တီႈၼႂ်းၸိုင်ႈတႆးပွတ်းႁွင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းၸၢဝ်းၶိူဝ်း၊ ၼႂ်းဝၼ်းလဵဝ်ၵူၺ်း တပ်ႉသိုၵ်းမၢၼ်ႈ ထုၵ်ႇမူၵ်းငွႆးယိုဝ်း သၢမ်ပွၵ်ႈ။

TNLA photo:internet

ပၢင်တိုၵ်း 3 ပွၵ်ႈၼႆႉ ပဵၼ်ၼႂ်း3 ၸႄႈဝဵင်း ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇၸႄႈဝဵင်းၵူတ်ႉၶၢႆ/ လၢဝ်ႇၵၢႆး လႄႈ ၵုင်းၸၢင်ႉ (ၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ)။ တပ်ႉသိုၵ်းလူင်ပွင်ၸိုင်ႈ ဢၼ်လမ်းယိုဝ်း တပ်ႉသိုၵ်း ၸၢဝ်းၶိူဝ်းယူႇၼၼ်ႉ ၺႃးမူၵ်းငွႆးယိုဝ်းၼႆ - ၵူၼ်းၼႂ်းပိုၼ်ႉတီႈလၢတ်ႈ။

လုင်းမႃႇလႃႉ ၵူၼ်းၼႂ်းပိုၼ်ႉတီႈ လၢတ်ႈၼႄဝႃႈ- ဝၼ်းတီႈ 24/02/2015 တီႈၼႂ်းၵႄႈၵၢင် တႃႈမိူင်းငႅၼ်းလႄႈ မိူင်းၸီးၼၼ်ႉ လႆႈပဵၼ်ပၢင်တိုၵ်းၵၼ်ႁိုင်ၸူဝ်ႈမိူင်းပၢႆ၊ ပၢင်တိုၵ်းတင်ႈတႄႇမွၵ်ႈယၢမ်းတဵင်ႈဝၼ်း 12 မူင်း တေႃႇထိုင်ဝၢႆးဝၼ်း 13:45 မူင်း။ ဝၢႆးဝၼ်း 3 မူင်းပၢႆ ပဵၼ်ၼႂ်းၵႄႈၵၢင် ဝၢၼ်ႈၵုင်းသႃႇလႄႈ ၼမ်ႉဝၼ်း၊ ပၢင်တိုၵ်းပွၵ်ႈၼႆႉႁိုင်မွၵ်ႈ 1 ၸူဝ်ႈမူင်း။ မိူဝ်ႈၼႆႉ (ဝၼ်းတီႈ 25) သိုၵ်းမၢၼ်ႈလေႃႈၶဝ်ႈဝၢၼ်ႈဢွၵ်ႇဝၢၼ်ႈ၊ ၸွမ်းၸိူဝ်းၼႂ်းထိူၼ်ႇၵေႃႈ သိုၵ်းမၢၼ်ႈၵႂႃႇတူင်ႉၼိုင်ၼမ်ဝႆႉ၊ ႁဵတ်းႁႂ်ႈၵူၼ်းဝၢၼ်ႈဢမ်ႇႁတ်းၵႂႃႇႁႆႈၵႂႃႇသူၼ်။ ၾၢႆႇသိုၵ်းၸၢဝ်းၶိူဝ်းၶဝ်တႄႉ ဢမ်ႇပေႃးလႆႈၵူဝ်ၵႃႈႁိုဝ်၊ ဢၼ်ၵႆႉတီႉၺွပ်းပေႃႉထုပ်ႉႁႅမ်တၢႆၼႆႉ ပဵၼ်သိုၵ်းမၢၼ်ႈၵူၺ်း- ဝႃႈၼႆ။

မိူၼ်ၼင်ႇယၢမ်းလဵဝ် တပ်ႉသိုၵ်းမၢၼ်ႈၼႆႉ ဢမ်းၼၢၸ်ႈ (ဢႃႇၼႃႇ) မီးၼႂ်းမိုဝ်းၶဝ်တဵမ်ထူၼ်ႈယဝ်ႉ၊ ၶဝ်ၶႂ်ႈႁဵတ်းသင်ၵေႃႈႁဵတ်းလူင်ၵႂႃႇတိၵ်းတိၵ်း၊ ဢၼ်ၼႆႉလီၵူဝ်တႄႉတႄႉ- လုင်းမႃႇလႃႉလၢတ်ႈ။

