ၽူႈၵိူဝ်းၵုမ် ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸဝ်ႈပိုၼ်ၶမ်း တွပ်ႇလၢတ်ႈလွင်ႈ ၸဝ်ႈယွတ်ႈသိုၵ်း ႁူပ်ႉထူပ်းၵူၼ်းမိူင်း၊ ႁူဝ်ပဝ်ႈၸုမ်းပဢူဝ်း ဢွင်ႇၶမ်းထီႇဝႃႈ တေႁူမ်ႈၸုမ်းတႆး ပူၵ်းပွင်ၸိုင်ႈမိူင်းႁူမ်ႈတုမ် ဢမ်ႇၼၼ် ၸႄႈမိူင်းတႆး။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတိတ်းတေႃႇတွင်ႈထၢမ်ဝႆႉၼင်ႇၼႆ။

Photo: Facebook

ထၢမ်-ဢၼ်ၸဝ်ႈႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸဝ်ႈယွတ်ႈသိုၵ်း ၵႂႃႇႁူပ်ႉၽူႈဢွၼ်ႁူဝ်ပဢူဝ်း ဢွင်ႇၶမ်းထီႇၼႆႉ လွင်ႈလၢၵ်ႇလၢႆးမီးသင်ၽွင်ႈ ?။

တွပ်ႇ-တင်းဢွင်ႇၶမ်းထီႇ ဢုပ်ႇၵၼ် တူၵ်းလူင်းၵၼ်ဝႃႈ- သွင်ၸုမ်းႁူမ်ႈၵၼ်သေ ဢွၼ်ၵၼ်ပူၵ်းပွင်ၸိုင်ႈမိူင်းႁူမ်ႈတုမ် ဢမ်ႇၼၼ် ၸႄႈမိူင်းတႆးၵႂႃႇ၊ တင်းသွင်ၶိူဝ်းၼႆႉ ၽႂ်ဢမ်ႇထုၵ်ႇလီၽိတ်းၵၼ် ထဵင်ၵၼ်ယဝ်ႉ။ မိူဝ်းၼႃႈမႃး သွင်ၸုမ်းၼႆႉ တေႁူမ်ႈၵၼ်သေ ၸုင်ၸၼ်ဢဝ်ၵူႈၸၢဝ်းၶိူဝ်း ႁႂ်ႈပေႃးလႆႈမႃးႁူမ်ႈၵၼ်ႁဵတ်းၵၢၼ် တႃႇမိူင်းတႆး။ ဢွင်ႇၶမ်းထီႇဝႃႈ မၼ်းႁုမ်သူင်ႁၵ်ႉ (ၵျိူၵ်ႈ) လွင်ႈၵတ်းယဵၼ်ၵူၺ်း၊ ပေႃးဝႃႈ ႁူဝ်ပဝ်ႈ RCSS ဢဝ်လွင်ႈၵတ်းယဵၼ်ၵေႃႈ မၼ်းၸူမ်းယဝ်ႉ၊ မၼ်းၸဝ်ႈၸူမ်းၸွမ်းတႄႉတႄႉ ဢၼ်လႆႈလူင်းလၢႆးမိုဝ်းၵမ်းၼႆႉ ဝႃႈၼႆ။

