႇၵေႃႈလႆႈ။ ဢၼ်လႆႈႁွင်ႉမႃးၼႆႉ လႆႈလူင်းၼႂ်းပိုၼ်ႉတီႈသေ ႁူပ်ႉထူပ်းပေႃႈမႄႈၵူၼ်းမိူင်းယဝ်ႉ ႁွင်ႉမႃးၸိူင်ႉၼႆၵူၺ်း။ ဢၼ်ဝႃႈတဵၵ်းငႅၼ်ႉၵႅၼ်ႉၶေႃး (ဢထမ်ႇမ)ၵဵပ်းဢဝ် ဢမ်ႇမႃးဢမ်ႇလႆႈၼႆၸိူဝ်းၼႆႉတႄႉ ပေႃႇလသီႇမၼ်းၵေႃႈဢမ်ႇမီး၊ ႁဵတ်းၵေႃႈဢမ်ႇလႆႈႁဵတ်း၊ ဢမ်ႇလႆႈၸီႉသင်ႇ။ ဢၼ်ပဵၼ်ယူႇမိူဝ်ႈလဵဝ်ၼႆႉတႄႉ ႁဵတ်းႁိုဝ်ၵေႃႈ တေပိူင်ႈၵၼ်သေတီႈတီႈယဝ်ႉ၊ လွင်ႈၼႆႉ တေလႆႈၵူတ်ႇထတ်းတူၺ်း၊ သင်ဝႃႈမီးၵေႃႉဢၼ်ပူၼ်ႉပႅၼ်ၶေႃႈၸီႉသင်ႇတၢင်းၼိူဝ်ၼႆတႄႉ တေလႆႈပၼ်တူတ်ႈ(တၢမ်ႇ)တၢင်းၽိတ်း ၵေႃႉဢၼ်ပူၼ်ႉပႅၼ်ၼၼ်ႉယဝ်ႉ၊ ႁဝ်းတေလႆႈႁွင်ႉၵူတ်ႇထတ်းတူၺ်းသေ တေပၼ်တူတ်ႈ(တၢမ်ႇ)- ဝႃႈၼႆ။

ႁူဝ်ပဝ်ႈလူင် RCSS/SSA ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈ RCSS/SSA သေ လႆႈၶဝ်ႈႁူမ်ႈပၢင်ပွႆး ဝၼ်းမိူင်းႁူမ်ႈတုမ် ဢၼ်ၸတ်းႁဵတ်းတီႈၼေႇပျီႇတေႃႇ၊ လႆႈလူင်းလၢႆးမိုဝ်း တႃႇၵမ်ႉၵႅမ်လွင်ႈငမ်းယဵၼ်သေ လႆႈႁူပ်ႉထူပ်းပႃးၵူၼ်းမိူင်း၊ ယၢမ်းလဵဝ်ၵေႃႈ တိုၵ်ႉမီးယူႇၼႂ်းၸိုင်ႈတႆး။

ဢၼ်ၸုမ်းၶၢဝ်ႇၽူႈတွႆႇႁွၵ်ႈ ပႆႇယိုၼ်ယၼ်လႆႈတႄႉ လႆႈငိၼ်းၶၢဝ်ႇၼႂ်းပိုၼ်ႉတီႈလၢတ်ႈဝႃႈ- ၸွမ်သိုၵ်းယွတ်ႈသိုၵ်း တေဢႅဝ်ႇလဵပ်ႈႁဵၼ်းတူၺ်းၼႂ်း ၸႄႈတွၼ်ႈတူၼ်ႈတီးသေ ထႅင်ႈ 1-2 ဝၼ်း တေလူင်းပိုၼ်ႉတီႈႁူပ်ႉထူပ်းၵူၼ်းမိူင်း ၼႂ်းၸႄႈတွၼ်ႈလွႆလႅမ် ပၢင်လူင်ၸိူဝ်းၼႆႉ- ၼႆယဝ်ႉ။