ၾၢႆႇပွင်ႇၶၢဝ်ႇၶွင် တပ်ႉသိုၵ်းတဢၢင်း TNLA ၵေႃႈလၢတ်ႈဝႃႈ- တီႈပၢင်တိုၵ်းမိူဝ်ႈဝႃးၼႆႉ ၾၢႆႇတပ်ႉသိုၵ်းတဢၢင်း ဢမ်ႇမီးလွင်ႈတူၵ်းသုမ်းလူႉတၢႆ။ ၾၢႆႇတပ်ႉသိုၵ်းမၢၼ်ႈတၢႆ 3 ၵေႃႉ- ဝႃႈၼႆ။

တႃႉဢၢႆႈၵျေႃႇ ၽူႈၵွၼ်းၾၢႆႇပွင်ႇၶၢဝ်ႇ TNLA လၢတ်ႈၼႄဝႃႈ- တပ်ႉသိုၵ်းမၢၼ်ႈၶဝ်ၼႆႉ တီႈဢၼ်ၶဝ်ထၢင်ႇဝႃႈ ႁဝ်းၶႃႈယူႇသဝ်းၼၼ်ႉ ၶဝ်ၵေႃႈဢဝ်ၵွင်ႈလူင်သေယိုဝ်းသႂ်ႇတိၵ်းတိၵ်း။ ဢၼ်ႁဝ်းၶႃႈ ပဵၼ်ပၢင်တိုၵ်းၵၼ် မိူဝ်ႈဝႃးၼႆႉ ပဵၼ်သၢမ်တီႈ၊ ပဵၼ်ၼႂ်းဝဵင်းလၢဝ်ႇၵၢႆး တီႈၼိုင်ႈ၊ ၽွင်းၵၢင်ဝၼ်းတင်းဝၢႆးဝၼ်းသမ်ႉ ပဵၼ်ၼႂ်းၵိင်ႇၸႄႈဝဵင်း တႃႈမိူင်းငႅၼ်း၊ ၾၢႆႇသိုၵ်းလူင်ပွင်ၸိုင်ႈမၢၼ်ႈ တၢႆ 3 ၵေႃႉ- ဝႃႈၼႆ။

ဢၼ်တပ်ႉသိုၵ်းလူင်ပွင်ၸိုင်ႈလႄႈ တပ်ႉသိုၵ်းၸၢဝ်းၶိူဝ်းၶဝ် ပဵၼ်ပၢင်တိုၵ်းၵၼ်ယူႇတိၵ်းတိၵ်းၼႆႉ မၼ်းတုမ်ႉတိူဝ်ႉပႃး ဢႃႇၼႃႇၽွင်းငမ်းဝၢၼ်ႈမိူင်းမႃးလႄႈ ယူႇတီႈလူင်ပွင်ၸိုင်ႈပိုၼ်ၽၢဝ်ႇဝႆႉ ႁႂ်ႈတပ်ႉသိုၵ်း ၽွင်းငမ်း ၼႂ်းၼႃႈလိၼ်ၵူဝ်းၵၢင်ႉ တႃႇၶၢဝ်းတၢင်း 3 လိူၼ်။

ၼႂ်းတပ်ႉသိုၵ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း  FUA (Federal Union Army) ၼႆႉ ၶွတ်ႇၽွတ်ႈဝႆႉ ပႃးတပ်ႉသိုၵ်းၸၢဝ်းၶိူဝ်း 13 ၸုမ်း။ ၼႂ်း 13 ၸုမ်းၼၼ်ႉ ပႃးတပ်ႉသိုၵ်းတဢၢင်း TNLA ၊ တပ်ႉသိုၵ်းၶၢင် KIA ၊ တပ်ႉသိုၵ်းၵူဝ်းၵၢင်ႉ MNDAA ၊ တပ်ႉသိုၵ်းၸိုင်ႈတႆး (SSPP/SSA) ၸဵမ်ၸိူဝ်းၼႆႉ။