ဢွၼ်တၢင်းၼႆႉ လူင်းလၢႆးမိုဝ်းၼႆသေတႃႉ ၵွပ်ႈပိူဝ်ႈပႆႇလူင်းထိုင်ၸၼ်ႉၼႆႉလႄႈ ဢမ်ႇႁတ်းႁူပ်ႉထူပ်းတႄႉတႄႉ။ မိူဝ်ႈလဵဝ်တႄႉ တႅၵ်ႇတႅၵ်ႇလႅင်းလႅင်းယဝ်ႉ၊ ႁဝ်းၵေႃႈပိုၼ်ၽၢဝ်ႇဝႃႈ တေႁူမ်ႈမိုဝ်းၸဝ်ႈၶဝ်သေ ႁဵတ်းၵၢၼ်တႃႇမိူင်းတႆးၵႂႃႇယဝ်ႉ။ ၵွပ်ႈပိူဝ်ႈၼႆလႄႈ ၵူၼ်းဝၢၼ်ႈၵူၼ်းမိူင်းတႄႉ ပဢူဝ်းလႄႈတႆးၼႆၵေႃႈ ႁႂ်ႈယူႇၵႂႃႇမိူၼ်ပၵ်းၵဝ်ႇပိူင်ၵဝ်ႇ၊ ဢၼ်ပဵၼ်မူႇၸုမ်းႁဝ်းၼႆၵေႃႈ ႁူမ်ႈၵၼ်ႁဵတ်းၵၢၼ်။ ပေႃးဝႃႈၼႂ်းပိုၼ်ႉတီႈပဢူဝ်းၼႆၵေႃႈ ဢၼ်တႆးမီးၼၼ်ႉ ပေႃးဝႃႈယုၵ်ႉယွင်ႈၾိင်ႈငႄႈတႆးၵေႃႈ ပၼ်ႁႅင်းပဢူဝ်း၊ ပဢူဝ်းၵေႃႈ ပေႃးယုၵ်ႉယွင်ႈၾိင်ႈငႄႈပဢူဝ်း ႁႂ်ႈပၼ်ႁႅင်းတႆးပႃးၸွမ်း၊ မိူၼ်ပၵ်းၵဝ်ႇပိူင်လင်- ဢုပ်ႇၵၼ်ၵႂႃႇၼင်ႇၼႆ။

ထၢမ်-ၸဝ်ႈႁူဝ်ပဝ်ႈ (RCSS) သမ်ႉဝႃႈႁိုဝ်ၶႃႈ ?။

တွပ်ႇ-ၸဝ်ႈႁူဝ်ပဝ်ႈၵေႃႈဝႃႈ ႁဝ်းၶႃႈထုၵ်ႇလႆႈႁူမ်ႈၵၼ် တင်ႈႁူင်းႁဵၼ်းၸၼ်ႉၸွမ် ၼႂ်းပိုၼ်ႉတီႈၽွင်းငမ်းတူဝ်ၵဝ်ႇပဢူဝ်းၼႆႉ၊ ႁႂ်ႈႁဵၼ်းသွၼ်ပႃးလိၵ်ႈတႆး လိၵ်ႈပဢူဝ်းၸွမ်း။ ႁဝ်းထုၵ်ႇလလီမီးပိုၼ်ႉတီႈ တီႈၼိုင်ႈ။ ပႃးတင်းၽူႈၵွၼ်း ၼႃႈလိၼ်ၽွင်းငမ်းတူဝ်ၵဝ်ႇပဢူဝ်း ၶုၼ်ႇၸၢၼ်ႇလုၼ်ႇ၊ မၼ်းၵေႃႈၼုင်ႈၶူဝ်းတႆး၊ ၸဝ်ႈႁူဝ်ပဝ်ႈၵေႃႈၼုင်ႈၶူဝ်းပဢူဝ်းသေ ၵႂႃႇၸွမ်းၵၼ်။

