ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS) ဝႃႈ- ၶႂ်ႈႁႂ်ႈ ၵေႃလိၵ်ႈလၢႆးလႄႈၾိင်ႈငႄႈ လႆႈႁဵတ်းၵၢၼ် လွတ်ႈလွတ်ႈလႅဝ်းလႅဝ်း၊ ဢမ်ႇတၢပ်ႈၵမ်ႉယၼ် ၸွႆႈထႅမ်ၵၢၼ်မိူင်း၊ ႁႂ်ႈၽုၵ်ႇၾင်ပၼ်ၵူၼ်းၼုမ်ႇ ၸုပ်ႈသႅၼ်းမႂ်ႇ ႁၵ်ႉၸိူဝ်ႉၶိူဝ်း။

ႁူဝ်ပဝ်ႈလူင် RCSS/SSA ၸဝ်ႈယွတ်ႈသိုၵ်း

ပူၼ်ႉမႃးမိူဝ်ႈဝၼ်းဢႃးတိတ်ႉတီႈ 22/02/2015 ဢိင်ၼိူဝ်ၸုမ်းၶၢဝ်ႇၽူႈတွႆႇႁွၵ်ႈ ၶဝ်ႈႁူပ်ႉထူပ်းတွင်ႈထၢမ်သေ ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း လၢတ်ႈဝႃႈ- ၵေႃလိၵ်ႈလၢႆးလႄႈ ၾိင်ႈငႄႈၼႆႉ ထုၵ်ႇလႆႈႁဵတ်းၵၢၼ်လွတ်ႈလႅဝ်းတႃႇၶဝ်၊ ဢမ်ႇတၢပ်ႈၶဝ်ႈမႃးၸွႆႈၵၢၼ် ၼႂ်းပႃႊတီႊၵၢၼ်မိူင်း၊ ၼႂ်းၵေႃပွင်ၵၢၼ်ၸိူဝ်ႉၸၢတ်ႈၸိုင်ႈတႆး ၵွပ်ႈဝႃႈ မၼ်းၵဵဝ်ႇၵၢၼ်မိူင်း။ ယူႇၼွၵ်ႈမၼ်းသေၵမ်ႉထႅမ်ၵေႃႈလႆႈ၊ သင်ဝႃႈ ၶႂ်ႈၶဝ်ႈမႃးၼႆၵေႃႈ လႆႈယူႇ။ သုၼ်ႇတူဝ်ၵေႃႈလႆႈ မုၵ်ႉၸုမ်းၵေႃႈလႆႈ။ ၵေႃႈလိၵ်ႈလၢႆးလႄႈၾိင်ႈငႄႈၼႆႉ ၶႂ်ႈႁႂ်ႈၶဝ်တူင်ႉၼိုင်တူင်ႇဝူင်းၵူၼ်းလွတ်ႈလွတ်ႈလႅဝ်းလႅဝ်း။ ပေႃးဝႃႈ ၵေႃလိၵ်ႈလၢႆးၵေႃႈတူင်ႉၼိုင်ယူႇ၊ ၵၢၼ်မိူင်းၵေႃႈတူင်ႉၼိုင်ယူႇ မၼ်းသူၼ်သၢၼ်ၵၼ်၊ ပေႃးလူႉၵေႃႈလူႉၸွမ်းၵၼ်မူတ်း- ဝႃႈၼႆ။

ၵေႃလိၵ်ႈလၢႆးလႄႈၾိင်ႈငႄႈၼႆႉ ၵႃႈပူၼ်ႉမႃး ပေႃးဝႃႈတူင်ႉၼိုင်ၵၢၼ်လိၵ်ႈလၢႆးလႄႈၾိင်ႈငႄႈၸိုင် ပေႃးမီးတိုဝ်ႉတၢင်းၵေႃႈ ၵမ်ႉၸွႆႈပၼ်လွင်ႈၸတ်းႁဵတ်းပၢင်ၵုမ်၊ ၵမ်ႉၸွႆႈပၼ် ၼင်ႇႁိုဝ်ၽူႈၼမ်း CSSU လႆႈႁူပ်ႉထူပ်းၵူၼ်းမိူင်း ၸိူဝ်းၼႆႉ။

ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်း သိုပ်ႇလၢတ်ႈဝႃႈ- ဢမ်ႇတၢပ်ႈၸွႆႈသၢင်ႈပၼ်သင်။ ၸုမ်းၵေႃလိၵ်ႈလၢႆးလႄႈၾိင်ႈငႄႈၼႆႉ ထုၵ်ႇလႆႈႁဵတ်းၵႂႃႇ ၼႃႈၵၢၼ်ၵေႃလိၵ်ႈလၢႆးလႄႈၾိင်ႈငႄႈၶွင်ၶဝ် လွတ်ႈလွတ်ႈလႅဝ်းလႅဝ်းၵူၺ်း။ ၵေႃလိၵ်ႈလၢႆးၼႆႉ တႃႇတေၽုၵ်ႇၾင်ႁႂ်ႈၵူၼ်းၸုပ်ႈသႅၼ်းမႂ်ႇၶဝ် ႁႂ်ႈပေႃးမီးၸႂ်ႁၵ်ႉၶိူဝ်းၸိူဝ်းၼၼ်ႉ ၶဝ်ႁဵတ်းၵႂႃႇလႆႈမူတ်း။ လွင်ႈသၢင်ႈပၢင်ၵုမ်ၼႆႉ ဢမ်ႇတၢပ်ႈသၢင်ႈပၼ်၊ ၵူၼ်းႁဵတ်းၵၢၼ်မိူင်းၶဝ် မီးပုၼ်ႈၽွၼ်းၵေႃႉလဵဝ်ၶဝ်- ဝႃႈၼႆ။