Photo: Facebook

ထၢမ်- မိူဝ်ႈဝႃး (16/02/2015) ၶဝ်ႁူပ်ႉၵၼ်တီႈလႂ်၊ ဢွၼ်ၵၼ်ၵႂႃႇတီႈလႂ်ၽွင်ႈၶႃႈ ?။

တွပ်ႇ- တီႈၵျွင်း/ဝတ်ႉၵျွၵ်ႉတလူင်း၊ တီႈႁိူၼ်းဢွင်ႇၶမ်းထီႇ ၵမ်းလဵဝ်။ ဢွင်ႇၶမ်းထီႇ ႁပ်ႉလဵင်ႉၶဝ်ႈဝၼ်း။ မိူဝ်ႈဝႃးၼႆႉ ၵႂႃႇတီႈၵၢတ်ႇၵူႇ၊ ၵျွၵ်ႉတလူင်းသေ ပူၼ်ႉမႃးဝၢၼ်ႈၼွင်။ တီႈဝၢၼ်ႈၼွင်ၼႆႉ မီးပႃးပီႈၼွင်ႉတႆး တင်းပီႈၼွင်ႉပဢူဝ်း၊ တီႈဝၢၼ်ႈၵျွၵ်ႉတလူင်းၵေႃႈ မီးတႆး တင်းပဢူဝ်း၊ ပေႃးလၢတ်ႈၵႂၢမ်းတႆး ၵေႃႈလႆႈမီးလၢမ်ႈ/ ပိၼ်ႇၽႃသႃ။ သမ်ႉမႃးထႅင်ႈ တၢင်းၼွၵ်ႈၼႆႉ ပဵၼ်ဝၢၼ်ႈယဵၼ်ႇ၊ တီႈၼၼ်ႈၵူၼ်းၼမ်တႄႉတႄႉ ပဵၼ်တႆးလွၼ်ႉလွၼ်ႉ၊ ၶဝ်ၵေႃႈၸွမ်းသူင်ႇၵႂႃႇၵူႈတီႈ၊ ၵူၺ်းၵႃႈ မၼ်းၶမ်ႈယဝ်ႉလႄႈ ထိုင်ဝၢၼ်ႈယဵၼ်ႇၵူၺ်း။

ထၢမ်- ဢၼ်သိူဝ်ၽိူၵ်ႇၸတ်း ပၢင်ၵုမ်ၸၢဝ်းၶိူဝ်းမိူင်းတႆး (သျႅၼ်းပျီႇတၢႆးယိၼ်းတႃး ၺီႇလႃႇၶၢၼ်ႇ) တီႈတူၼ်ႈတီးမိူဝ်ႈၼႆႉ ၶႃႈလူး၊ ၸွင်ႇၸဝ်ႈႁူဝ်ပဝ်ႈ ၵႂႃႇၶဝ်ႈႁူမ်ႈၶႃႈႁႃႉ ?။

တွပ်ႇ-ဢမ်ႇၵႂႃႇ။ ၶဝ်ၸိူၼ်းဝွၵ်ႇ မိူဝ်ႈဝၼ်းပိုတ်ႇ ဝၼ်းဢွၼ်တၢင်းသုတ်းၼၼ်ႉၵူၺ်း၊ ႁူဝ်ပဝ်ႈၵေႃႈ ၵႂႃႇလၢတ်ႈၶေႃႈၵႂၢမ်းၵူၺ်း။

ထၢမ်-ၶပ်းမၢႆမိူဝ်ႈၽုၵ်ႈၼႆႉလူး၊ မီးသင်ထႅင်ႈၶႃႈ ?။

တွပ်ႇ-မိူဝ်ႈၽုၵ်ႈၼႆႉ ပီႈၼွင်ႉပဢူဝ်းတေမႃးဢွၼ်ၵႂႃႇတၢင်းၼႂ်းၼွင်ႁၢႆးယႃႈ(ၼွင်ဢၢင်းလေး) ယဝ်ႉၵေႃႈ ၵႂႃႇတၢင်းပၢင်လွင်း ၵႂႃႇသီႇၵိပ်ႇ။ မိူဝ်ႈႁိုဝ်း ဝၼ်းတီႈ 19/02/2015 သမ်ႉတေၵႂႃႇပၢင်လူင်၊ ၼၼ်ႉၵေႃႈ ၶဝ်ၸဝ်ႈတေမႃးဢွၼ်ၵႂႃႇ၊ ၸုမ်းပဢူဝ်းၵေႃႈတေၵႂႃႇၸွမ်း၊ တေၵႂႃႇတီႈဝတ်ႉ/ၵျွင်းပိတၵၢတ်ႈ၊ ၵႂႃႇႁူပ်ႉထူပ်းတႆးၵူႈတီႈတီႈထႅင်ႈ။ ဢဵၼ်းဢၢၼ်းတႄႉ တႃႇႁႁူပ်ႉၸုမ်းၵၢၼ်မိူင်း လႄႈ ၵူၼ်းထဝ်ႈၵူၼ်းၵႄႇၸိူဝ်းႁၵ်ႉၸၢတ်ႈ ၸိူဝ်းၼၼ်ႉ၊ ၵူၺ်းၵႃႈ ပေႃးထွမ်ႇၶဝ်လၢတ်ႈတႄႉ တေမႃးၼမ်ၼမ်မိူၼ်ၵမ်းပူၼ်ႉထႅင်ႈယဝ်ႉ၊ ၵူၼ်းဝၢၼ်ႈၵေႃႈ ၶႂ်ႈမႃးဢုပ်ႇမႃးလၢတ်ႈလၢႆလွင်ႈလၢႆပိူင် ၸိူဝ်းၼၼ်ႉ။

ထၢမ်- လွင်ႈဢၼ်ၶဝ်ၶႂ်ႈယွၼ်းတွင်ႇၵျီး (တူၼ်ႈတီး)၊ လွင်ႈဢၼ်ၶဝ်ၶႂ်ႈတႄႇတင်ႈၸႄႈမိူင်းပဢူဝ်းၸိူဝ်းၼႆႉ ၸွင်ႇၶဝ်တူၵ်ႇပႃး ?။

တွပ်ႇ-ၼၼ်ႉတႄႉၶဝ်ဝႃႈ ပဵၼ်ၸုမ်းၶုၼ်ႇမိၼ်ႉထုၼ်းၶဝ် ၶုၼ်ႇဢူၵ်ႉၵႃႇၶဝ်ၵူၺ်း၊ မၼ်းဢမ်ႇၵဵဝ်ႇၶွင်ႈၵၼ်တင်းၸုမ်းႁဝ်း။ ဢၼ်ယွၼ်းၸႄႈမိူင်းၼႆႉ ဢဝ်ၵဵဝ်ႇၶွင်ႈၵၼ်တင်းၶဝ်ၸဝ်ႈ။ ပဢူဝ်းတႄႉတိုၼ်းဝႃႈ တႆးတင်းႁဝ်းၼႆႉ တိုၼ်းထုၵ်ႇလႆႈယူႇၵႂႃႇၸွမ်းၵၼ်။ ႁဝ်းယင်းႁၼ် တူဝ်ဢွင်ႇၶမ်းထီႇလၢတ်ႈဝႃႈ တႃႇတေဢွၼ်ႁူဝ်ၸိူဝ်ႉၸၢတ်ႈမိူင်းတႆးၵႂႃႇၼႆႉ ႁဝ်းႁၼ်ထိုင်ၸဝ်ႈၼွင်ႉၵူၺ်း၊ ဝႃႈၼႆႁင်းတီႈႁူဝ်ပဝ်ႈ။ ၵွပ်ႈပိူဝ်ႈဝႃႈ ဢူၼ်ႈဢွၼ်ႇၵူႈပိူင်၊ မိူၼ်ၼင်ႇၽူႈဢွၼ်ႁူဝ်ၵူႈပွၵ်ႈၼႆႉ မၼ်းၶႅင်သႂ်ႇၵၼ်။ ၵွပ်ႈၼႆ ပေႃးၸဝ်ႈၼွင်ႉမႃးဢွၼ်ႁူဝ်တႄႉ ႁဝ်းၵေႃႈႁၼ်လီ၊ ႁဝ်းၶဝ်ၸိူဝ်းၼႆႉ ထုၵ်ႇလီဢွၼ်ၵၼ်ႁူမ်ႈမိုဝ်းသေ ႁဵတ်းသၢင်ႈၸွမ်းၵၼ်ၵႂႃႇ၊ ၼင်ႇႁိုဝ် ၵူႈၸၢဝ်းၶိူဝ်းတေပႃးမႃးၼၼ်ႉ ႁဝ်းၵေႃႈတေၶတ်းၸႂ်၊ လွင်ႈၼႆႉ ဢွင်ႇၶမ်းထီႇၵေႃႈလၢတ်ႈ။ ပေႃးတႃႇၸုမ်း PNO တႄႉ ငဝ်းလၢႆးလီယူႇ၊ မီးၸုမ်း PNLO တႄႉယင်းတိုၵ်ႉၶႅင်ယူႇ။

ထၢမ်-ၸွင်ႇၸဝ်ႈပိုၼ်ၶမ်း ၶႂ်ႈလၢတ်ႈသင်ထႅင်ႈၶႃႈ ?။

တွပ်ႇ- မိူဝ်ႈၼႆႉပွတ်းၼႂ် ႁူပ်ႉထူပ်းၵူၼ်းၼႂ်းတူၼ်ႈတီး၊ ႁူပ်ႉထူပ်းၵူၼ်းၵၢၼ်မိူင်းၵဝ်ႇ ပႃႊတီႊႁူဝ်သိူဝ်၊ ပႃႊတီႊသိူဝ်ၽိူၵ်ႇ၊ ၽူႈႁၵ်ႉၸၢတ်ႈ၊ ၵူၼ်းၾၢႆႇမၢႆမီႈၸိူဝ်းၼႆႉ။ ၼၼ်ႉတႄႉ လၢတ်ႈၼႄလွင်ႈ ဢၼ်လႆႈၵေႃႇတင်ႈ CSSU ။ ဢၢၼ်းဢဝ် CSSU ၼႆႉ ပဵၼ်ၽူႈတၢင်တူဝ်ၵူၼ်းမိူင်းတႆးသေ ၵႂႃႇဢုပ်ႇၵၢၼ်မိူင်း ဢၼ်တေမီးမႃးၼႆႉ။ တေပဵၼ်ၸိူင်ႉႁိုဝ်ပႆႇႁူႉ၊ ၶႂ်ႈလႆႈတၢင်းႁၼ်ထိုင် တီႈၵူၼ်းတင်းၼမ်၊ ထုၵ်ႇလႆႈဝူၼ်ႉမႄးၸိူင်ႉႁိုဝ်၊ ၸၢင်ႈပဵၼ်ၸိူင်ႉႁိုဝ် ၸိူဝ်းၼႆႉ။ ၵမ်ႈၽွင်ႈၵေႃႈ ပၼ်တၢင်းႁၼ်ထိုင် ထုၵ်ႇလႆႈပႃးၸၢဝ်းၶိူဝ်း။

ၸဝ်ႈႁူဝ်ပဝ်ႈၵေႃႈဝႃႈ ထုၵ်ႇပႃးၸၢဝ်းၶိူဝ်းယူႇ၊ မိူဝ်ႈလဵဝ် မီးတႆးၵူၺ်း။ ပေႃးဝႃႈ ဝၼ်းတီႈ 25-26 ၼႆႉ ပေႃးပၢင်ၵုမ်ႁဝ်းယဝ်ႉ လိူၼ်မေႊၸိူဝ်းၼႆႉ ႁဝ်းတေၸၢင်ႈႁဵတ်းပၢင်ၵုမ်ၸၢဝ်းၶိူဝ်း ၼႂ်းမိူင်း၊ ပေႃးႁဵတ်းထႅင်ႈပွၵ်ႈၼိုင်ႈ ယိူင်းဢၢၼ်းဝႆႉတေႁဵတ်းၼႂ်းမိူင်း။ ပေႃးဝႃႈႁဵတ်းၼႂ်းမိူင်း တေပႃးၸၢဝ်းၶိူဝ်းမႃး၊ ဢွင်ႇၶမ်းထီႇၶဝ်ၵေႃႈ တေဢဝ်ပုၼ်ႈၽွၼ်းၸွႆႈသူၼ်းပၼ်ၽွင်ႈ။ ပေႃးထိုင်ၶၢဝ်းၼၼ်ႉမႃး ႁဝ်းၵေႃႈတေၸၢင်ႈတင်ႈလႆႈ ၸုမ်းဢွၼ်ႁူဝ်၊ ၸုမ်းဢွၼ်ႁူဝ်ဢၼ်ဝႃႈၼႆႉ ပဵၼ်ၵူၼ်းယိပ်းပေႃႇလသီႇ။ မိူၼ်ၼင်ႇၼႂ်း CSSU မိူဝ်ႈလဵဝ်ၼႆႉ သွင်ပႃႊတီႊ သွင်တပ်ႉသိုၵ်း ပဵၼ်ၵူၼ်းယိပ်းပေႃႇလသီႇ။ မိူဝ်းၼႃႈမႃး ၼင်ႇႁိုဝ်တေၼမ်ထႅင်ႈ၊ ၼင်ႇႁိုဝ်တေမီးၵူၼ်းပၼ်တၢင်းႁၼ်ထိုင် မႃးထႅင်ႈ၊ ပေႃးဝႃႈမီးဢၼ်ၼႆႉထႅင်ႈ ႁဝ်းၵေႃႈၸင်ႇၸၢင်ႈၵႂႃႇလႆႈလီလီ။

ၽႂ်ၵေႃႈဝႃႈ ဢၼ်မႃးဢုပ်ႇၵၼ် လႆႈမႃးႁူမ်ႈၵၼ်လႆႈၼႆႉ မီး CSSU ၼႆႉယဝ်ႉ၊ ႁဝ်းထုၵ်ႇလႆႈ ၵမ်ႉထႅမ် CSSU ၵႂႃႇ၊ ဢၼ်ဝႃႈၼႆတႄႉမီးၵမ်ႈၼမ်၊ ၵူၺ်းၵႃႈ ၵူၼ်းပၼ်တၢင်းႁၼ်ထိုင် ထုၵ်ႇလႆႈႁဵတ်းၼၼ်ႁဵတ်းၼႆတႄႉ ပႆႇပေႃးမီး၊ ၶဝ်ၵေႃႈပႆႇႁတ်းပၼ်တၢင်းႁၼ်ထိုင်ယူဝ်ႉ၊ တိုၵ်ႉၵူဝ်ယူႇႁိုဝ်၊ ၵမ်ႈၽွင်ႈတႄႉဝႃႈ 17/1 ယင်းပႆႇထွၼ်ဢွၵ်ႇ)၊ ၸဝ်ႈၶဝ်ထုၵ်ႇလႆႈတုၵ်းယွၼ်းထွၼ်ဢွၵ်ႇ။ ၵမ်ႈၽွင်ႈၵေႃႈဝႃႈ မၼ်းမိူၼ်တင်းလႆႈယဝ်ႉ၊ ၵူၺ်းၵႃႈ ၼႂ်းမၢႆမီႈသမ်ႉမီးယူႇလႄႈ ၶဝ်ၵေႃႈသမ်ႉၶႂ်ႈၵူဝ်ယူႇ။

ထၢမ်-ဢၼ်ႁူပ်ႉမိူဝ်ႈၼႆႉ ပဵၼ်တီႈလႂ်ၶႃႈ ?။

တွပ်ႇ-တီႈႁူင်းႁေႃၼႂ်းႁူင်းႁႅမ်းတူၼ်ႈတီး (တွင်ႇၵျီးႁူဝ်ႊတႄႊလ်)၊ မီးၵူၼ်းမွၵ်ႈ 30 ။